Йесо сафы идӕдз усы маст

ЙЕСО сӕдӕйы хицауы ӕххуырсты куы сдзӕбӕх кодта, уӕд уый фӕстӕ ацыд сахар Наинмӕ. Уый ис Капернаумы хуссар-ныгуылӕн фарс, 30 километры дӕрддзӕгӕн. Йӕ фӕдыл цӕуынц йӕ ахуыргӕнинӕгтӕ ӕмӕ бирӕ ӕндӕр адӕм. Ӕвӕццӕгӕн изӕрырдӕм бахӕццӕ сты сахары кулдуармӕ. Ӕмӕ, мӕнӕ, сӕмбӕлдысты мӕрддзыгой адӕмыл. Уӕлмӕрдмӕ фӕхӕссынц ӕрыгон лӕппуйы.

Лӕппуйы мад ис бынтон тӕригъӕддаг уавӕры, дуне йыл ӕмбойны батар, уымӕн ӕмӕ идӕдз ус у ӕмӕ уый та йӕ иунӕг хъӕбул у. Йӕ лӕг куы амард, уӕд йӕхи сабыр кодта, фырт ма йын кӕй баззад, уымӕй. Йӕ ныфсытӕ, йӕ зӕрдӕйы бӕллицтӕ ӕмӕ йӕ хъуыдытӕ иуылдӕр баст уыдысты йӕ лӕппуйы фидӕнимӕ. Ныр та йын йӕ уд кӕуыл банцой кӕна, йӕ зӕрдӕ кӕмӕй бафидар кӕна, ахӕм ничиуал ис. Адӕмимӕ уӕлмӕрдмӕ цӕугӕйӕ, йӕ зӕрдӕ фӕтоны дудгӕ мастӕй.

Сылгоймаджы судзгӕ рис фенгӕйӕ, Йесойы зӕрдӕ суынгӕг. Ӕмӕ йын рӕвдаугӕ хъӕлӕсӕй, фӕлӕ ныфсджынӕй дзуры: «Ма ку». Йесойы ахаст ӕмӕ архайд уынгӕйӕ йӕм адӕм иуылдӕр се ’ргом раздӕхтой. Уый хӕстӕг куы бацыд ӕмӕ мард цы сынтыл уыд, уымӕ куы бавнӕлдта, уӕд ӕй чи хаста, уыдон ӕрлӕууыдысты. Иуылдӕр ӕнхъӕлмӕ кӕсынц цыдӕр диссагмӕ.

Йесойы фӕдылдзӕуджытӕ федтой, уый диссаджы хуызы бирӕ кӕйдӕрты сӕ низтӕй кӕй сдзӕбӕх кодта. Фӕлӕ Йесо мӕрдты ӕгас кӕны, уый, ӕвӕццӕгӕн, никуы ма федтой. Ӕцӕгдӕр у йӕ бон уый саразын? Йесо мард лӕппуйӕн дзуры: «Лӕппу! дӕуӕн зӕгъын, сыст». Ӕмӕ лӕппу рабадт! Дзурын райдыдта, ӕмӕ йӕ Йесо йӕ мадмӕ ратта.

Ӕрыгон лӕппу ӕцӕгдӕр кӕй райгас, уый фенгӕйӕ, адӕмӕй иутӕ дзурынц: «Стыр пехуымпар сыстад не ’хсӕн». Иннӕтӕ та зӕгъынц: «Хуыцау бабӕрӕг кодта Йӕ адӕмы». Уыцы хабар уайтагъд ӕгас Иудейыл ӕмӕ йӕ алыварс хъӕутыл айхъуыст.

Аргъауӕг Иоанн та нырма дӕр ис ахӕстоны, ӕмӕ йӕ фӕнды фылдӕр базонын Йесойы хъуыддӕгты тыххӕй. Йӕ ахуыргӕнинӕгтӕ йын дзурынц уыцы диссӕгты тыххӕй. Куыд ӕндавы уый Иоанныл? Лукайы 7:11—18.

▪ Йесо Наинмӕ куы фӕцӕйхӕццӕ кодта, уӕд кӕуыл сӕмбӕлд?

▪ Йесо цы федта, уый йыл куыд бандӕвта ӕмӕ цы сарӕзта?

▪ Йесо цы диссаг сарӕзта, уый адӕмыл куыд бандӕвта?