Америкӕ

Библи ахуыр кӕны цырагъы рухсмӕ

Иу лӕг ӕмӕ ус лӕггад кӕнынц сӕрмагонд пионертӕй Бразилийы иу дард ран. Уыдон базыдтой, 13 азы размӕ Библи чи ахуыр кодта, иу ахӕм сылгоймаджы тыххӕй, Валдирӕ, зӕгъгӕ. Цӕмӕй йӕ ссардтаиккой, уый тыххӕй сӕ бахъуыд рыг фӕндӕгтыл цӕуын ӕмӕ цӕугӕдоны сӕрты ахизын, кӕд ууылты цӕуын тӕссаг уыд, уӕддӕр. Ӕппынфӕстаг Валдирӕйы ссардтой, ӕмӕ куыд рабӕрӕг, афтӕмӕй йӕ тынг фӕндыд Библи ногӕй ахуыр кӕнын райдайын. Валдирӕ дард ран кӕй цард, уымӕ гӕсгӕ баныхас кодтой, Библи телефонӕй кӕй ахуыр кӕндзысты. Фӕлӕ йӕ телефон хорз ахста ӕрмӕстдӕр кӕмдӕр быдыры, хӕдзарӕй тынг дард. Уымӕй уӕлдай ма йӕ бон Библи ахуыр кӕнын уыд ӕрмӕстдӕр изӕры фараст сахаты фӕстӕ. Дӕ цӕстытыл-ма ауайын кӕн: ӕрыгон сылгоймаг йӕ телефонимӕ иунӕгӕй талынджы быдыры бады ӕмӕ цырагъы рухсмӕ Библи ахуыр кӕны.

Валдирӕ ма йӕ телефонӕй фӕхъусы хуыцаубоны фембӕлдты программӕмӕ дӕр. Быдырмӕ ацӕуы ӕмӕ йемӕ рахӕссы йӕ брошюрӕ, зарджыты чиныг ӕмӕ Библи. Къӕвдабон та зонтикимӕ рацӕуы.

Мартъийы Валдирӕ ацыд Паддзахады залмӕ. Португайлаг ӕвзагыл рацыд, ногӕй кӕуыл бакуыстой, уыцы «Ног дунейы тӕлмац», ӕмӕ дзы уый фӕдыл уыд сӕрмагонд фембӕлд. Цӕуын ӕй бахъуыд 100 километры бӕрц. Ног Библи йын куы радтой, уӕд тынг цин кодта. Библи ахуыр кӕныныл ӕппӕт хъарутӕй кӕй архайы, уый тыххӕй дзы куы раппӕлыдысты, уӕд загъта: «Цӕй, бынтон зын дӕр нӕу!»

«Зыдтон ӕй, иубон кӕй ӕрбацӕудзыстут»

Колумбийы цӕры, индейаг адӕмыхаттӕй чи у, ахӕм адӕм, юпӕ, зӕгъгӕ. Фрэнк, сӕрмагонд пионер, уыцы адӕмыхаттӕн хъусын кӕнынмӕ куы цыд, уӕд ӕй бафӕдзӕхстой, цӕмӕй йӕхи сӕ хистӕр Джон Хайройӕ хъахъхъӕдтаид. Уый размӕ Джон уырдыгӕй атардта, хъусын кӕнын дзы чи фӕнд кодта, цалдӕр ахӕм евангелистты къорды. Иухатт Джон базыдта, евангелистты хистӕр адӕмӕй се ’фтиагӕй дӕсӕм хай кӕй ӕмбырд кӕны, ӕмӕ йӕ дамбаца фелвӕста ӕмӕ уӕлӕмӕ ӕхсын райдыдта. Евангелистты хистӕры лидзын бахъуыд.

