Цы чъизи кӕны адӕймаджы?

АДӔМ тынгӕй-тынгдӕр цӕуынц Йесойы ныхмӕ. Йӕ ахуыргӕнинӕгтӕй йӕ бирӕтӕ ныууагътой, ӕмӕ йӕ н. э. 31 азы Иерусалимы Куадзӕны марынмӕ куыд хъавыдысты, афтӕ та йӕ ныр дӕр Иудейы цӕрӕг дзуттӕгтӕ хъавынц марынмӕ.

Ӕрхӕццӕ н. э. 32 азы Куадзӕн дӕр. Хуыцауы фӕндон сӕххӕст кӕныны тыххӕй Йесо Куадзӕн бӕрӕг кӕнынмӕ ӕрцыд Иерусалиммӕ. Тынг арӕхстгай архайы, уымӕн ӕмӕ йӕ цардӕн тӕссаг у. Бӕрӕгбон куы фӕцис, уӕд фӕстӕмӕ Галилеймӕ ацыд.

Чиныджы дӕснытӕ ӕмӕ фарисейтӕ Йесомӕ Иерусалимӕй куы ӕрцыдысты, уӕд уый, ӕвӕццӕгӕн, уыд Капернаумы. Уыдон агурынц фадат, цӕмӕй йӕ дины закъӕттӕ халыны хъуыддаджы фӕзылын кӕной. «Дӕ ахуыргӕнинӕгтӕ цӕмӕн халынц фыдӕлты фӕдзӕхстытӕ? — фӕрсынц ӕй уыдон,— уымӕн ӕмӕ не ’хсынц сӕ къухтӕ, дзул куы хӕрынц, уӕд». Кӕд Хуыцау уый никуы домдта, уӕддӕр фарисейтӕ стыр фыдракӕндыл нымайынц уыцы фыдӕлты ӕгъдау, ома къухтӕ рӕмбыныкъӕдзы онг ӕхсыны ӕгъдау фехалын.

Сӕ хинӕйдзаг фарстӕн дзуапп раттыны бӕсты сын Йесо ӕвдисы, сӕхӕдӕг кӕй халынц Хуыцауы Закъон. «Сымах та цӕмӕн хизут Хуыцауы фӕдзӕхсты сӕрты, уӕхи фӕдзӕхстыты тыххӕй?— фӕрсы сӕ Йесо.— Уымӕн ӕмӕ Хуыцау бафӕдзӕхста: „цытджын дар дӕ фыды ӕмӕ дӕ мады“; ӕмӕ: „йӕ фыдӕн кӕнӕ йӕ мадӕн ӕвзӕр дзурӕг мӕлӕтӕй амӕлӕд“. Сымах та дзурут: исчи куы зӕгъа фыдӕн кӕнӕ мадӕн: „Мӕнӕй дыл цы ӕфтиаг ӕмбӕлы, уый фӕуӕд Хуыцауӕн лӕвар“, уӕд уымӕн йӕ бон у кадджын нӕ дарын йӕ фыды кӕнӕ йӕ мады».

Ӕцӕгдӕр, фарисейтӕ амонынц, зӕгъгӕ, Хуыцауӕн лӕваргонд ӕхца, зынаргъ дзаума кӕнӕ ӕндӕр исты кувӕндоны сты ӕмӕ дзы не ’мбӕлы ӕндӕр исты хъуыддагӕн пайда кӕнын. Ӕцӕгӕй та лӕвар баззайы, чи йӕ ратта, уымӕ. Афтӕмӕй, йӕ ӕхца кӕнӕ йӕ исбон «корван» — Хуыцауӕн кӕнӕ кувӕндонӕн лӕвар — сты, афтӕ дзургӕйӕ, фыртӕн йӕ бон у, йӕ зӕронд ныййарджытӕ тӕригъӕддаг уавӕры куы уой, уӕддӕр сӕ рохуаты ныууадзын.

Фарисейтӕ Хуыцауы Закъон кӕй зонынц, фӕлӕ йӕ уӕддӕр кӕй халынц, уымӕ гӕсгӕ сын Йесо мӕстыйӕ дзуры: «Сымах аиуварс кодтат Хуыцауы фӕдзӕхст, уӕ фыдӕлты фӕдзӕхстыты тыххӕй. Цӕстмӕхъустӕ! хорз пехуымпариуӕг кодта сымах тыххӕй Исай, дзургӕйӕ: „ӕрбахӕстӕг вӕййынц Мӕнмӕ ацы адӕм сӕ дзыхӕй ӕмӕ кадджын кӕнынц Мӕн ӕвзагӕй; сӕ зӕрдӕ та дард лӕууы Мӕнӕй; фӕлӕ дзӕгъӕлы нымайынц Мӕн, ахуыр кӕнгӕйӕ адӕймаджы ахуырад ӕмӕ фӕдзӕхстытыл“».

