Йезекил

37 Мӕныл уыди Йегъовӕйы къух+, ӕмӕ мӕ Йегъовӕ йӕ тыхы* фӕрцы ахаста+ ӕмӕ мӕ ӕрӕвӕрдта дӕлвӕзы астӕу. Дӕлвӕз та уыди стджытӕй йедзаг+. 2 Уый мӕ дӕлвӕзы стджыты астӕу фӕразил-базил кӕнын кодта. Уыди дзы тынг бирӕ стджытӕ ӕмӕ уыдысты тынг хус+. 3 Ӕмӕ мӕ бафарста: «Адӕймаджы фырт, гӕнӕн ис, ӕмӕ ацы стджытӕ райгас уой?» Ӕз ын дзуапп радтон: «Уый ды зоныс, о Дунедарӕг Хуыцау Йегъовӕ»+. 4 Уӕд мын уый загъта: «Пехуымпариуӕг кӕн ацы стджыты тыххӕй, зӕгъ сын: „О хус стджытӕ, байхъусут Йегъовӕйы ныхасмӕ:

5 „Ацы стджытӕн афтӕ зӕгъы Дунедарӕг Хуыцау Йегъовӕ: „Ӕз уӕ улӕфт бауадздзынӕн, ӕмӕ райгас уыдзыстут+. 6 Ӕз уыл ӕрӕвӕрдзынӕн нуӕрттӕ, афтӕ бакӕндзынӕн, ӕмӕ уыл фыд фӕзындзӕн, бамбӕрздзынӕн уӕ цармӕй ӕмӕ уӕ улӕфт бауадздзынӕн, ӕмӕ райгас уыдзыстут+. Ӕмӕ йӕ базондзыстут, ӕз кӕй дӕн Йегъовӕ“»+.

7 Ӕмӕ ӕз дӕр пехуымпариуӕг кодтон, загъд мын куыддӕриддӕр уыди, афтӕ+. Ӕмӕ куы пехуымпариуӕг кодтон, уӕд райхъуыст цыдӕр уынӕр, гыбар-гыбур, ӕмӕ стджытӕ кӕрӕдзиимӕ, иу стӕг иннӕимӕ, иу кӕнын райдыдтой. 8 Ӕмӕ дын сыл нуӕрттӕ ӕмӕ фыд куы фӕзынид, стӕй сыл царм дӕр куы рацӕуид. Фӕлӕ сӕ мидӕг улӕфт нӕ уыди.

9 Ӕмӕ мын дарддӕр загъта: «Пехуымпариуӕг кӕн дымгӕйӕн. Пехуымпариуӕг кӕн, адӕймаджы фырт, ӕмӕ дымгӕйӕн зӕгъ: „Афтӕ зӕгъы Дунедарӕг Хуыцау Йегъовӕ: „Дымгӕ, рацу цӕгат ӕмӕ хуссарӕй, скӕсӕн ӕмӕ ныгуылӕнӕй ӕмӕ баулӕф ацы мӕрдтыл+, цӕмӕй райгас уой“»+.

10 Ӕмӕ ӕз дӕр пехуымпариуӕг кодтон, куыддӕриддӕр мын загъта, афтӕ. Ӕмӕ сӕ бацыд улӕфт, ӕмӕ райгас сты ӕмӕ сӕ къӕхтыл слӕууыдысты+ – уыдысты тынг стыр ӕфсад.

11 Уый фӕстӕ мын загъта: «Адӕймаджы фырт, ацы стджытӕ сты Израилы адӕм иууылдӕр+. Уыдон афтӕ зӕгъынц: „Не стджытӕ бахус сты, ницыуал ныфс нӕ ис+. Иннӕтӕй бынтон фӕхицӕн стӕм“. 12 Уымӕ гӕсгӕ пехуымпариуӕг кӕн ӕмӕ сын зӕгъ: „Афтӕ зӕгъы Дунедарӕг Хуыцау Йегъовӕ: „О мӕ адӕм, ӕз уын уӕ ингӕнтӕ байгом кӕндзынӕн+ ӕмӕ уӕ ракӕндзынӕн уӕ ингӕнтӕй. Ӕмӕ уӕ ’ркӕндзынӕн Израилы зӕхмӕ+. 13 Ӕмӕ уын, мӕ адӕм, уӕ ингӕнтӕ куы байгом кӕнон ӕмӕ уӕ уырдыгӕй куы ракӕнон, уӕд ӕй базондзыстут, ӕз кӕй дӕн Йегъовӕ“+. 14 „Ӕз уӕ мӕ тыхӕй схайджын кӕндзынӕн, ӕмӕ райгас уыдзыстут+. Ӕмӕ уӕ ӕрцӕрын кӕндзынӕн уӕ зӕххыл. Ӕмӕ йӕ базондзыстут, уый кӕй загътон ӕз, Йегъовӕ, ӕмӕ йӕ кӕй сӕххӕст кодтон“,– зӕгъы Йегъовӕ»+.

