Addunyaa Haaraa, Akka Waaqayyo Abdii Kennetti Dhufu
SAGALEE WAAQAYYOO kan ta’e Macaafni Qulqulluun, yaada armaan gadii yeroo dubbatu abdiidhaan guutamna: “akka abdii inni nuuf kenneetti, bantiiwwan waaqaa haaraa, lafa haaraas warra qajeelummaan keessa buufatu in eegganna.”—2Phexros 3:13.
‘Bantiiwwan Waaqaa haaraan’ maalidha? Macaafni Qulqulluun, waaqa, bulchiinsaa wajjin walqabsiisa. (Hojii Ergamootaa 7:49) ‘Bantiiwwan Waaqaa haaraan’ bulchiinsa haaraa lafa kana bulchudha. Sirna bulchiinsaa yeroo ammaa jiru waan iddoo bu’uufi kaayyoo Waaqayyoo suuta sutaan kan raawwachiisu waan ta’eef haaraadha jedhameera. Mootummaa, Yesus waa’eesaa akka kadhannuuf nubarsiisedha. (Maatewos 6:10) Mootummaa kana kan dhaabe Waaqayyoo waan ta’eefi innis samiirra waan jiraatuuf “Mootummaa waaqaa” jedhameera.—Maatewos 7:21.
‘Lafti haaraan’ maalinni? Lafti bara baraaf akka jiraatu Macaafni Qulqulluun waan dubbatuuf, lafa haaraatu uumama jechuu miti. ‘Lafa haaraa’ jechuun hawaasa dhala namaa haaraa jechuudha. Jal’oonni waan lafarraa buqqaafamaniif haaraa ta’a. (Fakkeenya 2:21, 22) Namoonni yeroo sana jiraatan hundi, Uumaasaaniitiif ulfina kennuudhaan ni abboomamuuf akkasumas, ulaagaaleesaa wajjin wal simanii jiraatu. (Faarfannaa 22:27) Yeroo ammaa namoonni saba hundumaa keessa jiran, ulaagaaleesaa akka barataniifi jireenyasaanii keessatti hojiirra akka oolchan affeeramaniiru. Atoo akkas gochaa jirtaa?
Addunyaa haaraa keessatti, hundumtuu bulchiinsa Waaqayyootiif ni ajajamu. Jaalalli ati Waaqayyoof qabdu isaaf akka ajajamtu si kakaasaa? (1Yohannis 5:3) Mana keetti, bakka hojiitti, mana barumsaafi akkaataa jireenyaa keetiin, abboommiiwwan Waaqayyootiif akka ajajamtu argisiisaa jirtaa?
Addunyaa haaraa sana keessatti, hawaasni dhala namaa tokko ta’ee Waaqa dhugaa waaqeffata. Uumaa bantiiwwan waaqaafi lafaa waaqeffachaa jirtaa? Waaqeffannaan kee warra hidhata amantii saba hundumaa, gosa hundumaafi afaan hundumaa keessaa sassaabamanii wajjin dhugumaan tokko si godheeraa?—Faarfannaa 86:9, 10; Isaayaas 2:2-4; Sefaniya 3:9.
[Saanduqa/Fakkii fuula 17rra jiru]
Waaqayyo Isa Abdiiwwan Kana Kenne
Abdiiwwan kana kan kenne, Waaqayyo isa Uumaa Lafaafi samii ta’edha. Inni isa Yesus “Waaqayyo isa tokkicha, isa dhugaa” jechuudhaan eenyummaasaa ibsedha.—Yohannis 17:3.
Ilmaan namootaa garri caalaan, waaqolii harkasaaniitiin tolfamaniif ulfina kennu. Kan miliyoonaan lakkaa’amanis fakkiiwwaniif sagadu. Kaanimmoo, jaarmiyaalee ilmaan namootaa, qabeenya, falaasama, ykn fedha mataasaaniitiif bakka guddaa kennu. Namoonni amantiinsaanii akka Macaafa Qulqulluurratti hundaa’e dubbatan hundi, maqaa Waaqayyoo isa Macaafa Qulqulluurratti ibsameef kabaja hin kennani.—Keessa Deebii 4:35.
