Фондз хъуыддаджы искӕимӕ Библи ахуыр кӕнын райдайынӕн
1. Библи ахуыр ссарын дын зын куы уа, уӕд цы хъуамӕ аразай ӕмӕ цӕмӕн?
1 Мыййаг дын зын у, Библи ахуыр кӕнын кӕимӕ райдайай, ахӕм адӕймаджы ссарын? Дӕ ныфс ма асӕттӕд. Йегъовӕ арфӕ кӕны, йӕ фӕндон ӕххӕст кӕныныл чи архайы, уыдонӕн (Гал. 6:9). Дӕлдӕр ис, чи дын баххуыс кӕндзӕн, фондз ахӕм хъуыддаджы.
2. Нӕ бон куыд у адӕмӕн Библи ахуыр кӕныны тыххӕй комкоммӕ дзурын?
2 Комкоммӕ-иу бафӕрс. Бирӕтӕ зонынц, Библийыл арӕзт литературӕ кӕй парахат кӕнӕм, фӕлӕ алчи нӕ зоны, адӕмимӕ Библи дӕр кӕй ахуыр кӕнӕм, уый. Уӕдӕ хӕдзарӕй-хӕдзармӕ хъусын кӕнгӕйӕ нӕ бон у уый тыххӕй комкоммӕ дзурын. Хорз дӕм чи байхъусы, уыцы адӕймаджы дӕ бон у комкоммӕ бафӕрсын, зӕгъгӕ дӕ нӕ фӕнды Библи хуыздӕр базонын. Куы нӕ дын сразы уа, уӕддӕр ӕм дӕ бон у дарддӕр цӕуын ӕмӕ йын нӕ литературӕ хӕссын. Иу ӕфсымӕр цалдӕр азы дӕргъы иу бинонтӕн нӕ брошюрӕтӕ хаста. Иухатт та сын литературӕ куы бахаста, ӕмӕ цӕуынвӕнд куы скодта, уӕд ахъуыды кодта, зӕгъгӕ сӕ бафӕрсон: «Библи ахуыр кӕнын уӕ нӕ фӕнды?» Йӕ дисӕн кӕрон дӕр нал уыди, куы сразы сты, уӕд. Абон уыцы бинонтӕ Хуыцауӕн лӕггад кӕнынц.
3. Афтӕ нӕм цӕуылнӕ хъуамӕ кӕса, ӕмӕ ӕмбырдмӕ чи ӕрбацӕуы, уыдон иууылдӕр Библи ахуыр кӕнынц? Бамбарын ӕй кӕн.
3 Ӕмбырдмӕ чи ӕрбацӕуы. Афтӕ дӕм ма кӕсӕд, ӕмӕ ӕмбырдмӕ ногтӕй чи ӕрбацӕуы, уыдонӕй алкӕимӕдӕр Библи фӕахуыр кӕнынц. Иу ӕфсымӕр загъта: «Библи ахуыр кӕнын кӕимӕ райдыдтон, уыдонӕн се ’мбисимӕ ӕмбырды базонгӕ дӕн». Иу хо та бацыд, 15 азы дӕргъы ӕмбырдтӕм чи цыди, ахӕм сылгоймагмӕ, йӕ дыууӕ чызджы дӕр сты донаргъуыд. Уыцы сылгоймаг уыдис тынг ӕфсӕрмыгӕнаг, залмӕ-иу ӕрбацыд, фембӕлд-иу куы райдыдта, уӕд ӕмӕ-иу куыддӕр фӕци, афтӕ-иу ацыд. Сылгоймаг сразы ис Библи ахуыр кӕныныл ӕмӕ цасдӕры фӕстӕ рӕстдзинады фӕндагыл слӕууыд. Нӕ хо фыссы: «Фӕсмон кӕнын, 15 азы мидӕг ӕй кӕй нӕ бафарстон, Библи ахуыр кӕнын ӕй фӕнды ӕви нӕ, уымӕй!»
4. Цы ма у нӕ бон аразын, цӕмӕй нын Библийы ахуыр фӕзына?
