Аргъ кӕнӕм нӕ хӕлардзинадӕн Иегъовӕ ӕмӕ йӕ Фыртимӕ
Ацы аз ӕппӕты ахсджиагдӕр фембӕлд уыдзӕн 28 мартъийы
1 2002 азы 28 мартъийы, хурныгуылды фӕстӕ, Хицауы Ӕрымысӕн изӕр бӕрӕггӕнгӕйӕ равдисдзыстӕм, кӕй аргъ кӕнӕм нӕ хӕлардзинадӕн Иегъовӕ Хуыцау ӕмӕ Йесо Чырыстиимӕ. Уыцы сӕрмагонд цауы сӕрст чырыстӕттӕ банкъардзысты, Паддзахады иннӕ бындартимӕ, Фыдимӕ ӕмӕ йӕ Фыртимӕ «иудзинады» кӕй сты, уый (1 Иоан. 1:3; Еф. 1:11, 12). Милуангай «ӕндӕр фыстӕ» хъуыды кӕндзысты сӕ диссаджы ахастытыл Иегъовӕ ӕмӕ йӕ Фыртимӕ ӕмӕ семӕ ӕмвӕнд-ӕмзондӕй Хуыцауы хъуыддаг кӕй ӕххӕст кӕнынц, ууыл (Иоан. 10:16).
2 Ӕмвӕндӕй кусын. Иегъовӕ ӕмӕ Йесо алкӕддӕр уыдысты хӕлӕрттӕ. Ууыл цин кодтой миллиардгай азты дӕргъы, цалынмӕ адӕймаджы не сфӕлдыстой, уӕдмӕ (Мих. 5:2). Уый руаджы кӕрӕдзи тынгдӕр бауарзтой. Хуыцауы фыццаггуырд Фырт, ахӕсгӕ нысаниуӕджы зондджындзинадӕй ӕвдыст, цалынмӕ зӕхмӕ не ’рцыд, уӕдмӕ загъта: «Ӕз уыдтӕн Уымӕн [Иегъовӕйӕн]... йе стыр цин алы бон дӕр, ӕдзухдӕр цин кодтон Йӕ разы» (Ӕмб. 8:30). Хуыцауы Фырт уарзондзинады Гуырӕнимӕ ӕнӕнымӕц бирӕ ӕнустӕ ӕнгом ахастыты кӕй уыд, уый йыл тынг фӕзынд! (1 Иоан. 4:8).
3 Адӕмы тӕригъӕдӕй балхӕнын кӕй хъуыд, уымӕ гӕсгӕ Иегъовӕ равзӕрста, адӕмы тынг чи уарзта, йӕ уыцы иунӕггуырд Фырты, цӕмӕй йӕ нывондӕн радтаид. Ӕмӕ нын ӕрмӕстдӕр уый фӕрцы фӕзынд ныфс (Ӕмб. 8:31). Иегъовӕ ӕмӕ йӕ Фырт алы хъуыддаджы дӕр архайынц ӕмвӕндӕй. Уымӕ гӕсгӕ мах дӕр баст стӕм семӕ ӕмӕ кӕрӕдзиимӕ уарзондзинады фидар тӕгтӕй, ӕмӕ Хуыцауы фӕндон ӕхсызгонӕй ӕххӕст кӕнӕм.
4 Ӕппӕт зӕрдӕйӕ бузныг кӕй стӕм, уый ӕвдисӕм. Ӕрымысӕн изӕрмӕ куы ӕрбацӕуӕм ӕмӕ лӕмбынӕг куы хъусӕм, уӕд уымӕй бӕрӕг уыдзӕн, Иегъовӕйы уарзондзинадӕй ӕмӕ Йӕ Фырты нывондӕй ӕппӕт зӕрдӕйӕ бузныг кӕй стӕм. Уым дзырд цӕудзӕн Йесойы фӕзминаг уарзондзинадыл, йӕ иузӕрдиондзинадыл, йӕ мӕлӕтыл ӕмӕ ахӕстаргъ кӕй бафыста, Хуыцауы Паддзахады Паддзах кӕй у ӕмӕ Паддзахад адӕмӕн цы арфӕдзинӕдтӕ ӕрхӕсдзӕн, ууыл. Нӕ зӕрдыл ма нын ӕрлӕууын кӕндзысты, нӕ уырнындзинад ӕппынӕдзух кӕй хъуамӕ ӕвдисӕм, «ӕцӕгады мидӕг ӕмкусджытӕ» кӕй стӕм ӕмӕ Иегъовӕйы фӕндон зӕрдиагӕй кӕй ӕххӕст кӕнӕм, уымӕй (3 Иоан. 8, НД; Иак. 2:17).
