Carraawwan Dabalataa Yihowaadhaaf Galata Galchuuf Nu Gargaaran
1. Qophii haaraan Yihowaadhaaf ‘guddisnee galata galchuuf’ nu gargaaru isa kamidha?
1 Jiʼa Bitootessaa darbee kaasee, qophii haaraan jiʼa Bitootessaa, Eblaafi yeroo daawwataa olaanaan aanaa gumiisaanii daawwatutti, babalʼistoonni saʼaatii 30 tajaajiluudhaan qajeelchaa gargaaraa akka taʼan isaan gargaaru godhamee ture. Daawwannaan daawwataa olaanaa aanaa, xumura jiʼa jalqabaafi jalqaba jiʼa ittaanurra kan oolu yoo taʼe babalʼistoonni saʼaatii 30 tajaajiluuf guutan jiʼa isa jalqabaa ykn isa itti aanu filachuudhaan tajaajiluu dandaʼu. Obboloonni qajeelchaa gargaaraa taʼan hundi, walgaʼii daawwataa olaanaan qajeelchitootaafi qajeelchitoota addaa wajjin godhu guutummaasaarratti argamuu dandaʼu. Kana jechuun, saʼaatii 50 tajaajiluu hin dandeenyu yoo taʼeyyuu, qajeelchaa gargaaraa taanee saʼaatii 30 tajaajiluudhaan, Yihowaadhaaf ‘guddisnee galata galchuu’ dandeenya jechuudha.—Far. 109:30; 119:171.
2. Obboloonni yommuu daawwataa olaanaan aanaa gumiisaanii daawwatutti qajeelchaa gargaaraa taʼan carraawwan akkamii argatu?
2 Yeroo Daawwataan Olaanaa Aanaa Gumii Daawwatu: Obboloonni baayʼeen, daawwataan olaanaa aanaa yommuu gumiisaanii daawwatu qajeelchaa gargaaraa taʼanii isaa wajjin tajaajiluudhaan muuxannoo wal jijjiiruu ni dandaʼu. (Rom. 1:11, 12) Obboloonni qajeelchaa gargaaraa taʼan hedduun bakka hojiitii heyyama fudhachuudhaan guyyaa tokko isaa wajjin tajaajiluu dandaʼu taʼa. Warri guyyaa hojiitti tajaajiluu hin dandeenyemmoo, Sanbadduraafi Dilbata akka isaanii wajjin tajaajilu isa gaafachuu dandaʼu. Akkasumas obboloonni qajeelchaa gargaaraa taʼan, walgaʼii qajeelchitootaafi qajeelchitoota addaa wajjin godhamurratti argamuudhaan jajjabina argachuu dandaʼu.
3. Jiʼi Ayyaanni Yaadannoo itti kabajamu, qajeelchaa gargaaraa taʼuuf jiʼa gaariidha kan jennu maaliifi?
3 Jiʼa Bitootessaa fi Eblaatti: Obboloonni carraa saʼaatii 30 kanaan dura argatanitti fayyadamuudhaan jiʼa Ayyaanni Yaadannoo kabajamutti qajeelchaa gargaaraa taʼanii tajaajilan, ammas yeroo lammataatiif ‘aarsaa galataa Waaqayyoof dhiheessuu’ ni dandaʼu. (Ibr. 13:15) Jiʼi Bitootessaafi Eblaa, jiʼoota qajeelchaa gargaaraa taʼuudhaan hirmaannaa tajaajilarratti goonu itti guddifachuu dandeenyudha. Waggaa waggaadhaan jiʼoota kanatti, namoonni Ayyaana Yaadannoorratti akka argamaniif duula godhamurratti ni hirmaanna. Akkasumas, jiʼa Ayyaana Yaadannootti obboloonni hedduun hirmaannaa tajaajilarratti godhan waan guddifataniif babalʼistoota addaddaa wajjin tajaajiluu dandeenya. Ayyaana Yaadannoo booda, namoota ayyaanicharratti argaman hordofnee gargaaruudhaan haasaa addaarratti akka argamaniif isaan jajjabeessina. Atoo carraa gaarii kanatti fayyadamuudhaan qajeelchaa gargaaraa taʼuuf qophii gochuu dandeessaa?—Luq. 6:45.