Kodi Bukhu la Apokalipse Limbati Ciyani pa Nkhani ya Tsogolo Lanu?

1. Kodi n’cinthu ciponi cakufunika comwe wanthu an’funika kubzisankhulira okha?

NTSIKU zino pana bzinthu bziwiri bzakufunika kwene-kwene bzomwe wanthu an’funika kubzisankhulira okha. Iwo angasankhule kubvera Yahova, omwe ni Mtongi wa cirengedwe centse, ayai kukhala ku mbali ya nyamadulanthaka wace, omwe ni Sathani Dyabu. Munthu ali-wentse an’funika kusankhula mbali yace bzinese bzitani. Ndipo bzomwe angasankhule bzingacitise kuti adzatambire moyo wakusaya kumala ayai ne. (Mateu 25:31-33, 46) Pa nthawe ya citsautso cikulu wanthu an’dzaikhidwa cizindikiro cakuti adzapulumuke ayai cakuti adzapfudzidwe. — Apokalipse 7:14; 14:9-11; Zakiyeri 9:4, 6.

2. (a) Kodi mafala yomwe yali pa Ahebereu 10:35-39 yambatilimbikisa kucita ciyani? (b) Kodi bukhu la Apokalipse lingatithandize tani?

² Werengani Ahebereu 10:35-39. Penu mwasankhula kale kuthandizira utongi bwa Yahova, mwacita bwino kwene-kwene. Tsapano imwepo mukufunisisa kuthandizambo anzanu kucitambo bzibodzi-bodzibzi. Ndipo imwepo mungaphatise basa bzomwe mwapfunza mu bukhu la Apokalipse kuti muwathandize. Bukhu limweri limbafotokoza bzomwe bzin’dzacitikira anyamadulanthaka wa Yahova. Tsono limbatithandizambo kudziwa mabaibai yomwe wanthu omwe ambatumikira Yahova mwakukhulupirika an’dzatambira. Ndipopa tentsenefe tin’funika kupfunza cadidi cakufunika kwene-kwene ca m’Bibliyaci. Tikacita bzimwebzi, tin’dzakhala na mphanvu ya kupitiriza kutumikira Yahova. Ndipo cinango n’cakuti, tin’dzakwanisa kuphatisa basa bzomwe tikupfunzabzo kuti tithandize wanthu winango kusankhula kukhala ku mbali ya Umambo bwa Mulungu na kupitiriza kumutumikira.

3. Kodi mu nkhani ino tin’tawira mibvunzo iponi?

³ Mu nkhani ino, tin’tawira mibvunzo iyi: Kodi wanthu omwe ambathandizira utongi bwa Mulungu an’dzatambira mabaibai yaponi? N’ciyani cin’dzacitikira wanthu omwe ambathandizira cirombo cifuira cakufotokozedwa m’bukhu la Apokalipse?

N’CIYANI CIN’DZACITIKIRA ATUMIKI WA YAHOVA?

4. Kodi Juwau adawona mbani omwe akhana Jezu kudzulu?

⁴ Mpostolo Juwau adawona m’masomphenya magulu mawiri ya wanthu omwe mbakukhulupirika ku utongi bwa Mulungu ndipo adatambira bzisimbo bza moyo wakusaya kumala. Gulu lakuyamba likhana wanthu wakukwana 144 000. (Apokalipse 7:4) Iwo adatengedwa pa dziko lapantsi kuti akatonge na Jezu mu utongi bwace ayai mu Umambo kudzulu. Ndipo iwo an’dzatonga naye pabodzi dziko lapantsi. (Apokalipse 5:9, 10; 14:3, 4) M’masomphenyaya, Juwau adawona wa 144 000 adaima pabodzi na Jezu pa Phiri la Ziyoni kudzulu. — Apokalipse 14:1.

