2 | «Фыстад... удӕнцой дӕтты»

БИБЛИЙЫ ФЫСТ ИС: «Раздӕр цыдӕриддӕр фыст ӕрцыд, уый та фыст ӕрцыд махӕн зонд бацамонынӕн, цӕмӕй нӕ нӕ фидардзинады фӕрцы ӕмӕ, Фыстад цы удӕнцой дӕтты, уый фӕрцы уа ныфс» (РОМӔГТӔМ 15:4).

Ацы ныхӕстӕ цӕуыл дзурӕг сты

Библийы фыст ис, адӕймагӕн удӕнцой чи ӕрхӕссы, ахӕм ныхӕстӕ. Уыдон нын феххуыс кӕнынц тар хъуыдытимӕ тох кӕнынӕн. Библи ма нын ныфс ӕвӕры, зӕрдӕрыст кӕй тыххӕй ӕвзарӕм, уыцы хъуыдытӕ ӕмӕ ӕнкъарӕнтӕй тагъд рӕстӕджы ӕнустӕм кӕй фервӕздзыстӕм.

Ацы ныхӕстӕ дын куыд баххуыс кӕндзысты

Ныфссӕттӕг хъуыдытӕ иуӕй-иу хатт алкӕмӕ дӕр фӕзыны. Фӕлӕ депресси кӕнӕ ӕндӕр ахӕм низ кӕмӕ ис, уыдонӕй бирӕты уыцы хъуыдытимӕ тох кӕнын ӕдзух фӕхъӕуы. Ахӕм адӕмӕн Библи куыд баххуыс кӕны?

Библийы фӕрцы нӕ бон у нӕ тар хъуыдытӕ хорз хъуыдытӕй баивын (Филиппӕгтӕм 4:8). Куы йӕ кӕсӕм, уӕд нӕ зонд дзаг кӕндзыстӕм удӕнцойдӕттӕг хъуыдытӕй ӕмӕ нын уый ӕххуыс кӕндзӕн, цӕмӕй нӕ хъуыдытыл ӕмӕ не ’нкъарӕнтыл нӕ бар цӕуа (Псалом 94:18, 19).
Библи нын ӕххуыс кӕны, цӕмӕй нӕхимӕ ницӕйаг мауал кӕсӕм (Лукайы 12:6, 7).
Библийӕ бирӕ скъуыддзӕгтӕй у бӕрӕг, иунӕг кӕй не стӕм ӕмӕ нын не Сфӕлдисӕг не ’нкъарӕнтӕ тынг хорз кӕй ӕмбары (Псалом 34:18; 1 Иоанны 3:19, 20).
Библи зӕрдӕ ӕвӕры, тагъд рӕстӕджы Хуыцау афтӕ кӕй бакӕндзӕн, ӕмӕ, ныр цытӕ ӕвзарӕм, уыдӕттӕ хъуыды дӕр нал ӕркӕндзыстӕм (Исай 65:17; Раргомад 21:4). Не ’нкъарӕнтӕ ӕмӕ нын тыхст хъуыдытӕ ӕнцой куы нал дӕттой, уӕд-иу нын ацы зӕрдӕвӕрд баххуыс кӕндзӕн фидар фӕлӕууынӕн.

Библи куыд ӕххуыс кӕны. Джессикӕ

Мӕ низ мыл куыд ӕндавы

25 азы мыл куы цыд, уӕд ахӕм уавӕрмӕ ӕрцыдтӕн, ӕмӕ мын хуымӕтӕг хъуыддӕгтӕ кӕнын дӕр зын сси. Стӕй рабӕрӕг, депресси мӕм кӕй ис. Раздӕр мыл цы ’взӕр хабӕрттӕ ’рцыд, уыдон-иу мӕ зӕрдыл ӕрбалӕууыдысты ӕмӕ-иу ӕдзух уыдӕттыл хъуыды кодтон. Дохтыртӕ мын бамбарын кодтой, уыцы хабӕртты тыххӕй мӕм кӕй фӕзыны тар хъуыдытӕ, ӕмӕ мӕм депресси дӕр уый тыххӕй кӕй ис. Хостӕ мын кӕй рафыстой, уый фӕрцы мын фенцондӕр. Стӕй ма дохтыримӕ иумӕ сбӕрӕг кодтам, цавӕр хъуыдытӕ мӕ фӕхъыгдарынц, ӕмӕ мын бамбарын кодта, куыд хъӕуы семӕ тох кӕнын.

Библи мын куыд ӕххуыс кӕны

Мӕ депресси-иу куы стыхджын, уӕд-иу мын, паническая атака кӕй хонынц, уый райдыдта. Стӕй-иу тынг стыхстӕн ӕмӕ-иу мӕ хуыссӕг фӕлыгъд. Арӕх-иу мӕ ӕхсӕвыгон алыхуызон хъуыдытӕ уӕгъд нӕ уагътой. Псалом 94:19 стихы куыд фыст ис, афтӕмӕй Хуыцауӕн йӕ бон у, ӕмӕ нӕ зӕрдӕфидаргӕнӕн ныхӕстӕй барӕвдауа, тыхст хъуыдытӕ нын ӕнцой куы нӕ дӕттой, уӕд. Уымӕ гӕсгӕ мӕ хуыссӕны раз дардтон Библи ӕмӕ блокнот. Уыцы блокноты мын фыст уыди, чи-иу мӕ бафидар кодтаид, ахӕм стихтӕ. Мӕ хуыссӕг-иу куы фӕлыгъд, уӕд-иу Библийӕ цалдӕр стихы бакастӕн, ӕмӕ-иу мын афтӕмӕй Хуыцау удӕнцой лӕвӕрдта.

Библи нӕ разӕнгард кӕны, цӕмӕй-иу нӕ сӕрӕй фӕсурӕм, Хуыцауы цӕсты раст чи нӕу, ахӕм хъуыдытӕ. Раздӕр мӕм афтӕ каст, ӕмӕ ницӕйаг дӕн, ничи мӕ уарзы. Фӕлӕ стӕй базыдтон, ахӕм хъуыдытӕ Библийы ныхмӕ кӕй сты, уымӕн ӕмӕ дзы фыст ис, Хуыцау кӕй у уарзӕгой, тӕригъӕдгӕнаг ӕмӕ алы адӕймагыл дӕр хицӕнӕй кӕй тыхсы. Кӕд раздӕр мӕ тар хъуыдыты цагъар уыдтӕн, уӕд сыл ныр та мӕ бар цӕуы. Сахуыр дӕн, Хуыцау мӕм цы цӕстӕй кӕсы, мӕхимӕ ахӕм цӕстӕй кӕсын. Уый тынг ахсджиаг уыд, уымӕн ӕмӕ уый фӕрцы мӕхи ницӕйагыл нал нымадтон, мӕхимӕ раст цӕстӕй кӕсын райдыдтон.

Фидӕнмӕ зӕрдиагӕй ӕнхъӕлмӕ кӕсын, уымӕн ӕмӕ-иу нал ӕрхъуыды кӕндзынӕн, цы ӕвзӕр хабӕрттӕ мыл ӕрцыд, уыдон ӕмӕ-иу мӕ тар хъуыдытӕ тухӕнӕй нал мардзысты. Зонын ӕй, психикӕимӕ баст низтӕ кӕй нал уыдзӕн, ӕмӕ мын уый абон дӕр ӕххуыс кӕны. Стӕй мӕ диссаджы ныфс ис, депрессиимӕ тох кӕнын мӕ кӕй нал хъӕудзӕн.