Чи никуыма уыд, ахӕм хабар! «Библи – Ног дунейы тӕлмац» мыхуыры рацыд ирон ӕвзагыл

ФАРОН, 2010 азы, 21 августы, ӕрцыд иу ахсджиаг хабар: ирон адӕм райстой стыр лӕвар – Библи ӕнӕхъӕнӕй сӕ мадӕлон ӕвзагыл.

Ныры онг ирон ӕвзагыл уыдысты ӕрмӕстдӕр Грекъаг Фыстытӕ (Ног Фӕдзӕхст) ӕмӕ иуӕй-иу чингуытӕ Дзуттаг Фыстытӕй (Рагон Фӕдзӕхстӕй). Уӕдӕ ацы Библи у фыццаг ӕнӕхъӕн Библи ирон ӕвзагыл.Чи куыста «Ног дунейы тӕлмац»-ыл? Кӕцӕй йӕ зонӕм, ацы тӕлмац раст кӕй у, уый?

Библийӕн бирӕ тӕлмацтӕ цӕмӕн хъӕуы?

Фӕстаг азты Библийӕн тынг бирӕ ног тӕлмацтӕ рацыд. Иуӕй-иу ӕвзӕгтыл Хуыцауы Ныхас рацыд фыццаг хатт. Фӕлӕ кӕцыдӕр ӕвзӕгтыл Библийӕн ис цалдӕргай тӕлмацы. Цымӕ цӕмӕн бахъуыдысты? Сака Кубо ӕмӕ Уолтер Спект сӕ чиныджы, «Афтӕ бирӕ тӕлмацтӕ?», зӕгъгӕ, ацы хъуыддаг афтӕ ӕмбарын кӕнынц: «Библийы тӕлмацтӕй иуӕй дӕр нӕй афтӕ зӕгъӕн, ӕмӕ фӕстаг у. Рӕстӕг куыд цӕуы, афтӕ Библи иртасӕн куыст дӕр размӕ кӕй цӕуы, стӕй ӕвзаг кӕй ивы, уымӕ гӕсгӕ тӕлмацтӕ дӕр хъуамӕ хуыздӕрӕй-хуыздӕр кӕной» («So Many Versions?»).

Фӕстаг рӕстӕг ахуыргӕндтӕ фылдӕр базыдтой дзуттаг, арамейаг ӕмӕ грекъаг ӕвзӕгты тыххӕй – Библи фыццаг цы ӕвзӕгтыл фыст ӕрцыд, уыдоны тыххӕй. Стӕй ма ссардтой, Библи тӕлмацгӕнджытӕ раздӕр цы къухфыстытӕй пайда кодтой, уыдонӕй рагондӕр ӕмӕ растдӕртӕ. Уымӕ гӕсгӕ абоны хуызӕн хорз фадӕттӕ никуыма уыд Хуыцауы Ныхас раст ратӕлмац кӕнынӕн.

Библи мыхуыры рауадзынӕй цас ӕхца бакусӕн ис, уый тыххӕй иу журналы фыст ис: «Библи мыхуыры рауадзынӕй ис бирӕ ӕхца бакусӕн, тынг бирӕ» («The Atlantic Monthly»). Ӕмӕ иуӕй-иу хатт, Библи чи мыхуыр кӕны, уыдон тынгдӕр ууыл нӕ фӕмӕт кӕнынц, сӕ тӕлмац раст у ӕви нӕ, фӕлӕ, фылдӕр ӕхца куыд бакусой, ууыл. Библи чи уадзы, уыдонӕй иутӕ сӕхимӕ суанг уыцы бартӕ дӕр райстой, ӕмӕ сӕм «цымыдисаг» цы скъуыддзӕгтӕ нӕ фӕкастысты, уыдон айстой. Ӕндӕр Библийы та баивтой, сӕ хъуыдымӕ гӕсгӕ, кӕсджыты зӕрдӕмӕ чи нӕ фӕцыдаид, уыцы дзырдтӕ. Зӕгъӕм, сылгоймӕгты бартыл чи тох кӕны, уыдоны зӕрдӕ балхӕныны тыххӕй дзы Хуыцауы хонынц, «Фыд-Мад», зӕгъгӕ.

