Dandeettii Tajaajilarratti Qabnu Fooyyeffachuu—Namoota Maree Keenya Dhaabsisuu Barbaadaniif Deebii Kennuu

Barbaachisaa Kan Taʼe Maaliifi? Balaan uumamaa tokko akka dhufu beekta haa jennu. Namoonni iddoo tokkotti yoo baqachuu baatan balaa kanaaf saaxilamu. Ollaankee tokko balaa kana jalaa akka baqatuuf itti himuu deemtus hojiidhaan qabamee akka jiru dubbachuudhaan si dhagaʼuu dide. Yeroo kanatti carraaqqii isa oolchuuf gootu battaluma sanatti akka hin dhiisne beekamaadha! Namoonni naannoo tajaajilaa keenya keessa jiran hedduun, ergaan keenya lubbuu baraarsuu akka dandaʼu waan hin hubanneef nu hin simatan. Yeroo nuti isaan dubbisuu deemnu hojiidhaan qabanii jiru taʼa. (Mat. 24:37-39) Yookiin oduu sirrii hin taane waan dhagaʼaniif ilaalcha dogoggoraa qabu taʼa. (Mat. 11:18, 19) Akkasumas, nuti amantiiwwan ija gadhee godhatan kaanirraa adda akka hin taane yaadu taʼa. (2 Phe. 2:1, 2) Namni haasofsiisnu sun jalqabarratti fedhii hin qabu taanaan, dafnee abdii kutachuu hin qabnu.

Kana Gochuu Kan Dandeenyu Akkamitti?

Manaa gara manaa deemtee tajaajiluukee dura, namoota maree dhaabsisan si mudachuu akka dandaʼaniifi yeroo kanatti deebii akkamii kennuu akka qabdu yaadi.
Namni haasofsiistu sun mormii yoo kaase, malaan mareekee itti fufuuf yaalii godhi. Tarii akka isa ajaaʼibsiifattu ibsuudhaan kana gochuu dandeessa taʼa. Fakkeenyaaf, amantii mataasaa akka qabu yoo dubbate, “Anis nama akka kee wantoota hafuuraatiif fedhii qabun barbaada ture” isaan jechuu dandeessa. Yeroo tokko tokko miira ykn haala nama haasofsiisaa jirtu sanaa hubachuunkee isa faana mariʼachuukee itti fufuuf si gargaaruu dandaʼa. Fakkeenyaaf hojiidhaan qabamee akka jiru yoo sitti hime, “Hojiidhaan qabamtee akka jirtu naaf gala. Deemuukoo dura garuu kana siif kennuun barbaada” isaan jechuu dandeessa. Fedhii akka hin qabne yoo sitti himemmoo, gaaffii isa gaafachuu dandeessa taʼa. “Macaafa Qulqulluudhaaf fedhii hin qabu jechuukeetii? Moo amantii hundaaf fedhii hin qabdu?” jechuunii dandeessa.
Haalasaa tilmaama keessa galchi. Yihowaan namoonni dirqamaan akka dhaggeeffatan kan hin goone taʼuusaa yaadadhu. (Kes. 30:19) Namni hundi tarkaanfii fudhatuuf Yihowaa duratti dhuunfaadhaan itti gaafatama. (Gal. 6:5) Namni ati haasofsiisaa jirtu nama yaadasaatti cichu yoo taʼe, dhiistee deemuunkee gaariidha. Miirasaa akka isaaf kabajnu argisiisuudhaan, babalʼisaa yeroo kan biraatti isa haasofsiisuuf haala mijeessuu dandeenya.—1 Phe. 3:15.

Jiʼa Sanatti Akkas Gochuuf Yaali:

Namni maree dhaabsisu ennaa si mudatu, nama sana biraa erga deemtee booda, karaa kana caalaa gaarii taʼeen akkamitti isa haasofsiisuun akka isinirra ture nama wajjin tajaajilaa jirtu faana mariʼadhu.