Oborẹ Wu Ne Ru Ha Ukẹro Ro Serhọ Ni Enyo Ro Mwu Ọwan

MANẸ Tony ra hunute uvuẹn urhomu-ẹmro ọrukaro, ọ sabu nyerakpọ rọ vẹnẹren orhianẹ o rhiabọ dede userhumu enyo ẹda ye. Ọrẹn, nime inyo buebun rọ da i vwe mwuie-e, no rorori taghene ọye rhẹ ọdinyo-o. Mesoriẹ iroro yi ọ sọ?

Iroro yi ọ sọre nime enyo na yo mwuie brorhiẹn. Tony ọrhọ da enyo vrẹn oma ne, aphẹrhiẹn yen ọ vwọ rhọ dabu wia-an. Ọrhọ ji da inyo buebun ne, aphẹrhiẹn yen ọrhẹ irueruo yi i vwe rhe serhọ-ọ.

Tony ọ ji kpara enyo da nime ọ guọlọre nẹ ihworho i rha ha ukẹro ọgba nie. Allen ra hunute vrẹn ne, o kiki ta taghene o vwo ebẹnbẹn enyo ẹda-a. Nọ tare, “Mie tiomanẹ da enyo, ji ruẹ kamẹriẹn mi vwa da enyo buẹ-ẹn. Mie ruẹ ọnana ni mi sabu rha da enyo.” Dedevwo awọrọ a mẹriẹn taghene enyo o suẹn Tony ọrhẹ Allen, ọrẹn aye awanva i vwe rorie omara-an. O fori nẹ aye i ruẹ emru kpahen erhirhiẹ aye, neneyo aye i sabu suẹn inyo ẹda aye. Ọrẹn me yẹ aye ina sabu ru?

Kpare Idjaghwẹ!

Ihworho buebun ri sabu tiobọnẹ inyo ẹda i nyalele urhebro i Jesu rọ tare: “Omarana, orhianẹ ukẹro obọrhe ọnọ, o rhiẹ ukọ wẹn, shorie nie ne wu donrien fughwẹ. Fọkime orhomurun wu na kpare owu usuẹn oghọn ọnọ fughwẹ ukperẹ ọsoso ugboma na ọnọ ruẹ Gehenna.”—Matthew 5:29.

Jesu ọ vwo haye ta taghene a ha ẹkuọn rẹn oma ọwa-an. Ọrẹn izede udje, Jesu ọ haye ta rẹn ọwan ne tiobọnẹ kemru kemru rọ nọ sabu ghwọghọ onyerẹnkugbe ọwan rhẹ i Jehova. Itiọrurhomẹmro, ọnana ọ lọhọ ọkezẹko-o. Ọrẹn, ọnọ lẹrhẹ ọwan kẹnoma rẹn iroro ọrhẹ erhirhiẹ ri na sabu lẹrhẹ ọwan da inyo vrẹn oma. Omarana, awọrọ i rha ta taghene enyo wa da o bun phan, gba kpare idjaghwẹ ogege ne wu sabu suien.a Orhianẹ wu sabu suie-en, gba kẹnoma rẹn inyo ẹda. Ọnọ sabu bẹn ne ruie, ọrẹn o rhomu ghwẹ ọrẹ inyo ẹda ọnọ ghwọghọ akpọ rhotọre.

Wu na sabu rhiẹ ọgba inyo ẹda ọrhọ tobọ rhianẹ wu vwa da enyo vrẹn oma-a? Orhiomaran, idjaghwẹ ego ye wu na sabu kpare neneyo wu ha ukẹro ro serhọ ni enyo ro mwu ọwan?

Ekete wu na Mẹrẹn Userhumu

1. Vwo esegburhomẹmro taghene Osolobrugwẹ ọnọ ha userhumu wẹn, wu rha nẹrhomo vwe yi nẹ ẹhẹn rhe. Baibol na ọ ha urhebro ọnana rẹn ihworho ri ghini guọlọ ga i Jehova: “Uvuẹn i kemru kemru ọrẹ ẹrhomo kugbe orẹ ọrhẹ ekpẹmẹ, are i ta edamẹ are harẹn Osolobrugwẹ; ọke ọrana, ufuoma ọrẹ Osolobrugwẹ rọ ghwẹ ọmẹrẹnvwrurhe ephian, nọ nọ sẹrorẹ ọmudu ọrhẹ oghwa iroro are nyoma Kristi Jesu.” (Philippians 4:6, 7) Me wu na sabu nẹrhomo kpahen neneyo wu sabu vwo aruẹ ufuoma ọnana?