5. Kodi n’ciyani comwe cin’citikira wa 144 000 omwe akali pantsi pano?

⁵ Kuyambira mu ntsiku za apostolo mpaka ntsiku zathu zino, wanthu azinji akusankhulidwa kuti akacite mbali ya wa 144 000. (Luka 12:32; Aroma 8:17) Tsono Juwau adauzidwa kuti mbakucepa mwa wanthu wakusankhulidwawa omwe an’dzakhala akana moyo mu ntsiku zakumalizira. Wanthu wakusalawa an’dzatambira cizindikiro cakuti Yahova awabvuma, pomwe citsautso cikulu cinati kuyamba. (Apokalipse 7:2, 3; 12:17) Pomwe citsautso cikulu cin’dzakhala cikucitika, iwo an’dzatengedwa aciyenda kudzulu kuti akakhale na anzawo omwe adafa kale mwakukhulupirika. Iwo an’dzatonga pabodzi na Jezu mu Umambo bwa Mulungu. — Mateu 24:31; Apokalipse 5:9, 10.

6-7. (a) Kodi ni magulu yaponi yomwe Juwau adawona, ndipo timbadziwa ciyani bza iyo? (b) Thangwe ranyi mafala yomwe yali pa Apokalipse kapitulo 7 ngakufunika kwene-kwene kwa anyakudzozedwa na wa “thimu likulu”?

⁶ Pomwe Juwau adamala kuwona gulu libodzi kudzulu, iye adawona “thimu likulu.” Tsono thimu limweri likhali lakusiyana na la wa 144 000, thangwe ni thimu la wanthu wakusaya kulewengeka. (Apokalipse 7:9, 10) Kodi timbadziwa ciyani bza iwo? Juwau adauzidwa kuti: “Amwewa ni omwe acokera ku citsautso cikulu, iwo afula bzakubvala bzawo bzitali acibzicenesa na mulopa wa Mwana wa Bira.” (Apokalipse 7:14) Thimu likululi likadzapulumuka pa citsautso cikulu lin’dzakhala pa dziko la pantsi pano ndipo lin’dzatambira bzisimbo bzizinji kwene-kwene. — Salimo 37:9-11, 27-29; Mimwani 2:21, 22; Apokalipse 7:16, 17.

⁷ Bziribe basa penu tasankhulidwa kuti tikakhale na moyo kudzulu ayai tidzakhale pantsi pano, tentsenefe tin’funika kukhulupira na mtima wentse kuti bzomwe bzidanembedwa pa Apokalipse kapitulo 7 bzin’dzacitikadi. Imweyi in’dzakhala nthawe yakudekeza kwene-kwene kwa magulu mawiri ya atumiki wa Mulunguya. Ifepano tin’dzakomedwa thangwe rakuti tidasankhula kukhala wakukhulupirika ku utongi bwa Yahova. Kodi n’ciyani cinango comwe bukhu la Apokalipse limbatiuza pa nkhani ya citsautso cikulu? — Mateu 24:21.

KODI N’CIYANI CIN’DZACITIKIRA ANYAMADULANTHAKA WA MULUNGU?

8. Kodi citsautso cikulu cin’dzayamba tani ndipo wanthu azinji an’dzacita ciyani?

⁸ Mu nkhani yomwe idamala ire, tidapfunza kuti atsogoleri wa ndale wa dzikoli an’dzapfudza Babiloniya Mkulu, omwe ni magereja yakunama ya pa dziko lentse. (Apokalipse 17:16, 17) Bzimwebzi bzin’dzakhala ciyambi ca citsautso cikulu. Tsono, kodi wanthu an’dzayamba kutumikira Yahova thangwe ra citsautsoco? Ne. Thangwe bukhu la Apokalipse kapitulo 6 limbalewa kuti pa nthawe yakunesayi wanthu omwe ambanamata lini Yahova, an’dzafuna kukhotcereredwa na atsogoleri wa ndale na anyamalonda wa m’dzikoli omwe ali ninga mapiri. Iwo an’dzathandizira lini Umambo bwa Mulungu, ndipopa Yahova an’dzawawona kuti ni anyamadulanthaka wace. — Luka 11:23; Apokalipse 6:15-17.

9. Kodi n’ciyani cin’dzacitisa kuti wanthu wa Yahova akhale wakusiyana na wanthu winango pa citsautso cikulu, ndipo n’ciyani cin’dzawacitikira?

