Нӕлгоймӕгтӕн рӕстдзинады фӕндагыл слӕууынӕн ӕххуыс кӕнӕм

«Нырӕй фӕстӕмӕ ахсдзынӕ удӕгас адӕймӕгты» (ЛУК. 5:10).

1, 2. а) Йесо цы хъусын кодта, уымӕ-иу нӕлгоймӕгтӕй бирӕтӕ цы цӕстӕй ракастысты? ӕ) Ацы статьяйы цӕуыл аныхас кӕндзыстӕм?

ИУАФОН Йесо йӕ ахуыргӕнинӕгтимӕ Галилейӕйы куы хъусын кодта, уӕд бӕлӕгъы сбадт ӕмӕ йӕхи хибар ранмӕ айста. Фӕлӕ адӕм уый куы базыдтой, уӕд йӕ фӕдыл фистӕгӕй ацыдысты. Уыцы бон Йесомӕ чи ӕрбацыд, уыдон «уыдысты фондз мин лӕджы бӕрц», сылгоймӕгты ӕмӕ сывӕллӕтты нӕ нымайгӕйӕ (Матф. 14:21). Ӕндӕр хатт та Йесомӕ ӕрбацыд бирӕ адӕм, цӕмӕй сӕ сдзӕбӕх кодтаид ӕмӕ йын цӕмӕй йӕ ныхӕстӕм байхъуыстаиккой. Се ’хсӕн сылгоймӕгтӕ ӕмӕ сывӕллӕттӕй уӕлдай уыди «цыппар мин лӕджы» (Матф. 15:38). Куыд зыны, афтӕмӕй бирӕ нӕлгоймӕгты фӕндыд, Йесо цы дзырдта, уымӕ байхъусын. Уӕвгӕ, Йесо зыдта, ноджыдӕр ма бирӕтӕ кӕй байхъусдзысты хорз хабармӕ. Уый бӕрӕг у, диссаг куы сарӕзта, ӕмӕ йӕ ахуыргӕнинӕгтӕн сӕ хызтӕ кӕсӕгтӕй куы байдзаг сты, уӕд сӕ иуӕн, Симонӕн, цы загъта, уымӕй: «Нырӕй фӕстӕмӕ ахсдзынӕ удӕгас адӕймӕгты» (Лук. 5:10). Ацы ныхӕстӕй Йесойы уый зӕгъын фӕндыди, ӕмӕ кӕсаг куыд ахстой, афтӕ «ахсдзысты» адӕймӕгты дӕр ӕмӕ уыцы адӕймӕгты ’хсӕн уыдзӕн бирӕ нӕлгоймӕгтӕ.

² Абон дӕр нӕлгоймӕгтӕй бирӕтӕ байхъусынц хорз хабармӕ (Матф. 5:3). Чидӕртӕ дзы Библи ахуыр кӕнын райдайынц, фӕлӕ рӕстдзинады фӕндагыл къахдзӕфтӕ нӕ фӕкӕнынц. Нӕ бон сын куыд у баххуыс кӕнын? Йесо нӕлгоймӕгтӕн дӕр ӕмӕ сылгоймӕгтӕн дӕр иухуызон хъусын кодта. Фӕлӕ-иу йӕ хъус уӕлдай лӕмбынӕг ӕрдардта, йӕ рӕстӕджы нӕлгоймӕгты цы хъуыддӕгтӕ къуылымпы кодтой, уыдонмӕ. Ацы статьяйы ӕркӕсдзыстӕм, Йесо нӕлгоймӕгтӕн куыд ӕххуыс кодта ӕмӕ йӕ нӕ бон фӕзмын куыд у, уымӕ. Аныхас кӕндзыстӕм ӕртӕ хъуыддагыл: 1) нӕлгоймаг ӕхцайыл ӕгӕр куы мӕт кӕна, 2) адӕм дзы цы зӕгъдзысты, уымӕй куы тӕрса, ӕмӕ 3) афтӕ йӕм куы кӕса, ӕмӕ ницӕмӕ сарӕхсдзӕн.

