Kodi Mukukumbukira?

Kodi imwepo mwawerenga bwino-bwino nkhani za gole lino mu Ntsanza ya Mulindiri? Penu mun’ti inde, yezerani kutawira mibvunzo iri m’nyantsiyi:

Kodi ni phindu liponi lomwe tin’dzakhala nalo tikapambula nthawe ya kulalewa, kutetekera na kukumbukira bza Yahova?

Tin’dzacita bzinthu mwanzeru, tin’dzakhala apfunzisi wabwino, tin’dzakhala na cikhulupiro cakulimba ndipo lufoyi lathu kwa Yahova lin’dzathimizirika. — w22.01, matsa. 30-31.

Kodi ni phindu liponi lomwe tin’dzakhala nalo tikacita nyongo ya kukhulupira Yahova na wanthu omwe iye adawaikha kuti atitsogolere?

Ino ni nthawe yakuti tikhulupire momwe Mulungu ambacitira bzinthu sikuti kukumbuka kuti akulu akucita bzinthu bza mu msolo mwawo. Tikacita bzimwebzi pa citsautso cikulu tin’dzakwanisa kubvera napo malango yomwe yangadzawoneke ninga yakusaya kuthandiza. — w22.02, matsa. 4-6.

Kodi anjo akhafuna kulewanyi pomwe adalewa bza “cingwe cakulungamiza pa kumanga comwe ciri m’manja mwa [Mtongi wa m’Cigawo] Zerubabeli”? (Zakariya 4:8-10)

Masomphenyaya yadalimbikisa wanthu wa Mulungu kudziwa kuti templo ipsayo ingadamala kukonzedwa ndipo ingadabverana na bzomwe Mulungu akhafuna. — w22.03, matsa. 16-17.

Kodi tingakhale tani “ciratizo cabwino . . . pakulewalewa”? (1 Timotio 4:12)

Tin’funika kumbalewalewa mwakugwa mpfuwa na mwaulemu tikakhala tiri mu upalizi, tin’funika kumbaimba pa mitsonkhano na mtima wentse, kumbalewa cadidi, kumbalimbikisa anzathu na kumbatcenkha mafala yakupusa. — w22.04, matsa. 6-9.

Thangwe ranyi cirombo comwe cimbafotokozedwa pa Apokalipse 13:1, 2 cidatengana na bzirombo bzinai bzomwe bzimbafotokozedwa pa Daniyeli kapitulo 7?

Cirombo cimweci ni boma lini libodzi lokha ayai boma lomwe limbatonga dziko lentse, ninga boma la Roma. Koma ni mautongi ayai maumambo yentse yamphanvu yomwe yakutonga wanthu kuyambira kale-kale. — w22.05, tsa. 9.

Kodi tingalatize tani kuti timbakhulupira kuti Mulungu an’dzacita cirungamo?

Munthu akatitukwana ayai kuticitira bzakuipa timbatcenkha kukhala na ciya ayai kumukoyera cakumtima. Timbasiya nkhaniyo m’manja mwa Yahova thangwe timbadziwa kuti iye an’dzamalisa kubonera kwentse komwe timbagumana nako thangwe ra pikado. — w22.06, matsa. 10-11.

Kodi n’ciyani comwe m’bale omwe akucita mpembo pa mitsonkhano an’funika kukumbukira?

Iye an’funika lini kuphatisa basa mpemboyo kuti apereke malango ku gwere ayai kuti apereke bzidziwiso. Ndipo an’funika lini kulewalewa “mafala mazinji,” maka-maka kukakhala ni kumayambiriro kwa mitsonkhano. (Mateu 6:7) — w22.07, matsa. 24-25.

Kodi mafala yakuti “omwe akhacita bzinthu bzakuipa, an’dzamuka kuti atongedwe” yan’funa kulewanyi? (Juwau 5:29)

Sikuti an’dzatongedwa thangwe ra bzinthu bzakuipa bzomwe adacita pomwe akhanati kufa. Koma an’dzawonedwa penu akuphatisa basa bzinthu bzomwe an’dzapfunzisidwa akadzalamusidwa. — w22.09, tsa. 18.

Kodi ni malango yaponi yabwino yomwe J. F. Rutherford adapereka pa mtsonkhano wa cigawo mu Setembro, 1922?

Pa mtsonkhano wa cigawo omwe udacitika ku Cedar Point, Ohio, U.S.A., iye adalewa kuti: “Mambo akutonga! Imwepo mwapasidwa basa lakuti mudziwise wanthu bzimwebzi. Ndipopa, dziwisani, dziwisani, dziwisani Mambo na Umambo bwace!” — w22.10, matsa. 3-5.

Kodi Zaiya kapitulo 30 ambafotokoza bzinthu bzitatu bziponi bzomwe Mulungu ambaphatisa basa pakutithandiza kupirira?

Kapitulo imweyi imbalewa kuti iye (1) ambatawira mipembo yathu, (2) ambatitsogolera ndipo (3) ambatisimba ntsiku zino ndipo an’dzatisimbambo kutsogolo. — w22.11, tsa. 9.

Kodi timbadziwa tani kuti mafala ya pa Salimo 37:10, 11, 29 yambalewa bzinthu bzomwe bzidacitika mu nthawe ya Ajirayeri na bzomwe bzin’dzacitika kutsogolo?

Mafala ya Davideya yakulewa bzinthu bzabwino bzomwe bzingadacitika mu utongi bwa Salomau. Ndipo Jezu adalewambo mafala yomwe yali pa vesi 11 pomwe akhalewa bza Paraizo omwe akubwera. (Mateu 5:5; Luka 23:43) — w22.12, matsa. 8-10, 14.