“Iwepo Un’dzakhala Nande m’Paraizo”

1. Kodi n’ciyani comwe Jezu adalewa kwa kapondo omwe akhadakhomereredwa naye pabodzi? (Luka 23:39-43)

JEZU adakhomereredwa pabodzi na akapondo awiri ndipo iwo akhabva kuwawa kwene-kwene pa miti yakuzunzidwira ire. (Luka 23:32, 33) Akapondo awiriwo akhanyoza Jezu. Ndipopa tingalewe kuti iwo akhali lini anyakupfunza wace. (Mateu 27:44; Marko 15:32) Tsono m’bodzi wa iwo adacinja nzeru zace. Iye adauza Jezu kuti: “Jezu, mudzandikumbukirembo mukadzapita mu Umambo bwanu.” Ndipo Jezuyo adamutawira kuti: “Cadidi ndikukuuza lero kuti: Iwepo un’dzakhala nande m’paraizo.” (Werengani Luka 23:39-43.) Bibliya limbalewa lini kuti kapondoyo akhakhulupira mafala yomwe Jezu akhapalizira yakuti “Umambo bwa kudzulu bwafendera.” Ndipo Jezu alibe kumuuza kuti iye an’dzapita mu Umambo bwa Mulungu kudzulu. (Mateu 4:17) Bzikuwonekeratu kuti Jezu akhalewa bza Paraizo omwe akubwera kutsogoloku pantsi pano. Thangwe ranyi tikulewa tenepoyo?

2. Kodi n’ciyani cikulatiza kuti kapondo omwe akhalalewa na Jezu ule akhali Mdjuda?

² Bzikuwoneka kuti kapondo ule akhali Mdjuda. Tikulewa tenepoyo thangwe rakuti kapondoyo adabvunza mwanzace kuti: “Kodi iwepo umbagopa lini Mulungu?” (Luka 23:40) Adjuda akhanamata Mulungu m’bodzi yekha basi. Tsono wanthu wa mitundu minango akhanamata mirungu mizinji. (Kufuluka 20:2, 3; 1 Akolinto 8:5, 6) Bzingadakhala kuti akapondo wale akhali lini Adjuda, kapondo ule angadabvunza tenepa: “Kodi iwepo umbagopa lini mirungu?” Cinango n’cakuti Jezu alibe kutumidwa kuti akapalizire wanthu wa mitundu inango, koma “kwa mabira yakutaika ya mtundu wa Jirayeri.” (Mateu 15:24) Mulungu adauza Ajirayeri kuti iye angadadzalamusa wanthu omwe adafa. Mafala yomwe kapondo ule adalewa yakulatiza kuti iye akhadziwa bzimwebzi. Iye akhadziwambo kuti Yahova angadalamusa Jezu kuti akatonge mu Umambo bwa Mulungu kudzulu. Ndipo iye akhakhulupira kuti Mulungu angadamulamusambo.

3. Kodi n’ciyani comwe kapondo ule adakumbuka pomwe Jezu adaguma fala lakuti paraizo? Fotokozani. (Ciyambo 2:15)

³ Penu kapondo ule akhali Mdjuda, iye akhadziwa bwino nkhani ya Adamu na Eva, ndipo akhadziwambo kuti Yahova adawalenga kuti akhale m’Paraizo pantsi pano. Ndipopa, pomwe Jezu adamuuza kuti an’dzakhala m’Paraizo, kapondoyo adakhulupira kuti paraizoyo angadakhala pantsi pano. — Werengani Ciyambo 2:15.

4. Kodi n’ciyani comwe tin’funika kubzibvunza tikakumbukira mafala yomwe Jezu adauza kapondo ule?

⁴ Tikakumbukira mafala yomwe Jezu adauza kapondo ule, tin’funika kumbabzibvunza kuti moyo m’Paraizomo un’dzakhala tani maka-maka. Ifepano tingadziwe momwe moyo un’dzakhalira m’Paraizo tikakumbukira momwe bzinthu bzikhaliri mu utongi bwa Mambo Salomau. Bibliya limbalewa kuti Jezu ni mkulu kuposa Salomau. Ndipopa tingakhulupirembo kuti iye pabodzi na anyakudzozedwa an’dzacitisa dzikoli kukhala paraizo wakudeka kwene-kwene. (Mateu 12:42) Tsono Akristau wa mabira manango an’funika kudziwa bzomwe an’funika kucita kuti adzakhale na moyo wakusaya kumala m’Paraizo. — Juwau 10:16.