Библийӕ Хуыцауы ном айсынмӕ цӕмӕн хъавыдысты?

Ӕппӕты тынгдӕр мӕты цы хъуыддаг ӕфтауы, уый та баст у Хуыцауы ном Йегъовӕимӕ. (Иуӕй-иу ахуыргӕндтӕ йӕ тӕлмац кӕнынц «Яхве»-йӕ.) Библийы рагон къухфыстыты Хуыцауы ном фыст у цыппар дзуттаг ӕмхъӕлӕсонӕй ӕмӕ сӕ ратӕлмац кӕнӕн ис ЙХВХ кӕнӕ ЙГЪВГЪ-йӕ. Ацы сӕрмагонд ном, Рагон Фӕдзӕхст кӕй хонынц, ӕрмӕст уыцы хайы ӕмбӕлы 7 000 хатты бӕрц (Рацыд 3:15; Псалом 83:18.) Уӕдӕ бӕрӕг у, не Сфӕлдисӕджы кӕй фӕнды, цӕмӕй йын йӕ лӕггадгӕнджытӕ йӕ ном зонгӕ дӕр ӕмӕ дзургӕ дӕр кӕной!

Фӕлӕ бирӕ ӕнустӕ раздӕр дзуттӕгтӕ хъуыды кӕнын райдыдтой, Хуыцауы ном дзурын кӕй не ’мбӕлы ӕмӕ йӕ уымӕ гӕсгӕ дзурын нал уӕндыдысты. Фӕстӕдӕр уыцы хъуыды апарахат чырыстон динты дӕр. (Абар Хъуыддӕгтӕ 20:29, 30; 1 Тимофеймӕ 4:1.) Библи тӕлмацгӕнджытӕ дӕр ахӕм ӕгъдау райстой, ӕмӕ-иу Хуыцауы ном баивтой дзырд «Хицау»-ӕй. Абон та Библийы тӕлмацтӕн сӕ фылдӕры Хуыцауы ном ӕппындӕр нӕй. Иуӕй-иу нырыккон англисаг тӕлмацтӕй айстой суанг дзырд «ном» дӕр, зӕгъӕм, Иоанны 17:6 стихӕй, Чырысти Хуыцаумӕ афтӕ кӕм куывта, ӕз дын дӕ ном раргом кодтон, зӕгъгӕ. Зӕгъӕм, «Нырыккон англисаг тӕлмац»-ы ацы стих у афтӕ: «Ӕз дӕ раргом кодтон» («Today’s English Version»).

Хуыцауы номмӕ ахӕм цӕстӕй цӕмӕн кӕсынц? Ӕркӕсӕм-ма, иу журналы цы фыст ис, уымӕ. Уыцы журнал мыхуыры уадзынц Библийы Иугонд Ӕхсӕнӕдтӕ, ӕппӕт дунейыл дӕр Библи тӕлмацгӕнджытӕй бирӕтӕн разамынд чи дӕтты, уыдон. Уыцы журналы иу статьяйы уыд фыст: «ЙХВХ сӕрмагонд ном кӕй у, уымӕ гӕсгӕ растдӕр уыдзӕн, Библи цы ӕвзагмӕ фӕтӕлмац кӕнынц, уыцы ӕвзагыл ацы цыппар дамгъӕйы куыд хъуысынц, афтӕ сӕ куы фыссиккой». Фӕлӕ ма уыцы статьяйы фыст ис афтӕ дӕр: «Ӕрмӕст ма нӕ уый зӕгъын фӕнды, уӕддӕр цӕуылдӕрты ахъуыды кӕнын кӕй фӕхъӕуы» («Practical Papers for the Bible Translator», 43 т., №4, 1992).