Kwerhọ ye taghene wu vwo ebẹnbẹn inyo ẹda, ne wu ji ruẹ emru kpahiẹn. Wu rha ta rẹn Osolobrugwẹ kpahen oborẹ wa guọlọ ruẹ, Jehova ọnọ ha ebrurhọ rhẹ omẹdamu ọnọ ji ha userhumu wẹn kẹnoma rẹn ebẹnbẹn erọrọ. “Ohworho ro rhurhu ọdandan ọnẹyen o vwo efikparobọ-ọ, ọrẹn ọrẹ ọ rhian ọdandan yen jeghwai nyajẹ aye vwo, ene dje arodọmẹ riẹn.” (Proverbs 28:13) Jesu ọ tare taghene ana sabu nẹrhomo: “Wu vwe suẹn ame ruẹ ọdamuni-i, ọrẹn simi ame nẹ abọ ọvwọkon na.” (Matthew 6:13; ekete ra djokarhọ) Marhẹ wu ne ru nyalele aruẹ ẹrhomo ọrana, bọgo wu na mẹrẹn ẹkpahenrhọ ẹrhomo wu nẹren?

2. Mẹrẹn omẹgbanhon nẹ ẹmro Osolobrugwẹ. “Ẹmro Osolobrugwẹ o nyerẹn, . . . ọ sabu rhe iroro ọrhẹ oborẹ ọ ha uvuẹn ọmudu na.” (Hebrews 4:12) Egba inyo ẹda buebun i sabu tiobọnẹ uruemru na nime aye e se i Baibol na kẹdẹkẹdẹ, ji roro kodo kpahen eghwẹmro sansan ri ha uvuien. Ọgba ijoro owu ro vwo ofẹnzẹ i Jehova nọ tare: “Omamerhomẹ ọ havwiẹ harẹn ohworho rọ vwọ nyalele urhebro evwọkon, ọrẹn urhi Jehova yọ mai je yi, no ji se urhi ọnẹyen na, roro kpahiẹn ason ọrhẹ uvo. . . . Kemru kemru rẹ ọye o ruru nẹ ono serhọ.”—Psalm 1:1-3.

Nime Allen o lele Iseri Jehova yono i Baibol na kugbe, ọnana nọ yẹriẹ omẹgbanhon rọ sabu tiobọnẹ inyo ẹda vrẹn oma, nọ tare, “O mwurun mẹ ẹro taghene Baibol na ọrhẹ iruemru-urhi ri ha uvuien, yi ha userhumu mẹ tiobọnẹ inyo ẹda vrẹn oma, orhiomara-an, manẹ mi hwu ne.”

3. Vwo omerhesun. Baibol na o vwo iyẹnrẹn imizu uvuẹn ukoko na ri rhiẹ idinyo bi, ri ruẹ oma aye fon ne “nyoma ẹhẹn ọfuanfon ọrẹ Osolobrugwẹ ọwan.” (1 Corinthians 6:9-11) Izede ọgo? A sabu ha userhumu rẹn aye tiobọnẹ uruemru inyo ẹda vrẹn oma nyoma aye e vwo omerhesun, ro rhiẹ uruemru ra sabu vwo nyoma userhumu ẹhẹn ọfuanfon Osolobrugwẹ. “Wu vwa da inyo vrẹn oma uvuẹn erhirhiẹ ri sọre-e, ọrẹn jenẹ ẹhẹn ọfuanfon na ọrhọ vuọn oma.” (Ephesians 5:18; Galatians 5:21-23) Jesu Kristi o veri taghene “Ọsẹ na rọ ha odjuwu [ono] tiobọnu ẹhẹn ọfuanfon na rẹn ihworho ra nekpẹn yen mie yi.” Omarana, “are i rha nọ, na na yẹ are.”—Luke 11:9, 13.

Ihworho ri guọlọ ha ẹga ro fiotọre rẹn i Jehova ina sabu vwo omerhesun nyoma isese ọrhẹ uyono i Baibol na, kugbe ẹrhomo ro nẹ ẹhẹn rhe ọke ephian. Ukperẹ wu na lẹrhẹ ẹhọn seriotọre, rhiabọ dede ive rọ ha uvuẹn Ẹmro Osolobrugwẹ rọ tare: Ohworho rọ “wọ oborẹ o sekpahen ẹhẹn na, ọnọ mẹrẹn arhọ i bẹmẹdẹ nẹ ẹhẹn na rhe. Ọwan i vwe fiobọrhotọre orhorhomu e ruo-o, fọkime ana riẹ erere yi orhianẹ e fiobọrhotọre-e.”—Galatians 6:8, 9.

