Хуыцауы Ныхасы цы стыр тых ис, уый аивта индуизмыл хӕст бинонты цард

НИКУЫ мӕ ферох уыдзӕн, 2005 азы 22 августы, къуырисӕры, мӕ хӕстӕджытӕ райсомӕй хӕрынмӕ куыд ӕрӕмбырд сты, уый. Цӕрдзынӕн ӕви нӕ, уый дыууӕйыл уыд, уымӕн ӕмӕ мӕ магъзы рак уыди. Мӕ сӕрыхицау Криш скуывта, ӕмӕ уый фӕстӕ ӕз райдыдтон дзурын.

Мӕ бинонтӕн загътон: «Уӕззау операци мын кӕндзысты ӕмӕ, гӕнӕн ис, мӕлгӕ дӕр акӕнон. Куы амӕлон, уӕд мын алцыдӕр цӕттӕ у. Йегъовӕйы Ӕвдисӕн уӕ чи у, уыдонӕй курӕг дӕн, уӕ ныфс ма асӕттӕд. Иннӕтӕн та лӕгъстӕ кӕнын, Библи ахуыр кӕнын райдайут ӕмӕ ӕмбырдтӕм цӕут. Уӕд сымах дӕр бауырндзӕн, тагъд ног дуне кӕй уыдзӕн ӕмӕ, Хуыцауӕн иузӕрдионӕй чи лӕггад кӕны, уыдон дзӕнӕты кӕй цӕрдзысты ӕмӕ, низ цы у, уый зонгӕ дӕр кӕй нал кӕндзысты».

Уый фӕстӕ цы уыди, уый радзурыны размӕ уал мӕ фӕнды мӕ сабибонты ӕмӕ, Хуыцауы куыд базыдтон, уый тыххӕй радзурын.

Мӕ сабибонтӕ

Нӕ бинонтӕ цардысты Хуссар Африкӕйы, наулӕууӕн горӕт Дурбаны. Не стыр хъӕдын хӕдзар уыд бӕрзонд къуыбырыл, йӕ сӕр уыд зестӕй ӕмбӕрзт. Цӕмӕй-иу не ’фсӕйнаг кулдуармӕ бахӕццӕ уыдаиккам, уый тыххӕй-иу нӕ дӕлвӕзы сӕйраг фӕндагӕй хӕрдмӕ ссӕуын хъуыд 125 къӕпхӕныл. Къӕпхӕнтӕй ма-иу нӕ нӕ хӕдзары онг иугыццыл ауайын хъуыд, йӕ алыварс къутӕртӕ кӕмӕн зад, ахӕм къахвӕндагыл. Нӕ кулдуары раз уыд мӕ фыдымады кувӕндон. Уым уыди бирӕ иконӕтӕ ӕмӕ индиаг хуыцӕутты нывтӕ. Мӕ фыдымад мӕ хуыдта «кувӕндоны хъӕбул» (индиагау мандир ки бача), уымӕн ӕмӕ-иу мын куыд дзырдта, афтӕмӕй, цы хуыцӕуттӕн куывтам, уыдоны руаджы райгуырдтӕн. Кувӕндоны акомкоммӕ цы лӕгъз сырх асинтӕ уыд, уыдоныл схизӕн уыд нӕ хӕдзармӕ. Нӕ хӕдзары уыд даргъ тыргъ, стыр къухни, ӕвзалыйӕ кӕм арт кодтам, ахӕм пецимӕ, авд къомнӕты, иу къомнӕт та ма нын уыд хицӕнӕй. Нӕ бинонтӕ уыдысты 27 адӕймаджы: мӕ фыдыфыд ӕмӕ фыдымад, мӕ фыд, йе ’ртӕ кӕстӕр ӕфсымӕры, йӕ кӕстӕр хо ӕмӕ сӕ бинонтӕ.

Ахӕм стыр бинонтӕ дарын ӕнцон нӕ уыд. Фӕлӕ иууылдӕр хӕларӕй цардыстӕм ӕмӕ уыцы рӕстӕджытӕ абон дӕр ӕхсызгонӕй ӕрымысӕм. Мӕ мад Гарги Деви ӕмӕ йе ’ртӕ файнусты кодтой хӕдзары куыстытӕ: радгай-иу хӕринаг кодтой ӕмӕ-иу ӕфснайдтой. Мӕ фыдыфыд уыд хӕдзары хистӕр, ӕмӕ бинонтӕн хӕринаг уый ӕлхӕдта. Алы ӕртыццӕг дӕр-иу мӕ фыдыфыд ӕмӕ мӕ фыдымад базармӕ ацыдысты ӕмӕ-иу къуырийы фаг дзидза, дыргътӕ ӕмӕ халсартӕ балхӕдтой. Къуыбырӕй дӕлвӕз хорз зынди, ӕмӕ-иу арӕх уым нӕзыбӕласы аууон сбадтыстӕм ӕмӕ-иу сӕм ӕнхъӕлмӕ кастыстӕм. Куыддӕр-иу автобусӕй се стыр хызынтимӕ рахызтысты, афтӕ-иу 125 къӕпхӕныл дӕлӕмӕ ныййарц стӕм, цӕмӕй-иу сын аххуыс кодтаиккам.

