Kodi Mitsonkhano ya Mboni za Yahova Ingakuthandizeni Tani?

Kodi mudacemeredwa kale ku mitsonkhano ya Mboni za Yahova? Pinango mungacite thupo pang’ono penu n’kuyamba kuyenda ku mitsonkhanoko. Ndipo mungabzibvunze kuti: ‘Kodi n’ciyani cimbacitika ku mitsonkhano imweyi? Thangwe ranyi njakufunika? Thangwe ranyi nin’funika kuyenda ku mtsonkhanoko? Mu pfunziro lino, munipfunza thangwe ranyi kutsonkhana na wanthu winango kungakuthandizeni kukhala pa uxamwali na Mulungu na phindu lomwe mungaligumane na mitsonkhanoyo.

1. Thangwe ranyi Mboni za Yahova zimbagwezekana kuti zinamate pabodzi?

Onani momwe anembi wa Bibliya adalatizira thangwe likulu lakumbatsonkhanira pabodzi: “Nin’dzatumbiza Yahova pakati pa gulu la wanthu wakutsonkhana.” (Salimo 26:12) Mpsibodzi-bodzimbo, Mboni za Yahova zimbakomedwa kwene-kwene kumbatsonkhana pabodzi. Pa dziko lentse la pantsi, iwo ambatsonkhana pabodzi sumana iri-yentse kuti atumbize Mulungu, kuimba nyimbo na kupemba. Ndipo gole liri-lentse iwo ambacita mitsonkhano mikulu-mikulu.

2. Kodi mun’dzapfunza ciyani pa mitsonkhano yathu?

Pa mitsonkhano yathu timbapfunza Fala la Mulungu, “limbafotokozedwa mwakubveka bwino na kubvekesa thandauzo lace.” (Werengani Nehemiya 8:8.) Ndipo imwepo mukadzabwera, mun’dzapfunza bza Yahova na makhalidwe yace yabwino. Imwepo mukadziwa bzizinji bza lufoyi lace ni pomwe mun’dzakhala naye pa uxamwali. Ndipo mun’dzapfunzambo momwe iye angakuthandizireni kukhala na moyo wabwino.—Zaiya 48:17, 18.

3. Kodi mun’dzagumana phindu liponi mukadzatsonkhana nafe?

Yahova akutiuza kuti “bwerani timbakumbukirane kuti timbalimbikisane pa kulatiza lufoyi na kucita mabasa yabwino, ticileka kusiya kutsonkhana kwathu pabodzi.” (Ahebereu 10:24, 25) Ku mitsonkhano yathu, imwepo mun’dzadziwana na wanthu omwe ambafunanadi ndipo akufunambo kupfunza bzizinji bza Mulungu ninga imwepo. Ndipo mun’dzabva nkhani zakulimbikisa zakucokera m’Bibliya. (Werengani Aroma 1:11, 12.) Imwepo mun’dzadziwana na wanthu azinji omwe ali pa banja na omwe ali lini pa banja omwe akukomendwa napo kuti akugumana na mabvuto mazinji. Yamweya ni mathangwe manango yomwe yambacitisa Yahova kufuna kuti timbatsonkhane pabodzi nthawe zentse.

FUFUDZANI BZINANGO

4. Mitsonkhano ya Mboni za Yahova

Kale-kale, Akristau akhatsonkhana pabodzi kuti anamate Yahova. (Aroma 16:3-5) Werengani Akolose 3:16, ndipo mukamala cezeranani mbvunzo wakutewerayu:

• Kodi Akristau wakale-kale akhanamata tani Yahova?

VIDIYO: N’ciyani Cimbacitika mu Nyumba ya Umambo? (2:12)

• Kodi pana kundendemerana kuponi pakati pa bzomwe bzimbacitika mu Nyumba ya Umambo na bzomwe mwawerenga pa Akolose 3:16?

• Kodi pana cinthu comwe cakudekerani mu vidiyoyi ayai pa cithunzi-thunzici?

Werengani 2 Akolinto 9:7, ndipo mukamala cezeranani mbvunzo wakutewerayu:

• Thangwe ranyi mitsonkhano ya Mboni za Yahova njafovolo?

Imwepo na pfunzisi wanu onani bzomwe bzin’dzapfunzidwa pa mitsonkhano sumana ino.

• Kodi ni mbali iponi ya pa mitsonkhanoyo yomwe mukuwona kuti ingakuthandizeni?