Ӕхцайыл ӕгӕр куы мӕт кӕна

3, 4. а) Нӕлгоймӕгтӕн арӕхдӕр сӕ сӕйраг мӕт цы вӕййы? ӕ) Иуӕй-иу нӕлгоймӕгтӕ афтӕ цӕмӕн фӕхъуыды кӕнынц, ӕмӕ ӕхца ӕмӕ куыст рӕстдзинад базонынӕй ахсджиагдӕр сты?

³ Иухатт чиныджыдӕснытӕй иу Йесойӕн загъта: «Ахуыргӕнӕг, кӕдӕмфӕнды ма цӕуай,– ӕз дӕр ацӕудзынӕн дӕ фӕдыл». Фӕлӕ йын Йесо афтӕ куы бакодта, зӕгъгӕ, «Адӕймаджы Фыртӕн... йӕ сӕр кӕм ӕркъул кӕна, уый дӕр нӕй», уӕд уыцы лӕг йӕ хъуыды фӕивта. Ахӕм хатдзӕг скӕнӕн уымӕн ис, ӕмӕ, Чырыстийы фӕдылдзӕуӕг сси, уый тыххӕй Библийы ницы ис фыст. Ӕвӕццӕгӕн ӕй уый бакъуылымпы кодта, ӕмӕ, кӕм цӕрдзӕн ӕмӕ цы хӕрдзӕн, ууыл ӕгӕр мӕт кодта (Матф. 8:19, 20).

⁴ Нӕлгоймӕгтӕн арӕхдӕр сӕ сӕйраг мӕт вӕййы, ӕхца куыд бакусой, уый. Библи ахуыр кӕной ӕмӕ дзы цы фыст ис, уымӕ гӕсгӕ цӕрой, уый та сӕм афтӕ ахсджиаг нӕ фӕкӕсы. Бирӕтӕ сӕ афтӕ фӕхъуыды кӕнынц, ӕмӕ сӕм уӕлдӕр ахуыр куы уа ӕмӕ хорз куыст куы ссарой, уӕд ницы цух уыдзысты. Фӕзӕгъынц, зӕгъгӕ, мӕ дзыппы ӕхца куы уа, уӕд цыфӕндыдӕр сараздзынӕн, фӕлӕ, Библи куы ахуыр кӕнон ӕмӕ Хуыцауы куы базонон, уӕд мын уый та цы ратдзӕн. Чи зоны, Библийы цы фыст ис, уый сӕ зӕрдӕмӕ фӕцӕуы, фӕлӕ «ацы царды сагъӕстыл свӕййынц, хъӕздыгдзинад сӕ йӕ фӕдыл асайы» ӕмӕ рӕстдзинады мыггаг сӕ зӕрдӕйы нӕ сырӕзы (Мар. 4:18, 19). Ӕркӕсӕм, Йесо йӕ ахуыргӕнинӕгтӕн куыд баххуыс кодта, царды сӕйрагдӕр цы у, уый бамбарынӕн.

5, 6. Андрей, Петр, Иаков ӕмӕ Иоанн цӕй фӕрцы бамбӕрстой, ӕхца кусынӕй хъусын кӕнын сӕйрагдӕр кӕй у, уый?

⁵ Андрей ӕмӕ йе ’фсымӕр Симон Петр кодтой кӕсагахсыны куыст. Семӕ куыстой Иоанн ӕмӕ Иаков дӕр ӕмӕ сӕ фыд Зеведей дӕр. Сӕ куыст афтӕ хорз цыд, ӕмӕ ма сӕм ӕххуырст кусджытӕ дӕр уыди (Мар. 1:16–20). Андрей ӕмӕ Иоанн Йесойы тыххӕй Аргъауӕг Иоаннӕй фыццаг хатт куы фехъуыстой, уӕд ӕй бамбӕрстой, Мессийӕйы кӕй ссардтой. Гъемӕ Андрей хабар радзырдта йе ’фсымӕр Симон Петрӕн. Ӕмӕ йӕ Иоанн та, ӕвӕццӕгӕн, йе ’фсымӕр Иаковӕн радзырдта (Иоан. 1:29, 35–41). Уый фӕстӕ цалдӕр мӕйы дӕргъы Йесо хъусын кодта Галилейӕйы, Иудейӕйы ӕмӕ Самарийы, ӕмӕ уыдон дӕр цыппарӕй йемӕ уыдысты. Фӕлӕ стӕй сӕ раздӕры куыстмӕ аздӕхтысты. Йесо цы дзырдта, уый сӕ зӕрдӕмӕ цыди, фӕлӕ сын хъусын кӕныны хъуыддаг царды фыццаг бынаты нӕ уыд.