⁹ Tsono atumiki wakukhulupirika wa Yahova an’dzapitiriza kukhala wakusiyana na wanthu wentse pa nthawe yakunesayi. Ndipo ndiwo okha omwe an’dzapitiriza kutumikira Yahova Mulungu na kulamba kuthandizira “cirombo.” (Apokalipse 13:14-17) Thangwe ra kukhulupirika kwawo kwa Yahova, anyamadulanthaka wa Yahovayo an’dzakalipa kwene-kwene. Ndipo ciphatano ca mitundu ya wanthu cin’dzayenda kukacita nkhondo na wanthu wa Mulungu wa pa dziko lentse. Mu Bibliya, nkhondo imweyi imbacemeredwa kuti nkhondo ya Gogi wa ku Magogi. — Zakiyeri 38:14-16.

10. N’ciyani comwe Yahova an’dzacita kuti akhotcerere wanthu wace? (Apokalipse 19:19-21)

¹⁰ Kodi Yahova an’dzacita ciyani anyamadulanthaka wace akadzafuna kupha wanthu wace? Iye akutiuza kuti: “Inepano nin’dzakalipa kwene-kwene.” (Zakiyeri 38:18, 21-23) Pa Apokalipse kapitulo 19, pambatiuza bzomwe bzin’dzacitika. Yahova an’dzatumiza Mwana wace kuti adzakhotcerere wanthu wace na kukunda anyamadulanthaka wace. Pa nkhondoyi, Jezu an’dzakhala pabodzi na “acikunda wakudzulu” omwe ni anjo wakukhulupirika wa Yahova pabodzi na wa 144 000. (Apokalipse 17:14; 19:11-15) Kodi nkhondo imweyi in’dzamala tani? Pa nkhondoyi, wanthu wentse wakuipa pabodzi na magulu ya wanthu yomwe yambabvera lini Yahova an’dzapfudzidwa. — Werengani Apokalipse 19:19-21.

MALOWOZI YOMWE YAN’DZACITIKA NKHONDO IKAMALA

11. Kodi ni cinthu ciponi cakudekeza kwene-kwene comwe cin’dzacitika kudzulu cakulewedwa m’bukhu la Apokalipse?

¹¹ Kodi mukukumbuka kuti atumiki wa Mulungu an’dzabva tani akadzawona kuti anyamadulanthaka wentse wa Mulungu apfudzidwa ndipo iwo apulumuka? Imweyi in’dzakhala nthawe yakudekeza kwene-kwene! N’cadidi kuti kudzulu anjo an’dzakomedwa kwene-kwene Babiloniya Mkulu akadzapfudzidwa. Tsono pana cinthu pomwe cinango comwe cin’dzacitisa kuti wale omwe ali kudzulu akomedwe kwene-kwene. (Apokalipse 19:1-3) Cinthuco ni “malowozi ya Mwana wa Bira,” yomwe ni nkhani yakudekeza kwene-kwene ya m’bukhu la Apokalipse. — Apokalipse 19:6-9.

12. Kodi malowozi ya Mwana wa Bira yan’dzacitika lini? (Apokalipse 21:1, 2)

¹² Kodi malowozi ya Mwana wa Bira yan’dzacitika lini? Akristau wentse omwe ambacita mbali ya wa 144 000 an’dzakhala ali kale kudzulu pomwe nkhondo ya Armagedo ikanati kuyamba. Tsono imweyi in’dzakhala lini nthawe yakuti malowozi ya Mwana wa Bira yacitike. (Werengani Apokalipse 21:1, 2.) Malowozi ya Mwana wa Bira yan’dzacitika nkhondo ya Armagedo ikadzamala, pomwe anyamadulanthaka wentse wa Mulungu apfudzidwa. — Salimo 45:3, 4, 13-17.

13. Kodi n’ciyani cin’dzacitika pa malowozi ya Mwana wa Bira?

¹³ Kodi n’ciyani cin’dzacitika pa malowozi ya Mwana wa Bira? Malowozi yambacitisa kuti mwamuna na mkazi ayambe kukhala pabodzi. Mpsibodzi-bodzimbo na malowozi ya Mwana wa Bira. Iyo yan’dzacitisa kuti Mambo, omwe ni Jezu Kristu, pabodzi na “namwali” wace, omwe ni anyakudzozedwa wa 144 000, ayambe kutonga pabodzi. Cinthu cakufunikaci cin’dzayambisa utongi bwa boma lipsa lomwe lin’dzatonga pa dziko la pantsi mkati mwa magole 1000. — Apokalipse 20:6.

