**Dandeettii Tajaajila Irratti Qabnu Fooyyeffachuu—Kitaaba Barumsa Macaafa Qulqulluu Raabsuu**

Barbaachisaa Kan Taʼe Maaliifi? Meeshaan barsiisuuf itti fayyadamnu inni guddaan kitaaba Barumsa Macaafa Qulqulluu ti. Haa taʼu malee ittiin nama qayyabsiisuu keenya dura nama sanaaf kennuu qabna. Kanaafuu, hundi keenya tajaajila irratti kitaaba Barumsa Macaafa Qulqulluu raabsuuf dandeettii qabaachuu qabna. (Fak. 22:29) Malli hedduun jira; babalʼistoonni mala buʼa qabeessa taʼee argatanitti fayyadamuu dandaʼu.

Kana Gochuu Kan Dandeenyu Akkamitti?

Gaaffii xiyyeeffannaa harkisuu fi namicha gara boqonnaa kitaabichaa tokkotti geessuuf si gargaaru kaasi. Tarii gaaffiiwwan jalqaba boqonnaawwanii irra jiran keessaa tokko filachuus ni dandeessa. Deebii namichi kennu erga dhageessee booda, caqasa tokko dubbisiif; achiis keeyyata dhimma sana irratti ibsa kennu erga itti argisiistee booda marii gabaabaa irratti gochuu dandeessu.
Malli kan biraan immoo, fuulawwan gara jalqabaa kitaabichaatti fayyadamuudhaan fedhii namichaa kakaasuu fi achiis kitaabicha irraa deebii Macaafni Qulqulluun kennu itti argisiisuu dha. Fakkeenyaaf wanta gaddisiisaa dhiheenyatti karaa sabqunnamtii oduu irratti gabaafame kaasuudhaan, namoonni baayʼeen gaaffiiwwan fuula 3 irra jiran akka gaafatan ibsuufii dandeessa. Yookiin immoo, ollaawwan keetti waaʼee gara fuulduraa waan gaarii himaa akka jirtu itti himuu dandeessa. Achii fakkiiwwan fuula 4 fi 5 irra jiran itti argisiisiitii, “Abdiiwwan kana keessaa inni kam yeroo raawwatamu arguu barbaadda?” jedhii gaafadhu. Malli kan biraan immoo, namoonni gaaffiiwwan guguddaa jireenya isaanii keessatti kaasaniif deebii akka argatan gargaaruuf akka deemte itti himuu dha. Achiis namichatti gaaffiiwwan fuula 6 irratti argaman itti argisiisiitii, gaaffiin caalaatti xiyyeeffannaa isaa harkisu isa kam akka ta’e gaafadhu.
Qayyabannaa Macaafa Qulqulluu jalqabsiisuuf kallattiidhaan afeerrii dhiheessi. Akkana jechuunii dandeessa: “Kitaaba Macaafa Qulqulluu qayyabachuuf gargaaru kana namootatti argisiisaa jirra. Kitaaba kana kanaan dura argitee beektaa? [Hanga deebii kennutti eegi.] Daqiiqaa muraasa yoo qabaatte, Macaafa Qulqulluu kee wajjin akkamitti itti fayyadamuu akka dandeessu sitti argisiisuun barbaada.”

Jiʼa Kanatti Akkas Gochuuf Yaali:

Waaqeffannaa maatii keessan irratti shaakalaa.
Tajaajila irra yeroo jirtan, maal jechuu akka yaaddan nama isinii wajjin tajaajilutti himaa. (Fak. 27:17) Akkaataan dhiheenyaa keessan buʼaa hin argamsiisne taanaan jijjiiraa.