KODI MOYO UN’DZAKHALA TANI M’PARAIZO?

5. Kodi mukukumbuka kuti moyo un’dzakhala tani m’Paraizo?

⁵ Kodi mukukumbuka kuti moyo un’dzakhala tani m’Paraizo? Pinango mukabva fala lakuti paraizo, mungakumbukire mbuto yakudeka ninga momwe likhaliri zunde la Edeni. (Ciyambo 2:7-9) Pinango mungakumbukire polofesiya yomwe idanembedwa na mpolofeta Mikeya yomwe imbalewa kuti munthu “ali-wentse an’dzakhala pa muti wace wa uva na wa nkhuyu.” (Mikeya 4:3, 4) Ndipo mungakumbukirembo kuti Bibliya limbalewa kuti mu dziko lipsa mun’dzakhala na cakudya cizinji. (Salimo 72:16; Zaiya 65:21, 22) Pinango mungayezerembo kubziwona muli mu dziko lakudeka, mudakhala pa kadera kuti mudye cakudya cakukoma comwe ciri pa meza. Ndipo mukuwona miti na maluwa yakudeka. Pa nthawe imweyi, pinango mukubva abale wanu, axamwali wanu na wanthu omwe alamusidwa akuceza na kuseka. Bzinthu bzimwebzi ni nkhumbukira lini ne, bzin’dzacitikadi pa dziko la pantsi pano. Ndipo m’Paraizomo tin’dzakomedwa kucita basa labwino.

6. Kodi ni basa liponi lomwe tin’dzacita m’Paraizo? (Onani cithunzi-thunzi.)

⁶ Yahova adatikonza kuti timbakomedwe na basa lomwe timbacita. (Mpalizi 2:24) Ndipo mu dziko lipsa, mkati mwa Utongi bwa Kristu bwa Magole 1000, bzinthu bzin’dzakhala tenepo. Thangwe wanthu omwe an’dzapulumuka pa citsautso cikulu na wanthu azinji omwe an’dzalamusidwa an’dzafuna bzakubvala, cakudya na mbuto yakukhala. Ndipopa, ifepano tin’dzakhala na basa lizinji lakucita! Tin’dzakhalambo na basa ninga lomwe Adamu na Eva akhanalo, lakukonza dzikoli kuti likhale paraizo. Ndipo basa linango lomwe tin’dzakhala nalo lin’dzakhala la kupfunzisa wanthu azinji omwe an’dzalamusidwa kuti adzadziwe Yahova na kudziwambo bzomwe iye ambafuna. Ndipo tin’dzapfunzisambo wanthu wakukhulupirika omwe adakhala na moyo pomwe Jezu akhanati kubwera kuti adzadziwe bzinthu bzomwe bzidacitika kuyambira pomwe iwo adafa.

7. Kodi bzinthu bzin’dzakhala tani m’Paraizo, ndipo thangwe ranyi tikulewa tenepoyo?

⁷ M’Paraizo, ifepano tin’dzakhala mwa mtendere na moyo wabwino ndipo mun’dzacitika lini phiringu. Thangwe ranyi tikulewa tenepoyo? Thangwe rakuti Yahova adalatiza kale momwe bzinthu bzin’dzafambira wanthu akadzakhala akutongedwa na Mwana wace. Timbakwanisa kuwona bzimwebzi tikakumbukira bzomwe bzidacitika mu utongi bwa Mambo Salomau.

UTONGI BWA SALOMAU BUDALATIZA KUTI PARAIZO AN’DZAKHALA TANI

8. Kodi bzomwe Davide adanemba pa Salimo 37:10, 11, 29 bzidacitika tani mu utongi bwa Mambo Salomau? (Onani “Mibvunzo Yakucokera kwa Anyakuwerenga” mu revista ino.)

