Дӕхи дӕр фервӕзын кӕн ӕмӕ дӕм чи хъусы, уыдоны дӕр
«Лӕмбынӕг хъуыды кӕн дӕхиуыл ӕмӕ ахуырадыл [«куыд амоныс, ууыл», НД]... афтӕ кӕнгӕйӕ дӕхи [дӕр] фервӕзын кӕндзынӕ ӕмӕ дӕумӕ хъусджыты дӕр» (1 ТИМОФЕЙМӔ 4:16).
1, 2. Цы разӕнгард кӕны ӕцӕг чырыстӕтты адӕмы ирвӕзын кӕныны куыстмӕ?
ТАИЛАНДЫ цӕгатфарс иу дард хъӕуы лӕг ӕмӕ ус, Иегъовӕйы Ӕвдисӕнтӕ, къуылдымтыл цӕрӕг знӕмы адӕмимӕ ныхас кӕнынц, нырмӕ бынтондӕр кӕй нӕ зыдтой, ахӕм ӕвзагыл. Цӕмӕй хъӕуы цӕрджытӕн сӕ бон уа Хуыцауы Паддзахады тыххӕй хорз уацхъуыд хъусын кӕнын, уый тыххӕй уыцы къай ӕрӕджы ахуыр кӕнын райдыдта ног ӕвзаг, лаху, зӕгъгӕ.
2 «Уыцы диссаджы адӕймӕгтӕн ӕххуысгӕнгӕйӕ, цы циндзинад ӕвзарӕм ӕмӕ куыд райгонд стӕм, уымӕн зӕгъӕн дӕр нӕй,— дзуры лӕг. — Ам уӕлдай тынг хатӕм, Раргомады 14:6, 7-ӕм стихтӕ, афтӕ кӕм дзырдӕуы, зӕгъгӕ, хорз уацхъуыд хъуыстгонд цӕудзӕн „алы адӕмӕн ӕмӕ мыггагӕн ӕмӕ ӕвзагӕн“ (НФ), куыд ӕххӕст кӕнынц, уый. Зӕххы къорийыл хорз уацхъуыд кӕм нӕма фехъуыстой, ахӕм бынӕттӕ бирӕ нал ис, ӕмӕ ацы бынат дӕр у уыдонӕй иу. Библи ахуыр кӕнын кӕй фӕнды, уыдонӕн се ’ппӕтыл ӕххӕсгӕ дӕр нӕ кӕнӕм». Куыд зыны, афтӕмӕй уыцы лӕг ӕмӕ ус канд сӕхи фервӕзын кӕныны ныфс нӕй, фӕлӕ ма сӕм чи хъусы, уыдоны дӕр. Фӕлӕ цымӕ уый ныфс нӕй ӕппӕт чырыстӕтты дӕр?
«Лӕмбынӕг хъуыды кӕн дӕхиуыл»
3. Цӕмӕй нӕ бон иннӕты фервӕзын кӕнын уа, уый тыххӕй уал нӕхӕдӕг цы хъуамӕ аразӕм?
3 Апостол Павел Тимофейӕн ахӕм уынаффӕ радта: «Лӕмбынӕг хъуыды кӕн дӕхиуыл ӕмӕ ахуырадыл [«куыд амоныс, ууыл, НД]». Ӕмӕ уыцы уынаффӕ хауы ӕппӕт чырыстӕттӕм дӕр (1 Тимофеймӕ 4:16). Ӕцӕгдӕр, цӕмӕй иннӕтӕн фервӕзынӕн баххуыс кӕнӕм, уый тыххӕй уал хъуамӕ «лӕмбынӕг хъуыды кӕнӕм нӕхиуыл». Цы нысан кӕны уый? Кӕддӕриддӕр нӕ зӕрдыл кӕй хъуамӕ дарӕм, цы рӕстӕджы цӕрӕм, уый. Йесо йӕ фӕдылдзӕуджытӕн радта, ацы «цардӕвӕрды кӕрон» (НД) кӕд уыдзӕн, уый базонынӕн сын чи баххуыс кодтаид, ахӕм хицӕн хӕйттӕй конд нысан. Фӕлӕ ма Йесо ноджыдӕр загъта, кӕрон бӕлвырдӕй цы бон ӕрцӕудзӕн, уый кӕй нӕ зондзыстӕм (Матфейы 24:3, 36). Уӕдӕ уый зонгӕйӕ нӕхи куыд хъуамӕ дарӕм?
4. а) Ацы цардӕвӕрдӕн ма цы рӕстӕг баззад, уымӕ нын цавӕр ахаст хъуамӕ уа? ӕ) Цавӕр цӕстӕнгасӕй хъуамӕ хизӕм нӕхи?