MZINDA WA ULEMERERO NA TSOGOLO LANU

14-15. Kodi kapitulo 21 ya Apokalipse imbandendemezera wa 144 000 na ciyani? (Onani cithunzi-thunzi pa tsamba lakuyamba.)

¹⁴ Bukhu la Apokalipse limbandendemezera wa 144 000 na mzinda wakudeka kwene-kwene wakucemeredwa “Jeruzalemu mupsa.” (Apokalipse 21:2, 9) Mzinda umweyu udamangidwa na aliserse ya minyala 12 yomwe idanembedwa “madzina 12 ya apostolo 12 wa Mwana wa Bira.” Thangwe ranyi Juwau adakomedwa kuwona bzimwebzi? Thangwe iye adawona dzina lace lidanembedwambo pa ubodzi mwa minyalayo. Umweyu ni mwayi ukulu kwene-kwene! — Apokalipse 21:10-14; Aefezo 2:20.

¹⁵ Mzinda wakuyezezerayu ukhali wakusiyana kwene-kwene na mizinda yentse. Mseu wace ukulu ukhadakonzedwa na oro caiyo, misuwo yace 12 idakonzedwa na minyala yakuumira, maparede na aliserse yace bzidakonzedwa pomwe na minyala inango yakuumira ndipo iyo ikhadapimidwa bwino kwene-kwene. (Apokalipse 21:15-21) Tsono bzikhawoneka kuti pana cinthu comwe cikhasala. Juwau adalewa kuti: “Ndiribe kuwona templo mwemo, thangwe Yahova, Mulungu Wamphanvu-zentse pabodzi na Mwana wa Bira, ndiwo templo ya mzindayo. Ndipo mzindayo ukhafunika lini kubvunikiridwa na dzuwa ayai mwezi, pakuti ulemerero bwa Mulungu bukhabvunika kale, ndipo kandiyero yace ikhali Mwana wa Bira.” (Apokalipse 21:22, 23) Wale omwe ambacita mbali ya Jeruzalemu mupsa an’dzakhala pabodzi na Yahova. (Ahebereu 7:27; Apokalipse 22:3, 4) Ndipopa Yahova na Jezu ndiwo templo ya mzindayu.

16. Kodi n’ciyani cin’dzacitikira wanthu mu Utongi bwa Magole 1000 bwa Umambo bwa Mulungu?

¹⁶ Anyakudzozedwa ambakomedwa kwene-kwene akakumbukira bza mzinda umweyu. Tsono wanthu omwe ana cidikhiro cakudzakhala na moyo pa dziko la pantsi an’funikambo kukomedwa na mzindayu. Thangwe ranyi? Thangwe mkati mwa Magole 1000 ya Utongi bwa Umambo bwa Mulungu, Jeruzalemu mupsa an’dzapereka bzisimbo bzizinji pa dziko la pantsi. Juwau adawona bzisimbo bzimwebzi bzikuyerera ninga “mkulo wa madzi ya moyo.” Ndipo ng’ambu ziwiri za mkuloyo mukhana “miti ya moyo,” yomwe ikhana “masamba . . . yakupozera mitundu ya wanthu.” (Apokalipse 22:1, 2) Wanthu wentse omwe an’dzakhala na moyo m’dziko limweri an’dzakhala na mwayi wakupfatsa na bzinthu bzabwino bzakucokera kwa Mulungu. Wanthu omwe ambabvera Mulungu an’dzayamba kukhala wakulungamiratu pang’ono na pang’ono. Mu dziko limweri mun’dzakhala mulibe pomwe kuduwala, kuwawidwa ne kulira. — Apokalipse 21:3-5.