Kodi mukhadziwa?

Pa jw.org, mungagumane mbuto na nthawe yomwe mitsonkhano imbacitika ku mbuto zakusiyana-siyana pa dziko lentse la pantsi.

1. Pa mitsonkhano yathu pambafotokozedwa nkhani, pambacitidwa bziratizo ndipo pambalatizidwa mavidiyo. Mitsonkhanoyo imbayamba na kumala na nyimbo pabodzi na mpembo

2. Mbali zinango za mitsonkhanoyo, wanthu ambakhala na mwayi wa kupereka mitawiro

3. Wana, acikulire, mabanja na omwe ali lini pa banja, wentse ambatambiridwa na manja mawiri

4. Mitsonkhano yathu njafovolo. Mboni za Yahova zimbafambisa lini ntsengwa ayai palato yakukumbira kobiri pa ­mitsonkhano yawo

5. Pambafunika nyongo kuti timbatsonkhane

• Thangwe ranyi tin’funika kumbatsonkhana nthawe zentse?

KODI MWAPFUNZA CIYANI?

Kugumanika pa mitsonkhano kun’dzakuthandizani kupfunza bzizinji bza Yahova, kulimbikisa uxamwali bwanu na iye na kumunamata pabodzi na wanthu winango.

Mibvunzo yakubwerezera

• Thangwe ranyi Yahova ambatiuza kuti timbatsonkhane pabodzi?

• Kodi n’ciyani comwe mun’dzapfunza ku mitsonkhano ya Mboni za Yahova?

• Kodi mukuwona kuti mitsonkhano ingakuthandizeni tani?

ONANI POMWE IBZI

Tani penu mukucita thupo kukagumanika ku mtsonkhanoko? Onani bzomwe munthu munango adacita pomwe akhacitambo thupo.

Tin’dzayebwa Lini Momwe Adatitambirira (4:16)

Onani momwe tswaka linango limbakomedwera na kugumanika pa mitsonkhano na bzomwe ambacita kuti apitirize kugumanika ku mitsonkhanoko nthawe zentse.

Ndidakomedwa Kwene-kwene na Mitsonkhano! (4:33)

Onani momwe winango ambaiwonera mitsonkhano.

“Thangwe Ranyi Nin’funika Kumbagumanika pa Mitsonkhano pa Nyumba ya Umambo?”(Nkhani ya pa jw.org)

Onani momwe munthu munango omwe akhali waciwembo adacinjira moyo wace pambuyo pa kutsonkhana na Mboni za Yahova.

“Kuli-kwentse Komwe Ndikhayenda Ndikhana Mfuti”(Ntsanza ya Mulindiri ya 1 Julho, 2014)

5. Dziko lacinja kwene-kwene kuyambira mu 1914

Onani VIDIYO.

VIDIYO: Dziko Lacinja Kwene-kwene Kuyambira mu 1914 (1:10)

Jezu adaleweratu momwe bzinthu bzingadadzakhalira pa dziko la pantsi iye angadayamba kutonga ninga Mambo kudzulu. Werengani Luka 21:9-11, ndipo mukamala cezeranani mbvunzo wakutewerayu:

• Kodi ni bzinthu bziponi bzomwe mumbawona ayai kubva kuti bzikucitika?

Mpostolo Paulo adaleweratu bza makhalidwe yomwe wanthu angadadzakhala nayo mu ntsiku zakumalizira za utongi bwa wanthu. Werengani 2 Timotio 3:1-5, ndipo mukamala cezeranani mbvunzo wakutewerayu:

• Kodi imwepo mumbawona kuti wanthu ana makhalidwe yamweya ntsiku zino?

6. Latizani kuti mumbakhulupira kuti Umambo bwa Mulungu bukutonga

Werengani Mateu 24:3, 14, ndipo mukamala cezeranani mibvunzo ikutewerayi:

• Kodi ni basa liponi lomwe likulatiza kuti Umambo bwa Mulungu bukutonga?

• Kodi imwepo mungathandizirembo tani basa limweri?

Umambo bwa Mulungu bukutonga kale kudzulu ndipo ntsiku yakuti buyambembo kutonga pa dziko la pantsi pano yasala pang’ono. Werengani Ahebereu 10:24, 25, ndipo mukamala cezeranani mbvunzo wakutewerayu:

• Kodi n’ciyani comwe tin’funika kucita “pomwe tikuwona kuti ntsikuyo ikufendera”?