⁸ Mzimu wa Yahova udatsogolera Mambo Davide kunemba bzomwe bzingadadzacitika pomwe mambo wanzeru na wakukhulupirika angadadzatonga. (Werengani Salimo 37:10, 11, 29.) Ifepano timbawerengera wanthu mafala ya pa Salimo 37:11 tikakhala tikuwauza bza Paraizo. Kucita bzimwebzi n’kuphonya lini thangwe Jezu adafotokoza mafala yamweya pa Nkhani ya pa Phiri. Bzimwebzi bzikulatiza kuti bzomwe mavesiya yambalewa bzin’dzacitika kutsogolo. (Mateu 5:5) Tsono mafala ya Davideya yakhalatizambo momwe moyo ungadakhalira pomwe Mambo Salomau angadakhala akutonga. Pomwe Salomau akhatonga dziko la Jirayeri, wanthu wa Mulungu adakhala na mtendere caiwo ndipo bzinthu bzikhawafambira bwino mu dziko lomwe “likhayerera mkaka na uci.” Mulungu adawauza kuti: “Mukapitiriza kubvera malango yangu na kuteweza malamulo yangu . . . , nin’dzakupasani mtendere m’dzikolo mwakuti mun’dzagona mwakusaya kugopa munthu ali-wentse.” (Mwambo 20:24; 26:3, 6) Bzomwe Yahova adalewabzi bzidacitikadi mu utongi bwa Mambo Salomau. (1 Nkhani 22:9; 29:26-28) Ndipo Yahova adalewambo kuti wanthu wakuipa “angadadzawoneka lini pomwe.” (Salimo 37:10) Ndipopa, bzomwe bzimbafotokozedwa pa Salimo 37:10, 11, 29 bzidacitika mu nthawe ya Mambo Salomau ndipo bzin’dzacitika pomwe kutsogolo.

9. Kodi n’ciyani comwe mambo wacikazi wa ku Xeba adauza Mambo Salomau?

⁹ Mambo wacikazi wa ku Xeba adabva kuti Ajirayeri akhana moyo wabwino kwene-kwene pomwe Salomau akhatonga. Ndipopa, iye adacoka ku dziko lace aciyenda ku Jeruzalemu kuti akawone yekha. (1 Wamambo 10:1) Pomwe adawona ulemerero bwentse bomwe Salomau akhanabo na moyo wabwino omwe wanthu akhanawo, iye adauza Salomauyo kuti: “Bzentse bzomwe ndabva mpsing’ono-ng’ono na bzomwe ndawona kuno. . . . Wakusimbidwa ni acikunda wanu na atumiki wanu, omwe ambakhala patsogolo panu nthawe zentse acimbatetekera nzeru zanu!” (1 Wamambo 10:6-8) Tsono bzinthu bzabwino bzomwe bzikhacitika mu utongi bwa Salomau bzikulatiza bzinthu bzizinji kwene-kwene bzomwe Yahova an’dzacita pomwe Mwana wace Jezu an’dzakhala akutonga.

10. Thangwe ranyi Jezu ngwabwino kwene-kwene kuposa Salomau?

¹⁰ Jezu ngwabwino kwene-kwene kuposa Salomau. Thangwe Salomau akhali munthu wakuperewera, ndipo adadzacita bzinthu bzakuipa bzomwe bzidadzabweresera mabvuto wanthu wa Mulungu. Tsono Jezu ngwakulungama ndipo ambaphonya lini. (Luka 1:32; Ahebereu 4:14, 15) Sathani adayezera umu na umu kuti apumpse Jezu, koma iye adapitiriza kukhala wakukhulupirika. Bzimwebzi bzikulatiza kuti iye an’dzacita lini cinthu ciri-centse comwe cingadzabweresere mabvuto wanthu omwe an’dzakhala akuwatonga. Iye ngwakuthemera kukhala Mambo wathu thangwe ni munthu wabwino kwene-kwene.

11. Kodi Jezu an’dzatonga pabodzi na mbani?

¹¹ Jezu an’dzatonga pabodzi na amambo winango wakukwana 144 000. Ndipo iwo an’dzapereka kwa wanthu bzentse bzomwe iwo akufuna na kucitisa kuti bzomwe Yahova akufuna bzicitike pantsi pano. (Apokalipse 14:1-3) Amambo amwewa adagumana na mabvuto mazinji pomwe akhali pantsi pano, ndipopa iwo an’dzabvera ntsisi wanthu. Kodi iwo an’dzaphata basa lanyi?

KODI ANYAKUDZOZEDWA AN’DZAPHATA BASA LANYI?