Цымӕ ахъуыды кӕнын цӕуыл фӕхъӕуы, уыцы «цыдӕртӕ» цы сты? Уыцы журналы куыд фыст ис, афтӕмӕй иуӕй-иу ахуыргӕндтӕ дзурынц: «Библи куы тӕлмац кӕнӕм [чырыстон диныл хӕст чи нӕу, уыдонӕн] ӕмӕ дзы исты ном, зӕгъӕм, Яхве, куы ныффыссӕм, уӕд ӕй раст нӕ бамбардзысты... Чи зоны, ахъуыды кӕной, „Яхве“ кӕй у ӕцӕгӕлон Хуыцау кӕнӕ ног, ӕнӕзонгӕ Хуыцау, ӕмӕ, сӕхӕдӕг кӕй зонынц, уыцы Хуыцауӕй кӕй хицӕн кӕны». Фӕлӕ Библи ӕргом дзуры, Хуыцау Йегъовӕ ӕцӕгдӕр кӕй хицӕн кӕны, чырыстон диныл хӕст чи нӕу, уыдон кӕмӕн кувынц, уыцы хуыцӕуттӕй (Исай 43:10–12; 44:8, 9).

Иуӕй-иу ахуыргӕндты хъуыдымӕ гӕсгӕ, Хуыцауы ном ӕнӕуи дзырд «ХИЦАУ»-ӕй кӕй баивынц, уым ногӕй ницы ис, уымӕн ӕмӕ афтӕ кодтой уымӕй размӕ дӕр. Фӕлӕ Йесо Чырысти ӕргом дзырдта, Хуыцауы чи ӕгад кодта, ахӕм ӕгъдӕуттыл чи хӕцыд, уыдоны ныхмӕ (Матфейы 15:6). Стӕй, сӕрмагонд ном кады номӕй ис баивӕн, уымӕн Фыстады бӕлвырдгӕнӕн нӕй. Библи Йесо Чырыстийы хоны алыхуызон кады нӕмттӕй, зӕгъӕм, «Хуыцауы Дзырд» ӕмӕ «паддзӕхты Паддзах» (Раргомад 19:11–16). Ӕмӕ уӕд ном «Йесо» уыдонӕй искӕцыйӕ баивын хъӕуы?

Цы журналы кой кодтам, уым ма ис ахӕм хъуыды: «Хуыцауы ном, „Йегъовӕ“, зӕгъгӕ, дзурын нӕ хъӕуы». Афтӕ цӕмӕн зӕгъынц? Дарддӕр дзы фыст ис: «Ахуыргӕндтӕн сӕ фылдӕр дзурынц, зӕгъгӕ, уыцы ном фыццаг куыд дзырдтой, уымӕ гӕсгӕ йӕ растдӕр дзурӕн уыдзӕн „Яхве“». Фӕлӕ уӕд Библийы иуӕй-иу зындгонд нӕмттӕн дӕр, зӕгъӕм, Йереми, Исай ӕмӕ Йесойӕн дӕр, сӕ хабар афтӕ у: дзуттаг ӕвзагыл сӕ куыд дзырдтой ӕмӕ сӕ ныр куыд тӕлмац кӕнынц, уыдон кӕрӕдзимӕ дард лӕууынц (уыцы нӕмттӕ дзуттагау сты Йирмейа́гъ, Йешайа́гъу ӕмӕ Йегъошу́а). Хуыцауы ном афтӕ дзурӕм, «Йегъовӕ», зӕгъгӕ, уый рӕдыд кӕй нӕу ӕмӕ йӕ бирӕтӕ афтӕмӕй кӕй зонынц, уымӕ гӕсгӕ ницы бӕлвырдгӕнӕнтӕ ис ахӕм ныхӕстӕн, афтӕ дзурын ӕй нӕ хъӕуы, зӕгъгӕ. Уӕдӕ иуӕй-иуты Хуыцауы ном фыссын кӕй нӕ фӕнды, уый ууыл баст нӕу, ӕмӕ бӕлвырдгӕнӕнтӕ дзурынц афтӕ. Уый баст у сӕхи хъуыдытимӕ, стӕй, сӕ зӕрдӕмӕ цы цӕуы ӕмӕ цы нӕ цӕуы, уыимӕ.

