QOʼANNAA 7

Sirrii fi Amansiisaa

Luqaas 1:3

YAADA IJOO: Dhaggeeffattoonni kee xumura sirrii taʼe irra akka gaʼan gargaaruuf ragaawwan amansiisaa taʼanitti fayyadami.

Maddeen amansiisaa taʼanitti fayyadami. Yeroo dandaʼamu hundatti kallattiidhaan dubbisuudhaan yaadni kennitu Dubbii Waaqayyoo irratti akka hundaaʼu godhi. Saayinsii dhugaa taʼuun isaa mirkanaaʼe, oduu gabaafame, muuxannoo tokko ykn ragaa gargaaru kan biraa yoo caqaste, maddi odeeffannoo kee amansiisaa fi yeroon kan itti hin darbine taʼuu isaa dursii mirkaneessi.
Maddeen odeeffannootti sirriitti fayyadami. Ibsi caqasa irratti kennitu, yaada naannoo isaa jiru, guutummaa ergaa Kitaaba Qulqulluu fi barreeffamoota “garbichi amanamaanii fi ogeessi” baasee wajjin kan wal simu akka taʼu godhi. (Mat. 24:45) Maddeen odeeffannoo Kitaaba Qulqulluudhaa ala taʼan yommuu caqastu wanta namni barreesse sun jechuu barbaade utuu hin jijjiirin itti fayyadami.

Wanta raawwatame tokkoo fi wanta lakkoofsaan ibsame tokko arbeessitee hin dubbatin. “Namoota baayʼee” jechuun “namoota gara caalaa isaanii” jechuu akka hin taane, “yeroo baayʼee,” jechuun “yeroo hundumaa,” jechuu akka hin taane akkasumas “hin raawwatamne taʼa” jechuun “hin raawwatamne” jechuu akka hin taane hubadhu.
Ragicha akka hubatan gargaari. Caqasa tokko erga dubbistee ykn madda tokko erga caqastee booda, dhaggeeffattoonni kee xumura tokko irra akka gaʼan gargaaruuf gaaffiiwwan malaan qophaaʼan gaafadhu ykn qabxicha fakkeenyaan ibsi.