Saanduqa Gaaffii

◼ Yeroo balbalarratti qayyabsiisnu kadhannaa dhiheessuu qabnaa?

Qayyabannaa Macaafa Qulqulluu kadhannaadhaan jalqabuufi cufuun faayidaa hedduu qaba. Yommuu kadhannaa dhiheessinu, Yihowaan maree keenyarratti hafuura qulqulluusaa akka nuu kennu gaafachaa jirra. (Luq. 11:13) Akkasumas kadhannaan, namni qayyabsiisnu qayyabannaansaa bakka guddaa akka qabu akka hubatu kan isa gargaaru yommuu taʼu, akkamitti kadhachuu akka dandaʼus isa barsiisa. (Luq. 6:40) Kanaaf, hamma dandaʼametti utuu baayʼee hin turin qayyabannaarratti kadhannaa jalqabuun gaariidha. Taʼuyyuu, haalli namootaa addadda waan taʼeef, obboleessi qayyabannaa gaggeessu qayyabannaa balbalarratti godhamurratti kadhannaa dhiheessuuf ykn dhiisuuf yeroo murteessu hubannaa qabaachuu qaba.

Wanti tilmaama keessa galuu qabu inni tokko naannoo qayyabannaan itti gaggeeffamudha. Qofaasaanii yoo taʼan, kadhannaa gabaabaa dhiheessuudhaan saganticha jalqabuufi cufuunsaanii gaariidha. Haataʼu malee, akkas gochuun xiyyeeffannaa namootaa kan harkisuufi nama qayyabattuttis kan itti hin tolle yoo taʼe, hanga naannoo tasgabbaaʼaa taʼetti qayyabachuu dandeessanitti turun gaariidha. Qayyabannaan eessattiyyuu yoo gaggeeffame, kadhannaa dhiheessuu jalqabuu kan qabnu yoom akka taʼe hubannaadhaan murteessuu qabna.—Tajaajila Mootummaa Bitootessa 2005, fuula 4 ilaali.