⁶ Цасдӕры фӕстӕ Йесо Петрӕн ӕмӕ Андрейӕн загъта, зӕгъгӕ, мӕ фӕдыл рацӕут ӕмӕ уӕ ӕз скӕндзынӕн «адӕмахсджытӕ». Уыцы дыууӕ ахуыргӕнинаджы куыд бакодтой? «Уыдон уайтагъд сӕ хызтӕ ныууагътой ӕмӕ йӕ фӕдыл ацыдысты». Афтӕ бакодтой Иаков ӕмӕ Иоанн дӕр – «уыдон дӕр уайтагъд сӕ бӕлӕгъ ӕмӕ сӕ фыды уым ныууагътой ӕмӕ йӕ фӕдыл ацыдысты» (Матф. 4:18–22). Ацы нӕлгоймӕгтӕн цы баххуыс кодта, цӕмӕй сӕ хъарутӕ иууылдӕр хъусын кӕнынмӕ сарӕзтаиккой? Цымӕ уыцы уынаффӕ сонтӕй рахастой? Афтӕ зӕгъӕн нӕй. Уый размӕ цалдӕр мӕйы дӕргъы уыдон хъуыстой, Йесо цы дзырдта, уымӕ. Ӕмӕ сӕхи цӕстӕй уыдтой, цы диссӕгтӕ арӕзта, стӕй хӕрам хъуыддӕгтӕн куыд нӕ быхста ӕмӕ йын адӕм йӕ ныхӕстӕ сӕ зӕрдӕмӕ куыд истой, уый. Ӕмӕ уый фӕрцы сӕ уырнындзинад фӕфидар ӕмӕ Йегъовӕйыл сӕ ныфс ноджы тынгдӕр дарын райдыдтой.

7. Библи кӕимӕ ахуыр кӕнӕм, уыдонӕн нӕ бон куыд у баххуыс кӕнын, цӕмӕй сахуыр уой сӕ ныфс Йегъовӕйыл дарын?

⁷ Махӕн дӕр нӕ бон куыд у, Библи кӕимӕ ахуыр кӕнӕм, уыдонӕн ӕххуыс кӕнын, цӕмӕй сахуыр уой сӕ ныфс Йегъовӕйыл дарын? (Ӕмб. 3:5, 6). Куыд сӕ ахуыр кӕнӕм, уымӕй бирӕ кӕнгӕ у. Се ’ргом-иу сын аздахӕм, Йегъовӕ нын зӕрдӕ цӕмӕй ӕвӕры, уымӕ: йӕ Паддзахады хъуыддӕгтӕ царды фыццаг бынаты куы ’вӕрӕм, уӕд нын арфӕ кӕндзӕн, ӕмӕ цух ницӕмӕй ӕййафдзыстӕм. (Бакӕс Малахийы 3:10; Матфейы 6:33.) Йегъовӕ йӕ адӕмыл куыд тыхсы, уый сын нӕ бон у Библийы ӕвдисын. Фӕлӕ ма хорз уаид, Йегъовӕ нын нӕхицӕн куыд ӕххуыс кӕны, уый тыххӕй дӕр-иу сын куы радзуриккам. Уый сын стыр ӕххуыс фӕуыдзӕн, цӕмӕй сахуыр уой сӕ ныфс Йегъовӕйыл дарын. Нӕ бон ма сын у, нӕ литературӕйы нӕ хотӕ ӕмӕ не ’фсымӕрты тыххӕй цы хабӕрттӕ фыст вӕййы, уыдон дӕр дзурынa.

8. а) Библи кӕимӕ ахуыр кӕнӕм, уый цӕмӕн хъӕуы, Йегъовӕ куыд хорз у, уый бафӕлварын ӕмӕ базонын? ӕ) Нӕ бон ын куыд у баххуыс кӕнын, цӕмӕй Йегъовӕйы хорздзинад йӕхиуыл бавзара?