4. Djẹ omamọ okugbe. “Ohworho rọ nyalele ọvwẹghwanren ọnọ ghwanren, ọrẹn, ohworho ro lele akpa ruẹ kugbe ọnọ rioja.” (Proverbs 13:20) Ta rẹn igbehian taghene wu guọlọ suẹn oborẹ wa ha enyo ro mwu ọwan ruiruo lele. Baibol na o ha orhetio phia taghene wu rhe tiobọnu “enyo ẹda vronma, akpẹriọ gegerege, [ọrhẹ] enyo ẹda bun phan,” igbehian erọrọ ri rhiẹ idinyo ni na ‘ta erharhere ẹmro kpahuọn,’ nime ono gbe aye unu. (1 Peter 4:3, 4) Brorhiẹn wu na kẹnoma rẹn ihworho ri na sabu rha lẹrhuọ da inyo vrẹn oma.

5. Brorhiẹn uchunu enyo wu na da. “Are i vwe jenẹ enyerakpọ ọnana ọ ma are-e, ọrẹn, are i gbe ruẹ ewene nyoma are ine wene iroro are, neneyo are i sabu djephia harẹn omobọ are ọhọre Osolobrugwẹ rọ gbare, ro ji rhomu, rọ jeghwai kwerhọ.” (Romans 12:2) Wu rhe kwe nẹ iruemru-urhi Baibol ni ha userhumu wẹn brorhiẹn uchunu enyo wu na da, ukperẹ ono rhiẹ igbehian yanghene “enyerakpọ ọnana,” wu ne nyerẹn akpọ rẹ Osolobrugwẹ o vwo ekwerhọ kpahen. Ọrẹn, marhẹ wu ne ru rhe uchunu enyo ro mwuo?

Wu rha da enyo tẹ erhirhiẹ rọ hobọte iroro yanghene orhienbro ọnọ, enyo na o bun phan ne. Omarana, wu vwa hẹrhẹ nẹ enyo o mwu vwẹre bọmọke wu na ki dobọji-i. Rhe uchunu enyo wu na sabu da. Wu vwa da vrẹn ye-e, neneyo o jo rho mwuo.

6. Wu vwe je na riẹruọ da enyo bun pha-an. “Jenẹ ẹmro ọnọ Ee o mevirhọ ee, Ẹjo o mevirhọ ẹjo.” (Matthew 5:37) Ohworho rọ ha use wẹn rhiẹ akpẹriọ ọrhọ ta wẹn ne wu da enyo vrẹn oborẹ wu na sabu da, ha izede ọghọ tiẹn. “Jenẹ ẹmro are orhiẹ ọrẹ dẹndẹn ọke ephian, nọ vuọn rhẹ adawun, neneyo are i rhe oborẹ are ina kpahenrhọ harẹn owuowuọwan.”—Colossians 4:6.

7. Nekpẹn userhumu. Ya odẹ igbehian enọ rhotọre ri na sabu ha userhumu wẹn suẹn uruemru inyo ẹda. “Awanva i rhomu ghwẹ owuọwan, fọkime aye i vwo omamọ osa fọkiẹ owian ọgbogbanhon aye. Fọkime owuọwan usuẹn aye orho se, ọreva ye na nọ sabu ha userhumu riẹn vẹnrẹn.” (Ecclesiastes 4:9, 10; James 5:14, 16) National Institute on Alcohol Abuse and Alcoholism rọ ha uvuẹn United States nọ ji ta: “Ọnọ sabu bẹn ọkezẹko wu ne ti nẹ uchunu enyo wa da. Nekpẹn userhumu mie ihworho ekrun ọrhẹ igbehian enọ ne wu sabu nyamwu ẹkẹ wu bru tẹ oma.”

8. Nyamwu orhienbro wu bruru. “Are i rhiẹ ihworho re ruẹ lele ẹmro na, orhiẹ ere rhon yi ọvo-ọ, nẹ are i ja rha phiẹ oma are rhọ rhẹ iroro efian. Ọrẹn, ohworho rọ dabu ni urhi ọgbagba ọrẹ ugbomọphẹ na fiotọre, jeghwai nyalelie, ono rhiẹ ohworho rọ ha ẹmro na wian orhiẹ ọrẹ ọ sẹriẹro-o; oma nọ nọ ji merhiẹn fọkiẹ oborẹ o ruẹ.”—James 1:22, 25.

