Йесо йӕ райгуырӕн сахары ӕмбырдгӕнӕны

КӔЙ зӕгъын ӕй хъӕуы, Йесо йӕ хӕдзармӕ, Назаретмӕ, куы ӕрыздӕхт, уӕд адӕм ӕмызмӕлд систы. Иу азы размӕ Иоаннӕй аргъуыд райсынмӕ сахарӕй цалынмӕ нӕ ацыд, уӕдмӕ уыд хуымӕтӕг пълотник. Ныр та йӕ алыран адӕм зонынц диссӕгтӕ аразӕгӕй. Уӕдӕ бынӕттон цӕрджыты тынг фӕнды, Йесо ам дӕр куы саразид ахӕм диссӕгтӕ.

Йесо йе ’гъдаумӕ гӕсгӕ бынӕттон ӕмбырдгӕнӕнмӕ куы бацыд, уӕд, цы сараздзӕн, уымӕ адӕм ӕнӕрхъӕцӕй ӕнхъӕлмӕ кӕсынц. Службӕйы рӕстӕджы уый сыстад хъӕрӕй кӕсынмӕ, ӕмӕ йӕм Исайы чиныг раттой. Уым Йесо ссардта, Иегъовӕйы удӕй сӕрст адӕймагыл кӕм цӕуы дзырд, уыцы бынат. Нӕ Библиты уый ис Исайы чиныджы 61-ӕм сӕры.

Уыцы адӕймаг уацайрӕгты кӕй ссӕрибар кӕндзӕн, куырмытӕн цӕстырухс кӕй ратдзӕн ӕмӕ Иегъовӕйы хӕрзӕхсызгон сӕрды тыххӕй кӕй хъусын кӕндзӕн, уый тыххӕй бакӕсгӕйӕ, Йесо чиныг фӕстӕмӕ кусӕгмӕ ратта ӕмӕ сбадт. Адӕм ӕм ӕдзынӕгӕй кӕсынц. Уый фӕстӕ Йесо, ӕвӕццӕгӕн, лӕмбынӕгдӕр бамбарын кодта, цы бакаст, уый нысаниуӕг ӕмӕ дзуры: «Ныр сӕххӕст ацы фыст, кӕй фехъуыстат сымах».

Адӕм дис кӕнынц йӕ «арфӕдзинады дзырдтыл» ӕмӕ кӕрӕдзийӕн дзурынц: «Уый Иосифы фырт нӕу?» Йесо зоны, диссӕгтӕ фенын сӕ кӕй фӕнды, ӕмӕ дарддӕр дзуры: «Ӕнӕмӕнг, сымах зӕгъдзыстут Мӕнӕн уайдзӕф: дохтыр! сдзӕбӕх кӕн Дӕхӕдӕг Дӕхи; скӕн ам дӕр, Дӕ фыдыбӕстӕйы мах цы фехъуыстам, Капернаумы цы уыд, уый». Йӕ раздӕры сыхӕгтӕ, ӕвӕццӕгӕн, хъуыды кӕнынц, Йесо дзӕбӕх кӕнын йӕ райгуырӕн сахарӕй кӕй хъуамӕ райдыдтаид, ӕмӕ фыццаджыдӕр уыцы адӕмӕн кӕй хъуамӕ баххуыс кодтаид. Уымӕ гӕсгӕ сӕм афтӕ кӕсы, цыма сӕ Йесо ницӕмӕ дары.

Адӕм сӕхимидӕг цы хъуыды кӕнынц, уый зонгӕйӕ сын Йесо дзуры цалдӕр рагон хабары. Илиайы рӕстӕджы Израилы бирӕ идӕдз устытӕ уыд, фӕлӕ Хуыцау Илиайы уыдонӕй сӕ иумӕ дӕр нӕ арвыста. Уый ацыд ӕндӕрбӕстаг идӕдз сылгоймагмӕ, Сидонмӕ, ӕмӕ диссаг саразгӕйӕ, уый мӕлӕтӕй фервӕзын кодта. Афтӕ Елисейы рӕстӕджы дӕр бирӕ хъотырджынтӕ уыд, фӕлӕ дзы Елисей сирийаг Нееманы йеддӕмӕ никӕй ссыгъдӕг кодта.

Ацы ӕцӕг хабӕрттӕ радзургӕйӕ, Йесо, ӕмбырдгӕнӕнмӕ чи ӕрбацыд, уыдон хиуарзон кӕй сты ӕмӕ сӕм уырнындзинад фаг кӕй нӕй, уый хурмӕ кӕй рахаста, уымӕ гӕсгӕ йӕм смӕсты сты ӕмӕ йӕ сахарӕй сурынц. Сӕ сахар цы хохыл ӕвӕрд ис, уый цъуппӕй йӕ раппарынмӕ хъавынц. Фӕлӕ Йесо куыддӕртӕй йӕхи атыдта ӕмӕ сӕрӕгасӕй баззад. Лукайы 4:16—30; 3 Паддзахӕдты 17:8—16; 4 Паддзахӕдты 5:8—14.

▪ Назареты адӕм ӕмызмӕлд цӕмӕн систы?

▪ Йесойы ныхӕстӕ адӕмыл куыд бандӕвтой, фӕлӕ йӕм уый фӕстӕ цӕмӕн смӕсты сты?

▪ Адӕм Йесойӕн цы бакӕнынмӕ хъавынц?