Дӕуӕн дӕр дӕ бон у ацы хуымӕтӕг фарста раттын

Мэри ӕмӕ йӕ цардӕмбал Джонa кӕм цӕрынц, уыцы бӕстӕмӕ Филиппинтӕй бирӕтӕ ӕрцӕуынц кусынмӕ. Мэри ӕмӕ Джонӕн сӕ зӕрдӕмӕ тынг цӕуы семӕ хорз хабары тыххӕй ныхас кӕнын. Коронавирусы пандемийӕйы рӕстӕг Мэрийӕн Библийы ахуыртӕ ӕрмӕст йӕ бӕстӕйы нӕ фӕзынд, фӕлӕ ма ӕндӕр бӕстӕты дӕр. Уый йын куыд бантыст?

Мэри-иу, Библи кӕимӕ ахуыр кодта, уыдоны бафарста: «Библи ахуыр кӕнын кӕй фӕнды, ахӕм искӕй зоныс?» Кӕд-иу ын исчи «о» загъта, уӕд-иу ын загъта, цӕмӕй йӕ йемӕ базонгӕ кодтаид. Уый хуымӕтӕг фарста у. Фӕлӕ уый фӕрцы арӕх вӕййы ноджыдӕр искӕимӕ Библи ахуыр кӕнын райдайӕн. Ома уый куыд рауайы? Хуыцауы Ныхасӕн чи аргъ кӕны, уыдоны фӕфӕнды, цӕмӕй сӕ бинонтӕ ӕмӕ се ’мбӕлттӕ дӕр базоной, сӕхӕдӕг цы базыдтой, уый. Гъемӕ дарддӕр хабар куыд рауад?

Мэри Библи кӕимӕ ахуыр кодта, уыдонӕй иу уыди Жасми́н. Уый Мэрийы базонгӕ кодта йӕ цыппар ӕмбалимӕ, ӕмӕ уыдон дӕр Библи ахуыр кӕнын райдыдтой. Сӕ иуӕн, Кристи́нӕн, йӕ ахуыр йӕ зӕрдӕмӕ афтӕ тынг фӕцыд, ӕмӕ Мэрийӕн загъта, цӕмӕй йемӕ ахуыр кодтаид къуыри дыууӕ хатты. Мэри Кристины дӕр бафарста, Библи ахуыр кӕнын кӕй фӕнды, ахӕм искӕй ма зоныс, зӕгъгӕ. Кристин ын загъта: «О, ме ’мбӕлттимӕ дӕ базонгӕ кӕндзынӕн». Цалдӕр къуырийы фӕстӕ Кристин Мэрийы базонгӕ кодта йе ’мбӕлттӕй цыппаримӕ, фӕстӕдӕр та ма ноджыдӕр цалдӕримӕ. Ӕмӕ стӕй уыдонӕй дӕр чидӕртӕ Мэрийӕн загътой, Библийы тыххӕй фылдӕр базонын кӕй фӕнды, ахӕм зонгӕтӕ сын кӕй ис.

Кристины фӕндыд, цӕмӕй йӕ бинонтӕ дӕр Филиппинты Библи ахуыр кӕнын райдыдтаиккой. Гъемӕ йӕ чызг Андре́аимӕ аныхас кодта. Андреа фыццаг афтӕ хъуыды кодта: «Йегъовӕйы Ӕвдисӕнтӕ сектӕ сты. Уыдон Чырыстийыл не ’ууӕндынц, стӕй ӕрмӕстдӕр Зӕронд Фӕдзӕхст кӕсынц». Фӕлӕ фыццаг ахуыры фӕстӕ бамбӕрста, кӕй рӕдыд. Уый фӕстӕ-иу Библийӕ ног исты куы базыдта, уӕд-иу афтӕ бакодта: «Кӕд Библийы афтӕ фыст ис, уӕд раст у!»