Фӕлӕ ацы фарста, ӕрмӕст ахуыргӕндтӕ кӕуыл фӕныхас кӕнынц, ахӕм фарста нӕу. Зӕгъӕм, Хуыцауы ном раздӕры тӕлмацтӕй кӕй айстой, уый цӕмӕ ӕркодта, уый тыххӕй фыста, Библийы Иугонд Ӕхсӕнӕдтӕй Индийы чи кусы, иу ахӕм ахуыргонд: «Индусты Хуыцауы кады ном ницӕмӕн хъӕуы, уыдоны фӕнды зонын Хуыцауӕн йӕ сӕрмагонд ном. Хуыцауӕн йӕ ном куы нӕ зоной, уӕд ын йӕхи дӕр нӕ бамбардзысты». Ӕмӕ уый зӕгъӕн ис, Хуыцауы чидӕриддӕр агуры, уыдонӕй. Адӕймаг Хуыцауы ном куы зона, ӕрмӕстдӕр уӕд бамбардзӕн, ӕнӕуи цавӕрдӕр тых нӕ, фӕлӕ удгоймаг кӕй у ӕмӕ йӕ нӕ бон кӕй у базонын (Рацыд 34:6, 7). Библи зӕгъы: «Йегъовӕмӕ йӕ номӕй чидӕриддӕр кувы, уый фервӕздзӕн» (Ромӕгтӕм 10:13). Уӕдӕ Хуыцауӕн чи лӕггад кӕны, уыдон ын ӕнӕмӕнгӕй хъуамӕ дзурой йӕ ном!

Хуыцауӕн кад чи хӕссы, ахӕм тӕлмац

1950 азы англисаг ӕвзагыл рацыд Библийӕн йӕ иу хайы ног тӕлмац, схуыдтой йӕ «Чырыстон Грекъаг Фыстытӕ – Ног дунейы тӕлмац». Уый уыди тынг ахсджиаг хъуыддаг. Иннӕ дӕс азы дӕргъы та хайгай мыхуыры рацыд, Рагон Фӕдзӕхст кӕй хонынц, уый, ома Дзуттаг Фыстытӕ. Англисаг ӕвзагыл «Ног дунейы тӕлмац» ӕнӕхъӕнӕй рацыд 1961 азы. Иннӕ тӕлмацтӕй уӕлдай, «Ног дунейы тӕлмац»-ы Рагон Фӕдзӕхсты Хуыцауы ном Йегъовӕ ис иу-7 000 раны, кӕмдӕриддӕр хъуамӕ уыдаид, уым. Ацы тӕлмац ма иннӕтӕй уымӕй хицӕн кӕны, Хуыцауы ном дзы Ног Фӕдзӕхсты дӕр, ома Чырыстон Грекъаг Фыстыты, 237 раны фӕстӕмӕ фыст кӕй ӕрцыд.

Ацы тӕлмацы Хуыцауӕн йӕ ном фӕстӕмӕ фыст кӕй ӕрцыд, уый Хуыцауы кадджын кӕны. Уымӕй уӕлдай ма уый фӕрцы нӕ бон у Библи хуыздӕр бамбарын. Зӕгъӕм, Матфейы 22:44 стих бирӕ тӕлмацты у афтӕ: «Загъта Хицау мӕ Хицауӕн». Фӕлӕ чи кӕмӕн загъта? «Ног дунейы тӕлмац»-ы та у афтӕ: «Йегъовӕ мӕ Хицауӕн загъта». Ацы ныхӕстӕ ист сты Псалом 110:1 стихӕй, ӕмӕ уым дӕр фыст ис, зӕгъгӕ, «Йегъовӕ мӕ Хицауӕн загъта». Уый фӕрцы кӕсджытӕн сӕ бон у бамбарын, Хуыцау Йегъовӕ ӕмӕ йӕ Фырт иу кӕй не сты.

«Ног дунейы тӕлмац»-ыл чи куыста?

