Уацамынды-иу уӕхи хъахъхъӕнут
1. Уацамынды-иу нӕхи цӕмӕн хъуамӕ хъахъхъӕнӕм?
1 Хуыцауы лӕггадгӕнджытӕ хорз хабар хъусын кӕнынц «хӕлд ӕмӕ зыгъуыммӕ фӕлтӕры ’хсӕн», ӕмӕ сты, «фыстӕ бирӕгъты ’хсӕн» куыд уой, афтӕ (Матф. 10:16; Фил. 2:15). Арӕх фехъусӕм змӕстытӕ ӕмӕ фыдмиты тыххӕй, стӕй, адӕмы кӕй давынц, уый диссаг дӕр никӕмӕуал кӕсы. Уыдӕттӕй бӕрӕг у, ӕвзӕр адӕм «фыддӕрӕй-фыддӕр» кӕй кӕнынц (2 Тим. 3:13). Библийӕ нын цавӕр уынаффӕтӕ баххуыс кӕндзысты, цӕмӕй-иу уацамынды нӕхи хъахъхъӕнӕм? (Матф. 10:16).
2. Цавӕр уавӕрты фӕхъӕуы участокӕй ацӕуын ӕмӕ ӕндӕр ран хъусын кӕнын?
2 Ӕмбаргӕ ут. Ӕмбисӕндты 22:3 фыст ис, ӕмбаргӕ адӕймаг йӕхи фыдбылызӕй кӕй хизы. Уӕдӕ цырддзаст ут! Сабыр кӕм вӕййы, уым дӕр уавӕр ӕвиппайды фӕивы. Чи зоны, уынгты фенут бирӕ пъӕлицӕйӕгты кӕнӕ адӕм къордтӕ-къордтӕ куыд ӕмбырд кӕнынц, уый. Иуӕй-иу хатт нӕ, кӕимӕ ныхас кӕнӕм, уыдонӕй исчи фӕдзӕхсгӕ дӕр бакӕны. Ахӕм рӕстӕг хабӕрттӕ базоныныл архайын нӕ хъӕуы, фӕлӕ уырдыгӕй хъӕуы ацӕуын ӕмӕ ӕндӕр ран хъусын кӕнын (Ӕмб. 17:14; Иоан. 8:59; 1 Фес. 4:11).
3. Екклесиасты 4:9 цы хъуыды ис, уый нӕ лӕггадмӕ куыд хауы?
3 Иумӕ хъусын кӕнут. «Дыууӕ адӕймагӕн, иунӕгӕй чи у, уымӕй хуыздӕр у»,– фыст ис Екклесиасты 4:9. Кӕд-иу нырмӕ иунӕгӕй хъусын кодтай ӕмӕ уый ӕдас уыди, уӕд ма ныр дӕр афтӕ у? Иуӕй-иу рӕтты, чи зоны, ӕдас у. Фӕлӕ иннӕ рӕтты тӕссаг у, цӕмӕй хо кӕнӕ ӕрыгон хъусынгӕнӕг хӕдзарӕй-хӕдзармӕ хъусын кӕна, уӕлдайдӕр талынгӕй. Кӕд уацамынды нӕхи тӕссаг уавӕрӕй фӕхъахъхъӕнӕм, уӕддӕр, куыд рабӕрӕг, афтӕмӕй стыр ӕххуыс вӕййы къӕрцхъус ӕмбал (Еккл. 4:10, 12). Къордӕй куы хъусын кӕнат, уӕд хорз уаид, де ’мбӕлттӕм дӕр дӕ хъус куы дарис. Кӕм хъусын кӕнат, уырдыгӕй куы цӕуай, уӕд-иу алы хатт дӕр уый тыххӕй иннӕтӕн зӕгъ.
4. Нӕ бон цы у аразын, цӕмӕй не ’мбырды иннӕтӕ ӕдас уой?
4 Хистӕр нӕлгоймӕгтӕн сӕ хӕс у, цӕмӕй нын бынӕттон уавӕртӕм гӕсгӕ разамынд дӕттой, уымӕн ӕмӕ «махыл тыхсынц» (Дзут. 13:17). Бонзонгӕ куы уӕм ӕмӕ хистӕр нӕлгоймӕгтимӕ ӕмгуыст куы кӕнӕм, уӕд нын Йегъовӕ ӕнӕмӕнг арфӕ кӕндзӕн (Мих. 6:8; 1 Кор. 10:12). Уӕдӕ Хуыцауы лӕггадгӕнджытӕ се ’ппӕт дӕр хъуамӕ архайой, цӕмӕй сӕ территорийы бӕстон хъусын кӕной, фӕлӕ хъуамӕ кӕддӕриддӕр къӕрцхъус уой.