Dandeettii Tajaajila Irratti Qabnu Fooyyeffachuu—Babalʼistoota Haaraa Leenjisuu

Barbaachisaa Kan Taʼe Maaliifi? Bartoonni Yesus warri haaraan dhugaa namoota barsiisuu dabalatee, wantoota inni ajaje “hundumaa” eeguu barachuu qabu. (Mat. 28:19, 20) Namoonni haaraan hedduun Mana Barumsaa Tajaajila Tiʼookraasii irratti galmaaʼuuf gaʼumsa kan qaban siʼa taʼan, karaa al idilee taʼeen miseensota maatii isaaniitii fi michoota isaaniitiif lallabuu jalqabaniiru taʼa. Haa taʼu malee, wanta barachaa jiraniif dinqisiifannaan qaban guddachaa yommuu adeemuu fi Yihowaan namoonni hundi misiraachoo akka dhagaʼan kan barbaadu taʼuu isaa yommuu hubatan, tajaajila dirree irratti hirmaachuuf fedhii akka qaban dubbatu taʼa. (Rom. 10:13, 14) Namoonni haaraan babalʼistoota hin cuuphamne erga taʼanii booda, guddina hafuuraa gochuuf tarkaanfii kana yommuu fudhatanitti amanannaa akka qabaatan leenjii gaarii argachuun isaan barbaachisa.—Luq. 6:40.

Kana Gochuu Kan Dandeenyu Akkamitti?

Babalʼisaa haaraan barreeffamoota lallabuu fi barsiisuuf isa barbaachisan akka argatu isa gargaaraa. Boorsaa tajaajilaa keessan akkamitti akka qindeeffattanii fi kaayyoo barreeffamoota isin qabattan hunda ibsaafii.
Akkaataa dhiheenyaa Tajaajila Mootummaa irra jiru tokko filadhaatii waliin shaakalaa. Akkaataa dhiheenyaa sana jecha mataa isaatiin akka dubbatu jajjabeessaa. Yoomessa kitaaba Mana Barumsaa Tajaajilaa fuula 82 irra jiruu fi naannoo tajaajilaa keessan keessatti baramaa taʼe tokko waliin shaakalaa. Akkaataan uffannaa fi miidhaginaa seera qabeessa taʼe barbaachisaa taʼuu isaa itti himaa.—2 Qor. 6:3, 4.
Leenjii wal irraa hin cinne kennaafi. Babalʼisaa haaraa sanatti kaardii naannoo tajaajilaa itti argisiisaa; akkasumas foormii yeroo manaa gara manaa tajaajilan guutamu akkamitti akka itti fayyadamu isa barsiisaa. Namoota fedhii argisiisan akkamitti akka galmeessu itti argisiisaa. Weeb saayitii jw.org/om jedhamuu fi buukleetii Misiraachoo Saba Hundaaf Taʼu jedhamu akkamitti tajaajila irratti akka fayyadamu isa barsiisaa. Fedhii namoota haasofsiisee akkamitti guddisuu akka dandaʼu itti himaa.—1 Qor. 3:6.
Obsa qabaadhaa; akkasumas isa galateeffadhaa. (Fak. 25:11) Fakkeenya gaarii isaaf taʼaa. Hinaaffaan keessanii fi dhuunfaatti akka isaaf yaaddan argisiisuun keessan, yeroo gara fuulduraatiif buʼaa gaarii argamsiisa.

Jiʼa Kanatti Akkas Gochuuf Yaali:

Nama Macaafa Qulqulluu qayyabsiistanii wajjin manaa gara manaa tajaajilaa; yommuu deddeebii gaaffii gootan ykn qayyabannaa Macaafa Qulqulluu geggeessitan isa fudhadhaa deemaa. Nama qayyabsiistan hin qabdan yoo taʼe immoo, babalʼisaan muuxannoo hin qabne isinii wajjin akka tajaajilu afeeraa.