Oborẹ wu ne ru Tiobọnẹ Uruemru ra da Inyo Vrẹn Oma

Rhẹ ihworho ephian ra da enyo obuebun yẹ idinyo-o. Ọrẹn, nime ihworho ezẹko a da enyo omamọ ji da ye ọgbọ buebun, ọnana nọ dẹrẹrhiẹ uruemru aye. Ra mẹriẹn taghene idinyo ina sabu kpomu orhianẹ aye i dobọ inyo ẹda ji kpregede, aruẹ ihworho enana i guọlọ userhumu idọkitọ. Allen nọ tare: “Ọke mia damoma mi na dobọ inyo ẹda ji, ni mi mẹrẹnvwrurhe taghene uyono i Baibol ọvo o te-e. Nime mi ji guọlọ userhumu idọkitọ.”

Idinyo buebun i guọlọ userhumu idọkitọ, nẹ aye i sabu fi uruemru inyo ẹda vrẹn oma kparobọ jeghwai kẹnoma riẹn.b Nime ihworho ezẹko ina sabu kpomu orhianẹ aye i dobọ inyo ẹda ji ukwọgbọ, aye ne riẹ ihọsipita yanghene da imwu ri na ha userhumu rẹn aye dobọ inyo ẹda ji. Jesu nọ tare: “Ihworho ri vwo omọkpokpọ a guọlọ ohworho ro no simi aye-e, ọrẹn, ihworho re kpomẹ yi guọleriẹ.”—Mark 2:17.

Erere ra Mẹrẹn Arha Nyalele Ọkpọvi Osolobrugwẹ

Osolobrugwẹ yo tiobọnẹ urhebro ẹghwanren kpahen oborẹ ana ha enyo ruiruo lele, nime ọ guọlọ oborẹ ọ mai rhomu rẹn ọwan nẹ ọke ọnana ya ruẹ i bẹmẹdẹ. Ọke ẹgbukpe uzegbẹne a vrẹn ọke Allen o tiobọnẹ inyo ẹda, nọ tare: “Oma ọ merhenren mẹ taghene mi sabu wene akpenyerẹn mẹ ne, ji yono taghene Jehova o vwo omwemẹ rọ nọ ha userhumu mẹ kpọ akpenyerẹn mẹ vi, ne rhe taghene . . . ” Allen nọ dunuji nime ọke rọ karorhọ oborẹ ọ phia vrẹn ne, amioviẹ no koko ukẹruiẹ. “Um, . . . Jehova o vwẹruọ jeghwai kerhọ ọwan ọke ra guọlọ userhumu, ọrana omamọ emru dẹn.”

Omarana, orhianẹ wẹwẹ ọdinyo yanghene ọgba inyo ẹda, wu vwe roro taghene wu sabu tiobọnẹ uruemru na dẹ-ẹ. Allen ọrhẹ awọrọ i dẹrughwaroghwu aruẹ erhirhiẹ ọnọ ne, ezẹko usuẹn aye i ji tiobọnẹ uruemru na yanghene kẹnoma rẹn inyo ẹda ne. Aye a vioja-a; wu ji vioja-a.

Sẹ wu brorhiẹn wu na da ibiẹ enyo yanghene kẹnoma riẹn phẹlẹphẹlẹ, damoma nyalele urhebro Osolobrugwẹ rọ tare: “Orhianẹ are ine kwe nyalele ekama mẹ! Ufuoma are nọ nọ họhọ urhie, habaye irueruo ọsoso are nọ nọ họhọ ukolame rọ ha urhie ọduado na.”—Isaiah 48:18.

[Ekete Ra Djokarhọ]

[Ekpeti/Ifoto]

Mia Sabu Suẹn Uchunu Enyo Mia da?

•Wu na sabu nọ oma:

•Mia da enyo buẹn vrẹn oborẹ mia da bi?

•Inyo ẹda o ti mẹ uhrun ọke ọnana ghwẹ ọke bi?

•Inyo mia da ọke ọnana i gbanhon ghwẹ eri mia da bi?

•Mia da enyo nẹ ebẹnbẹn mi vwori i sabu sẹre mẹ ẹro?

•Ugbehian yanghene ohworho ekrun mẹ o brenu kpahen uruemru inyo ẹda mẹ dẹ ne?

•Mi ruẹ okpetu dẹ ne uvuẹn oghwa, obẹ iruo yanghene ekete erọrọ fọkiẹ inyo ẹda?

•Ọ bẹn mẹ mi na ja da enyo ọkprughwre owu?

•Evwan o biomi mẹ orhianẹ awọrọ a kẹnoma rẹn enyo ro mwu ọwan?

•Mie tiẹ uchunu enyo mia da nuẹ, nẹ awọrọ i ja rha mẹriẹn?