17. Mbani omwe an’dzagumana phindu mu Utongi bwa Magole 1000? (Apokalipse 20:11-13)

¹⁷ Kodi mbani omwe an’dzagumana phindu na bzinthu bzabwino bzomwe Mulungu an’dzatipasa? Wakuyamba ni wanthu wa thimu likulu omwe an’dzapulumuka pa Armagedo pabodzi na wana omwe angadzabadwe mu dziko lipsa. Tsono pa Apokalipse kapitulo 20 pambatiuzambo kuti wanthu omwe adafa an’dzamuka. (Werengani Apokalipse 20:11-13.) Wanthu wakulungama omwe adafa pabodzi na wakusaya kulungama, omwe alibe kukhala na mwayi wa kupfunza bza Yahova, an’dzamuka kuti akhale pomwe na moyo pantsi pano. (Mabasa 24:15; Juwau 5:28, 29) Kodi bzimwebzi bzin’funa kulewa kuti wanthu wentse omwe adafa an’dzamuka kuti akhale na moyo mu Utongi bwa Magole 1000? Ne. Wanthu omwe adalamba kutumikira Yahova pomwe akhana moyo an’dzamusidwa lini kwa anyakufa. Thangwe adakhala kale na mwayi wa kupfunza bza Yahova koma adalamba, acilatiziratu kuti an’themera lini kudzakhala na moyo m’Paraizo pantsi pano. — Mateu 25:46; 2 Atesalonika 1:9; Apokalipse 17:8; 20:15.

MAYEZO YAKUMALIZIRA

18. Kodi moyo un’dzakhala tani pantsi pano kuphampha kwa magole 1000?

¹⁸ Mpaka kuphampha kwa magole 1000 wanthu wentse omwe an’dzakhala na moyo pantsi pano an’dzakhala wakulungama. Palibe munthu omwe an’dzakhala pomwe na pikado yomwe tidatambira kucokera kwa Adamu. (Aroma 5:12) Pikado yentse yomwe tidatambira kwa Adamu in’dzacosedwa. Ndipopa mpaka kuphampha kwa magole 1000, wanthu wentse omwe an’dzakhala pomwe na moyo an’dzakhala wakulungamiratu. — Apokalipse 20:5.

19. Thangwe ranyi Sathani an’dzatsudzulidwa kuti apumpse wanthu?

¹⁹ Tikudziwa kuti Jezu adapitiriza kukhala wakukhulupirika kwa Mulungu napo kuti Sathani adayezera kumupumpsa. Tsono, kodi wanthu wakulungama an’dzakwanisa kukhala wakukhulupirika kwa Yahova pomwe Sathani an’dzayezera kuwapumpsa? Ali-wentse wa ifepano an’funika kudzalatiza kukhulupirika kwace kwa Yahova pomwe Sathani an’dzatsudzulidwa ku ciphompho kuphampha kwa magole 1000. (Apokalipse 20:7) Wanthu omwe an’dzapitiriza kukhala wakukhulupirika pa nthawe yakumalizirayi an’dzatambira moyo wakusaya kumala ndipo an’dzapfatsa na mtendere caiwo. (Aroma 8:21) Tsono wanthu omwe an’dzapandukira Yahova, an’dzapfudzidwa pabodzi na Dyabu na madimonyo yace. — Apokalipse 20:8-10.

20. Kodi imwepo mwabva tani thangwe ra kupfunza mapolofesiya ya m’bukhu la Apokalipse?

²⁰ Kodi imwepo mukubva tani pomwe mwamala kupfunza bzinthu bzinango bza m’bukhu la Apokalipse? Kodi mukukomedwa lini kuwona kuti imwepo mukucitambo mbali pa mapolofesiya yamweya? Bzikuwonekeratu kuti bzomwe mwapfunzabzi bzakulimbikisani kuti muuzembo anzanu kuti abwere tidzanamate nawo pabodzi Mulungu wathu. (Apokalipse 22:17) Pakuti tamala kupfunza bzomwe bzin’dzacitika kutsogolo, ifepano tikukomedwa kwene-kwene ndipo tin’funa kulewa mafala ninga yomwe Juwau adalewa, yakuti: “Ameni! Bwerani Mbuya Jezu.” — Apokalipse 22:20.