Ayyaana Yaadannootiif Qophaaʼaa Jirtuu?

Yeroon isaa Dh.K.B. Niisaan 13 bara 33 ture. Yesus ajjeefamuu isaa dura michoota isaa baayʼee isatti dhihaatanii wajjin yeroo dabarsuuf galgalli tokko qofti akka isa hafe beeka ture. Yeroo xumuraatiif isaanii wajjin Faasikaa ayyaaneffachuu fi ayyaana haaraa, jechuunis Irbaata Gooftaa qopheessuu qaba ture. Ayyaana bakka guddaa qabu kanaaf qophii gochuun barbaachisaa ture. Kanaaf, Yesus Phexrosii fi Yohannis wantoota tokko tokko akka qopheessan isaan erge. (Luq. 22:7-13) Yeroo sanaa kaasee Kiristiyaanonni Ayyaana Yaadannoo kabajuuf fedhii qaban qophii gochuun isaanii barbaachisaa ture. (Luq. 22:19) Maarree Ayyaana Yaadannoo Bitootessa 25, 2007 (April 3, 2015) kabajnuuf qophii barbaachisaa akkamii gochuu qabna?

Qophii Jaarsoliin Gumii Godhan:

Galma Mootummaa ykn bakka ayyaanni kun itti kabajamu duraan dursanii qopheessu. Iddoon kun bakka taaʼumsaa gaʼaa fi ibsaa kan qabu, akkasumas qilleensa akka gaariitti kan galchu taʼuu qaba. Iddoon kun duraan dursee akka gaariitti akka qulqulleeffamu qophii godhaa.
Obboleessa haasaa kennuuf gaʼumsa qabu, dura taʼaa, akkasumas obboloota maxinoo fi wayiniin naanneffamuu isaa dura kadhannaa dhiheessan dursaatii filadhaa.
Iddoo itti ayyaanni kun kabajamutti kan fayyadaman gumiiwwan lamaa ol taanaan, yeroo itti ayyaanichi jalqabu, yeroo itti galmicha seenanii fi baʼan, akkasumas yeroo itti konkolaataa isaanii dhaabanii fi bakka dhaabanii kaasuu qaban dursaatii qindeessaa.
Keessumsiistota, akkasumas obboloota maxinoo fi wayinii naannessan dursaatii qopheessaa.
Maxinoo fi wayinii, saanii, birciqqoo, minjaalaa fi uffata minjaalaa barbaachisaa taʼe dursaatii qopheessaa.

Qophii Babalʼistoonni Godhan:

Duula afeerraa namoonni ayyaanicha irratti akka argamaniif godhamu irratti dammaqinaan hirmaachuuf qophii godhaa.
Barattoota Macaafa Qulqulluu, firoota keessan, namoota wajjin barattan, wajjin hojjettan, akkasumas namoota beektan yaadannoo irratti qabadhaatii isaan afeeraa.
Kutaa Macaafa Qulqulluu tibba Ayyaana Yaadannootti dubbifamu dubbisaa, akkasumas irratti xiinxalaa.
Keessummoota simachuuf bakka ayyaanichi itti kabajamutti dursaatii argamaa.