Orhianẹ ẹkpahenrhọ ọnọ rẹn owu usuẹn enọ na ee, nọyẹ o fori ne wu kpare udjoghwẹ wu ne suẹn uchunu enyo wa da.

[Ekpeti/Ifoto]

Re Brorhiẹn Ẹghwanren Kpahen Oborẹ Ana ha Enyo ro Mwu Ọwan Ruiruo Lele

Bọmọke wu na ki da enyo ro mwu ọwan, nọ oma:

•O rhiẹ oborẹ oserhọ ne mi da enyo ro mwu ọwan, gbinẹ mi kẹnoma riẹn?

Urhebro: Ohworho rọ vwọ sabu suẹn uchunu enyo rọ da, ọgbọ kẹnoma rẹn inyo ẹda.

•Marhẹ enyo mi na da ono bun te?

Urhebro: Rhe uchunu enyo ro mwuo ne wu ki tuẹn enyo ẹda rhọ.

•Ọkiọgo yi mi na da enyo?

Urhebro: Wu vwa da enyo bọmọke wu na ki ghwa imoto; vwobọrhọ irueruo ri guọlọre taghene wu kpomavi; ruẹ irueruo ogame; ọke wa mẹrenvwan; yanghene ọke wa da aruẹ imwu ezẹko.

•Ekete ọgọ yi mi na da enyo?

Urhebro: Uvuẹn ekete ro serhọ; wu vwe tiomanu da enyo-o; wu vwa da enyo udaro ihworho ra damoma aye ina dobọ inyo ẹda ji-i.

•Ayọmo yi mi ne lele da enyo?

Urhebro: Obọdẹn igbehian yanghene ihworho ekrun ọnọ; wu vwe lele idinyo da enyo kugbe-e.

[Ekpeti/Ifoto]

Ẹmro Osolobrugwẹ ọ ha Userhumu Rẹn Ọdinyo Owu Dobọ Inyo Ẹda ji

Supot ro rhirhiẹ ẹkwotọre i Thailand ọgba inyo ẹda. Ọke rọ tonrhọ, owuọwọn ọvo yọ da enyo. Bibiesuọn bibiesuọn, nọ tuẹn inyo ẹda rhọ urhiọke, ọke oru, nọ ji da enyo erhẹrhuvo. Ọgbọ buebun, ọ ha arudo da enyo vrẹn oma. Ọrẹn, nọ tuẹn uyono i Baibol rhọ rhẹ Iseri Jehova. Supot nọ dobọ inyo ẹda ji, ọke ro yono taghene Jehova o vwo utuoma kpahen era da inyo vrẹn oma. Ọrẹn ọke oru, nọ rharhumu tuẹn inyo ẹda rhọ. Ọnana ọ lẹrhẹ ẹhẹn ihworho ekrun ọnẹyen seriotọre.

Ọrẹn, Supot o ji vwo ẹguọlọ kpahen i Jehova, ọ ji guọlọ ha ẹga riẹn izede ro serhọ. Igbehian i Supot na ji ha userhumu riẹn ji ha urhebro rẹn ihworho ekrun ọnẹyen, nẹ aye i rhe lelie ghwọghọ ọke kugbe, ukperẹ aye ina sẹrerhumuje vwo. Uvwrọke ọrana, oborẹ ọ ha uvuẹn 1 Corinthians 6:10, rọ tare taghene ‘idinyo i ha Uvie Osolobrugwẹ riuku-u,’ yọ ha userhumu rẹn Supot mẹrẹn oborẹ erhirhiẹ rọ havwọ na ọ gbanhon te. Nọ mẹrẹnvwrurhe taghene o fori nọ damoma fi uruemru inyo ẹda vrẹn oma kparobọ.

Ọfọ ọnana, Supot no brorhiẹn taghene ọnọ kẹnoma rẹn inyo ẹda phẹlẹphẹlẹ. Nyoma userhumu ẹhẹn ọfuanfon Osolobrugwẹ, ọkpọvi rọ ha i Baibol na, userhumu ekrun ọnẹyen, ọrhẹ imizu ukoko na, Supot nọ sabu fi uruemru inyo ẹda vrẹn oma kparobọ. Oma ọ merhen ekrun ọnẹyen omamọ, ọke rọ homakpahontọre rẹn Osolobrugwẹ ji bromarhame. Vwana, oborẹ i Supot ọ guọlọ o terie obọ ne, nọyẹ omamọ onyerẹnkugbe rhẹ Osolobrugwẹ, ọ ji ha ọke ọnẹyen yono awọrọ kpahen Osolobrugwẹ ne.