СӔЙРАГ ТЕМӔ | ӔНӔЗӔРДӔХУДТ ЦӔМӔН ХЪУАМӔ УӔМ?
Мӕнгдзинад тӕссаг цӕмӕй у?
«Арӕх ахӕм зын уавӕрты бахауӕм, ӕмӕ иугыццыл мӕнгдзинад дӕр фаг вӕййы, цӕмӕй уавӕр фӕива» (Самантӕ, Хуссар-Африкаг Республикӕ).
Самантӕимӕ разы нӕ дӕ? Алыхуызон зын уавӕртӕй хызт ничи у. Ӕмӕ, асайын ӕнцондӕр кӕм вӕййы, ахӕм уавӕры бахаугӕйӕ нӕхи куыд фӕдарӕм, уымӕй бӕрӕг вӕййы, зынаргъдӕр нын цы у, уый. Зӕгъӕм, кӕд нын ӕппӕты ахсджиагдӕр у, цӕмӕй иннӕты цӕсты нӕ кад ма ’рхауа, уӕд, чи зоны, ахъуыды кӕнӕм, зӕгъгӕ мын асайын йеддӕмӕ ӕндӕр гӕнӕн нӕй. Фӕлӕ рӕстдзинад куы рабӕрӕг вӕййы, уӕд адӕймаг арӕх фӕсмойнаг фӕвӕййы, кӕй асайдта, уый тыххӕй. Ахъуыды кӕн, дӕлдӕр цы фыст ис, ууыл.
МӔНГДЗИНАД – ӔУУӔНЧЫ ЗНАГ
Дыууӕ адӕймаджы балымӕн вӕййынц, кӕрӕдзийыл куы феууӕндынц, уӕд. Сӕ кӕрӕдзимӕ сӕ зӕрдӕ нӕ фехсайы, хинӕй мыл куы рацӕуа кӕнӕ мӕ ныхас куы ахӕсса, зӕгъгӕ. Фӕлӕ кӕрӕдзийыл ӕууӕндын иу бонмӕ нӕ райдайынц. Уый тыххӕй фыццаг иумӕ бирӕ рӕстӕг фервитынц, ӕргом ныхас фӕкӕнынц ӕмӕ сӕ алчи ӕрмӕст йӕхиуыл нӕ фӕхъуыды кӕны, фӕлӕ иннӕмӕн куыд хуыздӕр уыдзӕн, ууыл. Фӕлӕ хатт иу мӕнгард ми дӕр фаг вӕййы, цӕмӕй, се ’хсӕн цы ӕууӕнк ис, уый фехӕла. Хабар афтӕ куы рауайы, уӕд адӕймагыл ногӕй баууӕндын тынг зын вӕййы.
Дӕ хорз ӕмбалыл кӕй нымадтай, уый дӕ искуы асайдта? Кӕд о, уӕд дӕхи куыд хатыдтӕ? Ӕвӕццӕгӕн дын тынг зын уыди. Чи зоны дӕм афтӕ дӕр фӕкаст, ӕмӕ дыл гадзрахатӕй рацыд. Ӕмӕ дӕ бамбарӕн дӕр ис. Уӕдӕ дызӕрдыггаг нӕу, мӕнгдзинад цыфӕнды хорз ӕмбӕлтты дӕр кӕй фӕхицӕн кӕны.
МӔНГДЗИНАД РАСАЙЫ МӔНГДЗИНАД
Роберт Иннес, экономикӕйы профессор Калифорнийы университетӕй, загъта, зӕгъгӕ, дам, «мӕнгдзинад хӕцгӕ низӕй уӕлдай нӕу». Ӕцӕгдӕр, мӕнгдзинад абарӕн ис вирусимӕ – мӕнгард адӕймагимӕ цас фылдӕр рӕстӕг ӕрвитай, уыйас дын тӕссагдӕр у, йӕ «низ» дыл куы бахӕца, уымӕй.
Дӕ бон цы у саразын, цӕмӕй мӕнгдзинады къӕппӕджы ма бахауай? Уымӕн дын баххуыс кӕндзӕн Библи. Дӕ хорзӕхӕй, цалдӕр уынаффӕмӕ дзы ӕркӕс.