12. Kodi Yahova adapasa Akristau wa 144 000 basa liponi?

¹² Basa lomwe Jezu pabodzi na wa 144 000 an’dzacita lin’dzakhala lizinji kwene-kwene kuposa lomwe Salomau adacita. Thangwe ranyi? Thangwe Mambo Salomau adatonga wanthu wa m’dziko libodzi lokha basi. Tsono Jezu pabodzi na anzace an’dzatonga na kuthandiza wanthu omwe ambakhala pa dziko lentse la pantsi. Umweyu ni mwayi ukulu kwene-kwene omwe anyakudzozedwa anawo!

13. Kodi ni basa liponi lakufunika kwene-kwene lomwe wa 144 000 an’dzacita?

¹³ Anyakudzozedwa wakukwana 144 000 an’dzaphatambo basa ninga la Jezu Kristu. Iwo an’dzakhala amambo na antsembe. (Apokalipse 5:10) Mu nthawe ya Ajirayeri, antsembe ndiwo akhathandiza wanthu kukhala na manungo yabwino na kuwathandizambo kubvera Malamulo. Tsono ifepano timbadziwa kuti “Lamulo ni ciratizo ca bzinthu bzabwino bzomwe bzikubwera.” Ndipopa tingakhulupirembo kuti Jezu pabodzi na anyakudzozedwa an’dzathandiza wanthu wa Mulungu kukhala na manungo yabwino na kukhalambo pa uxamwali bwakulimba na Yahova. (Ahebereu 10:1) Ifepano tikudziwa lini kuti iwo an’dzacita tani kuti ambakwanise kuuza wanthu bzakucita pomwe iwo ali kudzulu. Comwe tikudziwa n’cakuti Yahova an’dzacitisa kuti bzimwebzi bzidzakwanisike. Ndipo tingakhulupire kuti m’Paraizo, tin’dzatambira malango yomwe tikufunikira. — Apokalipse 21:3, 4.

KODI “MABIRA MANANGO” YAN’FUNIKA KUCITA CIYANI KUTI YADZAKHALE M’PARAIZO?

14. Kodi anyakudzozedwa na Akristau wa “mabira manango” mbakusiyana? Fotokozani.

¹⁴ Jezu adacemera Akristau omwe an’dzatonga naye pabodzi kudzulu kuti “kathimu ka mabira.” (Luka 12:32) Ndipo iye adalewambo bza grupo laciwiri, lomwe limbacemeredwa kuti “mabira manango.” Tingalewe kuti magrupo mawiriya yambacita mbali ya thimu libodzi la mabira thangwe yambaphata basa pabodzi. (Juwau 10:16) Akristau wa magrupo mawiriya akuphata kale basa pabodzi ndipo an’dzapitiriza kucita bzimwebzi m’Paraizo. Akristau wa kathimu ka mabira an’dzakhala ali kudzulu ndipo Akristau wa mabira manango an’dzakhala ali pantsi pano ndipo an’dzatambira moyo wakusaya kumala. Tsono n’ciyani comwe Akristau wa “mabira manango” an’funika kucita kuti adzapite m’Paraizo?

15. (a) Kodi Akristau wa “mabira manango” ambathandiza tani Akristau wakudzozedwa? (b) Kodi imwepo mungatewezere tani m’bale omwe ali mu farmácia? (Onani cithunzi-thunzi.)

¹⁵ Kapondo ule alibe kukhala na mwayi wakutenda bzomwe Jezu adamucitira thangwe adaferatu ntsiku imweyire. Tsono ifepano wa mabira manangofe tinawo mwayi wakucita bzimwebzi. Ifepano timbafuna Akristau wakudzozedwa. Jezu adalewa kuti bzomwe timbacitira Akristau wakudzozedwawa bzingacitise kuti tidzatambire moyo wakusaya kumala ayai ne. (Mateu 25:31-40) Ifepano tingathandize Akristau wakudzozedwa mwakumbacita basa la kupalizira na kupfunzisa wanthu na nyongo. (Mateu 28:18-20) Kuti tikwanise kucita bzimwebzi, tin’funika kumbaphatisa bwino basa mabukhu yomwe timbapasidwa kuti timbapfunzisire wanthu. Ndipo libodzi mwa mabukhuyo ni bukhu lakuti Khalani na Moyo Wakukondwa Mpaka Kale-kale!. Penu tikanati kuyamba kupfunza Bibliya na munthu, tingacite nyongo kuti tikhale na nyakupfunza m’bodzi wa Bibliya.

