Nkhani Zakutithandiza mu Utumiki
1. Kodi nkhani zakuti “Kucheza ndi Munthu Wina,” zina bzakulinga bziwiri bziponi?
1 Nthawe na nthawe, Nsanja ya Olonda yakugawira, imbacosa nkhani yakuti “Kucheza ndi Munthu Wina.” Nkhanizo zina bzakulinga bziwiri—kulatiza mapfunziso ya Bibliya mu njira yakutokonya mitima ya wanthu, na kutilatiza momwe tingakumbukirire nkhani inango na wanthu mwa ulemu. (1 Pedru 3:15) Kodi tingaziphatise basa tani bwino nkhanizo?
2. Kodi tingaziphatise tani basa nkhanizo mu utumiki?
2 Ziphatiseni Basa mu Utumiki: Mungambakoye marevista manango ya Nsanja ya Olonda yomwe yana nkhanizo. Pomwe mweneciro nyumba, munthu wakufuna kudziwa bzizinji ayai nyakupfunza Bibliya wakucitani mbvunzo, ayai walamusa nkhani yomwe idafokotozedwa mu m’nkhanizo, mupaseni revista ibodzi yomwe ina nkhaniyo, mucicezerana naye. Penu mulibe revista yakudindidwa yomwe ina nkhaniyo, pinango mungakaicose pa jw.org/nyu.
3. Kodi tingacezerane tani nkhanizo na mweneciro nyumba?
3 Kodi mungacezerane tani nkhanizo na munthu? Winango wambakumbira kuti munthuyo alewenge mwakubveka mafala ya mweneciro nyumba, pomwe iwo wankulewenga mafala ya Mpalizi. Iwo wadazindikira kuti kulewenga nkhani za wanthu awiri womwe wankucezerana nkhaniyo, kumbatokonya kwene-kwene wanthuwo, thangwe bzimbawapasa mpata wakupenda bzikhulupiro bzawo mu njira yakusaya kuwadodomesa.—Bzakutonga (Deuteronomo) 32:2.
4. Kodi tingaziphatise tani basa nkhanizo kuti tibzipfunzise tekha?
4 Bzipfunziseni mwekha , Mucipfunzisambo Winango: Pomwe munkuzilewenga nkhanizo, mbanembani pa mbali mavesi, bzitsanzo na kakumbukidwe kakuphatisidwa basa mu nkhanizo. Bvani momwe nkhanizo zinkufokotozedwera. Patsogolo pace, citanimbo bzibodzi-bodzibzo mu utumiki. (Mimwani [Miyambo] 1:5; 9:9) Mpfumakazi ibodzi idati: “Kulewenga nkhanizi, kuli ningati kupfunza kucokera kwa mwanzako omwe ni mpainiya wa luso—omwe nthawe zense ambadziwa bzomwe an’funika kulewa!”
5. Kodi tingathandize tani anyakupfunza wanthu wa Bibliya kukonzekera utumiki?
5 Mungaphatisembo basa bziratizo bzakunembedwabzo kuti muthandize anyakupfunza wanu wa Bibliya kukonzekera utumiki. Lewengani pabodzi nkhanizo, nyakupfunzayo acimbalewenga mafala ya mpalizi. Mwa njira imweyi, anyakupfunza wa Bibliyawo wangapfunze kufokotoza bzikhulupiro bzawo mu njira ya ulemu. (Wakolose 4:6) Inde, nkhanizi ni njira ibodzi yomwe Yahova ankutithandizirambo ‘kukwanirisa bwino’ utumiki bwathu.—2 Timotio 4:5.