Нӕ цӕхӕрадоны зад стыр пальмӕбӕлас, ӕмӕ дзы сауцъиутӕ сӕхицӕн ахстон скодтой. Куыд ратӕх-батӕх кодтой, уымӕ-иу кастыстӕм ӕмӕ-иу сын сӕ цъыбар-цъыбурмӕ хъуыстам. Мӕ фыдымад-иу дуары акомкоммӕ асинтыл сбадти ӕмӕ-иу нын алыхуызон хабӕрттӕ кодта, цъиутӕ мын сӕ радзырдтой, зӕгъгӕ. Цас хъӕлдзӕг бонтӕ арвыстон ацы хӕдзары! Худтыстӕм-иу, хъазыдыстӕм, кӕрӕдзийӕн лӕвӕрттӕ кодтам – иудзырдӕй, уыдыстӕм стыр ӕмӕ ӕнгом бинонтӕ. Фӕлӕ мын ӕппӕты ӕхсызгон уый у, ӕмӕ уыцы рӕстӕг базыдтам не Сфӕлдисӕг Хуыцау Йегъовӕйы ӕмӕ йӕ Фырт Чырыстийы тыххӕй.

Йегъовӕйы куы нӕма зыдтам, уӕдмӕ уыдыстӕм индуизмыл хӕст, ӕмӕ нӕ алы бон дӕр нӕ дины ӕгъдӕуттӕм гӕсгӕ цыдӕртӕ кӕнын хъуыд. Уымӕй уӕлдай ма нӕм-иу уыд стыр бӕрӕгбӕттӕ. Уазджыты-иу фӕхуыдтам, цӕмӕй-иу нӕ хуыцӕуттӕн ӕмӕ нӕ ус-хуыцӕуттӕн бакуывтаиккам. Хатт-иу бӕрӕгбоны рӕстӕг мӕ фыдымад цӕстылуайӕнтӕ уынын райдыдта ӕмӕ-иу дӕлимонтимӕ ныхас кодта, ӕмӕ-иу уӕд ӕмбисӕхсӕв сӕ номыл кусӕрттаг акодтам, цӕмӕй нын мацы зиан ракодтаиккой. Мӕ фыдыфыды мын иууылдӕр хорз зыдтой, уымӕн ӕмӕ скъолатӕ ӕмӕ кувӕндӕттӕ аразынӕн ӕмӕ цалцӕг кӕнынӕн ӕхца не ’вгъау кодта.

Базыдтам Йегъовӕйы

1972 азы мӕ фыдыфыд фӕрынчын ӕмӕ амард. Уымӕй цалдӕр мӕйы фӕстӕ мӕ фыды кӕстӕр ӕфсымӕры ус Индервати, хуыдтой ма йӕ Джейн дӕр, Йегъовӕйы Ӕвдисӕнтӕй райста журналтӕ «Хъахъхъӕнӕн мӕсыг» ӕмӕ «Пробудитесь!», фӕлӕ сӕ мидӕмӕ нӕ фӕхуыдта, ӕмӕ уый тыххӕй йӕ зӕрдӕ йӕхиуыл ӕрхудт. Кӕд нӕм-иу уымӕй размӕ дӕр ӕрбацыдысты, уӕддӕр сӕм никуы байхъуыстам. Фӕлӕ нӕм иннӕ хатт куы ’рбахостой, уӕд сӕ мӕ фыдыфсымӕры ус мидӕмӕ ӕрбахуыдта, ӕмӕ семӕ аныхас кодта, йӕ лӕг кӕй нуазы, уый тыххӕй. Хиуӕттӕ ӕмӕ йын сыхӕгтӕ дзырдтой, ахицӕн дзы у, зӕгъгӕ. Фӕлӕ йын Йегъовӕйы Ӕвдисӕнтӕ бамбарын кодтой, Хуыцау бинонты цардмӕ цы цӕстӕй кӕсы, уый (Матфейы 19:6). Йӕ зӕрдӕмӕ тынг фӕцыдысты, Библийы уый фӕдыл цы уынаффӕтӕ ис, уыдон ӕмӕ, Хуыцау хорз цардӕй зӕрдӕ кӕй бавӕрдта, уыйa. Йӕ лӕгӕй нал ахицӕн, ӕмӕ Йегъовӕйы Ӕвдисӕнтимӕ Библи ахуыр кӕнын райдыдта. Ахуыр-иу кодтой залы, йӕ файнустытӕ та-иу сӕм сӕ къомнӕттӕй хъуыстой.