⁸ Цӕмӕй, Библи кӕимӕ ахуыр кӕнӕм, уыцы адӕймагӕн йӕ уырнындзинад фидар уа, уый тыххӕй фаг нӕу, ӕмӕ, Йегъовӕ иннӕтӕн куыд арфӕ кӕны, уый тыххӕй кӕса кӕнӕ-иу ын уый тыххӕй исчи радзура. Хъуамӕ Йегъовӕйы хорздзинад йӕхиуыл дӕр бавзара. Псаломы 34:8 фыст ис: «Бафӕлварут ӕмӕ базонут, Йегъовӕ куыд хорз у, уый. Амондджын у уыцы адӕймаг, йӕхи йе уазӕг чи бакодта». Куыд у нӕ бон уыцы адӕймагӕн баххуыс кӕнын, цӕмӕй, Йегъовӕ куыд хорз у, уый фена? Зӕгъӕм, уыцы адӕймаг ӕхцайӕ тыхсы, афтӕмӕй та тамако дымы кӕнӕ фыднозт кӕны, йе та ӕхцайыл хъазы, ӕмӕ йӕ фӕнды уыцы хъуыддӕгтӕ ныууадзын (Ӕмб. 23:20, 21; 2 Кор. 7:1; 1 Тим. 6:10). Нӕ бон ын у бацамонын, цӕмӕй уый тыххӕй Хуыцаумӕ кува ӕмӕ дзы ӕххуыс кура. Ӕмӕ йӕ цард хуыздӕрырдӕм ивын куы райдайа, уӕд ӕй йӕхӕдӕг фендзӕн, Йегъовӕ куыд хорз у, уый. Нӕ бон ма йӕ у разӕнгард кӕнын, цӕмӕй Библи алы къуыри дӕр ахуыр кӕна, йӕхи ӕмбырдтӕм цӕттӕ кӕна ӕмӕ сӕм цӕуа, ӕмӕ афтӕмӕй Хуыцауы хъуыддӕгтӕ царды фыццаг бынаты ӕвӕра. Йегъовӕ йын йӕ фыдӕбонӕн кӕй арфӕ кӕны, уый куы уына, уӕд йӕ уырнындзинад фидар кӕндзӕн ӕмӕ иннӕ хъуыддӕгтыл афтӕ тынг нал мӕт кӕндзӕн.

Адӕм цы зӕгъдзысты, уымӕй куы тӕрса

9, 10. а) Никодим ӕмӕ аримафейаг Иосиф, Йесойы ахуыргӕнинӕгтӕ кӕй уыдысты, уый цӕуылнӕ хъӕр кодтой? ӕ) Абон иуӕй-иу нӕлгоймӕгты цы къуылымпы кӕны, цӕмӕй Чырыстийы фӕдылдзӕуджытӕ суой?

⁹ Хатт нӕлгоймӕгтӕ Чырыстийы фӕдылдзӕуджытӕ уый тыххӕй не свӕййынц, ӕмӕ фӕмӕт кӕнынц, адӕм цы зӕгъдзысты, зӕгъгӕ. Зӕгъӕм, фыццаг ӕнусы Никодим ӕмӕ аримафейаг Иосиф нӕ хъӕр кодтой, Йесойы ахуыргӕнинӕгтӕ кӕй уыдысты, уый. Уыдон тарстысты, иннӕ дзуттӕгтӕ сӕ куы базоной, уӕд цы зӕгъдзысты кӕнӕ цы сараздзысты, уымӕй (Иоан. 3:1, 2; 19:38). Ӕмӕ дзӕгъӕлы нӕ тарстысты. Дзуттаг дины разамонджытӕ Йесойӕ се сӕфт афтӕ тынг уыдтой, ӕмӕ-иу ыл чи баууӕндыд, уыдоны-иу ӕмбырдгӕнӕнӕй ратардтой (Иоан. 9:22).

