‘Karaa Hojii Guddaadhaaf Sii Banamerratti’ Hirmaachuu Ni Dandeessaa?
1 Phaawulos ergamaan, ‘karaan hojii guddaatti’ geessu yeroo isaaf banametti mormitoonni hedduun jiraataniyyuu, carraa argate sanatti fayyadamee hojii lallabaatti fufuuf hawwii qaba ture. (1 Qor. 16:9) Yeroo ammaa addunyaa maratti babal’istoonni Mootummichaa 642,000 ta’an qajeelchaa yeroo hundaa ta’uudhaan karaa guddaa isaaniif banamerratti hirmaachaa jiru.
2 Haalawwan Keenya Ni Jijjiiramu: Haalawwan amma keessa jirru sochii keenya kan daangessan ta’uyyuu yeroo booda jijjiiramuu ni danda’a. Kanaaf, haalli keenya guutummaatti hamma jijjiiramutti eeguu mannaa, yeroo yerootti haala keenya gamaaggamuun gaariidha. (Lal. 11:4) Dargaggeessa barumsakee xumuruuf jettudhaa? Haadha ykn abbaa ijoolleenkee yeroo dhihootti mana barumsaa galuuf jedhanidhaa? Yeroon hojiidhaa soorama itti baatu dhihaateeraa? Jijjiiramawwan akkasii kun yeroo akka qabaattu waan godhaniif, qajeelchaa yeroo hundaa ta’uuf si dandeessisu. Obboleettiin kanaan dura dhibee fayyaa qaban tokko, waggaa 89ffaasaanitti qajeelchaa ta’uuf murteessaniiru. Maaliif? Waggaa tokkoof mana yaalaa waan hin galleef, haalli fayyaasaanii qajeelchaa ta’uuf akka isaan dandeessisu waan isaanitti dhaga’ameefidha.
3 Phaawulos, jalqaba obbolootasaa Qorontos jiran daawwachuuf karoora baafatee ture. Ta’uyyuu, misraachoo lallabuuf jecha karoorasaa sirreessee ture. Babal’istoonni yeroo ammaatti qajeelchaa yeroo hundaa ta’an hedduunis, galmasaanii kana bira ga’uuf sirreeffama baay’ee gochuun isaan barbaachiseera. Warri tokko tokko baasiisaanii guuttachuuf hojii guyyaa walakkaa hojjechuun qofti hamma isaan ga’utti jireenyasaanii salphaa godhaniiru. Mirga tajaajilaa kanaanis gammachuu argataniiru. (1 Xim. 6:6-8) Hiriyoonni gaa’elaa tokko tokko abbaan manaa qofti akka hojjetu gochuudhaan jijjiirama gochuunsaanii, haati manaa qajeelchaa ta’uu akka dandeessuuf karaa baneeraaf.
4 Sa’aatii qajeelchitoonni deebisan guutuu hin danda’u jettee yaaduudhaan, qajeelchaa ta’uu hin danda’u jettee murteessuuf hin ariifatin. Guyyaatti sa’aatii lamaafi daqiiqaa muraasa qofatu barbaachisa. Kana gochuu danda’uukee yoo shakkite, ji’a tokkoof ykn lamaaf qajeelchaa gargaaraa ta’uudhaan sa’aatii 70 tajaajiluuf yaali. Akkas gochuunkee gammachuu qajeelchaa ta’uudhaan argamu akka miyeeffattu si taasisa. (Far. 34:8) Obboloota qajeelchaa ta’aniin mari’adhu. Isaanis rakkoowwan wal fakkaatan mo’aniiru ta’a. (Fak. 15:22) Yihowaan carraaqqii tajaajilakee bal’isuuf gootu akka sii eebbisu kadhadhu.—1 Yoh. 5:14.
5 Hojii Faayidaa Argamsiisu: Qajeelchaa yeroo hundaa ta’uun eebba baay’ee argamsiisa. Gammachuu guddaa, baay’ee kennuudhaan argamu akka argattu godha. (HoE. 20:35) Qajeelchaa ta’uun dandeettii Dubbii Waaqayyootti akka gaariitti fayyadamuukee sii guddisa. (2 Xim. 2:15) Carraawwan baay’ee gargaarsa Yihowaa akka argitu si dandeessisan sii kenna. (HoE. 11:21; Filp. 4:11-13) Qajeelchaa ta’uun amalawwan hafuuraa akka obsaan danda’uu jiran akka horattu si gochuusaarrayyuu, gara Yihowaatti caalaatti akka dhihaatu si gargaara. (Yaq. 4:8) Karaa hojii guddaadhaaf sii baname kanarratti hirmaachuudhaan qajeelchaa yeroo guutuu ta’uu ni dandeessaa?
[Gaaffiiwwan Qayyabannaa]
1. ‘Karaa hojii guddaatti geessu’ kamtu nuu baname?
2. Yeroo yerootti haala keenya gamaaggamuun gaarii kan ta’e maaliifi?
3. Babal’istoonni tokko tokko qajeelchaa yeroo hundaa ta’uuf sirreeffama kan godhan akkamitti?
4. Sa’aatii nurraa barbaadamu guutuu keenya yoo shakkine maal gochuu dandeenya?
5. Qajeelchaa yeroo hundaa ta’uun faayidaa qabeessa kan ta’e maaliifi?