Фидар дӕ?
1 «Мӕнӕн уымӕй стылдӕр циндзинад нӕй... мӕ сывӕллӕттӕ кӕй цӕуынц ӕцӕгады» (3 Иоан. 4). Иоаннӕн стыр циндзинад хаста, ӕцӕгад дзы чи базыдта, уыдон фидар кӕй уыдысты, уый. Уӕдӕ нӕ уӕларвон Фыдӕн та куыд ӕхсызгон у, йӕ фидӕны сывӕллӕттӕй милуантӕ кӕй «цӕуынц ӕцӕгады»! (Фӕсн. н. 23:15, 16; 27:11).
2 Хуыцауы адӕм, ӕмткӕй райсгӕйӕ, кӕд ӕнувыдӕй архайынц сӕ чырыстон лӕггаддзинады, уӕд уыцы рӕстӕджы иуӕй-иутӕ та сӕ цыд фӕсындӕгдӕр кодтой. Уыдон ӕцӕгад куы базыдтой, уӕд ӕвӕццӕгӕн тынг зӕрдиагӕй архайдтой, фӕлӕ азтӕ куыд цӕуынц, афтӕ уыдон уыйас нал исынц хайад ахуыргӕнинӕгтӕ цӕттӕ кӕныны куысты.
3 Ӕмбӕрстгонд у, иуӕй-иутӕ сӕ цыд кӕй фӕсындӕгдӕр кодтой, уый, уымӕн ӕмӕ сӕ хъыгдары се ’нӕниздзинад кӕнӕ та фӕзӕронд сты. Фӕлӕ уыдон раппӕлинаг сты сӕ фидардзинады тыххӕй. Сӕ бон цы у, уый аразынц. Фӕлӕ Иегъовӕйӕн йӕ цард чи снывонд кодта, уыдонӕй алкӕмӕндӕр йӕ бон у йӕхимӕ радтын ахӕм фарстытӕ: Мӕ сӕрмагонд хъуыддӕгтӕй мын Паддзахады хъуыддӕгтӕн ӕрмӕстдӕр гыццыл рӕстӕг зайы? «Хъӕрмуст» дӕн ӕви ма дарддӕр дӕр ӕппӕт тыхтӕй «архайын»? (Рарг. 3:15, 16, НФ; Лук. 13:24). Мах иууылдӕр хъуамӕ куывды мидӕг ахъуыды кӕнӕм нӕ хъуыддӕгтыл ӕмӕ нӕ кӕд исты ивындзинӕдтӕ саразын хъӕуы, уӕд сӕ саразӕм. Ӕмӕ нӕ зӕрдыл дарӕм Иегъовӕйы зӕрдӕвӕрд, кӕй ратдзӕн «кад, намыс ӕмӕ фарн алкӕцы хорзгӕнӕгӕн» (Ром. 2:10).
4 Куыд ис фидар лӕууӕн. Йесойӕн фидар лӕууынӕн цы баххуыс кодта? Павел ӕмбарын кӕны: «Цы циндзинад Ӕм хаудта, уый бӕсты [«уый сӕраппонд», НД] бавзӕрста дзуар, ницӕмӕ ӕрдаргӕйӕ ӕгаддзинад, ӕмӕ ӕрбадт Хуыцауы бадӕны рахизварс» (Дзут. 12:1—3). Йесомӕ цы циндзинад ӕнхъӕлмӕ каст, уый фылдӕр уыд, рӕстӕгмӕ цы зындзинӕдтӕ хъуамӕ бавзӕрстаид, уыдонӕй. Цы циндзинад нӕм ӕнхъӕлмӕ кӕсы, уый нӕ зӕрдыл куы дарӕм, уӕд мах дӕр фидар лӕудзыстӕм (Рарг. 21:4, 7; 22:12). Сӕрмагондӕй Библи куы ахуыр кӕнӕм, ӕнӕсцухӕй ӕмбырды фембӕлдтӕм куы цӕуӕм, ӕмӕ зӕрдӕбынӕй куы кувӕм, уӕд нын Иегъовӕ цы тых радты, уый фӕрцы нӕ бон уыдзӕн дарддӕр дӕр фӕразонӕй кӕнын нӕ бӕрны нын цы куыст бакодта, уый.
5 Иегъовӕ цин кӕны йӕ иузӕрдион лӕггадгӕнджыты фидардзинадыл. Цӕй ӕмӕ йын йӕ циндзинад фылдӕр кӕнӕм дарддӕр дӕр «ӕцӕгады цӕугӕйӕ».