¹⁰ Иуӕй-иу рӕтты нӕлгоймаджы куы бафӕнды Хуыцауы, Библийы кӕнӕ дины тыххӕй фылдӕр базонын, уӕд ӕй йе ’мкусджытӕ, йе ’мбӕлттӕ ӕмӕ йӕ хиуӕттӕ сӕ уӕлныхты сисынц. Кӕмдӕрты та афтӕ у, ӕмӕ адӕймаг ӕндӕр дин райсын кӕй сфӕнд кодта, уый иннӕтӕн куы фӕзӕгъы, уӕд суанг йӕ цардӕн дӕр тӕссаг вӕййы. Уӕлдай зындӕр та вӕййы, нӕлгоймаг ӕфсӕддон куы вӕййы кӕнӕ политикӕйы куы фӕархайы йе та адӕмы ’хсӕн нымад лӕг куы вӕййы, уӕд. Библийы тыххӕй дзургӕ йӕ куы фехъусынц, уӕд ын фӕзӕгъынц, лӕджы хуызӕн лӕг дӕ, ӕмӕ дӕ сӕрмӕ цытӕ хӕссыс, зӕгъгӕ. Зӕгъӕм, Германийӕ иу нӕлгоймаг Йегъовӕйы Ӕвдисӕнтӕн загъта: «Сымах рӕстытӕ дзурут. Фӕлӕ ӕз Йегъовӕйы Ӕвдисӕн куы суон, уӕд ӕй алчидӕр базондзӕн. Ӕмӕ ме ’мкусджытӕ ӕмӕ мӕ сыхӕгтӕ, стӕй, хорз кӕимӕ цӕрын, уыдон цы зӕгъдзысты? Нӕ, мӕнӕн мӕ бон нӕ бауыдзӕн».

11. Йесо йӕ ахуыргӕнинӕгтӕн куыд ӕххуыс кодта, цӕмӕй, адӕм цы зӕгъдзысты, уымӕй ма тарстаиккой?

¹¹ Кӕд Йесойы апостолтӕ тӕппуд адӕймӕгтӕ нӕ уыдысты, уӕддӕр-иу хатт тарстысты, адӕм цы зӕгъдзысты, уымӕй (Мар. 14:50, 66–72). Ӕмӕ Йесо йӕ ахуыргӕнинӕгтӕн ӕххуыс кодта, цӕмӕй рӕстдзинады фӕндагыл размӕ цыдаиккой, кӕд сӕ ныхмӕ цыдысты, уӕддӕр. Куыд? Бацӕттӕ сӕ кодта, цы фӕлварӕнтӕ сӕм ӕнхъӕлмӕ каст, уыдонмӕ. Бафӕдзӕхста сӕ: «Амондджын уыдзыстут, адӕм уӕ се сӕфт куы уыной, хъоды уыл-иу куы бакӕной, фидистӕ уын куы кӕной ӕмӕ уӕ фыдгӕнджытӕ куы хоной Адӕймаджы Фырты тыххӕй» (Лук. 6:22). Йесо йӕ фӕдылдзӕуджытӕн бамбарын кодта, фидистӕ сын «Адӕймаджы Фырты тыххӕй» кӕй кӕндзысты. Стӕй сын зӕрдӕ бавӕрдта, Хуыцау алкӕддӕр сӕ фарсмӕ кӕй уыдзӕн, ӕххуыс ӕмӕ дзы хъарутӕ куы курой, уӕд (Лук. 12:4–12). Уымӕй уӕлдай ма-иу йӕ фӕдыл цӕуын чи райдыдта, уыдоны разӕнгард кодта, цӕмӕй сӕхи бастаиккой йӕ ахуыргӕнинӕгтыл (Мар. 10:29, 30).

12. Нӕ бон куыд у, Библи кӕимӕ ахуыр кӕнӕм, уыдонӕн ӕххуыс кӕнын, цӕмӕй, адӕм цы зӕгъдзысты, уымӕй ма тӕрсой?

