Seenaa Baraa Isa Tokkoffaa
14 Hiiraam+ mootiin Xiiros Daawitiif mana* akka ijaaraniif ergamtoota, akkasumas saanqaa gaattiraa, namoota dhagaa bocanii* fi anaaxota gara isaatti ni erge.+ 2 Daawitis inni saba isaa Israaʼeliif jedhee mootii guddaa waan isa godheef,+ Yihowaan Israaʼel irratti mootii godhee cimsee akka isa dhaabe ni beeke.+
3 Daawit Yerusaalem keessatti haadhotii manaa dabalataa ni fuudhe;+ ijoollee dhiiraa fi ijoollee durbaa dabalataas ni dhalche.+ 4 Ijoolleen inni Yerusaalem keessatti dhalche kanneen kana turan:+ Shaamuʼaa, Shoobaab, Naataanii+ fi Solomoon;+ 5 Yibhaar, Elishuʼaa, Elpaalet, 6 Nogaa, Nefeeg, Yaafiʼaa, 7 Elishaamaa, Beʼelyaadaa fi Elifeelet.
8 Filisxeemonni Daawit guutummaa Israaʼel irratti mootii taʼee dibamuu+ isaa yommuu dhagaʼan, hundi isaanii isa barbaaduu dhufan.+ Daawitis kana yommuu dhagaʼu isaaniin waraanuuf baʼe. 9 Achiis Filisxeemonni dhufanii Sulula* Refaayim ni weeraran.+ 10 Daawitis, “Ol baʼee Filisxeemota waraanuu? Harka kootti dabarsitee isaan ni kennitaa?” jedhee Waaqayyoon gaafate. Yeroo kanatti Yihowaan, “Ol baʼi, anis harka keetti dabarsee isaan nan kenna” isaan jedhe.+ 11 Kanaafuu, Daawit gara Baʼaal Peraaziimitti+ ol baʼee achitti isaan ni rukute. Yeroo kanatti Daawit, “Akkuma bishaan ittisa isaa cabsee baʼutti, Waaqni dhugaan diinota koo harka kootiin ni caccabse” jedhe. Isaan maqaa iddoo sanaa Baʼaal Peraaziim* jedhanii kan moggaasan kanaafi. 12 Filisxeemonnis waaqolii isaanii achumatti dhiisan; yommuu Daawit ajaja kennettis ibiddaan isaan ni guban.+
13 Boodas Filisxeemonni deebiʼanii sululicha* weeraran.+ 14 Daawit ammas Waaqayyoon ni gaafate; Waaqni dhugaan garuu akkana isaan jedhe: “Kallattiidhaan isaan duukaa buutee ol hin baʼin. Kanaa mannaa, duuba isaaniitiin naannaʼiitii tusii* baakaa* fuulduratti isaan waraani.+ 15 Fiixee tusii baakaa irraa sagalee adeemsa duulaa yommuu dhageessu, Waaqni dhugaan raayyaa waraanaa Filisxeemotaa rukutuuf si dura waan baʼeef isaan haleeli.”+ 16 Kanaafuu, Daawit akkuma Waaqni dhugaan isa ajaje ni godhe;+ isaanis Gibeʼonii hamma Geezeritti+ raayyaa waraanaa Filisxeemotaa ni rukutan. 17 Daawit guutummaa biyyattii keessatti beekamummaa ni argate; Yihowaanis saboonni hundi akka isa sodaatan godhe.+