Африкӕ

Хъусын кӕны мотоциклыл

Бенины хуссар хайы горӕтты адӕм арӕхдӕр фӕпайда кӕнынц такси-мотоциклтӕй, хонынц сӕ земиджан. Дезире у ӕххуысгӕнӕг пионер ӕмӕ йӕ мотоциклыл бафидар кодта аудиоплеер, динамиктӕ та сарӕзта, адӕймаг кӕм фӕбады, уыцырдӕм. Адӕймаг йӕ мотоциклыл куы сбады, уӕд скусын кӕны нӕ публикациты ӕмӕ Библийыл арӕзт драмӕты аудиозаписьтӕ. Адӕмӕн сӕ фылдӕр уайтагъд уыцы записьтӕм лӕмбынӕг хъусын райдайынц. Бирӕты зӕрдӕмӕ афтӕ тынг фӕцӕуынц, ӕмӕ сӕ бынатмӕ куы бахӕццӕ вӕййынц, уӕд сӕ хизын дӕр нӕ фӕфӕнды, чидӕртӕ та сӕ комгӕ дӕр нӕ фӕкӕнынц хизын, цалынмӕ записьмӕ кӕронмӕ нӕ байхъусынц, уӕдмӕ. Дезире зӕгъы: «Бӕргӕ-иу хорз уаид, ӕмӕ-иу мын адӕймаг куы бафидид ӕмӕ куы ацӕуид, ӕз та-иу ӕндӕр искӕй куы аласин. Фӕлӕ йӕ зонын, адӕймаг хорз хабар фехъуса, уый ӕхца бакусынӕй бирӕ ахсджиагдӕр кӕй у. Уымӕй уӕлдай ма афтӕмӕй бирӕ публикацитӕ апарахат кӕнын».

Фӕндфидар гыццыл чызг

Ноллӕ, 6-аздзыд чызг, йӕ бинонтимӕ цӕры Бурундийы хӕххон хъӕуы ӕмӕ скъоламӕ нӕма цӕуы. Иубон йӕ бинонтӕ гыццыл ӕвзалыйы пецыл хӕринаг кодтой, ӕмӕ сӕ, сӕ фарсмӕ иу хӕдзары чи куыста, уыцы дыууӕ нӕлгоймаджы зынг ракуырдтой, артӕн, дам, нӕ хъӕуы. Уыцы рӕстӕг артмӕ йӕ хъус дардта Ноллӕ ӕмӕ сын загъта, райсут дзы, зӕгъгӕ. Гыццыл фӕстӕдӕр Ноллӕ уыцы дыууӕ нӕлгоймагыл сӕмбӕлд ӕмӕ сӕ тамако дымгӕ куы федта, уӕд ӕй бамбӕрста, зынг сӕ цӕмӕн хъуыд, уый. Уый йӕ зӕрдӕмӕ нӕ фӕцыд, ӕмӕ сын афтӕ бакодта: «Куы йӕ зыдтаин, зынг уӕ тамако ссудзынӕн кӕй хъӕуы, уӕд уын нӕ радтаин». Уый фӕстӕ йӕ зӕрдыл ӕрлӕууыд, Паддзахады залы кӕй федта, ӕддаг цъарыл тамакойы ныв кӕм уыд, ахӕм брошюрӕ. Ноллӕ Паддзахады залмӕ азгъордта ӕмӕ райста дыууӕ брошюрӕйы «Хуыцау тамако дымынмӕ цы цӕстӕй кӕсы?». Стӕй уыцы нӕлгоймӕгтӕм ӕрбаздӕхт, фӕйнӕ брошюрӕйы сын радта ӕмӕ сын загъта, цӕмӕй сӕ уыцы тӕккӕ бакастаиккой. Фӕстӕдӕр та сыл сӕмбӕлд ӕмӕ сын регионалон конгресмӕ хуынды гӕххӕттытӕ радта. Чызг ахӕм фӕндфидар кӕй разынд, уый сӕм тынг диссаг фӕкаст ӕмӕ конгресмӕ дыууӕ боны ӕрбацыдысты. Сихорафон сӕ Ноллӕ федта ӕмӕ сын загъта, цӕмӕй йӕ бинонтимӕ иумӕ истытӕ ахордтаиккой. Нӕлгоймӕгтӕ конгрессы цы федтой ӕмӕ цы фехъуыстой, уый сӕ зӕрдӕмӕ афтӕ тынг фӕцыд, ӕмӕ дыууӕйӕ дӕр Библи ахуыр кӕнын райдыдтой.

