Фӕндаг ӕрцӕттӕгӕнӕджы райгуырд

ТАГЪД Елисаветӕйӕн хъуамӕ сывӕллон райгуыра. Ӕртӕ мӕйы бӕрц Мариа уыдис йӕ цуры. Фӕлӕ ныр Мариа хӕрзбон загъта Елисаветӕйӕн ӕмӕ дард фӕндагыл фӕстӕмӕ Назаретмӕ аздӕхт. Иу ӕхсӕз мӕйы фӕстӕ уымӕн дӕр уыдзӕн сывӕллон.

Мариайы ацыды фӕстӕ Елисавӕтӕйӕн райгуырд сывӕллон. Ӕвгъӕддон сылгоймаг ӕнӕфыдбылызӕй кӕй аирвӕзт ӕмӕ сывӕллон ӕнӕниз кӕй у, уый стыр цины хабар у. Елисаветӕ йӕ сабийы сыхӕгтӕ ӕмӕ хӕстӕджытӕн ӕвдисы, ӕмӕ иуылдӕр йемӕ цин кӕнынц.

Хуыцауы Закъонмӕ гӕсгӕ-иу, сывӕллоны райгуырдӕй аст боны куы рацыд, уӕд-иу Израилы лӕппуйӕн кодтой сунӕт. Уый тыххӕй сӕм ӕрӕмбырд сты сӕ хӕлӕрттӕ ӕмӕ сӕ хӕстӕджытӕ. Уыдон зӕгъынц, зӕгъгӕ, лӕппуйыл йӕ фыды ном, Захари хъӕуы сӕвӕрын. Фӕлӕ Елисаветӕ разы нӕу ӕмӕ дзуры: «Нӕ, фӕлӕ йӕ ном уӕд Иоанн». Куыд зоныс, афтӕмӕй уыцы ном лӕппуйыл хъуамӕ сӕвӕрдтаиккой зӕд Гавриилы ныхасмӕ гӕсгӕ.

Фӕлӕ сӕ хӕлӕрттӕ уӕддӕр сӕ ныхмӕ цӕуынц: «Дӕ хӕстӕджытӕй ничи ис, ахӕм ном кӕуыл ис». Уӕд къухтӕй амонгӕйӕ фӕрсынц фыды, кӕддӕра уый та цавӕр ном фӕнды сӕвӕрын йӕ фыртыл. Захари фӕйнӕг ракуырдта ӕмӕ алкӕмӕндӕр диссагӕн фыссы: «Иоанн йӕ ном».

Уый фӕстӕ Захари ногӕй сдзырдта. Ӕвӕццӕгӕн ма хъуыды кӕныс, Захари зӕды ныхӕстыл кӕй нӕ баууӕндыд, Елисаветӕйӕн лӕппу кӕй райгуырдзӕн, ӕмӕ уымӕ гӕсгӕ йӕ бон дзурын кӕй нал уыд. Ӕмӕ ныр ӕппӕт адӕм Захарийы дзургӕйӕ уынынц ӕмӕ дисгӕнгӕйӕ дзурынц: «Цы уыдзӕн ацы сывӕллон?»

Захари та, сыгъдӕг удӕй сӕххӕст уӕвгӕйӕ, ӕвдисы йӕ цин ахӕм ныхӕстӕй: «Арфӕгонд у Израилы Хицау Хуыцау, кӕй бабӕрӕг кодта йӕ адӕмы, ӕмӕ скодта ирвӕзындзинад уымӕн. Ӕмӕ сырӕзын кодта ирвӕзындзинады сыкъа махӕн, Давиды мыггаджы, Йӕ Лӕппуйы». Уыцы «ирвӕзындзинады сыкъа», кӕй зӕгъын ӕй хъӕуы, чи нӕма райгуырд, уыцы Хицау Йесо у. Захари куыд зӕгъы, афтӕмӕй нын Хуыцау уый уылты ратдзӕн «ӕдасӕй, не знӕгты къухтӕй аирвӕзыны фӕстӕ, кусын Уымӕн сыгъдӕгӕй ӕмӕ растӕй Йӕ разы, нӕ царды ӕппӕт бонты».

Захари йӕ фырт Иоанны тыххӕй пехуымпариуӕг кӕны: «Ӕмӕ ды, сывӕллон, хуыйндзынӕ Ӕппӕтбӕрзонды пехуымпар, уымӕн ӕмӕ разӕй цӕудзынӕ Хицауы цӕсгомы раз — ӕрцӕттӕ кӕнынмӕ Уымӕн фӕндӕгтӕ, бамбарын кӕныны тыххӕй Йӕ адӕмӕн, ирвӕзындзинад кӕй ис сӕ тӕригъӕдтӕ ныббарыны, нӕ Хуыцауы хорз арф хӕларзӕрдӕмӕ гӕсгӕ, кӕцыйӕ бабӕрӕг кодта мах бӕрзондӕй Хурыскӕсӕн, талынджы ӕмӕ мӕлӕтон аууоны бадджыты срухс кӕнынмӕ, нӕ къӕхтӕ фарны фӕндагмӕ саразынмӕ».

Уӕдмӕ ӕнӕмой Мариа ӕрхӕццӕ сӕ хӕдзармӕ, Назаретмӕ. Сывӕрджын у, уый куы базоной, уӕд цы уыдзӕн? Лукайы 1:56—80; Левит 12:2, 3.

▪ Цас хистӕр у Иоанн Йесойӕ?

▪ Иоанныл аст боны куы сӕххӕст, уӕд цы ’рцыд?

▪ Цы хуызы «бабӕрӕг кодта» Хуыцау йӕ адӕмы?

▪ Рагзагъдмӕ гӕсгӕ Иоанн цавӕр куыст хъуамӕ кӕна?