4 Алчидӕр нӕ йӕхимидӕг ахъуыды кӕнӕт: «Цымӕ ма ацы цардӕвӕрдӕн цы рӕстӕг баззад, уымӕй мӕхи ӕмӕ мӕм чи хъусы, уыдоны фервӕзын кӕнынӕн ӕххӕстӕй пайда кӕнын? Ӕви афтӕ хъуыды кӕнын: иугӕр кӕрон кӕд ӕрцӕудзӕн, уый бӕлвырд бӕрӕг нӕу, уӕд ууыл цы тыхсон?» Ахӕм цӕстӕнгас тынг тӕссаг у. Уымӕн ӕмӕ нын Йесо бынтон ӕндӕр фӕдзӕхст радта: «Цӕттӕ ут, уымӕн ӕмӕ кӕцы сахат ӕнхъӕл не стут, ӕрцӕудзӕн Адӕймаджы Фырт» (Матфейы 24:44). Абон уый рӕстӕг нӕу, ӕмӕ Иегъовӕйы хъуыддаг фӕфӕстӕдӕр кӕнӕм ӕмӕ ацы дунейы ӕдасдзинад ӕмӕ ӕхцондзинад агурӕм (Лукайы 21:34—36).
5. Иегъовӕйӕн Чырыстийы агъоммӕ цы ӕвдисӕнтӕ уыд, уыдон нын цавӕр цӕвиттон ныууагътой?
5 Нӕхиуыл лӕмбынӕг кӕй хъуыды кӕнӕм, уый ма нысан кӕны, цыфӕнды зындзинӕдты дӕр чырыстон фӕндагыл кӕронмӕ фидар кӕй лӕудзыстӕм, уый. Ивгъуыд заманты Хуыцауы лӕггадгӕнджытӕ кӕронмӕ фидар лӕууыдысты, кӕд-иу сын уыцы тӕккӕ фервӕзыны ныфс нӕ уыд, уӕддӕр. Павел цӕвиттонӕн куы ’рхаста, Чырыстийы агъоммӕ чи цард, уыцы ӕвдисӕнты: Авел, Енох, Ной, Авраам ӕмӕ Саррӕйы, уӕд банысан кодта, зӕгъгӕ, уыдон «зӕрдӕвӕрдты сӕххӕст нӕ федтой, ӕрмӕст сӕм дарддӕр кастысты ӕмӕ сыл цин кодтой, ӕмӕ сӕхи тыххӕй дзырдтой, ацы зӕххыл кӕй сты ӕцӕгӕлӕттӕ ӕмӕ рӕстӕгмӕ цӕрджытӕ». Уыдон ӕнцон цард нӕ равзӕрстой ӕмӕ сӕ алыварс цы адӕм уыд, уыдонау ӕнӕгъдау хъуыддӕгтыл нӕ ныххӕцыдысты, фӕлӕ ӕнӕрхъӕцӕй ӕнхъӕлмӕ кастысты «зӕрдӕвӕрдты сӕххӕстмӕ» (Дзуттытӕм 11:13, НД; 12:1).
6. I ӕнусы чырыстӕттӕ ирвӕзындзинадмӕ цы цӕстӕй кастысты, уый сӕ цардыл куыд ӕндӕвта?
6 I ӕнусы чырыстӕттӕ дӕр ацы дунейы сӕхи нымадтой «ӕрцӕуӕггӕгтыл» (1 Петры 2:11). Н. э. 70 азы Иерусалимы ныппырхы рӕстӕджы ӕцӕг чырыстӕттӕ удӕгасӕй куы баззадысты, уый фӕстӕ дӕр уацамынды хъуыддаг нӕ ныууагътой кӕнӕ дунейы адӕм куыд цардысты, афтӕ нӕ райдыдтой цӕрын. Уыдон зыдтой, кӕронмӕ иузӕрдионӕй чи баззайа, уыдонмӕ ноджы стырдӕр ирвӕзындзинад кӕй ӕнхъӕлмӕ кӕсы, уый. Ӕмӕ ӕцӕгдӕр, уымӕй бирӕ азты фӕстӕ, н. э. 98 азы, апостол Иоанн фыста: «Дуне дӕр фӕивгъуыйы, ӕмӕ йӕ фӕндон [«йӕ цыбӕлдзинад», НФ] дӕр, фӕлӕ Хуыцауы фӕндон ӕххӕстгӕнӕг уыдзӕн мыггагмӕ» (1 Иоанны 2:17, 28).
7. Иегъовӕйы Ӕвдисӕнтӕ абон куыд ӕвдисынц фӕразондзинад?
