UYONO 15
Ọrọmo Yi Jesu?
Jesu owuọwan usuẹn ihworho ri mai titi uvuẹn ikuegbe ituakpọ. Ihworho buebun i rhe odẹ i Jesu, ọrẹn, aye e rhe aruẹ ohworho rọ havwọ-ọ, habaye, ihworho buebun i vwo iroro sansan kpahen aruẹ ohworho i Jesu ọ ghini havwọ. Me yi Baibol na ọ ta kpahiẹn?
1. Ọrọmo yi Jesu?
Jesu ọmakashe ro vwo omẹgbanhon ro rhirhiẹ obẹ odjuwu. Ọye yi Jehova Osolobrugwẹ ọ kiki ma, bọmọke ọ ki ma ekwakwa erọrọ. Omarana, ne serie “ọmọ ọkpako emama ephian.” (Colossians 1:15) Baibol na o se i Jesu “Ọmọ owu ọvo Osolobrugwẹ o vwori,” fọkime i Jesu ọvo yi Jehova ọ ha abọ ye ma. (John 3:16) Jesu ọ dabu lele Ọsẹ ye Jehova wian, ro lelie ma ekwakwa ephian. (Se Proverbs 8:30.) Me te ọke ọnana, Jesu ọ riamerhen obọdẹn onyerẹnkugbe rhẹ i Jehova. Ọye ọ fuevwan ga ẹrhẹ ọtẹmro rẹn Osolobrugwẹ, omarana, ne serie “Ẹmro na,” fọkime ọye yi Jehova o dje urhomu nọ ha iyẹnrẹn ọrhẹ ọkpọvi phia.—John 1:14.
2. Mesoriẹ i Jesu ọ rhiẹ otọrakpọ na?
Omẹ ẹgbukpe 2,000 ri vrẹnren, Jehova no ruẹ igbevwunu owu. Nọ nyoma ẹhẹn ọfuanfon ọnẹyen fiẹ arhọ i Jesu rhẹ oghwuvwiẹ ọmase ro vwo ji chiọghọ re se i Mary. Nyoma izede ọnana, ne vwiẹ i Jesu jerẹ onyakpọ. (Se Luke 1:34, 35.) Jehova o dje i Jesu rhiẹ otọrakpọ na no rhiẹ i Messiah, yanghene i Kristi re ve kpahen na, no simi ituakpọ.a Ọsoso aruẹmẹrẹn i Baibol na kpahen i Messiah na i rugba uvuẹn urhomie, ọnana nọ lẹrhẹ ihworho rhe i Jesu rhẹ i “Kristi na, Ọmọ Osolobrugwẹ ro nyerẹn na.”—Matthew 16:16.
3. Bọgo yi Jesu ọ havwọ vwana?
Ọke i Jesu o hwu jerẹ onyakpọ, Jehova nọ rhọmeriẹn jerẹ ọmakashe, nọ rharhumu riẹ odjuwu. “Osolobrugwẹ nọ hariẹ mwu ẹrhẹ ro rierun” oboran. (Philippians 2:9) Vwana, Jesu nẹ ọmakashe ro vwo omẹgbanhon omamọ, Jehova ọvo yo vwo omẹgbanhon ghwẹ i Jesu.
YONO KODO RHỌ
Yono riaro kpahen aruẹ ohworho i Jesu ọ ghini havwọ, ọrhẹ oborẹ ọsoriẹ ọghanren ne yono kpahiẹn.
4. Jesu orhiẹ Osolobrugwẹ Ọrọmaigbanho-on
Baibol na o yonorin taghene dedevwo i Jesu ọmakashe ro vwo omẹgbanhon omamọ obẹ odjuwu, ọ huvwele Ọsẹ ye ro ji rhiẹ Osolobrugwẹ ye, Jehova. Mesoriẹ a ta omaran? Kporo IVIDIO na, ne wu mẹrẹn oborẹ i Baibol na ọ ta kpahen oborẹ ẹrhẹ i Jesu o ru vẹnẹ ẹrhẹ Osolobrugwẹ Ọrọmaigbanhon na.
Ekete i Baibol enana ina ha userhumu rẹn ọwan rhe onyerẹnkugbe rọ ha uvwre i Jehova ọrhẹ i Jesu. Se ekete i Baibol na owuowu, orho ru, are i gba kpahenrhọ enọ enana:
Se Luke 1:30-32.
Marhẹ ọmakashe na o ru dje onyerẹnkugbe rọ ha uvwre i Jesu ọrhẹ i Jehova Osolobrugwẹ, “Ọrọ Mai Rierun na”?
