Ноджыдӕр ма иу уынаффӕ

ЙЕСО йӕ апостолтимӕ Капернаумы куы уыд, уӕд ӕрмӕст ууыл нӕ ныхас кодтой, апостолтӕй стырдӕр чи у, фӕлӕ ма ӕндӕр цӕуылдӕр. Дзырд цыдис, Капернауммӕ ӕрыздӕхгӕйӕ, Йесо йӕхӕдӕг уым куы нӕ уыд, уӕд цы цау ӕрцыд, ууыл. Апостол Иоанн хъусын кӕны: «Мах федтам адӕймаджы, кӕцы Дӕу номӕй суры хӕйрӕджыты, мах фӕстӕ та нӕ цӕуы; ӕмӕ йын бар нӕ раттам, уымӕн ӕмӕ нӕ цӕуы мах фӕстӕ».

Ӕвӕццӕгӕн Иоанн хъуыды кӕны, зӕгъгӕ, ӕрмӕстдӕр апостолты къордӕн ис дзӕбӕх кӕныны бар. Афтӕ йӕм кӕсы, уыцы адӕймаг семӕ кӕй нӕй, уымӕ гӕсгӕ йын ахӕм диссӕгтӕ аразыны бар нӕй.

Фӕлӕ сын Йесо дзуры: «Ма йӕ уромут; уымӕн ӕмӕ Мӕ номӕй диссаг скӕнӕгӕн рӕхджы Мӕ фыдкой ракӕнӕн нӕй. Уымӕн ӕмӕ уӕ ныхмӕ чи нӕ у, уый уӕ фарс у. Ӕмӕ уын чи баназын кӕна доны къус Мӕ номы тыххӕй, уымӕн ӕмӕ сымах Чырыстийы стут, ӕцӕг зӕгъын сымахӕн, нӕ фесафдзӕн йӕ лӕвар».

Цӕмӕй уыцы адӕймаг Йесойы ахуыргӕнинагыл нымад цыдаид, уый тыххӕй йӕ ӕнӕмӕнг йӕ фӕдыл цӕуын нӕ хъуыд. Чырыстон ӕмбырд кӕй нӕма сырӕзт, уымӕ гӕсгӕ, сӕ къорды уӕнг кӕй нӕ уыд, уый нӕ нысан кодта, ӕндӕр къордӕй кӕй уыд. Уыцы адӕймаг ӕцӕгӕй кӕй ӕууӕндыд Йесойыл, уымӕ гӕсгӕ уыд йӕ бон хӕйрӕджыты сурын. Йесойы ныхӕстӕм гӕсгӕ, цы сарӕзта, уый уыд хорзӕхы аккаг. Ӕмӕ Йесо ӕвдисы, йӕ лӕвар кӕй нӕ фесафдзӕн.

Фӕлӕ апостолты ныхӕстӕ ӕмӕ хъуыддӕгтӕ уыцы адӕймаджы куы бакъуылымпы кодтаиккой, уӕд та цы ’рцыдаид? Уый стыр рӕдыд уыдаид. Йесо дзуры: «Фӕлӕ Мӕныл чи ӕууӕнды, уыцы гыццылтӕй иуы дӕр чи фӕрӕдийын кӕна, уымӕн хуыздӕр уыдаид куыройы фыд йӕ хъуырыл куы бабастаиккой ӕмӕ йӕ денджызы куы баппӕрстаиккой».

Уый фӕстӕ Йесо дзуры, йӕ фӕдылдзӕуджытӕ кӕй хъуамӕ аиуварс кӕной, къух, къах кӕнӕ цӕстау зынаргъ, фӕлӕ фӕкӕлынӕн тӕссаг цы хъуыддӕгтӕ сты, уыдон. Ӕнусон сӕфты символ «гееннӕмӕ» (Иерусалиммӕ хӕстӕг бырондон, цыран иудадзыг сыгъд арт) ӕппӕрст ӕрцӕуынӕй хуыздӕр у, адӕймагӕн зынаргъ цы у, уымӕй фӕцух уӕвын ӕмӕ Хуыцауы Паддзахадмӕ бацӕуын.