Фрэнк загъта: «Уыцы адӕммӕ куы ныххӕццӕ стӕм, уӕд нӕм чи байхъуыста, уыдонӕй фыццаг уыд Джон Хайройы чызджытӕй иу! Адӕмимӕ Библи кӕй фӕрцы фӕахуыр кӕнӕм, уыцы чиныг ын куы равдыстам, уӕд нын афтӕ куы бакӕнид: „Ацы динмӕ мӕ фӕнды цӕуын“. Уый фӕстӕ йӕ фыдмӕ азгъордта ӕмӕ йын не ’рбацыды тыххӕй загъта. Уый нӕм уайтагъд фӕдзырдта. Гыццыл тыхстыстӕм, фӕлӕ йӕм уӕддӕр бацыдыстӕм ӕмӕ йын ницыма загътам, афтӕ нын йӕхӕдӕг загъта: „Зонын ӕй, уӕ дин раст кӕй у. Аст азы размӕ Бесеррилы бырондоны ссардтон, мӕ чызгӕн цы чиныг радтат, ахӕм. Бакастӕн ӕй, ӕмӕ уын уӕдӕй фӕстӕмӕ уе ’рбацыдмӕ ӕнхъӕлмӕ кастӕн. Зыдтон ӕй, иубон кӕй ӕрбацӕудзыстут. Фӕнды мӕ, цӕмӕй мемӕ, мӕ бинонтимӕ ӕмӕ нӕ адӕмыхаттимӕ Библи ахуыр кӕнат. Нӕ хӕдзары дуӕрттӕ сымахӕн алкӕддӕр гом сты“.

Уыцы ныхӕстӕ фехъусгӕйӕ нӕ цӕссыгтӕ ӕркалдысты. Ӕнӕхъӕн хъӕу ӕрӕмбырд, цӕмӕй нӕм байхъуыстаиккой, Джон Хайро та нын нӕ ныхӕстӕ тӕлмац кодта. Куы цыдыстӕм, уӕд нын къӕлӕу радта, цӕмӕй йыл нӕ хӕссинӕгтӕ аластаиккам. Ныр нын ис 47 Библийы ахуыры. Ӕдӕппӕтӕй юпӕ адӕмыхаттӕй Библи ахуыр кӕнӕм 120 адӕймагимӕ, ӕмӕ се ’хсӕн сты Джон Хайро ӕмӕ йӕ чызг дӕр».

Раздӕр ныхмӕ чи цыд, уый Хуыцауы лӕггадгӕнӕг сси

Хосе цӕры Эквадоры ӕмӕ раздӕр уыд католикон диныл хӕст. Уый ныффыста: «Йегъовӕйы Ӕвдисӕнтӕй раздӕр ме сӕфт уыдтон. Сӕ фӕдыл зылдтӕн дӕс азы дӕргъы. Адӕмы-иу сыл сардыдтон, нӕмгӕ дӕр-иу сӕ фӕкодтон, стӕй-иу сӕ давджытӕ дӕр схуыдтон. Уымӕй уӕлдай ма-иу сӕ пъӕлицӕмӕ куы акодтой, уӕд-иу домдтон, цӕмӕй-иу сыл камерӕйы дуӕрттӕ мӕхӕдӕг сӕхгӕдтаин. Иухатт дзы кӕйдӕр машинӕ ныппырх кодтам. Ӕндӕр хатт та дзы кӕмӕндӕр йӕ мотоцикл былӕй аппӕрстам.

2010 азы фӕрынчын дӕн хуыты гриппӕй. Ӕз цардтӕн Андты хӕхты ӕмӕ мын мӕ дохтыр загъта, климӕт хъармдӕр кӕм у, уым искуы, дам, денджызы был ӕрцӕр, ӕмӕ, дам, адзӕбӕх уыдзынӕ. Гъемӕ ӕз дӕр цӕрынмӕ ацыдтӕн, денджызы был чи уыд, иу ахӕм гыццыл фермӕмӕ. Фермӕ уыд мӕ хиуӕттӕй кӕйдӕр. Иунӕгӕй цардтӕн ӕмӕ йӕм мӕхӕдӕг зылдтӕн. Зын мын уыд иунӕгӕй, ӕмӕ-иу мӕ тынг фӕндыд искӕимӕ аныхас кӕнын. Ӕмӕ мӕм фермӕмӕ чи ӕрбацыд, уый зонут? Йегъовӕйы Ӕвдисӕнтӕ! Ӕмӕ ӕз дӕр семӕ ныхас кӕнын райдыдтон, уымӕн ӕмӕ, иунӕгӕй кӕй уыдтӕн, уымӕй тынг сфӕлмӕцыдтӕн. Библийӕ куыд пайда кодтой, уый уынгӕйӕ мӕ дисӕн кӕрон нал уыд. Фырцымыдисӕй семӕ Библи ахуыр кӕныныл сразы дӕн. Библи ахуыр кӕнын куы райдыдтон, уымӕй афӕдзы ӕрдӕг куы рацыд, уӕд фыццаг хатт ацыдтӕн ӕмбырдмӕ. Хӕларзӕрдӕ кӕй уыдысты ӕмӕ мӕм хорз цӕстӕй кӕй ракастысты, уый мӕ зӕрдӕмӕ афтӕ тынг фӕцыд, ӕмӕ мӕхинымӕр загътон, адон, ӕвӕццӕгӕн, Хуыцауы ӕцӕг лӕггадгӕнджытӕ сты. Мӕ уырнындзинад фидар кодта, ӕмӕ 2014 азы апрелы донаргъуыд райстон.

