Mibvunzo Yakucokera Kwa Anyakuwerenga

Kodi nyakunemba Salimo Davide akhanama pomwe adalewa kuti angadatumbiza dzina la Mulungu “kuyenda na kuyenda” pa Salimo 61:8?

Ne. Bzomwe Davide akhanemba mpsacadidi ndipo akhanama lini.

Onani bzomwe iye adanemba mu vesi limweri na mavesi yomwe yana mafala yakundendemerana na ya mu vesi limweri. Iye adati: “Nin’dzaimba nyimbo zakutumbiza dzina lanu mpaka muyaya; kuti ndikwanise kuteweza mapiciro yangu ntsiku na ntsiku.” “Imwe Yahova Mulungu wangu, nin’dzakutumbizani na mtima wangu wentse, ndipo nin’dzalemekeza dzina lanu mpaka kale-kale.” “Nin’dzatumbiza dzina lanu mpaka muyaya.” — Salimo 61:8; 86:12; 145:1, 2.

Pomwe Davide adanemba mafala yamweya, iye akhakumbuka lini kuti angadafa lini. Iye akhadziwa kuti wanthu wentse ambafa thangwe ra pikado ndipo akhadziwambo kuti iye akhanayombo pikadoyo. (Ciyambo 3:3, 17-19; Salimo 51:4, 5) Davide akhadziwambo kuti Abalahamu, Izaki, na Djakobo omwe akhali axamwali wa Mulungu adafa ndipo iye akhadziwa kuti nthawe iri-yentse angadafambo. (Salimo 37:25; 39:4) Tsono mafala yomwe Davide adanemba pa Salimo 61:8 yakulatiza kuti iye akhafuna kutumbiza Mulungu kuyenda na kuyenda, bzomwe bzin’funa kulewa kuti iye akhafuna kutumbiza Mulungu moyo wace wentse. — 2 Samuweri 7:12.

Nthawe zinango Davide akhanemba bzinthu bzomwe bzikhacitika pa moyo wace. Timbakwanisa kuwona bzimwebzi tikawerenga Salimo 18, 51 na 52. Mu Salimo 23, Davide, omwe akhali makabusa, adandendemezera Yahova na makabusa omwe ambakhotcerera na kuusa mabira yace. Ndipopa iye akhafuna kutumikira Yahova ‘moyo wace wentse.’ — Salimo 23:6.

Cinthu cinango n’cakuti pomwe Davide adanemba mafalaya, iye adacita kutsogoleredwa na Yahova. Ndipopa bzomwe adalewabzi bzingadadzacitikambo kutsogolo. Thangwe ranyi tikulewa tenepoyo? Thangwe pa Salimo 110, Davide adalewa bza nthawe yomwe Mbuya wace ‘angadadzakhala ku boko la madidi la [Mulungu]’ kudzulu acipasidwa mphanvu. Kodi angadapasidwa mphanvuzo kuti acite ciyani? Angadapasidwa mphanvu kuti akunde anyamadulanthaka wa Mulungu na ‘kupereka cirango kuna mitundu yentse ya wanthu’ pa dziko la pantsi. Davide akhali kholo la Jezu omwe adadzakhala Mesiya ndipo Mesiyayo angadadzatonga ali kudzulu na kukhalambo “wantsembe kuyenda na kuyenda.” (Salimo 110:1-6) Pomwe Jezu akhali pa dziko la pantsi adalewa kuti bzomwe Salimo 110 ambalewa bzingadacitikira iye ndipo bzingadadzacitika kutsogolo. — Mateu 22:41-45.

Yahova adatsogolera Davide kunemba bzinthu bzomwe iye akhacita pa nthawe imweyire na bzomwe an’dzacita kutsogolo akadzalamusidwa. Iye an’dzakhala na mwayi wa kutumbiza Yahova mpaka kale-kale. Bzimwebzi bzikutithandiza kuwona kuti Salimo 37:10, 11, 29 ambafotokoza bzinthu bzomwe bzidacitika mu nthawe ya Ajirayeri na bzomwe bzin’dzacitika kutsogolo Mulungu akadzacita bzomwe adalewa. — Onani ndime 8 mu nkhani yakuti “Iwepo Un’dzakhala Nande m’Paraizo” yomwe iri mu revista ino.

Salimo 61:8 na mavesi yanango yomwe yana mafala yakundendemerana na ya mu vesiri yambalatiza kuti Davide akhafuna kutumbiza Yahova moyo wace wentse. Ndipo mafalaya yambalatizambo bzomwe iye an’dzacita akadzalamusidwa.