Ӕппынфӕстаг цыппар файнусты дӕр Библи ахуыр кӕнын райдыдтой. Джейн-иу цы базыдта, уый-иу махӕн дӕр радзырдта, стӕй-иу нын арӕх чиныгӕй, «Слушайте Великого Учителя»b, зӕгъгӕ, алыхуызон радзырдтӕ каст ӕмӕ-иу нын сӕ ӕмбарын кодта. Мӕ фыдыфсымӕртӕ, сӕ устытӕ Библи кӕй ахуыр кӕнынц, уый куы базыдтой, уӕд сӕ ныхмӕ цӕуын райдыдтой. Сӕ иу нын нӕ литературӕ, суанг Библи дӕр, байста ӕмӕ сӕ басыгъта. Ӕмбырдтӕм кӕй цыдыстӕм, уый тыххӕй-иу нӕм хыл кодтой, над дӕр ма-иу ныл ӕрхауд. Фӕлӕ нӕ фыд афтӕ никуы кодта, Библи кӕй ахуыр кодтам, уый ныхмӕ никуы ницы загъта. Мӕ фыдыфсымӕртӕ сӕ устыты нӕ басастой – иу дӕр дзы ӕмбырдтӕ нӕ ныууагъта, ӕмӕ сӕ уарзондзинад Йегъовӕмӕ тыхджынӕй-тыхджындӕр кодта.

1974 азы Джейн донаргъуыд райста, ӕмӕ Йегъовӕйы Ӕвдисӕн сси. Уый фӕстӕ та донаргъуыд райстой мӕ мад ӕмӕ йӕ иннӕ дыууӕ файнусты дӕр. Цасдӕры фӕстӕ мӕ фыдымад дӕр йӕ фыдӕлты дин ныууагъта. Бирӕ азты дӕргъы ӕз дӕр ӕмбырдтӕм цыдтӕн. Иухатт мӕ конгрессы иу хо, Шамила Рамперсад, зӕгъгӕ, бафарста: «Ды та донаргъуыд кӕд райсдзынӕ?» Ӕз ын дзуапп радтон: «Уый тагъд нӕ уыдзӕн, уымӕн ӕмӕ мемӕ Библи ничи ахуыр кӕны». Ӕмӕ мын уӕд загъта, уыцы хъуыддаджы мын ӕхсызгонӕй кӕй баххуыс кӕндзӕн. Иннӕ конгрессы, 1977 азы 16 декабры, донаргъуыд райстон. Операци мын куы скодтой, уыцы рӕстӕгмӕ нӕ бинонтӕй Йегъовӕйы Ӕвдисӕнтӕ систы 18 адӕймаджы. Фӕлӕ мӕ фыд Санни Дивӕ нырма йӕ фыдӕлты диныл хӕст уыд.

«Мӕт мацӕуыл кӕнут»

Филиппӕгтӕм 4:6, 7 стихтӕ мын стыр ныфсы хос уыдысты, уӕлдайдӕр та, мӕ сӕры рак кӕй ис, уый куы базыдтон, уӕд. Уыцы стихты фыст ис: «Мӕт мацӕуыл кӕнут, фӕлӕ алы уавӕры дӕр Хуыцаумӕ кувут, лӕгъстӕ йын кӕнут, бузныг ын дзурут ӕмӕ дзы афтӕмӕй курут, цы уӕ хъӕуы, уый. Ӕмӕ уын Хуыцауы фарн, зонд кӕуыл не ’ххӕссы, уыцы фарн, Йесо Чырыстийы фӕрцы бахъахъхъӕндзӕн уӕ зӕрдӕтӕ ӕмӕ уӕ зонд». Раст зӕгъгӕйӕ, мӕт мацӕуыл кӕнай, уый ӕнцон нӕу, уӕлдайдӕр та дын афтӕ куы зӕгъой, кӕцы минут амӕлдзынӕ, уый бӕрӕг нӕу, зӕгъгӕ, уӕд. Фыццаг рӕстӕг мӕхи кӕуынӕй мардтон, фӕлӕ уый фӕстӕ Йегъовӕмӕ кувын райдыдтон, ӕмӕ уӕд бамбӕрстон, Хуыцау мӕ кӕй схайджын кодта йӕ фарнӕй, «зонд кӕуыл не ’ххӕссы, уыцы фарнӕй».

