Akkaataawwan Dhiheenyaa Birooshuura Dhugumaan Waaqayyo Waa’ee Keenya Ni Yaadaa? jedhamu Raabsuuf Gargaaran
Oduu gaddisiisaa tokko erga kaastee booda akkas jechuu dandeessa:
“Waaqayyo dhugumaan waa’ee keenya kan yaadu erga ta’ee, namootarra rakkinni akka ga’u maaliif heyyame jettee yaaddee beektaa? [Hanga deebii kennutti eegi.] Birooshuurri kun, gaaffii kanaaf deebii quubsaa kenna; Waaqayyo yeroo dhihootti maal akka godhus ni dubbata. [Fakkiiwwan fuula 27rra jiran itti argisiisiitii keeyyata 22ffaarraa Faarfannaa 145:16 dubbisiif.] Waaqayyo rakkina ilmaan namaarra ga’u hundumaa kan balleessu akkamitti? Yeroon deebi’ee dhufutti gaaffii kanarratti akka mari’annun barbaada.” Birooshuuricha kenniifiitii beellama qabadhu.
Yeroo deddeebii gaaffii gootu, akkas jechuu dandeessa:
“Yeroo darbe caqasa kana waliin dubbisnee turre. [Faarfannaa 145:16 dubbisi; ykn yaadasaa dubbadhu.] Waaqayyo rakkina ilmaan namaarra ga’u hundumaa kan balleessu akkamitti? gaaffii jedhus kaaseen ture.” Birooshuurasaa akka fidatu godhi; achiis, ful. 27, 28 baasiitii yaada keeyyata 23-25rra jirurratti mari’adhaa. Qayyabannaa Macaafa Qulqulluu akka jalqabu afeeri, ykn yeroo itti aanutti keeyyata 26, 27rratti akka mari’attan qophii godhi.
Babal’isaan dargaggeessi tokko akkas jechuu danda’a:
“Namoonni umuriidhaan hiriyaa koo ta’an baay’een, waggaa 10 ykn 15 booda addunyaan kun maal fakkaachuu akka danda’u isaan yaaddessa. Atoo yeroo sanatti jireenyi maal fakkaata jettee yaadda? [Hanga deebii kennutti eegi.] Rakkoowwan yeroo ammaa jiran, kan jiraannu guyyoota dhumaa keessa akka ta’e argisiisu. [2 Ximotewos 3:1-3 dubbisiif.] Birooshuurri kun gaaffiiwwan kanatti aananiif deebii kenna. [Gaaffiiwwan qolasaarra jiran dubbisiitii birooshuuricha kenniif.] Yeroon deebi’ee dhufutti, daqiiqaa muraasaaf waa’ee dhukkubaafi dullumaarratti yaada nama jajjabeessu sii hiruun barbaada.” Deebitee dhaquuf beellama qabadhu.
Yommuu deebitee dhaqxu akkas jechuunii dandeessa:
“Yeroo darbe, waa’ee dhukkubaafi dullumaa sitti himuuf deebi’ee akkan dhufu sitti himeen ture. Yaadni kun asirratti argama.” Birooshuurasaa akka fidatu godhi. Achiis, fuula 23-24rraa keeyyata 6-7 dubbisaatii irratti mari’adhaa. Yeroo deebitee dhuftu, keeyyata 8-9rratti akka mari’attan qophii godhi.
Namni ga’eessa ta’e tokko mucaa xinnoo wajjin yeroo tajaajilu maqaa lamaansaanii erga beeksisee booda akkas jechuu danda’a:
“Yoo fedhii kee ta’e, ________ caqasa Macaafa Qulqulluu tokko siif dubbisuun barbaada. [Mucichi Faarfannaa 37:29 dubbisee yaada gabaabaa kenna.] Birooshuurri kun Waaqayyo kaayyoo ilmaan namaatiifi lafa kanaaf qabu akkamitti akka galmaan ga’u dubbata. [Fakkiiwwan fuula 24-27rra jiran itti argisiisi.] Yeroo deebinee dhufnu, du’aa ka’uu ilaalchisee abdii dinqisiisaa Macaafni Qulqulluun dubbatu sitti argisiisuun barbaada.” Birooshuuricha kenniifiitii deebitee dhaquuf beellama qabadhu.
Yeroo deebi’anii gaafatanitti ga’eessichi akkas jechuu danda’a:
“Yeroo darbe Faarfannaa 37:29 dubbisnee turre; akkasumas du’aa ka’uu ilaalchisee Macaafni Qulqulluun maal akka jedhu sitti argisiisuu akkan barbaadu sitti himeen ture. Waan asirratti barreeffame kana hubadhu.” Birooshuurasaa akka fidatu godhiitii fuula 24-25rraa keeyyata 12-14rratti mari’adhaa. Qayyabannaa Macaafa Qulqulluu akka jalqabu afeeri; ykn yeroo itti aanutti keeyyata 15-16rratti akka mari’attan qophii godhi.