5 Адӕмӕн ӕххуыс кӕнӕм, цӕмӕй уыцы бон немӕ уой. Хистӕр нӕлгоймӕгты совет хъуамӕ бацархайа, цӕмӕй йе ’мбырды рагӕй чи нӕ хъусын кӕны, уыцы Ӕвдисӕнтӕ Чырыстийы мӕлӕты Ӕрымысӕн изӕрмӕ ӕрбацӕуой (Матф. 18:12, 13). Фӕдзурын кӕмӕ хъӕуы, уыдонӕн хицӕн номхыгъд скӕнут, цӕмӕй сӕ рохуаты мачи баззайа, ӕмӕ сӕ алкӕйдӕр сӕрмагондӕй фӕхонут.
6 Искӕй ма зонут, Ӕрымысӕн изӕрмӕ чи ӕрбацӕуид? Бамбарын сын кӕнут, уыцы цау ахсджиаг кӕй у, уый. Зӕрдӕбынӕй сӕ фӕхонут ӕмӕ бацархайут, цӕмӕй фӕхатой, се ’рбацыд нын ӕхсызгон кӕй у. Уӕдӕ нӕ бон цы у, уый саразӕм, цӕмӕй ацы азы ӕппӕты ахсджиагдӕр цаумӕ фӕхонӕм, Библи кӕимӕ ахуыр кӕнӕм, цымыдис чи кӕны, нӕ бинонты ӕмӕ ма нӕ зонгӕты дӕр. Ахӕстаргъ пайда хӕссы, «Чырысти Йесойы базонын» ахсджиаг кӕй у, уый чи бамбӕрста, уыдонӕй алкӕмӕндӕр (Фил. 3:8, НФ). Чырыстийы нывондыл чи ӕууӕнда, уыдонӕн уыдзӕн ӕнусон царды ныфс (Иоан. 3:16).
7 Ӕрымысӕн изӕр сыгъдӕгзӕрдӕ адӕмыл кӕй фӕзындзӕн, уый алкӕддӕр уӕ зӕрдыл дарут. Дыууӕ азы размӕ Папуа-Ног Гвинейы сакъадӕхтӕй 11 цымыдисгӕнаг адӕймаджы 17 сахаты гыццыл бӕлӕгъыл ленк кодтой абухгӕ денджызы, цӕмӕй Ӕрымысӕн изӕрмӕ бахаудаиккой. Цӕмӕн? Уыдон загътой: «Мах фӕндыд, Иегъовӕйӕн чи кувы, уыдонимӕ иумӕ Чырыстийы мӕлӕты Ӕрымысӕн изӕр арвитын, ӕмӕ нӕ балцӕй фӕсмойнаг нӕ фестӕм». Ахъуыды ма кӕнут, уыцы цымыдисгӕнаг адӕм куыд ӕнувыд разындысты ӕмӕ цӕй стыр аргъ скодтой сӕ хӕлардзинадӕн Иегъовӕ, йӕ Фырт ӕмӕ чырыстон ӕфсымӕрадимӕ!
8 Цымыдисгӕнаг адӕмӕй алкӕмӕндӕр зӕгъут Библи ахуыр кӕныны тыххӕй. Разӕнгард сӕ кӕнут, цӕмӕй ӕмбырды фембӕлдтӕм ӕнӕсцухӕй цӕуой ӕмӕ цы базонынц, уый иннӕтӕн дзурой. Ӕххуыс сын кӕнут Библийы уагӕвӕрдтӕй сӕ царды пайда кӕнынӕн ӕмӕ афтӕмӕй «рухсы цӕуынӕн» ӕмӕ «ӕцӕгадмӕ гӕсгӕ архайынӕн» (1 Иоан. 1:6, 7, НД). Архайут, цӕмӕй Иегъовӕимӕ сӕ ахастытӕ ӕнгомдӕр кӕной ӕмӕ тынгдӕр аргъ кӕной, йӕ адӕмимӕ сын йӕ фӕндон ӕххӕст кӕнынӕн цы фадат ис, уымӕн.
9 Цӕй стыр кад нын у «ӕмудӕй лӕууын ӕмӕ ӕмзӕрдионӕй тох кӕнын Евангелийы уырниады сӕрыл» (Фил. 1:27, 28, НФ). Цӕй уӕдӕ, ӕхсызгонӕй ӕнхъӕлмӕ кӕсӕм 28 мартъийы Ӕрымысӕн изӕры нӕ уарзон хотӕ ӕмӕ ӕфсымӕртимӕ фембӕлдмӕ ӕмӕ алы бон дӕр бузныг уӕм Иегъовӕ ӕмӕ йӕ Фыртӕй! (Лук. 22:19).