Uumaan, waa’ee mataasaa ilaalchisee: “Ani Waaqayyo dha, [“Yihowaadha” NW] maqaan koo isa kana” jedheera. (Isaayaas 42:5,8) Maqaan kun, afaan Macaafni Qulqulluun jalqaba ittiin barreeffameen, al 7,000 ol argama ture. Yesus Kristos: “Yaa isa waaqa irra jirtu abbaa keenyaa! Maqaan kee qulqulluu ta’ee haa eegamu” jedhanii akka kadhataniif bartootasaa barsiiseera.—Maatewos 6:9.
Waaqni dhugaa kun amalawwan akkamii qaba? Waa’ee mataasaa akkas jechuudhaan ibseera: “Oo’a-qabeessaa fi araara qabeessa; aariitti suuta-jedhaa dha; gaarummaan koo fi amanamummaan koo guddaa dha.” Haata’u malee, namoota ta’e jedhanii abboommiiwwansaa cabsan adabuurraa duubatti akka hin jenne ibseera. (Ba’uu 34:6,7) Walitti dhufeenyi inni kanaan dura ilmaan namootaa wajjin qabu, kun dhugaa ta’uusaa mirkaneessa.
Maqaan kuniifi qaamni maqaa kanaan bakka buufame, maqaansaa qulqullaa’uu ykn qulqulluu ta’ee akka qabamuu qabu argisiisa. Inni, Uumaafi uumama cufarratti olaantummaa kan qabu waan ta’eef, isaaf ajajamuu qabna; akkasumas waaqeffannaan keenya hundi isaaf ta’uu qaba. Dhuunfaa keetti kana gochaa jirtaa?
[Saanduqa/Fakkii fuula 18rra jiru]
‘Bantiiwwan Waaqaa Haaraaniifi Lafti Haaraan’ Jijjiirama Akkamii Fidu?
Lafti gara jannataatti jijjiiramti Luqaas 23:43
Sabni, sanyiiniifi afaan addunyaa maratti argamu hundinuu walii waliisaaniitii kan wal jaallatan ta’u Yohannis 13:35; Mul’ata 7:9, 10
Namoonni hundinuu, guutummaa biyyoolessaatti nagaafi tasgabbii argatu Faarfannaa 37:10, 11; Miikiyaas 4:3,4
Hojii gammachiisaa, nyaata ga’aa Isaayaas 25:6; 65:17, 21-23
Dhukkubni, gaddi, duuni ni bada Isaayaas 25:8; Mul’ata 21:1,4
Guutummaan biyya lafaa tokkummaadhaan Waaqa dhugaa waaqeffata Mul’ata 15:3,4
[Saanduqa/Fakkii fuula 19rra jiru]
Faayidaa Ni Argattaa?
Waaqayyo sobuu hin danda’u!—Tiitoos 1:2.
Yihowaan: “dubbiin afaan koo keessaa ba’u, wanta ani fedhe hojjetee, wanta ani itti erges in raawwata malee, harka duwwaa gara kootti hin deebi’u” jechuudhaan dubbateera.—Isaayaas 55:11.
Yihowaan duraan dursee ‘bantiiwwan waaqaa haaraafi lafa haaraa’ uumeera. Bulchiinsi samii kun, hojiisaa jalqabeera. Bu’urri “lafa haaraa” duraan dursee kaa’ameera.
Macaafni Mul’ataa, ‘bantiiwwan waaqaa haaraaniifi lafti haaraan’ ilmaan namootaatiif maal akka fidan erga dubbatee booda, Macaafuma kanarratti, Waaqayyo gooftaan inni uumama cufarratti olaantummaa qabu: “Kunoo, ani waan hundumaa haaraa nan godha!” jedha; itti aansees, “Dubbiin kun amanamaa, dhugaas waan ta’eef, kana caafi! naan jedhe” jechuudhaan dubbata.—Mul’ata 21:1,5.
Gaaffiin barbaachisaa ta’e, kutaa ‘lafa haaraa,’ “bantiiwwan waaqaa haaraa” jalatti bulu keessa jiraachuuf dhuunfaatti sirreeffama barbaachisaa ta’e gochaa jirraa? kan jedhudha.