Yeroo Hunda Gabatee Beeksisaa Ni Ilaaltuu?

Jaarsoliin, tajaajiltoonni gumiifi namoonni gumii keessatti itti gaafatamummaa qaban kaan, yoom kutaa akka qaban beekuuf yeroo hunda gabatee beeksisaa ni ilaalu. Haataʼu malee namoonni gumii hundi achirraa odeeffannoo barbaachisaa argachuu dandaʼu. Galma Mootummaa qulqulleessuuf dabareen keessan yoom akka taʼe beektuu? Daawwataan olaanaa aanaa ykn waajjirri damee, gumichaaf xalayaa barbaachisaa taʼe ergeeraa? Nama Macaafa Qulqulluu qayyabsiistan afeeruu akka dandeessanitti, matadureen haasaa sabaa torban kanaa maal akka taʼe beektuu? Sagantaa walgaʼiirratti ykn tuuta tajaajila dirree keessanirratti jijjiiramni godhame jiraa? Odeeffannoowwan kana keessaa hedduunsaanii walgaʼiirratti himamuunsaanii kan hafe siʼa taʼu, jaarsoliinis odeeffannoowwan kana dhuunfaadhaan nama hundatti himuun isaan rakkisuu dandaʼa. Kanaafuu, yeroo hunda gabatee beeksisaa ilaaluu qabna. Akkas kan goonu yoo taʼe, wanti hundinuu “akka tolutti, sabiriidhaanis hojjetamuu” dandaʼa.—1 Qor. 14:40.