Дарддӕр сӕ Йесо фӕдзӕхсы: «Кӕсут, ӕлгъ ма кӕнут ацы гыццылтӕй иуыл дӕр; уымӕн ӕмӕ зӕгъын сымахӕн, сӕ Зӕдтӕ ӕрвтыл ӕдзухдӕр кӕй уынынц Мӕ Уӕларвон Фыды цӕсгом». Уый фӕстӕ, уыцы гыццылтӕй алкӕцыдӕр куыд зынаргъ у, уый бамбарын кӕнынӕн радзырдта фӕсномыг ныхас, сӕдӕ фысы кӕмӕн уыд ӕмӕ дзы иу кӕмӕн фӕдзӕгъӕл, ахӕм адӕймаджы тыххӕй. Йесо дзуры, уыцы адӕймаг 99 фысы кӕй ныууадздзӕн ӕмӕ йӕ сӕфт фысы агурӕг кӕй ацӕудзӕн, ӕмӕ йӕ куы ссара, уӕд ыл, чи нӕ фӕдзӕгъӕл, уыцы 99 фысӕй фылдӕр кӕй фӕцин кӕндзӕн. «Афтӕ нӕй фӕндон уӕ Уӕларвон Фыдмӕ,— дзуры Йесо,— цӕмӕй ацы гыццылтӕй иу дӕр фесӕфа».

Уый фӕстӕ, ӕвӕццӕгӕн, апостолты быцӕу йӕ зӕрдыл даргӕйӕ, Йесо дзуры: «Уӕд уӕ мидӕг цӕхх, ӕмӕ фарн уӕд уе ’хсӕн». Хӕринагыл цӕхх куы ӕркӕнай, уӕд ын ад ратты. Уӕдӕ адӕймаджы ныхас дӕр адджындӕр вӕййы символикон цӕххы фӕрцы. Ахӕм цӕхх ахъаз у сабырдзинадӕн.

Фӕлӕ ӕнӕххӕстдзинады аххосӕй иуӕй-иу хатт сӕвзӕры серьезон быцӕутӕ. Йесо амоны, ахӕм уавӕрты куыд бакӕнын хъӕуы, уый дӕр. «Кӕд ӕмӕ тӕригъӕд ракӕна дӕ ныхмӕ де ’фсымӕр,— дзуры уый,— ацу ӕмӕ йын бауайдзӕф кӕн хибарӕй: кӕд дӕм байхъуса, уӕд ссардтай ды де ’фсымӕры». Кӕд ӕмӕ нӕ байхъуса, уӕд та Йесо уынаффӕ кӕны: «Демӕ ма ноджыдӕр акӕн иу кӕнӕ дыууӕйы, цӕмӕй дыууӕ, кӕнӕ ӕртӕ ӕвдисӕны дзыхӕй фидаргонд уа алкӕцы ныхас».

Йесо дзуры, кӕй ма ис ноджы иу фадат — хъуыддаг «аргъуаны» кӕнӕ ӕмбырды хистӕртӕм адӕттын ӕмӕ уыдон раст уынаффӕ рахӕсдзысты. Кӕд тӕригъӕдракӕнӕг уыцы уынаффӕмӕ гӕсгӕ нӕ архайа, уӕд Йесо куыд загъта, афтӕмӕй «уый дӕуӕн уӕд, куыд муртатт ӕмӕ мытӕр».

Ахӕм уынаффӕтӕ хӕсгӕйӕ, хистӕртӕ хъуамӕ фидар хӕцой, Хуыцауы Ныхас цы дзуры, ууыл. Кӕд ӕй аххосджыныл ӕмӕ ӕфхӕрды аккагыл банымайой, уӕд уыцы тӕрхон «уыдзӕн баст арвыл» дӕр. Ӕмӕ ‘зӕххыл исты куы райхалой’, ома искӕй куы сраст кӕной, уӕд уый «уыдзӕн хӕлд арвыл» дӕр. Ахӕм барадон фарстыты тыххӕй Йесо дзуры: «Дыууӕ кӕнӕ ӕртӕйӕ ӕмбырд кӕм уой Мӕ Номыл, уым Ӕз Дӕн се ’хсӕн». Матфейы 18:6—20; Маркы 9:38—50; Лукайы 9:49, 50.

▪ Йесойы рӕстӕджы цӕмӕй адӕймаг йӕ ахуыргӕнинаг уыдаид, уый тыххӕй ӕнӕмӕнг цӕуылнӕ хъуыд йӕ фӕдыл цӕуын?

▪ «Гыццылты» фӕрӕдийын кӕнын цас стыр тӕригъӕд у ӕмӕ уыцы «гыццылтӕй» алкӕцыдӕр куыд зынаргъ у, уый Йесо фӕсномыг ныхасӕй куыд равдыста?

▪ Цы сразӕнгард кодта Йесойы зӕгъын, цӕмӕй йӕ апостолтӕн сӕ мидӕг цӕхх уа?

▪ Цы нысан кӕнынц дзырдтӕ «бабӕттын» ӕмӕ «райхалын»?