Архай, цӕмӕй арӕхстджындӕр хъусынгӕнӕг суай
1. Хорз хабар арӕхстджындӕрӕй кӕй хъуамӕ хъусын кӕнӕм, уый фыццаг ӕнусы чырыстӕтты цӕвиттонтӕй куыд зыны?
1 Чырыстӕттӕ хъуамӕ архайой, цӕмӕй хорз хабар арӕхстджындӕрӕй хъусын кӕной. Чырысти дӕр йӕ фӕдылдзӕуджыты ахуыр кодта, цӕмӕй арӕхстджындӕр хъусынгӕнджытӕ суыдаиккой (Лук. 9:1–5; 10:1–11). Акилӕ ӕмӕ Прискиллӕ дӕр Аполлосӕн «Хуыцауы фӕндаг бӕлвырддӕр бамбарын кодтой», цӕмӕй арӕхстджындӕрӕй хъусын кодтаид (Хъуыд. 18:24–26). Апостол Павел та Тимофейы, фӕлтӕрд хъусынгӕнӕджы, разӕнгард кодта, цӕмӕй ноджы арӕхстджындӕрӕй хъусын кодтаид, ӕмӕ йын «йе ’нтыстдзинад алчидӕр уыдтаид» (1 Тим. 4:13–15). Кӕд Хицауӕн цагъартау бирӕ азты дӕргъы лӕггад кӕнӕм, уӕддӕр хъуамӕ архайӕм, цӕмӕй ноджы арӕхстджындӕрӕй хъусын кӕнын сахуыр уӕм.
2. Нӕ бон куыд у иннӕтӕй ахуыр кӕнын?
2 Иннӕтӕй ахуыр кӕн. Арӕхстджындӕр хъусынгӕнджытӕ суыдзыстӕм, иннӕтӕй куы ахуыр кӕнӕм, уӕд (Ӕмб. 27:17). Уымӕ гӕсгӕ-иу дӕ хъус дар, уацамынды кӕимӕ вӕййыс, уыдон сӕ ныхас куыд райдайынц, уымӕ. Уыцы хъуыддаджы фӕлтӕрд чи у, уыдонӕй-иу ӕххуыс ракур ӕмӕ дын цы дзурой, уымӕ-иу лӕмбынӕг байхъус (Ӕмб. 1:5). Адӕймагмӕ ногӕй куы бацӕуай, уӕд дӕ ныхас куыд райдайдзынӕ кӕнӕ искӕимӕ Библи ахуыр кӕнын куыд райдайай, ууыл, мыййаг, фӕтыхсыс? Кӕд о, уӕд дӕ уацамындон къорды цӕстдарӕгимӕ кӕнӕ ӕндӕр фӕлтӕрд хъусынгӕнӕгимӕ аныхас кӕн. Стӕй дӕ зӕрдыл дар, Йегъовӕйы сыгъдӕг тыхы фӕрцы нӕ бон кӕй у, цӕмӕй арӕхстджындӕрӕй хъусын кӕнын сахуыр уӕм, ӕмӕ йӕм уый тыххӕй ӕппынӕдзух кув (Лук. 11:13).
3. Исчи нын уынаффӕ куы ратта, уӕд-иу уымӕ цы цӕстӕй хъуамӕ ракӕсӕм?
3 Исчи дын уынаффӕ куы ратта, цӕмӕй ноджы арӕхстджындӕрӕй хъусын кӕнын сахуыр уай, уӕд-иу ӕм ма фӕхъыг у (Еккл. 7:9). Фӕлтау-иу ӕм Аполлосау сӕрныллӕгӕй байхъус ӕмӕ-иу ын бузныг зӕгъ. Уый уыдзӕн зондыл дзурӕг (Ӕмб. 12:15).
4. Арӕхстджындӕрӕй кӕй хъуамӕ хъусын кӕнӕм, уый Чырысти куыд бамбарын кодта?
4 Арӕхстджындӕрӕй куы хъусын кӕнӕм, уӕд Хуыцауӕн кад хӕсдзыстӕм. Йесо йӕ фӕдылдзӕуджытӕн цӕвиттон ӕрхаста ӕмӕ сӕ афтӕмӕй баразӕнгард кодта, цӕмӕй арӕхстджындӕрӕй хъусын кӕнын сахуыр уыдаиккой. Йесо йӕхи абарста сӕнӕфсирбӕласимӕ, йӕ сӕрст фӕдылдзӕуджыты та – къалиутимӕ. Чырысти загъта, йӕ Фыд кӕй ссыгъдӕг кӕны, дыргъ чи хӕссы, уыцы къалиутӕй алкӕцы дӕр, цӕмӕй «ноджы фылдӕр дыргъ хӕссой» (Иоан. 15:2). Сӕнӕфсирдоны хицауы куыд фӕфӕнды, цӕмӕй-иу фылдӕр тыллӕг райса, афтӕ Йегъовӕйы дӕр фӕнды, цӕмӕй мах дӕр ноджы фылдӕр дыргъ хӕссӕм, ома йын «нӕ дзыхыныхасӕй адӕмы ’хсӕн йӕ ном кадджын кӕнӕм» (Дзут. 13:15). Арӕхстджындӕрӕй хъусын кӕныныл куы архайӕм, уӕд нын цы бантысдзӕн? Чырысти загъта: «Бирӕ дыргъ куы хӕссат... уӕд уымӕй мӕ Фыд скадджын уыдзӕн» (Иоан. 15:8).