«Ног дунейы тӕлмац» мыхуыры уадзы «Хъахъхъӕнӕн мӕсыг, Библи ӕмӕ трактатты Ӕхсӕнад». Уый архайы Йегъовӕйы Ӕвдисӕнты номӕй. Йегъовӕйы Ӕвдисӕнтӕ Библитӕ мыхуыр кӕнынц ӕмӕ сӕ ӕгас дунейы дӕр парахат кӕнынц сӕдӕ азӕй фылдӕр. Ацы тӕлмац (англисаг ӕвзагыл) бацӕттӕ кодта «Ног дунейы тӕлмац»-ы Комитет, се ’ппӕт дӕр – Йегъовӕйы Ӕвдисӕнтӕ. Уыцы комитеты чи уыд, уыдон сӕхицӕн кад нӕ агуырдтой, сӕ фӕндон уыди, цӕмӕй сын суанг сӕ мӕлӕты фӕстӕ дӕр сӕ нӕмттӕ ма схъӕр кодтаиккой. (Абар 1 Коринфӕгтӕм 10:31.)

Ацы тӕлмац «Ног дунейы тӕлмац» цӕмӕн схуыдтой? Уымӕн ӕмӕ ӕппындӕр нӕ дызӕрдыг кодтой, 2 Петры 3:13 стихы цы ног дунейы кой ис, адӕм уыцы ног дунейы къӕсӕрыл кӕй лӕууынц. «Ног дунейы тӕлмац»-ы Комитет йӕхӕдӕг куыд фыста, афтӕмӕй, «зӕронд дунейӕ ног дунемӕ куы хизӕм, уыцы рӕстӕджы» тынг ахсджиаг у, цӕмӕй «Хуыцауы Ныхасы сыгъдӕг рӕстдзинады» рухс кӕла. (Кӕс, 1950 азы цы тӕлмац рацыд, уымӕн йӕ разныхас.)

Раст тӕлмац

Сӕйрагдӕр уыд, цӕмӕй тӕлмац уыдаид раст. Англисаг ӕвзагмӕ йӕ тӕлмац кодтой, Библи цы ӕвзӕгтыл фыст ӕрцыд, уыцы ӕвзӕгтӕй – дзуттаг, арамейаг ӕмӕ грекъаг ӕвзӕгтӕй. Тӕлмац кӕнгӕйӕ пайда кодтой, уыцы рӕстӕг цы къухфыстытӕ уыд, уыдонӕн се ’ппӕты хуыздӕртӕйa. Тынг ма архайдтой ууыл дӕр, цӕмӕй рагон текст, уыцы ӕвзӕгтыл куыддӕриддӕр уыд, афтӕ ратӕлмац кодтаиккой, ӕрмӕст афтӕ, цӕмӕй йӕ абон чи кӕса, уыдон ӕй ӕнцонтӕй ӕмбарой.

Ӕмӕ диссаг нӕу, ахуыргӕндтӕй иуӕй-иутӕ «Ног дунейы тӕлмац»-ӕй кӕй ӕппӕлынц, раст ӕмӕ бӕлвырд кӕй у, уый тыххӕй. 1989 азы, дзуттаг ӕвзаг чи иртасы, иу ахӕм израилаг профессор, Биньямин Кедар, зӕгъгӕ, афтӕ загъта: «Дзуттаг Библи ӕмӕ тӕлмацтӕ куы фӕиртасын, уӕд арӕх ӕркӕсын „Ног дунейы тӕлмац“-мӕ англисаг ӕвзагыл. Ӕмӕ алы хатт дӕр бадис кӕнын, чи йӕ тӕлмац кодта, уыдон куыд тынг зӕрдиагӕй архайдтой, цӕмӕй текст гӕнӕн уӕвгӕйӕ хуыздӕр бамбӕрстаиккой».