7 Абон Иегъовӕйы Ӕвдисӕнтӕ дӕр ӕнӕрынцойӕ хъусын кӕнынц хорз уацхъуыд, кӕд уый тыххӕй карз ӕфхӕрд дӕр ӕййафынц, уӕддӕр. Цымӕ афтӕ бирӕ кӕй фӕразынц, уый дзӕгъӕлы у? Кӕй зӕгъын ӕй хъӕуы, нӕ, уымӕн ӕмӕ Йесо фидарӕй загъта: «Кӕронмӕ ныффӕразӕг та фервӕздзӕн» — кӕнӕ ацы цардӕвӕрды кӕронмӕ, йе та йӕ царды кӕронмӕ чи бафӕраза, уый. Райгасдзинады рӕстӕджы Иегъовӕ ӕрхъуыды кӕндзӕн ӕмӕ схорзӕхджын кӕндзӕн, йӕ иузӕрдион лӕггадгӕнджытӕй чи амард, уыдоны се ’ппӕты дӕр (Матфейы 24:13; Дзуттытӕм 6:10).
8. Ивгъуыд заманты чырыстӕтты фӕразондзинадӕн кӕй аргъ кӕнӕм, уый куыд у нӕ бон равдисын?
8 Уый ӕддейӕ мах амондджын стӕм, ивгъуыд заманты ӕцӕг чырыстӕттӕ ӕрмӕст сӕхи ирвӕзындзинадыл кӕй нӕ хъуыды кодтой, уымӕй дӕр. Уыдоны фӕрцы базыдтам Хуыцауы Паддзахады тыххӕй ӕмӕ сӕ стыр бузныг стӕм, Йесойы хӕслӕвӕрд — «ацӕут, сахуыр кӕнут ӕппӕт адӕмты... ахуыр кӕнгӕйӕ уыдоны ӕххӕст кӕнын ӕппӕт, Ӕз цы бафӕдзӕхстон сымахӕн» — сӕххӕст кӕныныл афтӕ удуӕлдайӕ кӕй архайдтой, уый тыххӕй (Матфейы 28:19, 20). Цӕй уӕдӕ ма нын цалынмӕ фадат ис, уӕдмӕ хорз уацхъуыд хъусын кӕнӕм, чи ма йӕ нӕ фехъуыста, уыдонӕн ӕмӕ уымӕй ӕвдисӕм, фыццаг чырыстӕттӕй бузныг кӕй стӕм, уый. Фӕлӕ ахуыргӕнинӕгтӕ цӕттӕ кӕныны хъуыддаджы уацамынд ӕрмӕстдӕр фыццаг къахдзӕф у.
Лӕмбынӕг хъуыды кӕн, куыд амоныс, ууыл
9. Адӕмӕй хорз куы хъуыды кӕнӕм, уӕд нын уый куыд баххуыс кӕндзӕн семӕ Библи ахуыр кӕнын райдайынӕн?
9 Нӕ хӕс адӕмӕн ӕрмӕст хъусын кӕнын нӕу, фӕлӕ ма сӕ ахуыр кӕнын дӕр. Йесо нын бахӕс кодта, цӕмӕй адӕмы ахуыр кӕнӕм, цы нын бафӕдзӕхста, уыдӕттӕ иууылдӕр ӕххӕст кӕнын. Раст у, иуӕй-иу рӕтты стӕмты йеддӕмӕ Иегъовӕйы тыххӕй базонын никӕй фӕнды. Фӕлӕ цы адӕмӕн хъусын кӕнӕм, уыдонӕй афтӕ куы хъуыды кӕнӕм, ницы сӕ хъӕуы, не сразы уыдзысты, уӕд нын тынг зын уыдзӕн искӕимӕ Библи ахуыр кӕнын райдайын. Иветт пионерӕй лӕггад кӕны, иуӕй-иутӕ афтӕ кӕмӕй зӕгъынц, зӕгъгӕ, дзы ницы ӕрӕвзӕрдзӕн, ахӕм бынаты. Уый фӕхатыд, уырдӕм хъусын кӕнынмӕ ӕндӕр рӕттӕй чи ӕрцӕуы ӕмӕ адӕммӕ ахӕм ахаст чи нӕ дары, уыдонӕн сӕ къухы кӕй бафты Библи хӕдзары искӕимӕ ахуыр кӕнын райдайын. Иветт дӕр кӕм хъусын кодта, уыцы бынатмӕ ӕндӕр цӕстӕй куы акаст, уӕд уый дӕр ссардта, Библи ахуыр кӕнын кӕй фӕнды, ахӕм адӕймӕгты.
10. Адӕмӕн Библи амонгӕйӕ нӕ хӕс сӕйраджыдӕр цы у?
10 Иуӕй-иу Ӕвдисӕнтӕ сӕ ныфс нӕ хӕссынц искӕимӕ Библи ахуыр кӕнынмӕ. Афтӕ сӕм кӕсы, ома сӕ бон не суыдзӕн. Раст у, иууыл ӕмхуызон курдиатджын не стӕм. Фӕлӕ Хуыцауы Ныхас адӕмӕн цӕмӕй ӕнтыстджынӕй амонӕм, уый тыххӕй стыр зонындзинӕдтӕ ницӕмӕн хъӕуы. Библийӕн йӕхимидӕг ис адӕмыл бандавыны тых ӕмӕ Йесо куыд загъта, афтӕмӕй фысы хуызӕн адӕм ӕцӕг Фыййауы хъӕлӕс куы фехъусой, уӕд ӕй ӕнӕмӕнг базондзысты. Уӕдӕ ма мах та ӕрмӕстдӕр хъӕуы Хорз Фыййауы, Йесойы, ахуырӕдтӕ адӕмӕн, нӕ бон куыд у, афтӕ хуымӕтӕгӕй ӕмбарын кӕнын (Иоанны 10:4, 14).
