Tibbi Ayyaana Yaadannoo Kan Nama Gammachiisu Akka Taʼu Godhaa!
1. Karaan tibba Ayyaana Yaadannootti gammachuun keenya akka dabalu gochuu itti dandeenyu tokko kami?
1 Jiʼa Bitootessaa, Eblaafi Caamsaatti gammachuukee dabaluu ni barbaadaa? Tajaajilakee balʼisuudhaan, yoo dandaʼamemmoo qajeelchaa gargaaraa taʼuudhaan akkas gochuu ni dandeessa. Kun gammachuu kan sii dabalu akkamitti?
2. Tajaajilarratti balʼinaan hirmaachuun keenya gammachuu kan nuu dabalu akkamitti?
2 Gammachuukee Dabali: Yihowaan isa waaqeffachuudhaan fedhii hafuuraa uumamaan qabnu guuttanne gammachuu argachuu akka dandeenyu godhee nu uume. (Mat. 5:3) Kana malees, namootaaf kennuudhaan gammachuu akka argannu godhee nu uumeera. (HoE. 20:35) Tajaajilli, Waaqayyoon waaqeffachuufis taʼe namoota gargaaruuf nu dandeessisa. Tajaajilarratti balʼinaan hirmaachuun gammachuu guddaa akka argamsiisu beekamaadha. Kana malees, tajaajilarratti yeroo dheeraa yommuu dabarsinu, dandeettiin tajaajilaa keenyas ni dabala. Dandeettiin keenya ennaa dabalummoo, ofitti amanannaan keenya ni dabala, sodaan nutti qabnus hirʼachaa deema. Namootaaf dhugaa baʼuuf akkasumas qayyabannaa Macaafa Qulqulluu jalqabsiisuufis carraa dabalataa nuu bana. Wantoonni kun hundi, tajaajili keenya caalaatti kan nama gammachiisu akka taʼu godhu.
3. Jiʼi Bitootessaafi Eblaa qajeelchaa gargaaraa taʼuuf yeroo mijataadha kan jennu maaliifi?
3 Saʼaatii 30 ykn 50 filannee tajaajiluu waan dandeenyuuf, jiʼi Bitootessaafi Eblaa qajeelchaa gargaaraa taanee tajaajiluudhaaf yeroo mijataadha. Kana malees, Sanbadduraa, Bitootessa 22 jalqabee hanga gaafa Ayyaana Yaadannootti, jechuunis hanga Wiixata, Ebla 14tti, duula gammachiisaa namoonni Ayyaana Yaadannoorratti akka argaman afeeruuf godhamurratti ni hirmaanna. Obboloonni yeroo isaanii kenname keessatti naannoo tajaajilaasaanii hamma dandaʼametti waliin gaʼuuf, “harka wal qabatanii” waan hojjetaniif gumiiwwan gammachuudhaan guutamu.—Sef. 3:9.
4. Qajeelchaa gargaaraa taʼuu yoo barbaanne maal gochuu qabna?
4 Ammumaa Qophaaʼaa: Hanga yoonaatti yeroo fudhattee sagantaakee hin ilaalle taanaan, jiʼa tokko ykn lamaaf tajaajilakee balʼisuuf sirreeffama akkamii gochuu akka dandeessu ilaali. Sirriitti irratti kadhadhu. (Yaq. 1:5) Akkasumas, maatiikeefi obboloota gumiikee keessa jiranii wajjin irratti mariʼadhu. (Fak. 15:22) Akkas yoo goote, dhibee fayyaa kan qabdu ykn saʼaatii dheeraa kan hojjettu yoo taʼellee gammachuu qajeelchaa gargaaraa taʼuudhaan argamu dhamdhamuu akka dandeessu beekamaadha.
5. Tibba Ayyaana Yaadannootti tajaajila keenya yoo balʼifanne faayidaa akkamii arganna?
5 Yihowaan tajaajiltoonnisaa akka gammadan barbaada. (Far. 32:11) Tibba Ayyaana Yaadannootti tajaajila keenya balʼisuuf kutannoo gochuun keenya, gammachuun keenya akka dabalu kan godhu taʼuusaarrayyuu, Abbaa keenya isa samiis ni gammachiisa.—Fak. 23:24; 27:11.