«Ног дунейы тӕлмац» ӕндӕр ӕвзӕгтыл

Йегъовӕйы Ӕвдисӕнтӕ «Ног дунейы тӕлмац» англисаг ӕвзагӕй уӕлдай тӕлмац кӕнынц ӕндӕр ӕвзӕгтӕм дӕр. Ныртӕккӕ, ӕнӕхъӕнӕй кӕнӕ йӕ иу хай, ис 80 ӕвзагӕй фылдӕрыл. Цӕмӕй Библи тӕлмац кӕнын ӕнцондӕр уа, уый тыххӕй ӕрхъуыды кодтой ног компьютерон программӕ – уый фӕрцы иртасӕн ис Библийы алы дзырд дӕр. Стӕй ма ӕрцыд арӕзт, тӕлмацгӕнджыты къордтӕн чи ӕххуыс кӕны, ахӕм хайад. Йегъовӕйы Ӕвдисӕнты Разамонӕг совет дӕр лӕмбынӕг йӕ хъус дары Библи тӕлмац кӕныны хъуыддагмӕ. Фӕлӕ цы ис зӕгъӕн, Библи куыд фӕтӕлмац кӕнынц, уый тыххӕй та?

Фыццаг уал равзарынц, тӕлмацыл чи кусдзӕн, ахӕм къорд. Уыдон иууылдӕр вӕййынц Хуыцауыл ӕнувыд лӕггадгӕнджытӕ. Рӕстӕг равдыста, тӕлмацгӕнджытӕ хицӕнтӕй нӕ, фӕлӕ къордӕй иумӕ куы фӕкусынц, уӕд тӕлмац кӕй вӕййы хуыздӕр ӕмӕ растдӕр. (Абар Ӕмбисӕндтӕ 11:14.) Кӕй зӕгъын ӕй хъӕуы, уыцы тӕлмацгӕнджытӕ вӕййынц фӕлтӕрд, уымӕн ӕмӕ уымӕй размӕ дӕр цасдӕр рӕстӕг Йегъовӕйы Ӕвдисӕнты литературӕ фӕтӕлмац кӕнынц. Фыццаг сын бацамонынц, Библи куыд тӕлмац кӕнын хъӕуы ӕмӕ, Библи тӕлмац кӕныны тыххӕй цы сӕрмагонд компьютерон программӕтӕ ис, уыдонӕй куыд пайда кӕнын хъӕуы, уый.

Тӕлмацгӕнджыты къорды хӕс у, цӕмӕй 1) сӕ тӕлмац уа раст, 2) уыцы иу дзырд кӕнӕ хъуыды алы ран дӕр уа иухуызон, 3) се ’взаг цас амоны, уыйас тӕлмац уа комкоммӕ, фӕлӕ уыимӕ 4) хуымӕтӕг адӕмӕн уа ӕнцонӕмбарӕн. Уый сӕ къухы цӕй фӕрцы бафты? Ӕркӕсӕм, ирон ӕвзагмӕ цы ног тӕлмац рацыд, уымӕ. Фыццаг уал тӕлмацгӕнджытӕ сбӕлвырд кодтой, англисаг тӕлмацы цы дзырдтӕ ис, уыдонӕн сӕ сӕйрагдӕртӕ цавӕр ирон дзырдтӕй ратӕлмац кӕндзысты, уый. Компьютерон программӕ февдисы Библийы алы дзырд дӕр ӕмӕ йӕм йӕ хъуыдымӕ гӕсгӕ хӕстӕг чи лӕууы, уыцы дзырдтӕ дӕр. Уыцы программӕ ма февдисы, англисаг дзырдӕй цы грекъаг кӕнӕ дзуттаг ныхас ӕрцыд тӕлмац, уый дӕр, ӕмӕ уый фӕрцы тӕлмацгӕнӕгӕн йӕ бон вӕййы фенын, уыцы грекъаг кӕнӕ дзуттаг дзырд иннӕ рӕтты куыд тӕлмац у, уый. Ӕппӕт адӕттӕ тӕлмацгӕнджытӕн стыр ӕххуыс фесты, цӕмӕй уыцы дзырдтӕн ирон дзырдтӕ ссардтаиккой. Уый фӕстӕ бавнӕлдтой Библи тӕлмац кӕнынмӕ. Тӕлмац ӕй кодтой компьютеры, стихгай. Компьютерон программӕ та афтӕ арӕзт у, ӕмӕ-иу алы стихӕн дӕр равдыста, иронау дзы цы дзырдтӕ хъуамӕ уа, уый.