Фӕстӕдӕр Андреа Мэрийы базонгӕ кодта йӕ дыууӕ ӕмбалимӕ ӕмӕ йе ’мкусӕгимӕ. Ӕмӕ уыдон дӕр ахуыр кӕнын райдыдтой. Андреайӕн уыд фыдыхо, Анжелӕ, ӕмӕ уыди куырм. Мэри-иу Андреаимӕ Библи куы ахуыр кодта, уӕд-иу сӕм уый дӕр хъуыста. Фӕлӕ Мэри уый нӕ зыдта. Иу бон Анжелӕ Андреайӕн загъта, цӕмӕй йӕ Мэриимӕ базонгӕ кодтаид ӕмӕ Мэри йемӕ дӕр Библи ахуыр кӕнын райдыдтаид. Анжелӕйы зӕрдӕмӕ тынг цыди, цы-иу базыдта, уый. Иу мӕймӕ бахъуыды кодта бирӕ стихтӕ ӕмӕ йӕ фӕндыд къуыри цыппар хатты ахуыр кӕнын! Стӕй йын Андреа ӕххуыс кодта, цӕмӕй-иу алы къуыри дӕр ӕмбырдтӕм видеоконференцийы фӕрцы баиу уыдаид.

Мэри-иу Кристинимӕ Библи куы ахуыр кодта, уӕд-иу Кристины цардӕмбал Джошуа алы хатт дӕр уым кӕмдӕр хӕстӕг уыди. Мэри уый куы базыдта, уӕд ӕй бафарста, дӕу, дам, Библи ахуыр кӕнын нӕ фӕнды. Джошуа йын афтӕ: «Байхъусдзынӕн уӕм, ӕрмӕст мӕм фарстатӕ ма дӕтт, кӕннод сыстдзынӕн ӕмӕ ацӕудзынӕн». Фӕлӕ ахуыр кӕнын куы райдыдтой, уӕд йӕхӕдӕг фыццаг 5 минутмӕ Кристинӕй фылдӕр фарстатӕ радта. Ӕмӕ йӕ бафӕндыд Библи ахуыр кӕнын.

Иу хуымӕтӕг фарстайы фӕрцы Мэри бирӕтимӕ райдыдта Библи ахуыр кӕнын. Кӕйдӕрты дзы фӕстӕдӕр ӕндӕр Ӕвдисӕнты бар бакодта. Ӕдӕппӕтӕй Библи ахуыр кӕнын райдыдта 28 адӕймагимӕ цыппар бӕстӕйы.

Жасмин донаргъуыд райста 2021 азы апрелы, Кристин та – 2022 азы майы. Ӕмӕ стӕй Кристин фӕстӕмӕ Филиппинтӕм йӕ бинонтӕм аздӕхт. Йе ’мбӕлттӕй дӕр дыууӕйӕ донаргъуыд райстой. Кристины донаргъуыдӕй цалдӕр мӕйы фӕстӕ Анжелӕ дӕр донаргъуыд райста ӕмӕ ныр лӕггад кӕны пионерӕй. Кристины цардӕмбал Джошуа, сӕ чызг Андреа ӕмӕ ма ноджыдӕр цалдӕр адӕймаджы дарддӕр Библи ахуыр кӕнынц ӕмӕ сӕ уырнындзинад фидар кӕны.

Фыццаг ӕнусы хорз хабар бинонты ӕмӕ ӕмбӕлтты ’хсӕн тагъд парахат кодта (Иоан. 1:41, 42а; Хъуыд. 10:24, 27, 48; 16:25–33). Хорз нӕ уаид, ды дӕр-иу, Библи кӕимӕ ахуыр кӕныс кӕнӕ ма ноджыдӕр фылдӕр базонын кӕй фӕнды, уыдоны куы бафӕрсис: «Библи ахуыр кӕнын кӕй фӕнды, ахӕм искӕй зоныс?» Цымӕ ацы хуымӕтӕг фарстайы фӕрцы цалимӕ райдаис Библи ахуыр кӕнын? Цӕй ӕмӕ йӕ афӕлвар.