11. Цӕмӕй Библи кӕимӕ ахуыр кӕнӕм, уыдонӕн хуыздӕр ӕххуыс кӕнӕм, уый тыххӕй цы ис аразӕн?
11 Цы нын баххуыс кӕндзӕн Йесойы ахуырӕдтӕ адӕмӕн, гӕнӕн куыд ис, афтӕ ӕнтыстджындӕрӕй амонынӕн? Фыццаджыдӕр, нӕхӕдӕг хъуамӕ базонгӕ уӕм, ныхас цӕуыл цӕудзӕн, уый тыххӕй Библи цы дзуры, уыимӕ. Цалынмӕ цавӕрдӕр фарст искӕмӕн бамбарын кӕнай, уӕдмӕ уал ӕй хъуамӕ дӕхӕдӕг хорз бамбарай. Уый ӕддейӕ хорз уаид, Библи ахуыргӕнгӕйӕ уын кӕрӕдзиимӕ куы уаид уӕздан, фӕлӕ хӕлар ахастытӕ. Кӕимӕ ахуыр кӕнӕм, уыдон, суанг бынтон ӕрыгӕттӕ дӕр, сӕхи сӕрибар куы фӕхатынц, кӕй сын аргъ кӕнӕм ӕмӕ сӕм зӕрдӕхӕлар кӕй стӕм, уый куы фӕуынынц, уӕд хуыздӕр бамбарынц ӕрмӕг (Фӕсномыг ныхӕстӕ 16:21).
12. Ахуыргӕнинаг ӕрмӕг кӕй бамбӕрста, уый куыд ис сбӕлвырдгӕнӕн?
12 Ахуыргӕнӕджы хӕс уый нӕу, цӕмӕй ахуыргӕнинаг, дзырд цӕуыл цӕуы, уый ӕмбаргӕ дӕр ма кӕна, афтӕмӕй йын йӕ ныхӕстӕ фӕлхат кӕна. Ӕххуыс ын кӕн, цы базоны, уый арф бамбарынӕн. Дӕ ныхӕстӕ дын куыд бамбардзӕн, уый баст у, цы ахуырдзинад ӕм ис, куыд цард ӕмӕ Библиимӕ куыд хорз у зонгӕ, ууыл. Уымӕ гӕсгӕ ахъуыды кӕн: цы ӕрмӕг ахуыр кӕнут, уым Библийӕ цы стихтӕ хаст цӕуы, уыдонӕн сӕ нысаниуӕг ӕмбары? Цӕмӕй уый базонай, уый тыххӕй та дӕ хъӕуы, „о“ кӕнӕ „нӕ“ зӕгъӕн кӕм нӕй, фӕлӕ хи ныхӕстӕй бамбарын кӕнын кӕй хъӕуы, ахӕм фарстытӕ дӕттын (Лукайы 9:18—20). Иуӕй-иутӕ цыдӕр куы нӕ фембарынц, уӕддӕр ӕфсӕрмы фӕкӕнынц ахуыргӕнӕджы бафӕрсын, ӕмӕ уымӕ гӕсгӕ, цы ахуыр кӕнынц, уый гӕнӕн ис кӕронмӕ ма ӕмбарой. Уӕдӕ Библи кӕимӕ ахуыр кӕныс, уый разӕнгард кӕн, цӕмӕй фарстытӕ дӕтта ӕмӕ цыдӕр кӕронмӕ куы нӕ ӕмбара, уӕд ӕй ӕргом дзура (Маркы 4:10; 9:32, 33).
13. Библи кӕимӕ ахуыр кӕныс, уымӕн ахуыргӕнӕг суӕвынӕн куыд ис баххуыс кӕнӕн?
13 Искӕимӕ Библи ахуыр кӕнгӕйӕ тынг ахсджиаг у уымӕн дӕр ахуыргӕнӕг суӕвынӕн баххуыс кӕнын (Галатӕгтӕм 6:6). Уый тыххӕй хорз уаид, цы сахуыр кодтат, уый фӕлхатгӕнгӕйӕ, исты хъуыды йӕхи ныхӕстӕй хуымӕтӕгӕй куы бамбарын кӕнид, раст ӕй цыма фыццаг хатт чи хъусы, ахӕм адӕймагӕн ӕмбарын кӕны, афтӕ. Фӕстӕдӕр уыцы адӕймаг хъусын кӕнынмӕ цӕттӕ куы уа, уӕд ӕй фӕхон, цӕмӕй иумӕ ацӕуат уацамынды. Демӕ, ӕвӕццӕгӕн, йӕхи хуыздӕр хатдзӕн, ӕмӕ иу-гыццыл куы сфӕлтӕра, куы фӕцахуыр уа, уӕд нал тӕрсдзӕн, ӕмӕ йӕ бон уыдзӕн ӕнӕ дӕуӕй дӕр хъусын кӕнын.
