Mulʼata Yohaannis Arge

Yohaannis ergamaan odoola Phaaximositti yeroo hidhamee turetti, Yesuus waaʼee gara fuulduraa ilaalchisee mulʼatawwan ykn fakkiiwwan walitti aanan 16 isatti argisiisee ture. Mulʼatawwan kun maqaan Yihowaa akkamitti akka qulqullaaʼu, mootummaan isaa akka dhufuu fi fedhiin isaa samii irratti taʼaa akka jiru, lafa irrattis kan taʼu akkamitti akka taʼe kan argisiisani dha.

Yohaannis mulʼata isa tokko irratti, Yihowaan teessoo isaa isa samii ulfina qabeessa irra taaʼee, jaarsoliin 24 isatti naannaʼanii jiran immoo uffata aʼadii uffatanii, gonfoo warqii kaaʼatanii arge. Teessoo sana keessaa balaqqeessi bakakkaa fi sagaleen kakawwee ni baʼa ture. Jaarsoliin 24n sun fuula Yihowaa duratti kufanii isa waaqeffatan. Mulʼata kan biraa irratti immoo, Yohaannis tuutni uummataa guddaa saba, namootaa fi qooqa hundumaa keessaa dhufan Yihowaa yommuu waaqeffatan arge. Hoolichi, jechuunis Yesuus isaan tiksa, gara bishaan jireenyaattis isaan geessa. Yeroo booda mulʼata kan biraa irratti immoo, Yesuus samii irratti Mootii taʼee jaarsolii 24​nii wajjin bulchuu jalqabe. Yohaannis mulʼata itti aanutti immoo, Yesuus Seexanaa isa jawwichaa jedhamee fi jinniiwwan isaa wajjin utuu wal waraanuu arge. Yesuusis samii irraa gara lafaatti isaan darbate.

Achiis Yohaannis fakkii miidhagaa Hoolichaa fi warri 144,000 tulluu Xiyoon irraa yommuu dhaabatan argisiisu arge. Kana malees, maleekaan tokko naannoo lafaa irra balaliʼaa, namoonni Waaqayyoon akka sodaatanii fi isaaf ulfina akka kennan utuu labsuu arge.

Mulʼata itti aanu irratti immoo, waraanni Armaagedoon ni jalqabe. Waraana sana irratti, Yesuusii fi raayyaan isaa sirna Seexanaa isa hamaa kana irratti injifannoo argatan. Yohaannis, mulʼata isa xumuraa irratti samii fi lafa irratti tokkummaa guutuun yommuu uumamu arge. Seexannii fi sanyiiwwan isaa guutummaatti balleeffaman. Sana booda, samii irras taʼe lafa irra kan jiraatan hundi maqaa Yihowaa isa qulqulluudhaaf ulfina kennu, isa qofas waaqeffatu.