Адӕм, ӕвӕццӕгӕн, фӕстӕмӕ алӕууыдысты, цӕмӕй фарисейты ма хъыгдарой Йесомӕ фарстытӕ дӕттынӕй. Фарисейтӕн Йесойы карз уайдзӕфӕн дзуапп раттын сӕ бон кӕй нӕу, уымӕ гӕсгӕ Йесо адӕммӕ фӕдзырдта, цӕмӕй йӕм хӕстӕгдӕр бацӕуой, ӕмӕ сын уый фӕстӕ зӕгъы: «Хъусут ӕмӕ ӕмбарут: дзыхмӕ цы бацӕуы, уый нӕ ӕвзӕр кӕны [«нӕ чъизи кӕны», НД] адӕймаджы, фӕлӕ дзыхӕй цы ссӕуы, уый ӕвзӕр кӕны [«чъизи кӕны», НД] адӕймаджы».

Фӕстӕдӕр, иу хӕдзармӕ бацӕугӕйӕ, Йесойы йӕ ахуыргӕнинӕгтӕ фӕрсынц: «Зоныс, фарисейтӕ, фехъусгӕйӕ ацы ныхас, кӕй сцыбӕл сты [«хорзау кӕй нал фесты», НД]?»

«Алкӕцы зайӕгой, кӕцы Мӕ Уӕларвон Фыд нӕ ныссагъта, йӕ бындзарӕй схаудзӕнис,— дзуапп дӕтты Йесо.— Ныууадзут сӕ, уыдон — куырмыты куырм фӕтӕгтӕ; ӕмӕ куырм куырмы куы кӕна, уӕд сӕ дыууӕ дӕр дзыхъхъы ныххаудзысты».

Ахуыргӕнинӕгты номӕй Петр Йесомӕ куы бахатыд, цӕмӕй сын, адӕймаджы цы чъизи кӕны, уый лӕмбынӕгдӕр бамбарын кӕна, уӕд уый Йесомӕ диссаг фӕкаст. «Ӕцӕг сымах дӕр нырма нӕма ӕмбарут? — дзуры Йесо. — Мыййаг нӕма ӕмбарут нӕ, дзыхмӕ цы бацӕуы, уый гуыбынмӕ [кӕй] ныццӕуы ӕмӕ ӕддӕмӕ ӕппӕрст кӕй цӕуы? Дзыхӕй цы ссӕуы — уый та зӕрдӕйӕ ссӕуы; гъе уый ӕвзӕр кӕны [«чъизи кӕны», НД] адӕймаджы; уымӕн ӕмӕ зӕрдӕйӕ ссӕуынц фыдвӕндтӕ, марындзинӕдтӕ, хӕтындзинӕдтӕ, хъахбайдзинӕдтӕ, давындзинӕдтӕ, мӕнгӕвдисӕндзинӕдтӕ, фыдкойтӕ: адон ӕвзӕр кӕнынц [«чъизи кӕнынц», НД] адӕймаджы; фӕлӕ ӕнӕхсад къухтӕй хӕрын — нӕ ӕвзӕр кӕны [«нӕ чъизи кӕны», НД] адӕймаджы».

Йесо ам сыгъдӕгдзинады ныхмӕ нӕ дзуры. Уый нӕ фӕнды зӕгъын, хӕринаг аразыны размӕ кӕнӕ хӕрды размӕ къухтӕ ӕхсын кӕй нӕ хъӕуы. Нӕ, Йесо хурмӕ ракалдта, адӕймаджы ӕрымысгӕ ӕгъдӕутты тыххӕй Хуыцауы рӕстаг домӕнты сӕрты чи хизы, уыцы дины разамонджыты цӕстмӕхъусдзинад. О, ӕвзӕр хъуыддӕгтӕ чъизи кӕнынц адӕймаджы ӕмӕ Йесо ӕвдисы, уыдон зӕрдӕйӕ кӕй цӕуынц. Иоанны 7:1; Дыккаг закъон 16:16; Матфейы 15:1—20; Маркы 7:1—23; Рацыд 20:12; 21:17; Исай 29:13.

▪ Цавӕр ныхмӕдзыдыл сӕмбӕлд Йесо?

▪ Фарисейтӕ цы хъуыддаджы зылын кӕнынц Йесойы ӕмӕ сын Йесо куыд равдыста, сӕхӕдӕг Хуыцауы Закъон кӕй зонынц, фӕлӕ йӕ уӕддӕр кӕй халынц?

▪ Йесойы ныхӕстӕм гӕсгӕ адӕймаджы цы чъизи кӕны?