Miikiyaas
2 “Warra wanta miidhaa geessisu yaadaniif,
Warra siree isaanii irratti wanta hamaa karoorfataniif wayyoo!
Isaan yommuu bariʼu wanta sana ni raawwatu,
Sababiin isaas, humni kana ittiin raawwatan harka isaanii keessa jira.+
2 Isaan maasii ni hawwu, ni qabatus;+
Mana ni hawwu, isas ni fudhatu;
Nama gowwoomsanii mana isaa ni fudhatu,+
Dhaala isaas jalaa ni fudhatu.
3 Kanaafuu, Yihowaan akkana jedha:
‘Kunoo, ani badiisa isin jalaa miliquu* hin dandeenye+ isin irratti fiduuf karoorfadheera.+
Kun yeroo badiisaa waan taʼeef,+ isin kana booda of tuulummaadhaan hin deddeebitan.+
4 Guyyaa sanatti namoonni waaʼee keessan ni mammaaku,
Mararamaniis isiniif ni booʼu.+
Isaan akkana jedhu: “Nuti guutummaatti badneerra!+
Inni dhaala keenya fuudhee warra kaaniif kenneera, eeyyee, dhaalli keenya badeera!+
Maasii keenyas saba amanamaa hin taaneef kenneera.”
5 Kanaafuu, gumii Yihowaa keessatti,
Nama wadaroo safaraatiin lafa hiru hin qabaattu.
6 Isaan, “Lallabuu dhiisaa!
Wantoonni kun lallabamuu hin qaban;
Salphinni nu irra hin gaʼu!” jedhanii lallabu.
7 Yaa mana Yaaqoob, namoonni,
“Hafuurri Yihowaa obsa dhabee?
Kun gochawwan isaa tii?” jechaa jiruu?
Dubbiin koo namoota qajeelummaadhaan deddeebiʼaniif wanta gaarii hin argamsiisuu?
8 Haa taʼu malee, sabni koo dhiheenya kana akka diinaatti kaʼeera.
Namoota akkuma waan waraana irraa deebiʼanitti ofitti amanannaadhaan darban irraa,
Faaya isa bareedaa uffataa wajjin* fuulleetti baastanii fudhattaniittu.
9 Dubartoota saba kootii manneen isaanii gammachuudhaan keessa jiraatan keessaa ariitaniittu;
Ijoollee isaanii irraas simboo koo bara baraaf fudhattaniittu.
10 Kun iddoo boqonnaa waan hin taaneef, kaʼaatii deemaa.
Xuraaʼummaadhaan kan kaʼe+ badiisni, eeyyee, badiisni cimaan ni dhufa.+
11 Namni tokko bubbee fi gowwoomsaa duukaa buʼee,
“Ani waaʼee daadhii wayinii fi waaʼee dhugaatii alkoolii siif nan lallaba” jedhee soba yoo dubbate,
Inni lallabduu wanta saba kana gammachiisu dubbatu taʼa!+
12 Yaa Yaaqoob, ani hunda keessan dhugumaan walitti nan qaba;
Warra Israaʼel keessaa hafan dhugumaan walitti nan qaba.+
Akkuma hoolota goorannoo keessa jiraniitti,
Akkuma bushaayee kaloo isaanii irra jiraniitti walitti isaan qabee tokkummaa akka qabaatan nan godha;+
Bakki sun waca namootaatiin ni guutama.’+
13 Inni cabsee baʼu isaan dura ni deema;
Isaan cabsanii ni baʼu, karricha keessa darbanii achiin ni baʼu.+
Mootiin isaanii isaan dura buʼee ni darba,
Yihowaanis isaan dura ni deema.”+