4 Иннӕты тыххӕй-иу бафӕрс. Иу хо фӕархайы, цӕмӕй иннӕ хотимӕ сӕ Библийы ахуыртӕм цӕуа. Хо уацамынды кӕимӕ вӕййы, уымӕй уал рагацау бар ракуры, цӕмӕй йын йӕ ахуыргӕнинаджы ахуыры кӕрон бафӕрса, зӕгъгӕ, Библи ахуыр кӕнын кӕй фӕнды, ахӕм никӕй зоныс. Библи кӕй фӕрцы фӕахуыр кӕнӕм, уыцы публикацийыл адӕймагимӕ куы ныхас кӕнай, уӕд ӕй дӕ бон у афӕрсын: «Ацы публикаци кӕй бацымыдис кӕна, ахӕм никӕй зоныс?» Хатт афтӕ вӕййы, ӕмӕ хъусынгӕнджытӕн кӕнӕ пионертӕн сӕ уавӕртӕм гӕсгӕ сӕ бон нӕ вӕййы сӕ участокы кӕимӕдӕр Библи ахуыр кӕнын. Уӕдӕ иннӕтӕн дзур, Библи кӕимӕ ахуыр кӕнай, ахӕм адӕймаджы ссарын дӕ кӕй фӕнды.
5. Уе ’мбырды йӕ цардӕмбал уырнӕг кӕмӕн нӕу, уыдонӕн Библи ахуыр кӕныны тыххӕй дзурын хорз цӕмӕн у?
5 Ӕнӕуырнӕг цардӕмбӕлттӕ. Чи зоны, де ’мбырды ис, йӕ цардӕмбал уырнӕг кӕмӕн нӕу, ахӕм чырыстӕттӕ. Иуӕй-иуты нӕ фӕфӕнды сӕ уырнӕг цардӕмбалимӕ Библийыл ныхас кӕнын, фӕлӕ сын Библи ахуыр кӕныны тыххӕй ӕндӕр исчи куы зӕгъа, уӕд, гӕнӕн ис, ӕмӕ сразы уой. Цалынмӕ ахӕм адӕймагимӕ нӕ аныхас кӕнай, уӕдмӕ уал хорз уаид, йӕ уырнӕг цардӕмбалимӕ йын куы бауынаффӕ кӕнис.
6. Библийы ахуыр агургӕйӕ кувын ахсджиаг цӕмӕн у?
6 Куывд. Куывдӕн цы тых ис, уый дӕ рох ма уӕд (Иак. 5:16). Йегъовӕ нын зӕрдӕ ӕвӕры, йӕ фӕндонмӕ гӕсгӕ дзы исты куы курӕм, уӕд нӕ ӕнӕмӕнг кӕй фехъусдзӕн (1 Иоан. 5:14). Тынг ӕнӕвдӕлон чи уыд, иу ахӕм ӕфсымӕр райдыдта Библийы ахуыры тыххӕй кувын. Йӕ цардӕмбал дӕр хъуыды кодта, цымӕ мӕ сӕрыхицауӕн йӕ бон суыдзӕн йӕ ахуыргӕнинагӕн рӕстӕг арын, уӕлдайдӕр та йын бирӕ зындзинӕдтӕ куы уа, уӕд. Уыцы хо йӕ хъуыдытӕ Йегъовӕйӕн радзырдта ӕмӕ дзы куырдта, цӕмӕй йӕ лӕг ахуыргӕнинаг ссардтаид. Дыууӕ къуырийы фӕстӕ сӕ куывдӕн дзуапп райстой – се ’мбырды иу пионер фембӕлд, Библи ахуыр кӕнын кӕй фӕндыд, ахӕм нӕлгоймагыл ӕмӕ йӕ ацы ӕфсымӕрӕн бахӕс кодта. Не ’фсымӕры ус фыссы: «Афтӕ кӕмӕ кӕсы, ӕмӕ искӕимӕ Библи ахуыр кӕнын йӕ бон нӕ бауыдзӕн, уыдонӕн зӕгъын: „Йегъовӕмӕ уый тыххӕй ӕдзухдӕр кувут, ӕмӕ йын уый тыххӕй комкоммӕ дзурут. Уый ӕнхъӕл дӕр нӕ уыдыстӕм, ӕмӕ афтӕ арфӕгонд ӕрцӕудзыстӕм“». Дӕ ныфс сӕттын куы нӕ бауадзай, уӕд дӕуӕн дӕр дӕ бон суыдзӕн искӕимӕ Библи ахуыр кӕнын райдайын ӕмӕ зӕрдӕрухс уыдзынӕ, «цардмӕ цы фӕндаг кӕны», ууыл цӕуынӕн ын куы ӕххуыс кӕнай, уӕд (Матф. 7:13, 14).