Йегъовӕйы Ӕвдисӕнты ныхмӕ кӕй цыдтӕн, ууыл фӕсмон кодтон. Фӕлӕ мын, зӕгъӕн ис, Йегъовӕ фадат радта, цӕмӕй мӕ рӕдыд сраст кодтаин. 2014 азы нын октябры цы районон конгресс уыд, уым мӕ интервью истой, раздӕр раст дины ныхмӕ куыд цыдтӕн, уый тыххӕй. Ӕмӕ мӕ ӕфсымӕр бафарста: „Ахӕм фадат дын куы уаид, цӕмӕй, кӕй ныхмӕ цыдтӕ, уыдонӕй искӕмӕй хатыр ракурай, уӕд уый чи уаид?“ Ӕз ын уайтагъддӕр дзуапп радтон, ӕфсымӕр Эдмундо, фӕлӕ кӕм ис, уый нӕ зонын, зӕгъгӕ. Уый ӕнхъӕл чи уыд, ӕмӕ Эдмундо сценӕйы фӕстӕ лӕууы. Районон цӕстдарӕг ӕй фӕхуыдта. Эдмундо сценӕмӕ куы рацыд, уӕд кӕрӕдзийӕн ныхъхъӕбыс кодтам ӕмӕ дыууӕйӕ дӕр ныккуыдтам. Махмӕ кӕсгӕйӕ адӕм дӕр фӕкуыдтой».

«Йегъовӕ, дӕ хорзӕхӕй, де ’вдисӕнты мӕм ӕрбарвит»

Парагвайы горӕт Асунсьоны хотӕ сихорафон судзгӕ хурмӕ хъусын кодтой, се ’мбырдмӕ чи хауы, уыцы территорийы. Куы фесты, уӕд ма сфӕнд кодтой, уым хӕстӕг цы цалдӕр хӕдзары уыд, уыдонмӕ дӕр бахойын. Хотӕй иу загъта: «Уӕдта ма исчи кувгӕ кӕны, цӕмӕй йӕм ӕрбацӕуӕм». Тигъыл цы хӕдзар уыд, уырдыгӕй сӕм иу ӕрыгон сылгоймаг ракаст, йӕ мидбылты бахудт ӕмӕ сӕ бафарста, мыййаг, Йегъовӕйы Ӕвдисӕнтӕ стут, зӕгъгӕ. Ӕмӕ сын бамбарын кодта, Боливийы Библи кӕй ахуыр кодта, фӕлӕ иу мӕйы размӕ йӕ куысты тыххӕй Парагваймӕ кӕй ӕрцыд. Йегъовӕйы Ӕвдисӕнтӕ кӕм фембырд кӕнынц, уый йӕ сыхӕгтӕй ничи зыдта, ӕмӕ уый тыххӕй куывта: «Йегъовӕ, дӕ хорзӕхӕй, де ’вдисӕнты мӕм ӕрбарвит». Ӕмӕ йӕм хотӕ раст уыцы бон ӕрбацыдысты ӕмӕ йемӕ Библи ахуыр кӕнын райдыдтой.