¹² Мах дӕр, Библи кӕимӕ ахуыр кӕнӕм, уыдонӕн хъуамӕ ӕххуыс кӕнӕм, цӕмӕй, адӕм цы зӕгъдзысты, уымӕй ма тӕрсой. Нӕ бон сын у бацамонын, сӕ ныхмӕ куы цӕуой, уӕд сӕ цы кӕнын хъӕуы (Иоан. 15:19). Арӕх афтӕ вӕййы, ӕмӕ адӕймаг Библи ахуыр кӕнын куы райдайы, уӕд ӕй йе ’мкусджытӕ кӕнӕ иннӕтӕ цӕмӕйдӕрты фӕфӕрсынц йе та йӕ ныхмӕ фӕдзурынц. Уымӕ гӕсгӕ хорз уаид, йемӕ рагацау Библийӕ хуымӕтӕг ӕмӕ бӕлвырд дзуапп куы бацӕттӕ кӕниккам. Стӕй йын хъуамӕ нӕхӕдӕг дӕр суӕм хорз ӕмбӕлттӕ, ӕмӕ ма йӕ ӕмбырды иннӕтимӕ дӕр зонгӕ кӕнӕм. Чи зоны йын ӕфсымӕртӕй искӕимӕ иумӕйагӕй цыдӕр ис, ӕмӕ йемӕ иу ӕвзаг тагъддӕр ссардзӕн. Сӕйраджыдӕр та йӕ хъуамӕ сахуыр кӕнӕм Йегъовӕмӕ ӕдзухдӕр ӕмӕ зӕрдӕбынӕй кувын. Уый фӕрцы йӕм баввахс уыдзӕн, ӕмӕ Йегъовӕмӕ суыдзӕн йе ’мбӕхсӕн ӕмӕ йӕ къӕдзӕх. (Бакӕс Псалом 94:21–23; Иаковы 4:8.)

Афтӕ йӕм куы кӕса, ӕмӕ ницӕмӕ сарӕхсдзӕн

13. Иуӕй-иу нӕлгоймӕгтӕ рӕстдзинады фӕндагыл цӕй тыххӕй не слӕууынц?

¹³ Нӕлгоймӕгтӕй иуӕй-иутӕм афтӕ фӕкӕсы, ӕмӕ иннӕтӕй уӕлдай ӕмбырды ницӕмӕ сарӕхсдзысты. Чи зоны, хорз кӕсын нӕ зонынц кӕнӕ дзырдарӕхст не сты. Йе та, чи зоны, ӕфсӕрмыгӕнаг сты ӕмӕ сӕ хъуыдытӕ иннӕты раз дзурын нӕ уарзынц. Ӕмӕ сын уымӕ гӕсгӕ тынг зын вӕййы Библи ахуыр кӕнын, ӕмбырды дзуапп дӕттын ӕмӕ иннӕтимӕ, цӕуыл ӕууӕндынц, уый тыххӕй ныхас кӕнын. Иу ӕфсымӕр, ӕрыгонӕй куыд хъусын кодта, уый тыххӕй мӕнӕ цы загъта: «Дуары размӕ-иу бауадтӕн ӕмӕ-иу мӕхи дуархойӕг скодтон, афтӕмӕй та-иу хойгӕ нӕ бакодтон, ӕмӕ-иу уайтагъд дарддӕр фӕцӕуӕг дӕн, куы ничи мӕ фенид ӕмӕ мӕ куы ничи фехъусид, зӕгъгӕ... Хӕдзарӕй-хӕдзармӕ мӕ хъусын кӕнын кӕй хъӕуы, ӕрмӕст уыцы хъуыдыйӕ дӕр-иу мӕ сурхид акалд».

14. Йесойы ахуыргӕнинӕгтӕн сӕ бон цӕуылнӕ баци хӕйрӕджджын лӕппуйы сдзӕбӕх кӕнын?