Ӕххуыс — Иегъовӕйы хӕлар суӕвынӕн
14. Ахуыргӕнӕгӕн йӕ сӕйраг нысан цы у ӕмӕ цӕмӕй уыцы нысан йӕ къухы бафта, уый тыххӕй йын цы баххуыс кӕндзӕн?
14 Алы чырыстон ахуыргӕнӕгӕн дӕр йӕ сӕйрагдӕр нысан у, кӕимӕ ахуыр кӕны, уымӕн Иегъовӕйы хӕлар суӕвынӕн баххуыс кӕнын. Уый саразынӕн ахъаз сты канд цы дзурыс, уый нӕ, фӕлӕ цы аразыс, дӕхи куыд дарыс, уый дӕр. Ахуыргӕнинагыл ахуыргӕнӕджы цӕвиттон тынг ӕндавы. Ныхӕстӕй хъуыддӕгтӕн стырдӕр тых ис, уӕлдайдӕр та, Библи кӕимӕ ахуыр кӕныс, ахӕм адӕймаджы чырыстон миниуджытыл ӕмӕ Хуыцауӕн зӕрдиагӕй лӕггад кӕныныл куы ахуыр кӕнай, уӕд. Иегъовӕимӕ дын ӕнгом ахастытӕ кӕй ис, уый дӕ ныхӕстӕ ӕмӕ дӕ хъуыддӕгты куы уына, уӕд ӕй, ӕвӕццӕгӕн, тынгдӕр бафӕнддзӕн, цӕмӕй уымӕн дӕр Хуыцауимӕ ахӕм ахастытӕ уа.
15. а) Цӕмӕн у ахсджиаг, цӕмӕй ахуыргӕнинаг Иегъовӕйӕн раст ӕнкъарӕнтӕй лӕггад кӕнынмӕ тырна? ӕ) Цӕмӕй ахуыргӕнинаджы уырнындзинад дарддӕр дӕр рӕза, уый тыххӕй йын куыд ис баххуыс кӕнӕн?
15 Мах фӕнды, цӕмӕй ахуыргӕнинаг Иегъовӕйӕн лӕггад кӕна, Армагеддоны куы амӕла, ӕрмӕст уый тасӕй нӕ, фӕлӕ йӕ кӕй уарзы, уый тыххӕй. Хуыцауӕн лӕггад кӕнынмӕ йӕ цӕмӕй ахӕм сыгъдӕг ӕнкъарӕнтӕ разӕнгард кӕной, уымӕн ын куы ӕххуыс кӕнӕм, уӕд мах араздзыстӕм, уырнындзинады фӕлварӕнты чи бафӕраздзӕн, ахӕм зынгӕн фидар ӕрмӕгӕй (1 Коринфӕгтӕм 3:10—15). Адӕймаг хорз фӕндонӕй куы нӕ архайа, зӕгъӕм ӕгӕр тынг ӕй куы фӕнда дӕу кӕнӕ ӕндӕр искӕй фӕзмын, уӕд ын уый нӕдӕр дунейы ӕндӕвады ныхмӕ лӕууынӕн баххуыс кӕндзӕн, нӕдӕр ӕцӕгад куыд домы, афтӕ кӕнынӕн. Дӕ зӕрдыл дар, ӕнустӕм ӕй ды кӕй нӕ ахуыр кӕндзынӕ, уый. Ӕмӕ дын цалынмӕ фадат ис, уӕдмӕ йӕ разӕнгард кӕн, цӕмӕй Хуыцауы Ныхас алы бон дӕр кӕса, хъуыды йыл кӕна, ӕмӕ афтӕмӕй хӕстӕгдӕр кӕна Иегъовӕмӕ. Стӕй ахуыр куы фӕуат, уӕд Библи ӕмӕ Библийы бындурыл уагъд публикациты фӕрцы дарддӕр йӕхӕдӕг арфдӕр зонгӕ кӕндзӕн «раст ахуырады хуызӕгимӕ» (2 Тимофеймӕ 1:13).
16. Куыд у дӕ бон ахуыргӕнинаджы зӕрдӕбынӕй кувын сахуыр кӕнын?
