1 Азфыстыты

29 Паддзах Давид ӕппӕт адӕмӕн загъта+: «Мӕ фырт Соломон, Хуыцау кӕй равзӕрста+, уый, нырма ӕрыгон+ ӕмӕ ӕвӕлтӕрд у, цы хъуыддаг саразын хъӕуы, уый та стыр хъуыддаг у, уымӕн ӕмӕ ацы галуан* адӕймагӕн нӕу+, фӕлӕ Йегъовӕ Хуыцауӕн. 2 Ӕз ӕппӕт хъарутӕй+ бацархайдтон ӕмӕ мӕ Хуыцауы хӕдзарӕн ӕрцӕттӕ кодтон+ сызгъӕрин+ – сызгъӕрин дзауматӕн, ӕвзист – ӕвзист дзауматӕн, ӕрхуы – ӕрхуы дзауматӕн, ӕфсӕйнаг+ – ӕфсӕйнаг дзауматӕн ӕмӕ хъӕдӕрмӕг+ – хъӕдын дзауматӕн, стӕй оникс+ дуртӕ, чъыры змӕстӕй кӕй ныффидар кӕнынц, ахӕм зынаргъ дуртӕ, нывтӕ кӕмӕй аразынц, ахӕм гыццыл дуртӕ ӕмӕ ӕндӕр алыхуызон зынаргъ дуртӕ ӕмӕ тынг бирӕ алебастр. 3 Ӕмӕ сыгъдӕг кувӕндонӕн цы ӕрцӕттӕ кодтон, уымӕй уӕлдай ма мӕ Хуыцауы хӕдзарӕн, мӕ Хуыцауы хӕдзар мын зынаргъ кӕй у+, уый тыххӕй, ноджыдӕр дӕттын мӕхи+ сызгъӕринӕй ӕмӕ мӕхи ӕвзистӕй+: 4 кувӕндоны уӕтты къултӕ бамбӕрзынӕн ӕртӕ мин таланты сызгъӕрин, офираг+ сызгъӕрин, ӕмӕ авд мин таланты сыгъдӕг ӕвзист, 5 сызгъӕрин – сызгъӕрин дзауматӕн, ӕвзист – ӕвзист дзауматӕн ӕмӕ, ӕрмгуыстгӕнджытӕ цыдӕриддӕр араздзысты, уыдӕттӕн. Мыййаг ма искӕй фӕнды абон Йегъовӕйӕн лӕвӕрттӕ ӕрбахӕссын?»+

6 Ӕмӕ хӕдзарвӕндӕгты+ хистӕртӕ+, Израилы мыггӕгты кънйӕзтӕ+, минты+ сӕргъы ӕмӕ сӕдӕты+ сӕргъы, стӕй паддзахы хъуыддӕгты+ сӕргъы чи лӕууыд, уыдон лӕвӕрттӕ хӕссын райдыдтой. 7 Ӕцӕг Хуыцауы хӕдзары лӕггад кӕнынимӕ цы хъуыддӕгтӕ уыд баст, уыдонӕн радтой фондз мин таланты сызгъӕрин, дӕс мин дарикы*, дӕс мин таланты ӕвзист, ӕстдӕс мин таланты ӕрхуы ӕмӕ сӕдӕ мин таланты ӕфсӕйнаг+. 8 Зынаргъ дуртӕ кӕмӕ уыд, уыдон дӕр сӕ ӕрбахастой Йегъовӕйы хӕдзары хӕзнадонмӕ. Уыцы хӕзнадон уыди Гирсоны+ байзӕддаг Йехиилы+ бар. 9 Ӕмӕ адӕм цин кодтой, Йегъовӕйӕн лӕвӕрттӕ кӕй хастой, ууыл, уымӕн ӕмӕ сӕ хастой зӕрдиагӕй*+. Ӕмӕ паддзах Давиды цинӕн дӕр кӕрон нал уыд+.

