Фыццаг нӕлгоймаг ӕмӕ сылгоймаг

АЦЫ ныв, йӕ размӕ цы ныв ис, уымӕй цӕмӕй хицӕн кӕны? Раст зӕгъыс, ам ис адӕймӕгтӕ. Уыдон фыццаг нӕлгоймаг ӕмӕ сылгоймаг сты. Чи сӕ сфӕлдыста? Хуыцау. Йӕ ном ын зоныс? Иегъовӕ. Уыцы нӕлгоймаг ӕмӕ сылгоймаг та хуындысты Адам ӕмӕ Евӕ.

Мӕнӕ куыд скодта Адамы Иегъовӕ Хуыцау. Зӕххӕй иуцасдӕр сыджыт систа ӕмӕ дзы ӕххӕст адӕймаджы буар сарӕзта. Стӕй йын йӕ фындзыхуынчъыты ныуулӕфыд ӕмӕ уый сси удӕгас адӕймаг.

Иегъовӕ Хуыцау Адамӕн бахӕс кодта куыст. Уый хъуамӕ цӕрӕгойтӕн радтаид нӕмттӕ. Адам, ӕвӕццӕгӕн, бирӕ рӕстӕджы дӕргъы йӕ хъус дардта, лӕмбынӕг касти цӕрӕгойтӕм, цӕмӕй дзы алкӕмӕндӕр радтаид, хуыздӕр ыл чи сфидыдтаид, ахӕм ном. Фӕлӕ, уыцы хӕслӕвӕрд ӕххӕстгӕнгӕйӕ, Адам фӕхатыд иу цыдӕр. Зоныс, цы?

Цӕрӕгойтӕ иууылдӕр уыдысты къӕйттӕ. Уыдис дзы дыууӕ пылы, фыд ӕмӕ мад, стӕй дыууӕ домбайы, уыдон дӕр фыд ӕмӕ мад. Ӕрмӕст Адамӕн нӕ уыд ӕмбал. Гъемӕ Иегъовӕ Адамы тарф фынӕй бакодта ӕмӕ йын йӕ фӕрсчытӕй иу систа. Стӕй уыцы фӕрскӕй Адамӕн скодта сылгоймаджы ӕмӕ сси йӕ ус.

Адамы цинӕн ма кӕрон кӕм уыди! Ахъуыды ма кӕн, куыд амондджын хъуамӕ уыдаид Евӕ та – ахӕм диссаджы цӕхӕрадоны ӕрцард! Ныр сӕ бон у сывӕллӕттӕ уадзын ӕмӕ иумӕ амондджынӕй цӕрын.

Иегъовӕйы фӕндыд, Адам ӕмӕ Евӕ ӕнустӕм куы цардаиккой ӕмӕ ӕгас зӕхх дӕр, Едемы цӕхӕрадон куыд рӕсугъд уыд, афтӕ куы скодтаиккой. Куыд амондджын уыдысты Адам ӕмӕ Евӕ! Сӕ цӕстытыл уади, уыцы куыст куыд кӕндзысты, уый. Ӕниу дӕу нӕ фӕндид ахӕм диссаджы куыст кӕнын – зӕххӕй рӕсугъд цӕхӕрадон саразын? Фӕлӕ Адам ӕмӕ Евӕйы амондджын цард бирӕ нӕ ахаста. Ӕркӕсӕм, цӕуылнӕ.