Иаиры хӕдзарӕй фӕстӕмӕ Назаретмӕ

ЙЕСОЙӔН уыд тынг ӕнӕвдӕлон бон — фыццаг уал денджызон балц Дӕссахарӕй Капернауммӕ, уый фӕстӕ сдзӕбӕх кодта тугнизӕй рынчын сылгоймаджы ӕмӕ ӕппынфӕстаг райгас кодта Иаиры чызджы. Фӕлӕ бон нӕма фӕци. Йесо Иаиры хӕдзарӕй куы рацыд, уӕд йӕ фӕдыл бафтыдысты дыууӕ куырм адӕймаджы ӕмӕ хъӕр кӕнынц: «Фӕтӕригъӕд кӕн махӕн, Йесо, Давиды Фырт!»

Уыцы нӕлгоймӕгтӕ Йесойы «Давиды Фырт» кӕй хонынц, уымӕй ӕвдисынц, Йесо Давиды паддзахбадӕны бындар, ӕмӕ уымӕ гӕсгӕ зӕрдӕвӕрд Месссиа дӕр кӕй у, ууыл кӕй ӕууӕндынц. Фӕлӕ Йесо йӕхи афтӕ дары, цыма сӕ нӕ хъусы. Ӕвӕццӕгӕн ӕй фӕнды, зӕрдӕбынӕй архайынц ӕви нӕ, уый сбӕрӕг кӕнын. Фӕлӕ йын нӕлгоймӕгтӕ уӕддӕр ӕнцой нӕ дӕттынц. Дарддӕр цӕуынц Йесойы фӕдыл ӕмӕ хӕдзармӕ куы бацыд, уӕд уыдон дӕр йӕ фӕстӕ бацыдысты.

«Уырны уӕ, Мӕ бон афтӕ бакӕнын кӕй у?» — бафарста сӕ Йесо.

«О, Хицау!» — фидарӕй загътой уыдон.

Йесо сын сӕ цӕстытыл йӕ къух авӕрдта ӕмӕ сын загъта: «Уӕ уырнындзинадмӕ гӕсгӕ уӕд сымахӕн». Ӕмӕ, мӕнӕ, уынын райдыдтой! Уый фӕстӕ сӕ Йесо карзӕй фӕдзӕхсы: «Кӕсут, цӕмӕй мачи базона». Фӕлӕ сӕ уый фырцинӕй ферох ӕмӕ ӕппӕт адӕмӕн дзурынц Йесойы тыххӕй.

Куыддӕр уыцы нӕлгоймӕгтӕ ацыдысты, афтӕ Йесомӕ ӕрбакодтой, хӕйрӕг кӕй багомыг кодта, ахӕм адӕймаджы. Йесо хӕйрӕджы асырдта, ӕмӕ уыцы тӕккӕ адӕймаг дзурын райдыдта. Ӕмӕ адӕм, дисгӕнгӕйӕ, дзурынц: «Никуы уыд ахӕм хъуыддаг Израилы».

Уым сты фарисейтӕ дӕр. Йесо диссаг кӕй сарӕзта, ууыл ма сразы уой, уый сӕ бон нӕу, фӕлӕ та уӕддӕр сӕ фыдвӕндӕй Йесойы азымджын кӕнынц, уыцы диссаджы хъуыддӕгтӕ кӕй хъаруйӕ аразы, уый тыххӕй ӕмӕ дзурынц: «Уый хӕйрӕджы суры хӕйрӕджыты ӕлдары хъаруйӕ».

Ацы цауты фӕстӕ Йесо араст йӕ райгуырӕн бӕстӕ Назаретмӕ, ацы хатт йӕ ахуыргӕнинӕгтимӕ. Иухатт ам, ӕмбырдгӕнӕны, адӕмы куы ахуыр кодта, уымӕй иу азы бӕрц рацыд. Райдианы адӕм дис кодтой йӕ диссаджы ахуырӕдтыл, фӕлӕ йын уый фӕстӕ йӕ ныхӕстӕм смӕсты сты ӕмӕ йӕ марынвӕнд скодтой. Ныр йӕ фӕлмӕнзӕрдӕйӕ Йесо ногӕй сфӕнд кодта йӕ раздӕры сыхӕгтӕн баххуыс кӕнын.

Кӕд ӕндӕр рӕтты адӕм Йесомӕ цыдысты, уӕддӕр куыд зыны, афтӕмӕй ам афтӕ нӕу. Уымӕ гӕсгӕ сабаты Йесо ӕмбырдгӕнӕнмӕ бацыд ӕмӕ уым ахуыр кӕны адӕмы. Чи йӕм хъусы, уыдонӕн сӕ фылдӕр дис кӕнынц. «Кӕцӕй ис Уымӕ ахӕм уӕлзонд [«бирӕзонындзинад», НФ] ӕмӕ тыхтӕ? — фӕрсынц кӕрӕдзи,— Пълотничы фырт нӕу Уый? Уый Мад нӕ хуыйны Мариа, Йӕ ӕфсымӕртӕ та Иаков ӕмӕ Иосий, ӕмӕ Симон ӕмӕ Иудӕ? ӕмӕ Йӕ хотӕ сеппӕт не ’хсӕн не сты? кӕцӕй Йӕм ис адон ӕппӕт?»

„Йесо дӕр мах хуызӕн адӕймаг куы у,— хъуыды кӕнынц сӕхимидӕг. — Куыд хъомыл кодта, уый дӕр куы уыдтам, ӕмӕ йын йӕ бинонты дӕр куы зонӕм. Мессиа уый цӕмӕн хъуамӕ уа?“ Кӕд Йесо стыр зондджындзинад ӕмӕ бирӕ диссӕгтӕ равдыста, уӕддӕр ӕй нӕ исынц. Суанг ма йӕ хорз чи зоны, уыцы хӕстӕджытӕ дӕр ыл не ’ууӕндынц, ӕмӕ уымӕ гӕсгӕ Йесо ӕрцыд ахӕм хатдзӕгмӕ: «Нӕ вӕййы пехуымпар ӕгад, кӕд ӕрмӕст йӕ фыдыбӕстӕйы ӕмӕ йӕ хӕстӕджытӕм, ӕмӕ йӕ хӕдзары».

Йесомӕ тынг диссаг кӕсы се ’нӕуырнындзинад. Уымӕ гӕсгӕ цалдӕр рынчыныл йӕ къухтӕ кӕй ӕрӕвӕрдта ӕмӕ сӕ кӕй сдзӕбӕх кодта, уымӕй уӕлдай ам ницы диссаг сарӕзта. Матфейы 9:27—34; 13:54—58; Маркы 6:1—6; Исай 9:7.

▪ Куырм нӕлгоймӕгтӕ Йесойы «Давиды Фырт» кӕй хуыдтой, уый цӕуыл дзурӕг у?

▪ Йесо диссӕгтӕ кӕй аразы, уый фарисейтӕ куыд ӕмбарын кӕнынц?

▪ Йесо Назаретмӕ адӕмӕн баххуыс кӕнынмӕ ногӕй кӕй ӕрцыд, уымӕй куыд бӕрӕг кӕны йӕ фӕлмӕнзӕрдӕдзинад?

▪ Куыд сӕмбӕлдысты Йесойыл Назареты ӕмӕ цӕмӕн?