¹⁴ Иухатт Йесойы ахуыргӕнинӕгтӕн сӕ бон нӕ баци хӕйрӕджджын лӕппуйы сдзӕбӕх кӕнын. Ӕмӕ уый тыххӕй сӕ ныфс куыннӕ асастаид. Лӕппуйӕн йӕ фыд Йесомӕ бацыд ӕмӕ йын загъта: «Хицау, мӕ фыртӕн мын батӕригъӕд кӕн. Суртӕ кӕны ӕмӕ йӕ уавӕр тынг ӕвзӕр у, йӕхи арӕх куы арты баппары, куы та – доны. Дӕ ахуыргӕнинӕгтӕм дӕр ӕй бӕргӕ ӕрбакодтон, фӕлӕ йын сӕ бон ницы баци». Йесо лӕппуйӕ дӕлимоны расырдта, ӕмӕ лӕппу сдзӕбӕх. Уый фӕстӕ ахуыргӕнинӕгтӕ Йесойы бафарстой: «Махӕн ӕй нӕ бон цӕуылнӕ баци расурын?» Уый сын загъта: «Уымӕн ӕмӕ уӕм уырнындзинад фаг нӕй. Ӕцӕг уын зӕгъын: хъыцъыйы нӕмыджы йас уырнындзинад уӕм куы уа ӕмӕ мӕнӕ ацы хохӕн куы зӕгъат, ардыгӕй сыст ӕмӕ уӕртӕ уым ӕрлӕуу, зӕгъгӕ, уӕд афтӕ бакӕндзӕн. Ӕмӕ ницы уыдзӕн ахӕмӕй, уӕ бон цы нӕ уа саразын» (Матф. 17:14–20). Адӕймаг Йегъовӕйыл куы ӕууӕнда, уӕд цыфӕнды стыр зындзинӕдты сӕрты дӕр ахиздзӕн. Фӕлӕ ӕрмӕстдӕр йӕхи хъарутӕй куы архайа, уӕд та йын ницы рауайдзӕн ӕмӕ афтӕ хъуыды кӕндзӕн, ӕз ницӕмӕ сарӕхсдзынӕн, зӕгъгӕ.

15, 16. Адӕймагмӕ афтӕ куы кӕса, ӕмӕ йӕ бон нӕ бауыдзӕн Йегъовӕйӕн лӕггад кӕнын, уӕд ын куыд ис баххуыс кӕнӕн?

¹⁵ Библи кӕимӕ ахуыр кӕнӕм, уымӕ афтӕ куы кӕса, ӕмӕ йӕ бон нӕ бауыдзӕн Йегъовӕйӕн лӕггад кӕнын, уӕд ын куыд ис баххуыс кӕнӕн? Нӕ бон ӕй у разӕнгард кӕнын, цӕмӕй йӕ ныфс йӕхиуыл нӕ, фӕлӕ Йегъовӕйыл дара. «Уӕхи хъомысджын Хуыцауы раз ӕрныллӕг кӕнут, ӕмӕ уӕ уый йӕ рӕстӕджы сбӕрзонд кӕндзӕн,– фыста Петр.– Ӕмӕ уе ’ппӕт сагъӕстӕ дӕр Хуыцауы бар бакӕнут, уымӕн ӕмӕ уый тыхсы сымахыл» (1 Пет. 5:6, 7). Цӕмӕй адӕймагӕн уый йӕ къухы бафта, уый тыххӕй йын хъуамӕ ӕххуыс кӕнӕм Йегъовӕйы бауарзынӕн. Ӕмӕ йӕ уӕд фӕнддзӕн йӕ разамындмӕ гӕсгӕ цӕрын. Уый та ууыл дзурӕг у, ӕмӕ Хуыцауы Ныхасӕн аргъ кӕндзӕн ӕмӕ, «Хуыцауы сыгъдӕг тых цы дыргъ дӕтты, уый», ома чырыстон миниуджытӕ, йӕ царды ӕвдисдзӕн (Гал. 5:22, 23). Стӕй ӕмбардзӕн, Хуыцаумӕ кувын ӕнӕмӕнг кӕй хъӕуы (Фил. 4:6, 7). Уымӕй уӕлдай ма йӕ зӕрдыл дардзӕн, Хуыцау ын кӕй дӕтдзӕн ныфс ӕмӕ хъарутӕ, цӕмӕй йын йӕ фӕндон ӕххӕст кӕна. (Бакӕс 2 Тимофеймӕ 1:7, 8.)

