Lekani Kukhala na Thupo

Nkhaniyi yacosedwa m’Buku Lapachaka la Mboni za Yehova

Mianmar

Tsamba 138, ndime 3 mpaka 139, ndime 2

Tiribe Kusiya Kutsonkhana

Mwa ciratizo, onani bzomwe bzidacitikira Cin Khan Dal, omwe akhakhala na banja lace m’mudzi winango wakutali, ku Sagaing. Iye ankulewa kuti: “Tikhafuna kuyenda ku mtsonkhano wacigawo ku Tahan, omwe ungadatenga nsiku ziwiri za ulendo bwakucitidwa na ngalawa na kandere-ndere. Tsono palibe omwe angadasamalira nkhuku zathu pomwe tingadacokapo. Na tenepo, tidakhulupira Yahova, ticiyenda ku mtsonkhanoyo. Titabwerera ku mui, tidasaya nkhuku zathu 19. Tsono, patandopita gole libodzi, nkhuku zathu zidadzathumizirika mpaka kupitirira 60. Ndipo napo anzathu wa m’mudzimo wadaluza nkhuku zawo m’golero thangwe cisi, ifepano tiribe kuluza nkhuku na ibodziyo.”

Aung Tin Nyunt na mkazace Nyein Mya, ni banja linango lomwe lidapitiriza kuikha patsogolo bzinthu bza uzimu. Iro likhakhala na wana apfemba, ku Kyonsha, m’kamudzi kakutalikirana na mzinda wa Yangon makilometro 64. Aung Tin Nyunt ankuti: “Kawiri-kawiri, banja lathu likhadya phala la mpunga na masamba. Tikhalibe kobiri, ne cinthu kuti tigulise. Na tenepo, tiribe kutaya mtima. Ndidauza banja langu kuti: ‘Jezu akhalibe pakutsamirisa msolo wace. Tenepo penu tin’dzakhala pansi pa muti ayai kufa na njala, inepano ndin’dzapitiriza basi kunamata Mulungu.’

“Nsiku inango, tikhalibe cakudya m’nyumba mwathu. Mkazangu na wana wangu wadandinyang’anisa na nkhope zakusunama. Ine ndidawatsimikiza kuti: ‘Lekani kucita thupo. Mulungu an’tithandiza.’ Pambuyo pa utumiki bwa kumunda ku macibese, ndidatenga wana wangu wacimuna kuti tikamedze nsomba. Tsono tidaphata nsomba zakundodya kabodzi kokha pa nsikuyo. Ndidatenga citundu comwe tikhaphera nsombazo, ndiciciikha mu mkulo, pakati pa maluwa ya m’madzi, ndiciwauza wana wanguwo kuti: ‘Mbatiyendeni, tin’bwerera pomwe pambuyo pa mtsonkhano.’ Masikatiyo, kudacita conzi kwene-kwene. Pomwe tidabwerera, tidagumana nsomba zizinji zinkubisalika m’maluwa ya m’madziyo thangwe ra conzico. Tenepo, tidamiza citundu cathu cire, ticiphata nsomba zizinjisa, zomwe tidazigulisa kuti tigule cakudya ca mdzinga wenseneyo.”

Nthawe na nthawe, atumiki wa Yahova wa ku Mianmar wadawona Mulungu ankuteweza piciro lace lakutsangalaza, lakuti: ‘Inepano cipo ndicidzakusiya, ndipo cipo ndicidzakutaya.’ Tenepo, iwo wadaleweratu: ‘Yahova ni mthandizi wangu, ndindzagopa lini. N’ciani comwe munthu angandicite?’—Wahebereu 13:5, 6.