10 Уый фӕстӕ Давид ӕппӕт адӕмы раз+ Йегъовӕйӕн раарфӕ кодта+. Давид загъта: «О Йегъовӕ, нӕ фыд Израилы Хуыцау+, табу дын уӕд+ ӕнусӕй-ӕнусмӕ. 11 О Йегъовӕ, ды дӕ стыр+ Хуыцау, хъомысджын+, диссаджы+ Хуыцау, дӕуӕн ӕмбал нӕй+, ды дӕ кадджын+ Хуыцау, уымӕн ӕмӕ дӕу у, уӕларвыл ӕмӕ зӕххыл цыдӕриддӕр ис, уый+. Дӕу у, Йегъовӕ, паддзахад+, ӕмӕ дӕуӕй уӕлдӕр ничи ис+. 12 Ды дӕттыс хъӕздыгдзинад+ ӕмӕ кад+, ӕмӕ алцыдӕр ис дӕ дӕлбар+. Дӕ къухы ис тых+ ӕмӕ хъомыс+, дӕ бон у адӕймаджы сбӕрзонд кӕнын+ ӕмӕ се ’ппӕтӕн дӕр хъару раттын+. 13 Ӕмӕ дын ныр, нӕ Хуыцау, арфӕ кӕнӕм+ ӕмӕ дын дӕ рӕсугъд+ ном кадджын кӕнӕм+.

14 Фӕлӕ чи дӕн ӕз+ ӕмӕ чи сты мӕ адӕм, цӕмӕй нӕ бон уа ахӕм лӕвӕрттӕ кӕнын?+ Алцыдӕр дӕуӕй цӕуы+, ӕмӕ дӕ къухӕй цы райстам, уый дын дӕттӕм. 15 Мах дӕ разы стӕм ӕрцӕуӕггӕгтӕ ӕмӕ ӕрлидзӕг адӕм+, нӕ фыдӕлтӕ се ’ппӕт дӕр куыд уыдысты, афтӕ. Зӕххыл нӕ царды бонтӕ аууонӕй уӕлдай не сты+, ӕмӕ сын ницы ис бакӕнӕн. 16 О Йегъовӕ, нӕ Хуыцау, дӕуӕн дӕ сыгъдӕг номыл хӕдзар саразынӕн цы бирӕ фӕллӕйттӕ ӕрцӕттӕ кодтам, уыдон иууылдӕр дӕ къухӕй сты, ӕмӕ иууылдӕр дӕу сты+. 17 О мӕ Хуыцау, ӕз ӕй зонын, ды зӕрдӕмӕ кӕй кӕсыс+ ӕмӕ, адӕймаг рӕстзӕрдӕ уа, уый дын кӕй у ӕхсызгон+. Ӕмӕ дын ӕз ацы лӕвӕрттӕ иууылдӕр мӕ сыгъдӕг зӕрдӕйӕ радтон, ӕмӕ мын ӕхсызгон у, дӕ адӕм, ам цы адӕм ис, уыдон дӕр дын зӕрдиагӕй кӕй кӕнынц лӕвӕрттӕ. 18 О Йегъовӕ, нӕ фыдӕлтӕ Авраам, Исахъ ӕмӕ Израилы Хуыцау+, дӕ адӕмӕн ахӕм арфӕ ракӕн, цӕмӕй сын ӕнустӕм дӕр ахӕм зӕрдӕйы уаг уа, сӕ хъуыдытӕ ӕмӕ сӕ фӕндтӕ ахӕм уой+, ӕмӕ сын сӕ зӕрдӕтӕ дӕхимӕ раздах+. 19 Ӕмӕ мӕ фырт Соломонӕн баххуыс кӕн, цӕмӕй дын дӕ фӕдзӕхстытӕ+, дӕ амындтӕ+ ӕмӕ дӕ уагӕвӕрдтӕ+ ӕппӕт зӕрдӕйӕ ӕххӕст кӕна+. Баххуыс ын кӕн, цӕмӕй уыдӕттӕ иууылдӕр ӕххӕст кӕна ӕмӕ, ӕз алцыдӕр кӕмӕн ӕрцӕттӕ кодтон+, уыцы галуан сараза»+.