15 Йегъовӕ мын дарддӕр загъта: 16 «Ды та, адӕймаджы фырт, райс лӕдзӕг+ ӕмӕ йыл ныффысс: „Иудӕйӕн ӕмӕ йе ’мбӕлттӕн, Израилы фырттӕн“+. Стӕй райс ӕндӕр лӕдзӕг ӕмӕ йыл ныффысс: „Иосифӕн – Ефремы+ лӕдзӕгӕн – ӕмӕ йе ’мбӕлттӕн, ӕгас Израилы адӕмӕн“+. 17 Уыцы дыууӕ лӕдзӕджы баиу кӕн, ӕмӕ дӕ къухы бауыдзысты иу лӕдзӕг+. 18 Ӕмӕ дын дӕ адӕмы фырттӕ куы зӕгъой, ӕппӕт адӕттӕ цы нысан кӕнынц, уый нын нӕ зӕгъдзынӕ, зӕгъгӕ+, 19 уӕд-иу сын зӕгъ: „Афтӕ зӕгъы Дунедарӕг Хуыцау Йегъовӕ: „Ӕз райсдзынӕн Иосифы лӕдзӕг, Ефремы къухы чи ис, уый. Уыцы лӕдзӕг ӕвдисы Израилы мыггӕгтӕ дӕр, Ефремы ӕмбӕлтты. Ӕмӕ уыцы мыггӕгтӕ сӕвӕрдзынӕн ууыл, ома Иудӕйы лӕдзӕгыл, ӕмӕ сӕ иу лӕдзӕг скӕндзынӕн+. Ӕмӕ мӕ къухы бауыдзысты иу лӕдзӕг“. 20 Кӕуыл ныффысдзынӕ, уыцы лӕдзджытӕ хъуамӕ уой дӕ къухы сӕ цӕстыты раз+.

21 Зӕгъ сын: „Афтӕ зӕгъы Дунедарӕг Хуыцау Йегъовӕ: „Израилы фырттӕ цы адӕмтӕм фӕцыдысты, уыдоны ’хсӕнӕй сӕ ракӕндзынӕн, алы рӕттӕй сӕ ӕрӕмбырд кӕндзынӕн ӕмӕ сӕ фӕстӕмӕ сӕ зӕхмӕ ӕркӕндзынӕн+. 22 Ӕмӕ сӕ уыцы зӕххыл, Израилы хӕхтыл, скӕндзынӕн иу адӕм+, ӕмӕ се ’ппӕтӕн дӕр уыдзӕн иу паддзах+. Уыдон дыууӕ адӕмы нал уыдзысты, дыууӕ паддзахадыл нал уыдзысты дих+. 23 Ӕмӕ сӕхи нал чъизи кӕндзысты сӕ фаджыс-хуыцӕуттӕй, се ’наккагдзинӕдтӕй ӕмӕ се ’ппӕт фыдракӕндтӕй+. Ӕз сӕ фервӕзын кӕндзынӕн, сӕ цӕрӕнбынӕтты цы тӕригъӕдджын митӕ кодтой, уыдонӕй се ’ппӕтӕй дӕр ӕмӕ сӕ ссыгъдӕг кӕндзынӕн+. Ӕмӕ уыдон суыдзысты мӕ адӕм, ӕз та суыдзынӕн сӕ Хуыцау+.

24 Уыдонӕн паддзах уыдзӕн мӕ лӕггадгӕнӕг Давид+, ӕмӕ се ’ппӕтӕн дӕр уыдзӕн иу фыййау+. Уыдон цӕрдзысты мӕ тӕрхӕттӕм гӕсгӕ+, фидар хӕцдзысты мӕ закъӕттыл+ ӕмӕ сӕ ӕххӕст кӕндзысты+. 25 Уыдон цӕрдзысты, мӕ лӕггадгӕнӕг Иаковӕн кӕй радтон, уӕ фыдӕлтӕ кӕм цардысты, уыцы зӕххыл+. О, цӕрдзысты йыл ӕнустӕм+ – сӕхӕдӕг дӕр, сӕ фырттӕ дӕр ӕмӕ сӕ фыртты фырттӕ дӕр+, мӕ лӕггадгӕнӕг Давид та ӕнустӕм уыдзӕн сӕ сӕргълӕууӕг+.

26 Ӕз семӕ скӕндзынӕн фарны бадзырд+. Семӕ конд ӕрцӕудзӕн ӕнусон бадзырд+. Сӕ зӕххыл сӕ ӕрцӕрын кӕндзынӕн, сбирӕ сӕ кӕндзынӕн+ ӕмӕ мӕ кувӕндон ӕнустӕм се ’хсӕн сӕвӕрдзынӕн+. 27 Мӕ цатыр уыдзӕн сӕ сӕрмӕ+, ӕмӕ ӕз суыдзынӕн сӕ Хуыцау, уыдон та суыдзысты мӕ адӕм+. 28 Ӕмӕ мӕ кувӕндон ӕнустӕм се ’хсӕн куы уа+, уӕд ӕй адӕмтӕ базондзысты, ӕз, Йегъовӕ+, кӕй сыгъдӕг кӕнын Израилы“».