¹⁶ Иуӕй-иуты фӕхъӕуы ӕххуыс, цӕмӕй сахуыр уой хуыздӕр кӕсын ӕмӕ сӕ хъуыдытӕ дзурын. Иннӕтӕм та афтӕ фӕкӕсы, ӕмӕ Йегъовӕйы куы нӕма зыдтой, уӕд цы ӕвзӕр хъуыддӕгтӕ арӕзтой, уый тыххӕй уый аккаг не сты, ӕмӕ йын лӕггад кӕной. Цӕмӕй ахӕм адӕймӕгтӕн баххуыс кӕнӕм, уый тыххӕй хъуамӕ уӕм фӕразон, стӕй сӕ хъуамӕ нӕ уарзтӕй тавӕм. «Дохтыр рынчынты хъӕуы, ӕнӕниз чи у, уыдоны нӕ, фӕлӕ»,– загъта Йесо (Матф. 9:12).

Фылдӕр нӕлгоймӕгтӕн баххуыс кӕнӕм

17, 18. а) Нӕ бон куыд у фылдӕр нӕлгоймӕгтӕн хъусын кӕнын? ӕ) Иннӕ статьяйы цӕуыл аныхас кӕндзыстӕм?

¹⁷ Адӕймаг, Библийы цы хабар фыст ис, уый йӕ зӕрдӕмӕ куы айсы, уӕд свӕййы ӕцӕг амондджын. Ӕмӕ нӕ уый тыххӕй фӕнды, цӕмӕй йӕ ноджы фылдӕр нӕлгоймӕгтӕ сӕ зӕрдӕмӕ айсой (2 Тим. 3:16, 17). Нӕ бон куыд у фылдӕр нӕлгоймӕгтӕн хъусын кӕнын? Хорз уаид, нӕлгоймӕгтӕн сӕ фылдӕр хӕдзары куы вӕййынц, уӕд куы хъусын кӕниккам, зӕгъӕм, изӕрыгӕтты, улӕфты бонты ӕмӕ бӕргбӕтты рӕстӕг. Хӕдзарӕй-хӕдзармӕ хъусын кӕнгӕйӕ ма ӕфсымӕртӕн сӕ бон у, чи-иу сӕм ракӕса, уымӕн зӕгъын, хӕдзары нӕлгоймӕгтӕй-ма мын искӕмӕ бадзур, зӕгъгӕ. Гӕнӕн уӕвгӕйӕ ма нӕ бон у, кӕимӕ кусӕм, уыцы нӕлгоймӕгтӕн дӕр хъусын кӕнын. Стӕй нӕ хотӕй бирӕтӕн сӕ лӕгтӕ сты ӕнӕуырнджытӕ, ӕмӕ уыдонӕн дӕр нӕ бон у рӕстдзинад базонынӕн ӕххуыс кӕнын.

¹⁸ Кӕуыл ӕмбӕлӕм, уыдонӕй алкӕмӕн дӕр куы хъусын кӕнӕм, уӕд ссардзыстӕм, рӕстдзинад чи агуры, ахӕмты. Цӕй ӕмӕ ахӕм адӕймӕгтӕн фӕразонӕй ӕххуыс кӕнӕм рӕстдзинады фӕндагыл слӕууынӕн. Фӕлӕ, донаргъуыд чи райста, уыцы нӕлгоймӕгтӕн та нӕ бон куыд у ӕххуыс кӕнын, цӕмӕй ӕмбырды фылдӕр хӕстӕм тырной? Ацы фарстайыл аныхас кӕндзыстӕм иннӕ статьяйы.

[Фиппаинаг]

Цавӕр дзуапп ратдзынӕ?

• Нӕ бон куыд у нӕлгоймӕгтӕн баххуыс кӕнын, царды сӕйрагдӕр цы у, уый бамбарынӕн?

• Библи кӕимӕ ахуыр кӕнӕм, уымӕн куыд ис баххуыс кӕнӕн, цӕмӕй, адӕм цы зӕгъдзысты, уымӕй ма тӕрса?

• Адӕймагмӕ афтӕ куы кӕса, ӕмӕ йӕ бон нӕ бауыдзӕн Йегъовӕйӕн лӕггад кӕнын, уӕд ын куыд у нӕ бон баххуыс кӕнын?

[Ныв 25 фарсыл]

Алы фадатӕй дӕр пайда кӕныс, цӕмӕй нӕлгоймӕгтӕн хъусын кӕнай?

[Ныв 26 фарсыл]

Библи чи ахуыр кӕны, уый куыд ис фӕлварӕнтӕм бацӕттӕ кӕнӕн?