6 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн
Ахуыргӕнинагмӕ фарст куы сӕвзӕра
1 Адӕймагимӕ Библи иугӕндзон куы ахуыр кӕнӕм, уӕд хорз уаид, Библийы сӕйраг ахуырӕдтӕ фӕд-фӕдыл ӕвзарын, иу темӕйӕ иннӕмӕ рагӕпп-багӕпп кӕныны бӕсты. Уый руаджы ахуыргӕнинаг бӕлвырд зонындзинӕдтӕ исдзӕн ӕмӕ уырнындзинады рӕздзӕн (Кол. 1:9, 10). Фӕлӕ арӕх ахуыры рӕстӕджы ахуыргӕнинӕгтӕм сӕвзӕры алыхуызон фарстытӕ. Куыд кӕнгӕ у уӕд?
2 Арфуынӕг у. Ахуыры рӕстӕджы ӕрмӕджы фӕдыл цы фарстытӕ сӕвзӕра, уыдонӕн фылдӕр хатт дзуапп раттӕн вӕййы ӕвӕстиатӕй. Кӕд цы ахуыр кӕнут, уыцы ӕрмӕджы фӕстӕдӕр йӕ фарстӕн дзуапп лӕвӕрд цӕуы, уӕд ын уый тыххӕй зӕгъ. Фӕлӕ йӕ фарст ахуыргӕнӕн ӕрмӕгмӕ куы нӕ хауа кӕнӕ раст дзуапп раттынӕн ӕрмӕг бацагурын куы хъӕуа, уӕд хуыздӕр уаид, ууыл аныхас кӕнын ахуыры фӕстӕ, йе та ӕндӕр хатт. Иуӕй-иу хъусынгӕнджыты хъуыдымӕ гӕсгӕ хорз у фарст гӕххӕттыл афыссын, афтӕмӕй ахуыргӕнинаг фендзӕн, йӕ фарстмӕ ӕмбӕлон хъусдард кӕй ис. Уый ма баххуыс кӕндзӕн ӕнӕ къуылымпыйӕ ахуыр кӕнынӕн дӕр.
3 Нӕ ахуыргӕнӕн чингуыты Библийы сӕйраг ахуырӕдтыл дзырд цӕуы цыбыртӕй. Фӕлӕ цы кӕнгӕ у, ахуыргӕнинаг цӕвӕрдӕр ахуырадыл куы нӕ разы кӕна кӕнӕ мӕнг дины ӕгъдауыл фидарӕй куы хӕца, уӕд? Хорз уаид, уый фӕдыл Библи цы дзуры, уый лӕмбынӕг ӕвзӕрст кӕм цӕуы, ахӕм уӕлӕмхасӕн ӕрмӕгмӕ ӕркӕсын. Фӕлӕ адӕймаг уӕд дӕр йӕ хъуыды куы нӕ ива, уӕд уыцы фарст рӕстӕгмӕ ныууадзут, ӕмӕ уӕ ахуыр адарддӕр кӕнут (Иоан. 16:12). Библийӕ йӕ зонындзинӕдтӕ куыд фылдӕр кӕной ӕмӕ уырнындзинады куыд рӕза, афтӕ, гӕнӕн ис, ацы ахуырад дӕр бамбара.
4 Бонзонгӕ у. Кӕд цавӕрдӕр фарстӕн бӕлвырд дзуапп нӕ зоныс, уӕд дӕхи хъуыдытӕ дзурынмӕ ма тагъд кӕн (2 Тим. 2:15; 1 Пет. 4:11). Зӕгъ, ацы фарста кӕй раиртасдзынӕ ӕмӕ йын иннӕ хатт дзуапп кӕй ратдзынӕ. Дӕ бон у ацы уавӕрӕй спайда кӕнын, цӕмӕй ахуыргӕнинагӕн равдисай, иртасын куыд хъӕуы. Уадз ӕмӕ ахуыр кӕна, Иегъовӕйы организаци цы кусӕнгӕрзтӕ дӕтты, уыдоны ӕххуысӕй иртасын. Афтӕмӕй, ӕппынфӕстаг йӕхӕдӕг сахуыр уыдзӕн йӕ фарстытӕн дзуапп агурын (Ап. к. 17:11).