16 Цӕмӕй ахуыргӕнинагӕн Иегъовӕимӕ ӕнгом ахастытӕ уа, уый тыххӕй ма йӕ хъӕуы зӕрдӕбынӕй кувын ахуыр кӕнын дӕр. Фӕлӕ куыд? Уӕ бон у, иумӕ ӕркӕсат Йесойы дӕнцон куывдмӕ, стӕй Библийы, зӕгъӕм Псалмты чиныджы цы бирӕ ӕндӕр зӕрдӕбын куывтытӕ ис, уыдонмӕ (Псалом 16, 85, 142; Матфейы 6:9, 10). Уый ӕддейӕ, уӕ ахуыры райдианы ӕмӕ фӕуды куыд кувыс, уымӕ хъусгӕйӕ дӕр уый бамбардзӕн, Иегъовӕимӕ дын цавӕр ахастытӕ ис, уый. Уымӕ гӕсгӕ дӕ куывтытӕ алыхатт дӕр хъуамӕ уой зӕрдӕбын ӕмӕ ӕргом, фӕлӕ ӕгӕр рӕсугъд ныхӕстӕ дзурын дӕр нӕ хъӕуы. Дӕ куывтытӕй хъуамӕ бӕрӕг уа дӕ чырыстон ӕмбарынад.
Архай дӕ сывӕллӕтты фервӕзын кӕныныл
17. Ныййарджыты бон куыд у сӕ сывӕллӕттӕн ирвӕзындзинады фӕндагыл баззайынӕн ӕххуыс кӕнын?
17 Кӕй нӕ фӕнды, цӕмӕй йӕ бинонтӕ фервӕзой. Сӕ ныййарджытӕ чырыстӕттӕ кӕмӕн сты, уыцы сывӕллӕттӕй бирӕтӕ зӕрдӕбынӕй ӕууӕндынц Хуыцауыл ӕмӕ фидар лӕууынц чырыстон фӕндагыл. Фӕлӕ ис ахӕмтӕ дӕр, ӕцӕгадӕн йӕ зӕрдӕйы арф уидӕгтӕ ауадзыны фадат чи нӕ радта (1 Петры 5:9; Ефесӕгтӕм 3:17; Колоссӕгтӕм 2:7). Уыцы кӕстӕртӕй бирӕтӕ куы бахъомыл вӕййынц кӕнӕ сӕ ӕххӕст кармӕ бирӕ куы нал фӕхъӕуы, уӕд ныууадзынц чырыстон фӕндаг. Цӕмӕй хъуыддаг уымӕ ма ’рцӕуа, уый тыххӕй ныййарджыты бон цы у саразын? Фыццаджыдӕр бинонты ’хсӕн хъуамӕ уа фӕлмӕн, уарзӕгой ахастытӕ. Хорз бинонты ’хсӕн сывӕллӕттӕ ахуыр кӕнынц хистӕртӕн аргъ кӕнын, адӕмимӕ хӕларӕй цӕрын ӕмӕ хорз цы у, ууыл фидар хӕцын, ӕвзӕрдзинадӕй та хи хизын (Дзуттытӕм 12:9). Уӕдӕ бинонтӕн кӕрӕдзиимӕ ӕнгом ахастытӕ кӕм уа, уыцы хӕдзары сывӕллонӕн ӕнцондӕр уыдзӕн Иегъовӕйы бауарзын ӕмӕ йӕ хӕлар суӕвын (Псалом 21:11). Ӕнгом бинонтӕ алыхатт дӕр цыдӕр фӕаразынц иумӕ, кӕд уыцы рӕстӕг ныййарджытӕ сӕхицӕй атона кӕнынц ӕмӕ сӕхи сӕрмагонд хъуыддӕгтӕ ныууадзынц, уӕддӕр. Ӕмӕ сымах дӕр афтӕ куы кӕнат, уӕд сымахмӕ кӕсгӕйӕ уӕ сывӕллӕттӕ дӕр ахуыр кӕндзысты царды раст уынаффӕтӕ хӕссын. Ныййарджытӕ, уӕ сывӕллӕтты сымах ӕрмӕст уый тыххӕй нӕ хъӕут, цӕмӕй сӕ хӕрд ӕмӕ уӕлӕдарӕсӕй цух ма уадзат. Уыдоны хъӕут сымах уӕхӕдӕг — уӕ рӕстӕг, уӕ хъарутӕ ӕмӕ уӕ уарзондзинад. Уӕ сывӕллӕттӕ ӕппӕт уыдӕттӕй цух не сты?
18. Ныййарджытӕ сӕ сывӕллӕттӕн цавӕр фарстытӕн хъуамӕ баххуыс кӕной дзуапп раттынӕн?
