Ammuma Mootummaa Waaqayyoo Deggeri!
Obomboleettiin miidhaa guddaa geessisu gara keetti dhufaa akka jiru godhii yaadi. Abbootiin taayitaammoo akeekkachiisa ariifachiisaa, “ASII BAʼAA! AMMUMA IDDOO ITTI BAQATTAN BARBAADADHAA!” jedhu kennaa jiru. Maarree maal goota? Gara iddoo jalaa ooluu itti dandeessutti akka baqattu hin shakkisiisu.
Haaluma wal fakkaatuun hunda keenyayyuu yeroo dhihootti “obomboleettiin” miidhaa guddaa geessisuu fi Yesuus ‘rakkina guddaa’ jedhee waame ni mudata. (Maatewos 24:21) Rakkina guddaa sanarraa baqachuuf iddoon dhaquu dandeenyu hin jiru. Taʼus, eegumsa argachuuf wanti gochuu dandeenyu jira. Maal gochuu dandeenya?
Yesuus Lallaba isaa isa Gaaraarratti qajeelfama, “Hundumaa dura Mootummichaa fi qajeelummaa isaa barbaaduu keessan itti fufaa” jedhu kenneera. (Maatewos 6:33) Kana gochuu kan dandeenyu akkamitti?
Hundumaa Dura Mootummaa Waaqayyoo Barbaadi. Kana jechuun Mootummaan Waaqayyoo wanta kamiyyuu caalaa wanta iddoo guddaa qabu akka taʼetti ilaaluu qabna jechuudha. (Maatewos 6:25, 32, 33) Mootummichaaf ilaalcha akkasii qabaachuu kan qabnu maaliifi? Namoonni rakkina ilmaan namootaa furuu waan hin dandeenyeefi. Wanta ulfaataa taʼe kana gochuu kan dandaʼu Mootummaa Waaqayyoo qofadha.
Qajeelummaa isaa barbaadi. Jireenya keenya keessatti seerotaa fi qajeelfamoota Waaqayyoo eeguuf wanta nuuf dandaʼame hunda gochuu qabna. Maaliif? Sababiin isaas, wanta sirrii fi dogoggora taʼe ofii keenyaan yoo murteessine miidhaa guddaatu nurra gaʼa. (Fakkeenya 16:25) Gama biraatiinimmoo, ulaagaalee Waaqayyoo eegnee yoo jiraanne, isa gammachiisuu qofa utuu hin taʼin, ofii keenyaas faayidaa argachuu dandeenya.—Isaayyaas 48:17, 18.
Hundumaa dura Mootummichaa fi qajeelummaa isaa barbaaduu kee itti fufi. Yesuus namoonni tokko tokko hamma dandaʼan maallaqa hedduu yoo kuufatan tasgabbii qabaachuu akka dandaʼan yaaduun isaanii yaada isaanii akka isaan jalaa hihiru akeekkachiiseera. Warri kaanimmoo yaaddoon jireenyaa baʼaa waan isaanitti taʼuuf, Mootummaa Waaqayyoo barbaaduuf yeroo hin qaban.—Maatewos 6:19-21, 25-32.
Haa taʼu malee, Yesuus warri Mootummaa Waaqayyoo deggeran yeroo ammaatti wanta isaan barbaachisu, gara fuulduraattimmoo eebbawwan dhuma hin qabne akka argatan waadaa galeera.—Maatewos 6:33.
Barattoonni Yesuus jaarraa jalqabaatti turan, Mootummichaa fi qajeelummaa isaa barbaaduu isaanii kan itti fufan taʼus, bara jireenyaa isaaniitti rakkinnii fi dhiphinni hundi yommuu badu hin argine. Garuu, eegumsa argataniiru. Akkamitti?
Jireenya isaanii keessatti ulaagaalee Waaqayyoo warra qajeeloo taʼan eeganii jiraachuun isaanii rakkina warra gorsa Waaqayyoo dhagaʼuu didanirra gaʼurraa isaan eegeera. Mootummichi akka dhufu amantii cimaa qabaachuun isaanii rakkoowwan ciccimoo taʼan dandamachuuf isaan gargaareera. Waaqayyos rakkoowwan isaan mudachaa turan akka dandamataniif ‘humna humna caalu’ isaaniif kenneera.—2 Qorontos 4:7-9.
HUNDUMAA DURA MOOTUMMICHA NI BARBAADDAA?
Kiristiyaanonni jaarraa jalqabaa ajaja Yesuus hundumaa dura Mootummicha akka barbaadan isaaniif kenneef ajajamaniiru. Misiraachoo Mootummichaa guutummaa addunyaa bara isaanii ture keessatti lallabaniiru. (Qolosaayis 1:23) Yeroo harʼaattoo namoonni akkas godhan jiruu?
Eeyyee! Dhugaa Baatonni Yihowaa yeroon Mootummaan Waaqayyoo sirna amma jiru kana itti balleessu akka dhihaate ni hubatu. Kanaafuu hojii Yesuus, “Saboota hundumaatti ragaa akka taʼuuf misiraachoon Mootummichaa guutummaa lafaa irratti ni lallabama; sana booda dhumni ni dhufa” jechuudhaan waaʼee isaa dubbate raawwachuuf wanta dandaʼan hunda godhu.—Maatewos 24:14.
Atoo misiraachoo kanaaf deebii akkamii kennita? Fakkeenya namoota jaarraa jalqabaatti magaalaa Maqedooniyaa kan taate Beeriyaa keessa jiraachaa turanii akka hordoftu si jajjabeessina. Isaan yommuu Phaawulos ergamaan waaʼee misiraachoo Mootummichaa isaanitti himu, “hawwii guddaadhaan” ergaa isaa fudhataniiru. Achiis, wanti dhagaʼan dhugaa taʼuu isaa mirkaneeffachuuf, “Kitaabota Qulqulluu of eeggannoodhaan [qoraniiru],” wanta baratanis hojiirra oolchaniiru.—Hojii Ergamootaa 17:11, 12.
Atis akkas gochuu dandeessa. Hundumaa dura Mootummaa Waaqayyoo fi qajeelummaa isaa barbaaduudhaan, yeroo ammaatti eegumsa, gara fuulduraattimmoo nagaa fi tasgabbii bara baraa argatta.