Se Matthew 3:16, 17.
Ọke i Jesu o bromarhame, me yẹ uvwele ro nẹ obẹ odjuwu rhe na ọ tare?
Ọrọmo yo vwo uvwele ọrana?
Se John 14:28.
Ọrọmo yẹ ọkpako ro ji vwo omẹgbanhon omamọ? Ọsẹ gbinẹ ọmọ?
Me yi Jesu o mevirhọ ọke ro se i Jehova Ọsẹ ye?
Se John 12:49.
Jesu o roro taghene ọye ọrhẹ Ọsẹ ye ohworho owu? Me wu rorori?
5. Oborẹ o djerie phia taghene i Jesu yi Messiah na
O vwo aruẹmẹrẹn buebun uvuẹn i Baibol na kpahen i Messiah na, nọyẹ, ọrẹ Osolobrugwẹ ọ djẹre no simi ituakpọ. Kporo IVIDIO na, ne wu yono oborẹ i Jesu o ru ha aruẹmẹrẹn ezẹko te orugba ọke rọ rhiẹ otọrakpọ na.
Se aruẹmẹrẹn i Baibol enana, orho ru, are i gba kpahenrhọ enọ enana:
Se Micah 5:2, ne wu yono kpahen ekete re ne vwiẹ i Messiah na.b
Uvwiẹ i Jesu ọ ha aruẹmẹrẹn ọnana te orugba?—Matthew 2:1.
Se Psalm 34:20 ọrhẹ Zechariah 12:10, ne wu yono oborẹ i Baibol na ọ tare kpahen uhwu i Messiah na.
Aruẹmẹrẹn enana i rugba?—John 19:33-37.
Wu rorori taghene i Jesu yo rurie neneyo aruẹmẹrẹn enana i rugba kpahiẹn?
Me yẹ ọnana o yoniruon kpahen i Jesu?
6. A mẹrẹn erere erhe yono kpahen i Jesu
Baibol na ọ tare taghene ọghanranren omamọ ne yono kpahen i Jesu, ọrhẹ oborẹ Osolobrugwẹ ọ guọlọre no ru. Se John 14:6 ọrhẹ 17:3, orho ru, are i gba kpahenrhọ onọ ọnana:
Mesoriẹ ọghanren ne yono kpahen i Jesu?
Jesu o rhie izede na firhọ na sabu rhiẹ ugbehian Osolobrugwẹ. O yono ihworho urhomẹmro na kpahen i Jehova, nyoma yen, ya na sabu vwo arhọ i bẹmẹdẹ
OBORẸ IHWORHO EZẸKO A TA: “Iseri Jehova e vwo imwẹro kpahen i Jesu-u.”
Marhẹ wu na kpahenrhọ ye lele?
ME WU YONORIN?
Jesu ọmakashe ro vwo omẹgbanhon omamọ. Ọye Ọmọ Osolobrugwẹ, ọye yi ji Messiah na.
Ẹzẹkoko
Mesoriẹ e se i Jesu “ọmọ ọkpako emama ephian”?
Me yi Jesu o ruru ọ ki rhiẹ otọrakpọ na?
Marhẹ e ru rhe taghene i Jesu yi Messiah na?
GUỌLỌ IYẸNRẸN ERỌRỌ
Yono kpahen oborẹ e ru rhe taghene i Jesu yi Messiah na.
Guọlọ otọriẹ uvuẹn i Baibol na sẹ Osolobrugwẹ o rhiẹ ọsẹ rẹn i Jesu jerẹ oborẹ ituakpọ e ji rhiẹ esẹ rẹn emọ.
“Mesoriẹ e se i Jesu Ọmọ Osolobrugwẹ?” (Urhomu-ẹmro rọ ha uvuẹn itanẹti)
Yono kpahen oborẹ ọsoriẹ iyono Isolobrugwẹ Esa ri Tan Kugbe o vwo rhiẹ uyono i Baibol na.
Se kpahen oborẹ akpenyerẹn ọmase owu o ru wene ọke ro yono oborẹ i Baibol na ọ tare kpahen i Jesu.
a Uvuẹn uyono ọrẹ 26 ọrhẹ 27, ene yono kpahen oborẹ ọsoriẹ ituakpọ a guọlọ usimirhọ, ọrhẹ oborẹ i Jesu ono ru simi ọwan.
b Se Iyẹnrẹn ra habaye 2, ne wu mẹrẹn aruẹmẹrẹn rọ ta kpahen ọke i Jesu ọnọ homaphia uvuẹn otọrakpọ na.