18 Чырыстон ныййарджытӕ ахӕм хъуыды ӕввахс дӕр макуы хъуамӕ бауадзой сӕ сӕрмӕ, ома нӕ сывӕллӕттӕ сӕхигъӕдӕй суыдзысты чырыстӕттӕ. Даниел, ӕмбырды хистӕр нӕлгоймаг ӕмӕ фондз сывӕллоны фыд, афтӕ зӕгъы: «Ныййарджытӕ сӕ сывӕллӕттӕн хъуамӕ ӕххуыс кӕной скъолайы ӕмӕ сӕм ӕндӕр бынӕтты ӕнӕмӕнг цы дызӕрдыггаг хъуыдытӕ фӕзындзӕн, уыдон сурынӕн. Фӕразонӕй сын хъӕуы ӕххуыс кӕнын дзуаппытӕ агурынӕн ахӕм фарстытӕн: „Цымӕ ӕцӕгдӕр кӕроны рӕстӕджы цӕрӕм? Ӕрмӕстдӕр иу раст дин ис? Де ’мкъласонтӕй дӕм бирӕтӕ ӕвзӕр сывӕллӕттӕ куы нӕ кӕсой, уӕддӕр семӕ иу кӕнын хорз цӕуылнӕ у? Адӕймаг бинонтӕ цалынмӕ не скӕна, уӕдмӕ йын искӕимӕ ӕрдон ахастытӕ куы уа, уӕд уый алыхатт дӕр ӕвзӕр у?“» Ныййарджытӕ, ныфс уӕ уӕнт, уӕ сывӕллӕтты фидӕн ӕмӕ амондыл зӕрдӕбынӕй куы тыхсат, уӕд уӕ Иегъовӕ дӕр йе ’ххуысӕй цух кӕй нӕ ныууадздзӕн, уымӕн ӕмӕ сыл уый дӕр сымахӕй къаддӕр нӕ тыхсы.
19. Ныййарджытӕ сӕ сывӕллӕтты сӕхӕдӕг куы ахуыр кӕной, уый хуыздӕр цӕмӕн у?
19 Иуӕй-иу ныййарджытӕ афтӕ хъуыды кӕнынц, зӕгъгӕ, нӕ сывӕллӕттимӕ Библи ахуыр кӕнын нӕ бон нӕу, нӕ нын уайы. Фӕлӕ нӕ хъӕуы афтӕ хъуыды кӕнын, уымӕн ӕмӕ уӕ сывӕллонӕн сымахӕй хуыздӕр ничи бацамондзӕн зонд, сымахӕй хуыздӕр ын ничи баххуыс кӕндзӕн (Ефесӕгтӕм 6:4). Уӕ сывӕллӕттимӕ ахуыргӕнгӕйӕ, архайут, цӕмӕй цӕуыл хъуыды кӕнынц ӕмӕ сӕ зӕрдӕйы цы ис, уый базонат. Арф сӕ зӕрдӕйы цы ис, уый дзурынц, ӕви уӕлӕнгай ныхӕстӕ фӕкӕнынц? Цы базонынц, ууыл ӕцӕгӕй ӕууӕндынц? Иегъовӕйы удӕгас Хуыцауыл нымайынц? Ацы фарстӕн ӕмӕ ма бирӕ ӕндӕр ахсджиаг фарстытӕн дӕр дзуапп ӕрмӕстдӕр уӕд райсдзыстут, уӕ сывӕллӕттимӕ уӕхӕдӕг куы ахуыр кӕнат Библи (2 Тимофеймӕ 1:5).
20. Бинонтӕ Библи иумӕ кӕй ахуыр кӕнынц, уый цӕмӕй фылдӕр циндзинад ӕмӕ пайда хӕсса, уый тыххӕй ныййарджытӕн сӕ бон цы у саразын?
20 Цы уын баххуыс кӕндзӕн Библи алы къуыри дӕр иумӕ ахуыр кӕнынӕн? Джозеф у хистӕр нӕлгоймаг, ис ын иу лӕппу ӕмӕ иу чызг. Уый афтӕ зӕгъы: «Библи искӕимӕ куы фӕахуыр кӕнӕм, уӕд уый нӕ фембӕлдмӕ куыд ӕхсызгонӕй фенхъӕлмӕ кӕсы, бинонты уӕнгтӕй дӕр алчидӕр афтӕ ӕнӕрхъӕцӕй хъуамӕ ӕнхъӕлмӕ кӕса уыцы рӕстӕгмӕ. Мах ууыл никуы фӕхъуыды кӕнӕм, цӕмӕй нӕ ахуыры рӕстӕг алыхатт дӕр ӕмхуызон уа. Арӕх нын ахӕссы сахаты бӕрц, фӕлӕ нын хаттӕй-хатт дӕс минуты йеддӕмӕ куы нӕ вӕййы, уӕддӕр ӕй ауадзӕм. Сывӕллӕттӕ ма уыцы рӕстӕгмӕ ноджыдӕр фенхъӕлмӕ кӕсынц, арӕх „Библион радзырдты чиныджы“ сюжеттӕ нӕхӕдӕг кӕй сӕвӕрӕм ӕмӕ сӕ кӕй ахъазӕм, уый тыххӕй дӕрa. Уыцы равдыстытӕ тынг арф фӕд ныууадзынц сабиты зӕрдӕты, куыд хорз ӕй бамбарынц, уый та бирӕ ахсджиагдӕр у, цал абзацты сахуыр кӕнӕм, уымӕй».