Фӕлӕ тӕлмацмӕ ӕрмӕст уый нӕ хауы, ӕмӕ иу ӕвзаджы дзырдтӕ ӕндӕр ӕвзаджы дзырдтӕй баивай. Тынг лӕмбынӕг кӕсын хъуыди, цӕмӕй, цы ирон дзырдтӕ равзӕрстой, уыдон алы ран дӕр хъуыды раст ралӕвӕрдтаиккой. Стӕй ма кӕсын хъуыди, цӕмӕй хъуыдыйӕдты арӕзт уыдаид ӕнцонӕмбарӕн ӕмӕ хуымӕтӕг. Бӕрӕг у, ацы тӕлмацыл тынг кӕй бафыдӕбон кодтой. «Библи – Ног дунейы тӕлмац» ирон ӕвзагыл у ӕнцонкӕсӕн, бӕлвырд ӕмӕ ӕнцонӕмбарӕн, стӕй Библийы рагон къухфыстытӕм гӕсгӕ у раст.

Уӕ хорзӕхӕй, бакӕсут «Библи – Ног дунейы тӕлмац». Уӕ бон ӕй райсын у, ацы журнал мыхуыры чи уадзы, уыдонӕй кӕнӕ Йегъовӕйы Ӕвдисӕнты ӕмбырды. Дызӕрдыг дӕр ма кӕнут, Хуыцауы ныхӕстӕ дзы уӕ мадӕлон ӕвзагмӕ раст тӕлмац кӕй сты, ууыл. Кӕсын ӕй куы райдайат, уӕд ӕнӕмӕнгӕй сразы уыдзыстут, «Библи – Ног дунейы тӕлмац» ирон ӕвзагыл кӕй рацыд, уый ӕцӕгдӕр кӕй у, чи никуыма уыд, ахӕм хабар!

[Фиппаинаг]

[Ныв/Рамкӕ 28 фарсыл]

«Ног дунейы тӕлмац» куыд конд у ӕмӕ дзы цы ис

Ӕнцонкӕсӕн шрифт.

Тексты арӕзт. Алы стих дӕр абзацӕй, ома ног рӕнхъӕй нӕ райдайы. Стихтӕ абзацтыл дих сты сӕ хъуыдымӕ гӕсгӕ. Уый фӕрцы кӕсджытӕн ӕнцондӕр уыдзӕн бамбарын, Библи чи фыста, уыдон дзы цы хъуыды ӕвӕрдтой, уый.

Сӕргӕндтӕ. Алы фарсыл дӕр, иуӕй-иу фӕрсты йеддӕмӕ, уӕлейӕ ис сӕргӕндтӕ. Уыдоны фӕрцы ӕнцон ссарӕн у, Библийы кӕм цы фыст ис, уый.

Стихтӕ астӕуӕй фӕлгӕты. Алы фарсыл дӕр астӕуӕй цы фӕлгӕт ис, уым фенӕн ис, Библийы ма ахӕм хъуыды кӕм ӕмбӕлы, уыцы стихтӕ.

Дзырдамонӕн. Фӕстейӕ дзы ис «Дзырдамонӕн». Уым ис Библийӕ кӕцыдӕр дзырдтӕ ӕмӕ, кӕм ӕмбӕлынц, уыцы стихтӕ. Алы дзырдмӕ дӕр дзы ис тынг цыбыр текст, кӕцӕй ист у, уыцы стихӕй.

Уӕлӕмхасӕн. Уӕлӕмхасӕны цы ӕрмӕг ис, уый хорз ӕххуыс у, Библийы сӕйраг ахуырӕдтӕ ӕмӕ, семӕ цы фарстатӕ баст сты, уыдон ӕмбарын кӕнынӕн.