Уыцы зын рӕстӕджы мын цыма Йегъовӕ мӕ рахиз къухыл хӕцыд ӕмӕ ӕдзух ма разы уыд, афтӕ мӕм каст (Исай 41:13). Йегъовӕйы ӕххуысӕй дохтыртӕн фидарӕй бамбарын кодтон, Библийы фӕдзӕхсты сӕрты, уӕхи тугӕй хизут, зӕгъгӕ, кӕй нӕ ахиздзынӕн (Хъуыддӕгтӕ 15:28, 29). Хирург дӕр ӕмӕ анестезиолог дӕр сразы сты, цӕмӕй мын операци кӕнгӕйӕ туг ма бауагътаиккой. Уый фӕстӕ мын хирург загъта, операци дзӕбӕх кӕй ацыд. Стӕй ма загъта, ахӕм уӕззау операцийы фӕстӕ адӕймаджы афтӕ тагъд йӕ къахыл слӕугӕ фыццаг хатт кӕй федта.

Мӕ операцийӕ ӕртӕ къуырийы фӕстӕ, нырма мӕ бон сынтӕгӕй стын нӕ уыд, афтӕмӕй хӕдзары кӕимӕдӕр Библи ахуыр кодтон. Мӕй ӕмӕ ’рдӕгӕй фылдӕр куы рацыд, уӕд та райдыдтон машинӕ скъӕрын, стӕй райдыдтон хорз хабар хъусын кӕнын ӕмӕ ӕмбырдтӕм цӕуын. Тынг бузныг дӕн, ӕмбырды хотӕй ӕмӕ мын ӕфсымӕртӕй хорз хабар хъусын кӕнынӕн чи ӕххуыс кодта, уыдонӕй. Иунӕгӕй мӕ никуы ныууагътой, стӕй-иу хъуамӕ ӕнӕмӕнгӕй базыдтаиккой, хӕдзармӕ куыд бахӕццӕ дӕн, уый. Ӕз ӕй зонын, Библимӕ дисктыл кӕй хъуыстон ӕмӕ сӕйраджыдӕр Хуыцауы хъуыддӕгтыл кӕй хъуыды кодтон, уый мын кӕй баххуыс кодта, цӕмӕй цыбыр рӕстӕгмӕ мӕ къахыл слӕууыдаин.

Мӕ операцийы фӕстӕ мӕ фыд дӕр Библи ахуыр кӕныныл кӕй сразы, ууыл афтӕ тынг цин кодтон, ӕмӕ йын зӕгъӕн дӕр нӕй. 73 азы йыл куы цыд, уӕд донаргъуыд райста, ӕмӕ ныр хорз хабар зынгзӕрдӕйӕ хъусын кӕны. Абон не стыр бинонтӕй Йегъовӕйӕн лӕггад кӕны 40 адӕймаджы. Кӕд мӕ галиу цӕстӕй хорз нал уынын ӕмӕ мӕ сӕры кӕхц кӕрӕдзийыл ӕфсӕйнаджы тъӕпӕн гӕбӕзты руаджы хӕцы, уӕддӕр тынг ӕнхъӕлмӕ кӕсын, тагъд Йегъовӕ «ӕппӕт дӕр... ног» кӕй сараздзӕн ӕмӕ дзӕнӕты кӕй цӕрдзыстӕм (Раргомад 21:3–5).

Ӕз дӕн амондджын адӕймаг – ис мын, хорз мӕ чи ’мбары ахӕм сӕрыхицау, ӕмбырды лӕггад кӕны хистӕр нӕлгоймагӕй. Ис нын замманай чызг, Клеристӕ. Уый мын тынг ӕххуыс кӕны, цӕмӕй мӕ рӕстӕгӕн йӕ фылдӕр хай адӕмӕн хорз хабар хъусын кӕнон. Уыцы хъуыддаджы мын Йегъовӕ тынг арфӕ кӕны. Библи кӕимӕ ахуыр кодтон, уыдонӕй бирӕтӕн баххуыс кодтон, цӕмӕй, Хуыцауы Ныхасы цы стыр тых ис, уый сӕхиуыл бавзӕрстаиккой. 30 адӕймаджы дзы донаргъуыд райстой.

Ӕз ӕппындӕр нӕ дызӕрдыг кӕнын, Йегъовӕ Хуыцау тагъд адӕмы се ппӕт хъизӕмӕрттӕй ӕмӕ низтӕй кӕй фервӕзын кӕндзӕн, ӕмӕ та зӕхх ногӕй дзӕнӕт кӕй суыдзӕн. Уыцы диссаджы рӕстӕгмӕ тынг ӕнхъӕлмӕ кӕсын!