Хъусын кӕнынц ахӕстӕтты

Либерийы хистӕр нӕлгоймӕгтӕ хорз хабар хъусын кӕнынц алыхуызон ахӕстӕтты. Сӕйраг горӕт Монровийы чи лӕггад кӕны, иу ахӕм сӕрмагонд пионер, Ив, зӕгъгӕ, загъта: «Ахӕстоны чи бады, уыдонӕй ӕртӕйӕ мартъийы систы ӕнӕаргъуыд хъусынгӕнджытӕ. Ӕмӕ ныр Монровийы сӕйраг ахӕстоны ис ӕхсӕз хъусынгӕнӕджы». Цымӕ куыд фӕхъусын кӕнынц? Ив зӕгъы: «Алы ӕртыццӕг ӕмӕ сабаты ӕрӕмбырд вӕййынц уацамындон фембӕлдмӕ. Уый фӕстӕ сын бар раттынц, цӕмӕй иу камерӕйӕ иннӕмӕ цӕуой ӕмӕ дзы чи бады, уыдонӕн хорз хабар хъусын кӕной». Ныр дзы бирӕтӕ Библи ахуыр кӕнынц ӕмӕ, ахӕстоны цы фембӕлдтӕ фӕуадзынц, уыдонмӕ фӕцӕуынц. Уыцы ахӕстоны чи бады, уыдонӕн филиалӕй иу ӕфсымӕр радзырдта ӕргом раныхас. Ӕдӕппӕтӕй йӕм байхъуыста 79 адӕймаджы. Иннӕ ӕхсӕз ахӕстоны дӕр ӕдзухдӕр Библийы ахуыртӕ фӕуадзынц, ӕмӕ, куыд бафиппайдтой, афтӕмӕй уый хуыздӕрырдӕм фӕзыны, чи дзы бады, уыдоныл.

«Ӕххуыс нӕ тынг хъӕуы!»

Намибийы ӕфсымӕртӕ тынг бафыдӕбон кодтой, цӕмӕй, дард рӕтты чи цӕры, уыцы адӕмӕй фылдӕр базонын кӕй фӕнды, уыдонӕн сӕ бон уыдаид Ӕрымысӕн изӕрмӕ ӕрбацӕуын. Чидӕртӕ дзы сты бушментӕ, Африкӕйы хуссар хайы цы адӕмыхӕттытӕ цӕры, уыдонӕй иутӕ. Бирӕ ӕнусты дӕргъы уыдон кодтой хуымӕтӕг ӕмӕ цӕугӕ цард, цуаны цыдысты ӕмӕ-иу ӕмбырд кодтой, хӕрынӕн цыдӕриддӕр бӕззыд, уый. Гленн у сӕрмагонд пионер ӕмӕ цӕры бӕстӕйы цӕгат хайы. Уый бацархайдта, цӕмӕй 2015 азы Ӕрымысӕн изӕр сбӕрӕг кодтаиккой, Рундуйӕ 270 километры дарддӕр чи ис ӕмӕ бушментӕ кӕм цӕры, иу ахӕм дард хъӕуы. Уӕд дзы дыккаг хатт сбӕрӕг кодтой Ӕрымысӕн изӕр. Дыууӕ хатты дӕр хъӕуы хицӕуттӕ Йегъовӕйы Ӕвдисӕнтӕн бар радтой тӕрхондоны агъуысты Ӕрымысӕн изӕр сбӕрӕг кӕнынӕн, ӕхца сӕ нӕ райстой, афтӕмӕй. Ӕрымысӕн изӕрмӕ ӕдӕппӕтӕй ӕрбацыд 232 адӕймаджы, кӕд къӕвда дзӕвгар фӕуарыд, уӕддӕр. Уыцы ран дзурынц кве ӕвзагыл, ис дзы бирӕ цъыкк-цъыкгӕнаг мыртӕ. Раныхас тӕлмац кодтой англисаг ӕвзагӕй кве ӕвзагмӕ. Уыцы ӕвзагыл Библи кӕй нӕй, уымӕ гӕсгӕ сын Библийы стихтӕ, зӕгъӕм, Исайы 35:5, 6 стихтӕ, куы ӕмбарын кодтой, уӕд сын къулыл хуызджын слайдтӕ ӕвдыстой. Гленн Библи ахуыр кӕны, уырнындзинады хъуыддаджы размӕ чи цӕуы, цалдӕр ахӕм адӕймагимӕ. Гленн радзырдта: «Дыууӕ азы дӕргъы ардӕм мӕй иу хатт ӕрцӕуын. Цалдӕр боны дзы пъалаткӕйы фӕцӕрын. Се ’взагыл дзурын зын кӕй у, стӕй дард кӕй цӕрынц, уый тыххӕй хъусын кӕныны хъуыддаг размӕ бынтон тагъд нӕ цӕуы. Ӕххуыс нӕ тынг хъӕуы! Хицӕуттӕм куы бацыдтӕн ӕмӕ сӕ бар куы ракуырдтон, цӕмӕй ацы аз Ӕрымысӕн изӕр сбӕрӕг кодтаиккам, уӕд мын сӕ разамонӕг загъта, зӕгъӕ, кӕд уӕ бон у, уӕд ацы ран кувӕн бынат саразут. Стӕй загъта, агъуыст саразынӕн нын зӕхх дӕр ӕмӕ ӕхца дӕр кӕй ратдзысты. Сымах та, дам, ӕрмӕстдӕр хъӕуы „хистӕры“ равзарын кӕнӕ нӕхи адӕмӕй искӕй сахуыр кӕнын, цӕмӕй, дам, „хистӕр“ суа».