20 Уый фӕстӕ Давид ӕппӕт адӕмӕн загъта+: «Уӕ Хуыцау Йегъовӕйӕн раарфӕ кӕнут»+. Ӕмӕ адӕм се ’ппӕт дӕр сӕ фыдӕлты Хуыцау Йегъовӕйӕн раарфӕ кодтой, ӕмӕ Йегъовӕйы раз ӕмӕ паддзахы раз сӕ зонгуытыл ӕрхаудтой+ ӕмӕ сӕ сӕртӕй ныллӕг акуывтой+. 21 Иннӕ бон та Йегъовӕйӕн ӕрхастой нывӕндтӕ+, стӕй Йегъовӕйӕн ӕрхастой судзинаг нывӕндтӕ+ дӕр: иу мин уӕныджы, иу мин фыры, иу мин уӕрыччы ӕмӕ семӕ кувинаг нозт+ дӕр. Тынг бирӕ нывӕндтӕ ӕрхастой ӕгас Израилы тыххӕй+. 22 Уыцы бон Йегъовӕйы раз хордтой ӕмӕ нызтой ӕмӕ сӕ цинӕн кӕрон нал уыд+. Ӕмӕ Давиды фырт Соломоны дыккаг хатт паддзахӕй сӕвӕрдтой+ ӕмӕ йӕ Йегъовӕйы раз сойӕ байсӕрстой, цӕмӕй уыдаид разамонӕг+, Садокы+ та байсӕрстой, цӕмӕй уыдаид сауджын. 23 Гъемӕ Соломон йӕ фыд Давиды бӕсты ӕрбадт Йегъовӕйы паддзахбадӕныл+ ӕмӕ уыд тынг ӕнтыстджын+. Ӕмӕ израилӕгтӕ се ’ппӕт дӕр йӕ коммӕ кастысты. 24 Кънйӕзтӕ+ се ’ппӕт дӕр, тыхджын лӕгтӕ+, стӕй паддзах Давиды фырттӕ иууылдӕр+ сӕхи паддзах Соломоны дӕлбар бакодтой. 25 Йегъовӕ Соломоны ӕнӕхъӕн Израилы раз тынг скадджын кодта+, йӕ паддзахы кад ын афтӕ бӕрзонд систа, ӕмӕ Израилы йӕ размӕ иу паддзахӕн дӕр ахӕм кад нӕ уыд+.

26 Йессейы фырт Давид паддзах уыд ӕнӕхъӕн Израилӕн+. 27 Давид Израилӕн паддзах уыди цыппор азы+. Авд азы хицауиуӕг кодта Хевроны+, ӕртын ӕртӕ азы та – Иерусалимы+. 28 Ӕмӕ амард зӕрондӕй+ ӕмӕ цардӕфсӕстӕй, хайджын уыд бирӕ хъӕздыгдзинӕдтӕй+ ӕмӕ стыр кадӕй+. Ӕмӕ йӕ фӕстӕ паддзах сси йӕ фырт Соломон+. 29 Паддзах Давиды хъуыддӕгты тыххӕй, фыццӕгты тыххӕй ӕмӕ фӕстӕгты тыххӕй, фыст ис, цӕстылуайӕнтӕ уынӕг+ Самуил, пехуымпар Нафан+ ӕмӕ цӕстылуайӕнтӕ уынӕг Гад+ цы ныффыстой, уым. 30 Фыст ма дзы ис, куыд паддзахиуӕг кодта, уый тыххӕй дӕр, йӕ хъомысы тыххӕй ӕмӕ, йӕ рӕстӕджы+ цы хабӕрттӕ ӕрцыд, стӕй Израилы ӕмӕ зӕххыл ӕппӕт паддзахӕдты дӕр цы хабӕрттӕ ӕрцыд, уыдоны тыххӕй+.