16. Kodi tingakonzekere tani kudzakhala mu dziko lipsa?

¹⁶ Tin’funika lini kucita kudikhirira kupita m’Paraizo kuti tidzakhale na makhalidwe yomwe Yahova ambakomedwa nayo. Mpsabwino kuyambiratu nthawe zino kukhala na makhalidwe yabwino. Tin’funika kumbalewa cadidi na kumbacita bzinthu bzomwe Yahova ambakomedwa nabzo. Tin’funika kukhala wakukhulupirika kwa Yahova, kwa mkazathu ayai mwamuna wathu na kwa Akristau anzathu. Tikambacita bzinthu bzomwe Yahova ambakomedwa nabzo bzin’dzatinesa lini kumubvera m’Paraizo. Ifepano tin’funikambo kupfunza basa na bzinthu bzinango kuti tilatize kuti tikufuna kudzakhala m’Paraizo. Onani nkhani yakuti “Kodi Ndimwe Wakukonzeka ‘Kudzatambira Dziko la Pantsi’?” yomwe iri mu revista ino.

17. Thangwe ranyi tin’funika lini kumbabzipasa mulandu thangwe ra pikado zomwe tidacita kale-kale?

¹⁷ Tin’funikambo kutcenkha kumbabzipasa mulandu thangwe ra pikado zomwe tidacita kale-kale. N’cadidi kuti tin’funika lini ‘kumbacita pikado utowa’ thangwe rakuti Jezu adatifera. (Ahebereu 10:26-31) Tsono tikacita pikado, tin’funika kukhulupira kuti tikakungula, ticikumbira Yahova kuti atilekerere na kukumbirambo thandizo kwa akulu ticicinja makhalidwe yathu, Yahova an’dzatilekerera na mtima wentse. (Zaiya 55:7; Mabasa 3:19) Kumbukirani mafala yomwe Jezu adauza Mfarizeu, yakuti: “Ndiribe kubwerera anyakulungama, koma anyakucita pikado.” (Mateu 9:13) Mafalaya yakulatiza kuti ntsembe ya cakulombolera ya Jezu ina mphanvu yakucenesa pikado zathu zentse.

IMWEPO MUNGAKHALE NA MOYO WAKUSAYA KUMALA M’PARAIZO

18. Kodi mun’dzafuna kuceza ciyani na kapondo omwe adaphedwa pabodzi na Jezu ule?

¹⁸ Yezezerani kuti muli m’Paraizo ndipo mukuceza na kapondo omwe adakhomereredwa pabodzi na Jezu ule. Imwepo na iye mungatende ntsembe ya cakulombolera ya Jezu. Ndipo pinango imwepo mungamukumbire kuti akufotokozereni bzomwe bzidacitika pomwe Jezu akhadasala pang’ono kufa na momwe iye adabvera pomwe Jezuyo adamuuza kuti an’dzakhala m’Paraizo. Ndipo pinango iye angakukumbirenimbo kuti mumufotokozere momwe bzinthu bzikhaliri mu ntsiku zakumalizira za dziko la Sathaniri. Bzin’dzadekeza kwene-kwene kupfunza Fala la Mulungu na munthu umweyu! — Aefezo 4:22-24.

19. Thangwe ranyi moyo m’Paraizo un’dzakhala wakudekeza kwene-kwene? (Onani cithunzi-thunzi pa tsamba lakuyamba.)

¹⁹ Moyo m’Paraizo un’dzakhala wakudekeza kwene-kwene. Mun’dzakhala na wanthu azinji omwe tin’dzafuna kuwadziwa ndipo tin’dzaphata basa labwino kwene-kwene. Tin’dzamudziwa bwino Baba wathu wa kudzulu na kupfatsa na bzinthu bzabwino bzomwe iye an’dzatipasa. Tin’dzakhala na bzinthu bzizinji kuti tipfunze. Ndipo tin’dzadziwambo bzinthu bzizinji bzomwe iye adalenga. Bzimwebzi bzin’dzacitisa kuti lufoyi lathu kwa Yahova likule kwene-kwene. Ifepano timbatenda kwene-kwene Yahova na Jezu thangwe ra kutipasa mwayi wa kudzakhala na moyo wakusaya kumala m’Paraizo!