Дзырд «чырыстон» йӕ нысаниуӕг фесӕфта?
ЧЫРЫСТОН кӕй ис схонӕн? Ацы фарстӕн цавӕр дзуапп раттис? Цалдӕр бӕстӕйы адӕммӕ лӕвӕрдтой ацы фарст, ӕмӕ мӕнӕ цы загътой:
«Йесойы фӕдыл чи цӕуы ӕмӕ йӕ чи фӕзмы, уый».
«Хорз адӕймаг чи у ӕмӕ адӕмимӕ хорз чи цӕры, уый».
«Чырыстийы Хицау ӕмӕ Ирвӕзынгӕнӕгыл чи нымайы, уый».
«Мессӕмӕ чи цӕуы, кувгӕ-кувын фӕрдгуытӕ чи ӕвзары ӕмӕ аргъуаны дзул ӕмӕ сӕнӕй чи аходы, уый».
«Мӕнмӕ гӕсгӕ, цӕмӕй чырыстон уай, уый тыххӕй ӕнӕмӕнг аргъуанмӕ цӕуын нӕ хъӕуы».
Суанг ма дзырдуӕттӕ дӕр алыхуызон ӕмбарын кӕнынц ацы дзырд. Зӕгъӕм, иу дзырдуаты дзырд «чырыстонӕн» ис дӕс нысаниуӕджы, райдай «ӕууӕнды кӕнӕ хӕст у Йесо Чырыстийы диныл» ӕмӕ фӕу «хорз кӕнӕ ӕгъдауджын адӕймагӕй». Уӕдӕ диссаг нӕу, бирӕтӕн, чырыстон кӕй ис схонӕн, уый зӕгъын зын кӕй у.
Адӕмы цӕстӕнгӕстӕ ивынц
Абон, йӕхи чырыстоныл чи нымайы, уыдонӕн — суанг ма иу аргъуанмӕ чи цӕуы, уыдонӕн дӕр — ис алыхуызон цӕстӕнгӕстӕ ахӕм фарстатӕм: Библи Хуыцауы удцырынӕй фыст у ӕви нӕ, эволюцийы теори, аргъуаны архайд политикӕйы ӕмӕ иннӕтӕн дӕ уырнындзинады тыххӕй дзурын хъӕуы ӕви нӕ. Арӕх моралон фарстатӕ — аборт кӕнӕн ис ӕви нӕ, лӕппу лӕппуимӕ кӕнӕ чызг чызгимӕ лӕг ӕмӕ усы цард куы кӕной, уӕд уый раст у ӕви нӕ, чызг ӕмӕ лӕппу сӕ къухтӕ куы нӕ ӕрфыссой, уӕд сын иумӕ ис цӕрӕн ӕви нӕ — свӕййынц быцӕуты артдзӕст. Куыд зыны, афтӕмӕй адӕмы цӕстӕнгӕстӕ уыцы фарстатӕм ивынц.
Цӕвиттонӕн, журнал «Чырыстон ӕнусы» фыст уыд, зӕгъгӕ, иу протестантон аргъуаны тӕрхондон ӕрӕджы схъӕлӕс кодта, аргъуанӕн кӕй ис бар, цӕмӕй «йӕ разамонджыты къордмӕ гомосексуалисттӕй ӕвзарӕн уа» («Christian Century»). Иуӕй-иу динамонджытӕ та ма загътой ахӕм хъуыды дӕр, зӕгъгӕ, фервӕзынӕн Йесойыл ӕууӕндын ахсджиаг нӕу. «Нью-Йорк таймс» куыд хъусын кӕны, афтӕмӕй уыдонмӕ гӕсгӕ, иудаизмыл цы адӕм хӕцы, уыдон дӕр, пысылмӕттӕ ӕмӕ иннӕ динты минӕвӕрттӕн дӕр «[чырыстӕттау] сӕ бон у уӕларвмӕ ссӕуын» («The New York Times»).
Ахъуыды ма кӕн, марксист хӕцы капитализмы фарс, демократ — диктатурӕйы ӕмӕ ӕрдз хъахъхъӕныны фарслӕууӕг та дзуры, хъӕд цӕгъдын кӕй хъӕуы, уый тыххӕй. Ды, ӕвӕццӕгӕн, зӕгъдзынӕ: «Уыцы адӕймаг нӕу ӕцӕг марксист, ӕцӕг демократ кӕнӕ ӕрдз хъахъхъӕныны ӕцӕг фарсхӕцӕг», ӕмӕ раст зӕгъдзынӕ. Уӕдӕ, абон йӕхи чырыстоныл чи нымайы, уыдоны алыхуызон цӕстӕнгӕстӕм куы ӕркӕсай, уӕд фендзынӕ, арӕх кӕрӕдзийы ныхмӕ кӕй вӕййынц ӕмӕ сын иумӕйагӕй кӕй ницы ис, Йесо Чырысти, чырыстон дины Бындурӕвӕрӕг, цӕуыл ахуыр кодта, уыимӕ дӕр. Уӕдӕ сӕ уыцы цӕстӕнгӕстӕм гӕсгӕ ӕцӕг чырыстӕттӕ схонӕн ис? (1 Коринфӕгтӕм 1:10).
Куыд фендзыстӕм, афтӕмӕй чырыстон ахуырӕдтӕ дуджы зондахастмӕ гӕсгӕ раджы райдыдтой ивын. Фӕлӕ Хуыцау ӕмӕ Йесо Чырысти уыцы ивындзинӕдтӕм цы цӕстӕй кӕсынц? Ӕнӕчырыстон ахуырӕдты фарс цы аргъуантӕ хӕцынц, уыдонӕн сӕ бон у сӕхи чырыстӕттӕ хонын? Ацы фарстатӕ ӕвзӕрст цӕуынц иннӕ статьяйы.