21. Ныййарджытӕн кӕд у сӕ бон сӕ сывӕллӕттӕн зонд амонын?
21 Кӕй зӕгъын ӕй хъӕуы, дӕ сывӕллӕтты ӕрмӕст уыцы ӕрвылкъуырион ахуыры рӕстӕджы хъуамӕ ма ахуыр кӕнай (Дыккаг закъон 6:5—7). Статьяйы райдианы Таиландӕй цы Ӕвдисӕны кой ракодтам, уый афтӕ зӕгъы: «Ныр дӕр ма цыма знон уыд, афтӕ хъуыды кӕнын мӕ фыд-иу мӕ йемӕ уацамынды куыд кодта, уый. Велосипедыл-иу сбадтыстӕм ӕмӕ-иу не ’мбырд кӕм хъусын кодта, уыцы бынӕттӕй иууыл дард кӕцытӕ уыдысты, уырдӕм ацыдыстӕм. Ӕххӕстрӕстӕг кӕй райдыдтам лӕггад кӕнын, уым дӕр, фыццаджыдӕр, нӕ ныййарджытӕ нын цы диссаджы цӕвиттон ныууагътой, уымӕй бузныг стӕм. Уый ӕддейӕ, кӕмфӕнды ма уыдаиккам, алы ран дӕр нӕ ахуыр кодтой. Ӕмӕ куыд зыны, афтӕмӕй сӕ амындтӕ дзӕгъӕлы нӕ фесты. Ӕз абоны онг дӕр хъусын кӕнын, ӕххуыс уӕлдай тынгдӕр кӕм хъӕуы, ахӕм дард рӕтты!»
22. «Нӕхиуыл ӕмӕ куыд амонӕм, ууыл лӕмбынӕг куы хъуыды кӕнӕм», уӕд цы уыдзӕн?
22 Рӕхджы, растдӕр снысангонд рӕстӕджы, Йесо ӕрцӕудзӕн, ацы цардӕвӕрдӕн Хуыцау цы тӕрхон рахаста, уый сӕххӕст кӕнынмӕ. Цасдӕры фӕстӕ уыцы ахсджиаг цау баззайдзӕн историйы, Иегъовӕйы иузӕрдион лӕггадгӕнджытӕ та дарддӕр лӕггад кӕндзысты сӕ Хуыцауӕн, ӕнусон ирвӕзындзинадмӕ ӕнхъӕлмӕ кӕсгӕйӕ. Дӕ сывӕллӕттӕ ӕмӕ Библи кӕимӕ ахуыр кодтай ӕмӕ кӕныс, уыдонимӕ ды дӕр уыцы адӕмы ’хсӕн кӕй уыдзынӕ, уый ныфс дӕ ис? Уӕд дӕ зӕрдыл дар ацы ныхӕстӕ: «Лӕмбынӕг хъуыды кӕн дӕхиуыл ӕмӕ ахуырадыл [«куыд амоныс, ууыл», НД], ӕдзухдӕр уыдоны куыст кӕн, уымӕн ӕмӕ афтӕ кӕнгӕйӕ дӕхи [дӕр] фервӕзын кӕндзынӕ ӕмӕ дӕумӕ хъусджыты дӕр» (1 Тимофеймӕ 4:16).
[Фиппаинаг]
a Рауагъта йӕ Хъахъхъӕнӕг Мӕсыджы Ӕхсӕнад, (уырыс.).
Куыд бамбарын кӕндзынӕ?
• Хуыцау йӕ тӕрхон кӕд сӕххӕст кӕндзӕн, уый бӕлвырдӕй кӕй нӕ зонӕм, уымӕ гӕсгӕ нӕхи хъуамӕ куыд дарӕм?
• «Куыд амонӕм, ууыл лӕмбынӕг хъуыды кӕнынӕн» цавӕр мадзӕлттӕ ис?
• Библи кӕимӕ ахуыр кӕнӕм, уымӕн нӕ бон куыд у Хуыцауы хӕлар суӕвынӕн баххуыс кӕнын?
• Ныййарджытӕ сӕ сывӕллӕтты ахуыр кӕнынӕн рӕстӕг цӕмӕн хъуамӕ арой?
[Ныв 24 фарсыл]
Библи кӕимӕ ахуыр кӕныс, уыимӕ дын уӕздан, фӕлӕ хӕлар ахастытӕ куы уа, уӕд ын фылдӕр пайда ӕрхӕсдзӕн.
[Ныв 26 фарсыл]
Библи иумӕ ахуыргӕнгӕйӕ, бинонтӕ фылдӕр циндзинад исдзысты, Библийӕ ист сюжеттӕ, зӕгъӕм Соломон дыууӕ хӕтаг сылгоймаджы ’хсӕн быцӕу куыд ахицӕн кодта, уый сӕхӕдӕг куы хъазой, уӕд.